1. ¿Bajcheʼ miʼ mejlel lac suben Jehová?

JEHOVÁ an jumpʼejl i familia muʼ bʌ i chʼujutesañob. Juntiquil jiñʌch Jesús, «jiñi ñaxam bʌ tiʼ pejtelel chuqui melbil», yicʼot yonlel ángelob (Col. 1:15; Sal. 103:20). Cheʼ bʌ Jesús tsajñi ti Pañimil, tsiʼ pʌsʌ chaʼan jiñi wiñicob xucʼuloʼ bʌ miʼ mejlel i qʼuelob Jehová bajcheʼ i Tat. Junsujtel, cheʼ bʌ woli (choncol) ti tʼan yicʼot jiñi xcʌntʼañob i chaʼan, tsiʼ taja ti tʼan Jehová bajcheʼ «c Tat i laʼ Tat jaʼel» (Juan 20:17). Cheʼ jaʼel, cheʼ mi la cʌcʼ lac bʌ ti Jehová i mi lac chaʼlen chʼʌmjaʼ, mi la cochel ti jumpʼejl familia baqui an hermanojob yicʼot hermanajob wen yujiloʼ bʌ cʼuxbiya (Mar. 10:29, 30).

2. ¿Chuqui mi caj laj qʼuel ti ili estudio?

² An hermanojob wocol bʌ miʼ yubiñob chaʼan miʼ qʼuelob Jehová bajcheʼ juntiquil Tatʌl yujil bʌ cʼuxbiya. Tajol an yañoʼ bʌ mach bʌ yujilobic bajcheʼ yom miʼ pʌsbeñob cʼuxbiya jiñi yambʌ hermanojob. Ti ili estudio, mi caj laj qʼuel bajcheʼ miʼ coltañonla Jesús chaʼan mi laj qʼuel Jehová bajcheʼ juntiquil Tatʌl muʼ bʌ i cʼuxbiñonla yicʼot muʼ bʌ i mejlel lac lʌcʼtesan lac bʌ tiʼ tojlel. Mi caj laj qʼuel jaʼel bajcheʼ miʼ mejlel lac lajin Jehová ti bajcheʼ yilalonla tiʼ tojlel la quermañujob.

3. ¿Chucoch miʼ ñumen lʌcʼtesañonla ti Jehová jiñi oración tsaʼ bʌ i pʌsʌ Jesús?

³ Jehová juntiquilʌch Tatʌl yujil bʌ cʼuxbiya, i Jesús yom chaʼan cheʼʌch mi laj qʼuel cheʼ bajcheʼ yilal miʼ qʼuel: Bajcheʼ juntiquil Tatʌl yujil bʌ cʼuxbiya baqui jach bʌ ora miʼ mejlel lac pejcan, mach cheʼic bajcheʼ juntiquil am bʌ i yeʼtel (troñel) mach bʌ yujilic cʼuxbiya. Cheʼʌch tsiʼ pʌsʌ Jesús cheʼ bʌ tsiʼ pʌsbe jiñi xcʌntʼañob bajcheʼ yom miʼ chaʼleñob oración, tsiʼ teche yicʼot ili tʼan tac: «C Tat lojon» (Mat. 6:9). Cheʼ cheʼic yom, Jesús tsaʼ mejli i subeñonla chaʼan mi lac pejcan Jehová bajcheʼ  «Mach bʌ Anic i Pʼisol i Pʼʌtʌlel», «tsaʼ bʌ i mele pejtel pañimil» o «Rey am bʌ tiʼ pejtelel ora», título tac wem bʌ yicʼot am bʌ ti Biblia (Gn. 49:25; Is. 40:28; 1 Tim. 1:17). Pero tsiʼ cʼʌñʌ jumpʼejl tʼan ñumen wem bʌ, bajcheʼ «Tat».

4. ¿Bajcheʼ la cujil chaʼan Jehová yom chaʼan mi lac lʌcʼtesan lac bʌ tiʼ tojlel?

⁴ ¿Wocol ba mi la cubin chaʼan mi laj qʼuel Jehová bajcheʼ juntiquil Tatʌl yujil bʌ cʼuxbiya? An cheʼʌch bʌ mi la cubin. Tajol tiʼ caj wocol bajcheʼ tsaʼ coliyonla. Pero miʼ ñuqʼuesan lac pusicʼal cheʼ la cujil chaʼan miʼ chʼʌmben i sujm bajcheʼ yubil mi la cubin i chaʼan lʌcʼʌl yom ajñel yicʼotonla. Jin chaʼan, jiñi i Tʼan miʼ subeñonla: «Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Sant. 4:8). Jehová miʼ cʼuxbiñonla i miʼ subeñonla chaʼan jiñʌch ñumen wem bʌ Tatʌl muʼ bʌ i mejlel lac taj.

5. Cheʼ bajcheʼ miʼ yʌl Lucas 10:22, ¿chucoch miʼ mejlel i coltañonla Jesús chaʼan mi lac ñumen lʌcʼtesan lac bʌ ti Jehová?

⁵ Jesús miʼ mejlel i coltañonla chaʼan mi lac lʌcʼtesan lac bʌ ti Jehová. Wen i cʌñʌ i miʼ lajin ti wen jiñi i melbal (chaʼlibal) tac. Jin chaʼan tsiʼ yʌlʌ: «Jiñi tsaʼix bʌ i qʼueleyon tsaʼix i qʼuele jiñi Tatʌl jaʼel» (Juan 14:9). Cheʼ bajcheʼ juntiquil la cuscuñ, Jesús miʼ pʌsbeñonla chaʼan mi laj qʼuel ti ñuc yicʼot chaʼan mi lac jacʼben i tʼan jiñi lac Tat, mi la cʌqʼuen i tijicñʌyel i chaʼan miʼ qʼuelonla ti utsʼat. Pero jiñi tsaʼ bʌ i mele cheʼ bʌ tsajñi ila ti Lum, miʼ ñumen pʌsbeñonla chaʼan Jehová uts yicʼot yujil cʼuxbiya (pejcan Lucas 10:22). Laʼ laj qʼuel chaʼpʼejl uxpʼejl ejemplo.

6. ¿Chucoch miʼ mejlel la cʌl chaʼan Jehová tsaʼʌch i wen ñʌchʼta Jesús?

⁶ Jehová miʼ ñʌchʼtʌben i tʼan i yalobilob. Laʼ laj qʼuel bajcheʼ tsiʼ mele tiʼ tojlel jiñi Ñaxam bʌ i yalobil. Tsiʼ ñʌchʼtʌbe i yoración tac Jesús cheʼ bʌ wʌʼan ti Pañimil (Luc. 5:16). Tsiʼ mele jaʼel cheʼ bʌ tsiʼ cʼajtibe i coltaya cheʼ bʌ an chuqui mi caj i mel, junchajp jiñʌch cheʼ bʌ tsiʼ yajca jiñi 12 i yapóstolob (Luc. 6:12, 13). Jehová tsiʼ ñʌchʼta jaʼel cheʼ bʌ woli (yʌquel) i ñusan wocol. Cheʼ bʌ Judas mi caj i yʌcʼ Jesús tiʼ cʼʌb i contrajob, Jesús tiʼ sube i Tat chaʼan miʼ coltan i lʌtʼ jiñi wocol tac muʼ bʌ caj i ñusan.  Jehová mach tsaʼic jach i ñʌchʼtʌbe i tʼan i Yalobil, tsiʼ chocbe tilel juntiquil ángel chaʼan miʼ pʼʌtʼesan (Luc. 22:41-44).

7. ¿Bajcheʼ yubil maʼ wubin cheʼ a wujil chaʼan Jehová mucʼʌch i ñʌchʼtan a woración?

⁷ Ili ora, Jehová miʼ ñʌchʼtan jaʼel jiñi la coración, miʼ jacʼbeñonla cheʼ tiʼ yorajlel i wen bajcheʼ miʼ mel (Sal. 116:1, 2). Cheʼʌch tsiʼ yubi juntiquil hermana chʼoyol bʌ ti India. Woliʼ chaʼlen wersa chaʼan miʼ mʌlben (jotben) jiñi cʌlʌx pensar i tsiʼ wen cʼajtibe Jehová chaʼan miʼ coltan. Miʼ yʌl: «Jiñi JW Broadcasting^® tsaʼ bʌ loqʼui ti mayo 2019 tsiʼ taja ti tʼan bajcheʼ miʼ mejlel lac mʌlben jiñi cʌlʌx pensar. Jiñʌch i cʼʌjñibal bʌ c chaʼan ti jimbʌ ora. Jiñʌch i jacʼbal jiñi coración tac».

8. ¿Bajcheʼ tsiʼ pʌsʌ Jehová chaʼan mucʼʌch i cʼuxbin Jesús?

⁸ Jehová miʼ pʌsbeñonla i cʼuxbiya cheʼ bajcheʼ tsiʼ mele tiʼ tojlel i Yalobil cheʼ bʌ wʌʼan ti Pañimil (Juan 5:20). Tsiʼ colta chaʼan lʌcʼʌl miʼ yajñel tiʼ tojlel, chaʼan tijicña i tsiʼ yʌqʼue chuqui i cʼʌjñibal i chaʼan. Tsaʼʌch i sube chaʼan miʼ cʼuxbin yicʼot chaʼan miʼ qʼuel ti utsʼat (Mat. 3:16, 17). Maʼañic baʼ ora i bajñel tsiʼ yubi i bʌ Jesús, come yujil chaʼan jiñi i Tat woliʼ coltan tiʼ pejtelel ora (Juan 8:16).

9. ¿Chuqui tac miʼ pʌsbeñonla chaʼan mucʼʌch i cʼuxbiñonla Jehová?

⁹ Cheʼ bajcheʼ Jesús, ti lac pejtelel an laj qʼuelbe i cʼuxbiya Jehová. Laʼcu lac ñaʼtan iliyi: Jehová tsiʼ lʌcʼtesayonla tiʼ tojlel i tsiʼ yʌqʼueyonla jumpʼejl familia baqui an cʼuxbiya i juntemel añob, muʼ bʌ i yʌqʼueñonla lac tijicñʌyel i miʼ ñuqʼuesʌbeñonla lac pusicʼal cheʼ bʌ woliyonla ti pensar (Juan 6:44). Cheʼ jaʼel miʼ chʌn aqʼueñonla jiñi chʼujul bʌ bʌlñʌcʼʌl. I miʼ coltañonla lac taj jiñi i cʼʌjñibal bʌ lac chaʼan ti jujumpʼejl qʼuin (Mat. 6:31, 32). Cheʼ bʌ mi lac ñaʼtan bajcheʼ cʼamel miʼ cʼuxbiñonla Jehová, miʼ ñumen colel jiñi laj cʼuxbiya tiʼ tojlel.

10. ¿Bajcheʼ miʼ mejlel lac lajin i cʼuxbiya Jehová tiʼ tojlel la quermañujob?

¹⁰ Jehová miʼ cʼuxbin jiñi la quermañujob. Pero joñonla an i tajol wocol mi la cubin chaʼan mi laj cʼuxbiñob yicʼot chaʼan mi lac subeñob. An i tajol tiʼ caj mach lajalic laj cultura o mach lajalic bajcheʼ tsaʼ coliyonla. I ti lac pejtelel mi lac taj lac sajtemal muʼ bʌ i mejlel i yʌqʼuen i chʼijyemlel o miʼ mejlel i michʼesan jiñi yañoʼ bʌ. Pero ti lac pejtelel mi lac mejlel ti coltaya chaʼan an cʼuxbiya tiʼ tojlel jiñi hermanojob cheʼ bʌ mucʼʌch laj cʼuxbiñob jaʼel cheʼ bajcheʼ miʼ mel Jehová (Efes. 5:1, 2; 1 Juan 4:19). Laʼ laj qʼuel chuqui miʼ mejlel laj cʌn tiʼ tojlel.

11. ¿Bajcheʼ tsiʼ pʌsʌ Jesús jiñi «ñuc bʌ i pʼuntaya» Jehová?

¹¹ Jehová miʼ pʌs «ñuc bʌ i pʼuntaya» (Luc. 1:78). Jiñi yujil bʌ pʼuntaya mucʼʌch i ñaʼtan yambʌlob cheʼ bʌ miʼ qʼuel chaʼan miʼ ñusañob wocol i miʼ sʌclan bajcheʼ miʼ mejlel i coltañob yicʼot i ñuqʼuesʌbeñob i pusicʼal. Jiñi tsaʼ bʌ i mele Jesús tiʼ tojlel jiñi lac piʼʌlob, tsiʼ pʌsʌ chaʼan Jehová mucʼʌch i ñaʼtañob (Juan 5:19). Jiñi Biblia miʼ yʌl chaʼan «cheʼ bʌ miʼ qʼuel jiñi lac piʼʌlob, miʼ wen pʼuntañob come ticʼlʌbilob yicʼot cʌybilob cheʼ bajcheʼ tiñʌmeʼ maʼañic bʌ majqui miʼ cʌntañob» (Mat. 9:36). Jesús mach tsaʼic jach i yubi i pʼuntaya tiʼ pusicʼal. Tiʼ tsʼʌca cʼamoʼ bʌ i tsiʼ colta jiñi muʼ bʌ i chaʼleñob tsʌts bʌ eʼtel yicʼot añoʼ bʌ al bʌ i cuch (Mat. 11:28-30; 14:14).

12. ¿Bajcheʼ tac miʼ mejlel lac pʌs lac pʼuntaya?

¹² Mi la com lac pʌs chaʼan mucʼʌch laj qʼuelob ti ñuc yicʼot mi lac pʼuntan la quermañujob, yom mi lac ñaʼtan chuqui ti wocol tac woliʼ ñusañob. Jumpʼejl ejemplo, juntiquil hermana tajol an i chaʼan jumpʼejl tsʌts bʌ cʼamʌjel. Maʼañic chuqui miʼ yʌl, pero tajol mucʼʌch  i qʼuel ti ñuc cheʼ miʼ tsʼitaʼ coltʌntel. ¿Mucʼʌch ba i mejlel i yʌqʼuen chuqui i cʼʌjñibal i chaʼan i familia? ¿Yom ba mi laj coltan tiʼ melol chuqui miʼ cʼux o chaʼan miʼ sujcun i yotot? O laʼ cu lac ñaʼtan chaʼan juntiquil hermano tiʼ sʌtʌ i yeʼtel. Miʼ mejlel lac tsʼitaʼ aqʼuen taqʼuin chaʼan mi laj coltan jinto miʼ taj i yeʼtel, mach yʌlʌyic mi lac sub majquiyonla.

13, 14. ¿Bajcheʼ miʼ mejlel lac lajin Jehová cheʼ yujil tʼoxol chuqui an i chaʼan?

¹³ Jehová miʼ tʼox chuqui an i chaʼan (Mat. 5:45). Mi la com lac pʌs pʼuntaya, mach jiñicto yom mi lac pijtan chaʼan jiñi hermanojob miʼ cʼajtiñob coltaya. Miʼ mejlel ti loqʼuel ti lac pusicʼal, cheʼ bajcheʼ miʼ mel Jehová. Ti jujumpʼejl qʼuin miʼ yʌcʼ ti loqʼuel jiñi Qʼuin anquese maʼañic mi laj cʼajtiben, i tiʼ pejtelel lac piʼʌlob miʼ tajob i wenlel, mach jiñobic jach jiñi muʼ bʌ i yʌqʼueñob wocolix. Jehová miʼ pʌsbeñonla chaʼan miʼ cʼuxbiñonla cheʼ miʼ yʌqʼueñonla chuqui i cʼʌjñibal lac chaʼan, ¿ñomach? ¡Wen uts yicʼot miʼ tʼox chuqui an i chaʼan, i jin chaʼan mi lac wen cʼuxbin!

¹⁴ Cabʌl la quermañujob woliʼ lajiñob Jehová cheʼ bʌ miʼ bajñel loqʼuelob tiʼ pusicʼal i coltan yañoʼ bʌ yicʼot chaʼan miʼ tʼoxob chuqui añob i chaʼan. Laʼ laj qʼuel chuqui tsaʼ ujti cheʼ bʌ tsaʼ ñumi jiñi huracán Haiyan ti Filipinas cheʼ ti 2013. Cabʌl hermanojob tiʼ sʌtʌyob i yotot yicʼot pejtelel chuqui añob i chaʼan. Pero jiñi hermanojob tiʼ petol Pañimil ti ora tsiʼ chaʼleyob coltaya. Wocolix i yʌlʌ jiñi donación tac yicʼot i yeʼtel cabʌlob, tsaʼ mejli jumpʼejl ñuc bʌ eʼtel baqui tsaʼ mejli ti chaʼ tojʼesʌntel o ti chaʼ mejlel lʌcʼʌ 750 otot, i mach i tajax jumpʼejl jab tsaʼ mejli. Cheʼ tiʼ yorajlel jiñi pandemia chaʼan COVID-19, jiñi Testigojob tsiʼ chaʼleyob wersa i coltan i yermañujob cheʼ bʌ i cʼʌjñibalob i chaʼan. Cheʼ bʌ chajpʌbilonla chaʼan ti ora mi laj coltan la quermañujob, mi lac pʌs chaʼan mi laj cʼuxbiñob.

15, 16. Cheʼ bajcheʼ miʼ yʌl Lucas 6:36, ¿chuqui yom mi lac mel mi la com lac lajin jiñi lac Tat?

¹⁵ Jehová yujil pʼuntaya i miʼ ñusʌbeñonla lac mul (pejcan Lucas 6:36). Jiñi lac Tat am bʌ ti panchan miʼ pʌsbeñonla i pʼuntaya ti jujumpʼejl qʼuin (Sal. 103:10-14). Cheʼʌch tsiʼ mele Jesús jaʼel, anquese xmulilob jiñi xcʌntʼañob  i chaʼan, Jesús tsiʼ pʼuntayob i tsiʼ ñusʌbeyob i mul. Tsaʼto i yʌcʼʌ i cuxtʌlel chaʼan mi lac ñusʌbentel lac mul (1 Juan 2:1, 2). Jiñi i pʼuntaya Jehová yicʼot Jesús i cheʼ miʼ ñusañob lac mul miʼ ñumen lʌcʼtesañonla tiʼ tojlel, ¿mach ba cheʼqui?

¹⁶ Cheʼ bʌ mi lac ñusʌben i mul yambʌlob ti jumpʼejl lac pusicʼal, mi lac pʼʌtʼesan jiñi cʼuxbiya am bʌ tiʼ tojlel jiñi hermanojob yicʼot hermanajob (Efes. 4:32). I sujmʌch, an i tajol wocol mi la cubin chaʼan mi lac ñusʌben i mul yambʌlob, pero yomʌch mi lac chaʼlen wersa lac mel. Juntiquil hermana miʼ yʌl chaʼan tsiʼ wen colta jiñi tema «Perdónense liberalmente unos a otros» * tsaʼ bʌ loqʼui ti jiñi La Atalaya. Tiʼ tsʼijbu: «Ili tema tsiʼ coltayon chaʼan wen jach bajcheʼ yom miʼ qʼuel jiñi wocol tac. Tiʼ tsictesa chaʼan cheʼ bʌ mi lac ñusʌben i mul juntiquil mach yomic i yʌl chaʼan wen woli laj qʼuel jiñi mach bʌ weñic i melbal o chaʼan mach lac wentajic jiñi wocol tac muʼ bʌ i yʌcʼ. Yom bʌ i yʌl, jin chaʼan woli lac locʼsan jiñi lac michʼ pusicʼal tiʼ caj jiñi mach bʌ weñic i melbal i chaʼan maʼañic mi lac sʌt jiñi lac tijicñʌyel». Cheʼ ti jumpʼejl lac pusicʼal mi lac ñusʌben i mul la quermañujob, mi lac pʌs chaʼan mucʼʌch laj cʼuxbiñob yicʼot chaʼan mi lac lajin jiñi lac Tat Jehová.

17. Cheʼ bajcheʼ miʼ pʌs Mateo 5:16, ¿bajcheʼ miʼ mejlel lac pʌs chaʼan mi laj qʼuel ti ñuc jiñi lac Tat am bʌ ti panchan?

¹⁷ Jumpʼejlʌch ñuc bʌ lac majtan cheʼ añonla ti jumpʼejl familia am bʌ tiʼ petol Pañimil muʼ bʌ i cʼuxbiñob i bʌ. I la com chaʼan cabʌl lac piʼʌlob miʼ chʼujutesañob Jehová jaʼel. Jin chaʼan, mach la comic lac mel muʼ bʌ i mejlel i bibʼesʌben i cʼabaʼ jiñi lac Tat am bʌ ti panchan o i chaʼan i tejclum. Mi lac chʌn chaʼlen wersa chaʼan wen lac melbal chaʼan jiñi yambʌlob miʼ mulañob i cʌn jiñi wen tʼan (pejcan Mateo 5:16).

18. ¿Chuqui mi caj i coltañonla ti subtʼan yic’ot lac chʼejlel?

¹⁸ An i tajol, an muʼ bʌ caj i tsʼaʼleñoñobla o muʼto caj i contrajiñoñobla tiʼ caj mi lac jacʼben i tʼan lac Tat Jehová. ¿Chuqui miʼ mejlel  lac mel cheʼ mi lac bʌcʼñan lac suben yambʌlob jiñi muʼ bʌ lac ñop? Laʼ laj cʼajtesan chaʼan Jehová yicʼot i Yalobil mi caj i coltañonla. Jesús tiʼ sube jiñi xcʌntʼañob chaʼan maʼañic miʼ cʼojoʼtañob (pensaliñob) chuqui mi caj i yʌlob o bajcheʼ mi caj i yʌlob. Tiʼ subeyob: «Cheʼ bʌ miʼ cʼotel i yorajlel mi caj laʼ subentel chuqui yom mi laʼ wʌl. Come mach laʼ bajñelic mi laʼ cajel ti tʼan: Yicʼotʌch i coltaya i pʼʌtʌlel laʼ Tat am bʌ ti panchan» (Mat. 10:19, 20).

19. ¿Bajcheʼ tsiʼ chaʼle subtʼan yicʼot i chʼejlel juntiquil estudiante?

¹⁹ Laʼ laj qʼuel chuqui tsaʼ ujti tiʼ tojlel juntiquil hermano i cʼabaʼ Robert. Cheʼ bʌ woli jaxto i tech i pejcan jiñi Biblia i maxto cabʌlic chuqui yujil, tsaʼ majli ti jumpʼejl meloñibʌl ti Sudáfrica i tiʼ tsictesʌbe jiñi juez chucoch maʼañic mi caj i yochel bajcheʼ soldado. Yicʼot i chʼejlel tiʼ tsictesa chaʼan maʼañic mi caj i yochel ti soldado come miʼ cʼuxbin i yermañujob. Tsiquil chaʼan miʼ qʼuel ti ñuc jiñi i yajñib ti ili familia. Cheʼ jiñi, juntiqui juez tsiʼ cʼajtibe: «¿Majquiyob jiñi a wermañujob?». Robert mach pijtʌbilic i chaʼan ili cʼajtiya, pero ti ora tsaʼ cʼajtiyi i chaʼan jiñi texto chaʼan bʌ jiñi qʼuin. Jiñʌch Mateo 12:50: «Pejtelel muʼ bʌ i mel chuqui yom c Tat am bʌ ti panchan querañʌch, quijtsʼiñʌch, c chichʌch yicʼot c ñaʼʌch». Anquese Robert maxto wen jalic i cajel i pejcan jiñi Biblia, jiñi i yespíritu Jehová tsiʼ colta i jacʼ ili cʼajtiya yicʼot yan tac bʌ. ¡Jehová tijicña tsiʼ yubi tiʼ tojlel! I tijicña mi caj i yubin ti lac tojlel jaʼel mi mucʼʌch lac ñop tiʼ tojlel chaʼan mi lac chaʼlen subtʼan yicʼot lac chʼejlel cheʼ bʌ an wocol tac.

20. ¿Chuqui yom mi lac bej mel? (Juan 17:11, 15).

²⁰ Laʼ lac chʌn qʼuel ti ñuc cheʼ añonla ti jumpʼejl familia baqui an cʼuxbiya. An lac chaʼan jiñi ñumen wem bʌ Tatʌl i cabʌl hermanojob yicʼot hermanajob muʼ bʌ i cʼuxbiñonla. Laʼ lac chʌn qʼuel ti ñuc iliyi. Satanás yicʼot i wiñicob mach yomobic chaʼan mi lac ñop chaʼan Jehová miʼ cʼuxbiñonla i miʼ chaʼleñob wersa chaʼan mach juntemelic mi la cajñel. Pero Jesús tsiʼ mele oración chaʼañonla i tsiʼ cʼajtibe Jehová chaʼan miʼ cʌntañonla chaʼan juntemel mi la cajñel (pejcan Juan 17:11, 15). I Jehová wolʌch i jacʼ jiñi oración. Laʼ lac lajin Jesús i laʼ lac chʌn ñop chaʼan jiñi lac Tat Jehová mucʼʌch i cʼuxbiñonla yicʼot miʼ coltañonla. Laʼ lac ñumen lʌcʼtesan lac bʌ tiʼ tojlel la quermañujob.