1, 2. ¿Chuqui tsaʼ ajli chaʼan mi caj i yujtel ti ili ora?

JIÑI tsaʼ bʌ i ñusayob yujquel lum ti Nepal ti 2015 an tsaʼ bʌ i yʌlʌyob: «Jiñi tienda tac yicʼot colem otot tac ti ora jach tsaʼ caji ti jejmel». «Jiñi lac piʼʌlob tsiʼ wen chaʼleyob bʌqʼuen [...]. Cabʌlob tsaʼ bʌ i yʌlʌyob chaʼan tsaʼ jach jalʼa chaʼpʼejl uxpʼejl minuto, pero joñon wen jal tsaʼ cubi». Cheʼ tsaʼic lac ñusa cheʼ bʌ bajcheʼ jiñi, tajol mach ñajʌyic lac chaʼan.

² Pero ti ili ora, lajal bajcheʼ woli (choncol) lac ñijcʌntel ti lac pejtelel, mach ti jumpʼejlic jach tejclum o jumpʼejlic jach país. Jehová woli (yʌquel) i ñijcan pejtelel jiñi tejclum tac tiʼ petol Pañimil, i añix ora cajel i mel. Cheʼʌch tsiʼ wʌn alʌ Hageo: «Come woliʼ yʌl i Yum Panchan yicʼot Pañimil: Ti jumucʼto mi caj c ñijcan panchan yicʼot pañimil, yicʼot colem ñajb yicʼot lum» (Hag. 2:6).

3. ¿Chucoch mach lajalic jiñi yujquel muʼ bʌ i ñumel yicʼot jiñi i ñijcʌntel tejclum tac woli bʌ i yʌjlel?

³ Jiñi tsaʼ bʌ i yʌlʌ Hageo chaʼan mi caj i yujtel mi caj i chʼʌm tilel chuqui tac wem bʌ, mach lajalic bajcheʼ jumpʼejl yujquel lum mucʼ jach bʌ i jisan chuqui tac an. Jehová tsiʼ yʌlʌ: «Mi caj c ñijcan pejtel colem tejclum tac. Mi caj i tilel jini Cʼax i Tʼojol jax bʌ muʼ bʌ i pijtañob winicob xʼixicob tiʼ pejtelel pañimil. Mi caj c bujtʼesan ili cotot tic ñuclel» (Hag. 2:7). ¿Baqui bʌ i sujmlel ili profecía tiʼ tojlel jiñi tsaʼ bʌ chumleyob tiʼ yorajlel Hageo? ¿I baqui bʌ i sujmlel ili ora? Ti ili estudio, mi  caj lac jacʼ ili cʼajtiya tac i mi caj laj qʼuel bajcheʼ mi lac mejlel ti coltaya cheʼ woliʼ ñijcʌntel jiñi tejclum tac.

4. ¿Chucoch Jehová tsiʼ choco majlel Hageo ti Jerusalén?

⁴ Jehová tsiʼ yʌqʼue Hageo wen ñuc bʌ i yeʼtel (troñel). Laʼ laj qʼuel chucoch. Hageo tajol juntiquilʌch tsaʼ bʌ loqʼui ti Babilonia chaʼan miʼ chaʼ majlel ti Jerusalén cheʼ ti jabil 537. Cheʼ bʌ tsaʼ cʼotiyob yaʼ ti tejclum, jiñi xucʼul bʌ i wiñicob Jehová tsiʼ melbeyob (pʌtbeyob) i yebal jiñi templo, jiñi i yotot Jehová (Esd. 3:8, 10). Pero ti wiʼil tsiʼ tajayob i contrajintel, tsiʼ yubiyob i chʼijyemlel i tsiʼ cʌyʌyob jiñi eʼtel (Esd. 4:4; Hag. 1:1, 2). Jin chaʼan, Jehová tsiʼ choco majlel Hageo cheʼ ti jabil 520 chaʼan miʼ coltañob i chaʼ taj i tijicñʌyel i miʼ yujtesañob jiñi templo (Esd. 6:14, 15). *

5. ¿Chucoch tsaʼʌch i chʼejlʼesa i tejclum Dios jiñi tʼan tac tsaʼ bʌ i yʌlʌ Hageo?

⁵ Jiñi tʼan tsaʼ bʌ i subu Hageo chaʼañʌch miʼ pʼʌtʼesʌbeñob i ñopoñel ti Jehová jiñi judíojob. Yicʼot i chʼejlel, tiʼ sube jiñi chʼijyemoʼ bʌ ili tʼan tac tilem bʌ ti Jehová: «Ti laʼ pejtelel wʌʼ bʌ añetla ti laʼ lumal, tijicñesan laʼ bʌ [...]. Chaʼlenla eʼtel, come añon quicʼotetla» (Hag. 2:4). Miʼ mejlel la cʌl chaʼan ili tʼan tac tsaʼʌch i yʌqʼueyob i chʼejlel. Mi jiñi judíojob yom i yujtesañob jiñi eʼtel, yom miʼ ñopob ti Jehová come an yonlel i yángelob.

6. ¿Chuqui ti wenlel tsiʼ yʌcʼʌ jiñi tsaʼ bʌ i wʌn alʌ Hageo?

⁶ Jehová tiʼ sube Hageo chaʼan miʼ subeñob jiñi judíojob chaʼan lajal bajcheʼ mi caj i ñijcan jiñi tejclum tac. Yicʼot ili tʼan tac, jiñi tsaʼ bʌ i cʌyʌyob i mel jiñi templo tsiʼ cʌñʌyob chaʼan Jehová mi caj i ñijcan Persia, jiñi tejclum ñumen pʼʌtʌl bʌ am bʌ tiʼ wenta cabʌl tejclum tac ti jimbʌ ora. ¿Chuqui ti wenlel miʼ tajtʌl cheʼ miʼ ñijcʌntel jiñi tejclum? Jiñi i tejclum Dios mi caj i yujtesan jiñi templo. Cheʼ jaʼel, an mach bʌ judíojobic muʼ bʌ caj i temob i bʌ yicʼot jiñi i tejclum Dios i mi caj i chʼujutesañob Jehová yaʼ ti tsijiʼ bʌ templo. Tsiquil chaʼan jiñi i tʼan Hageo tsaʼʌch i colta jiñi i tejclum Dios (Zac. 8:9).

7. ¿Chuqui ti eʼtel woli laj coltan ili ora?

⁷ ¿Baqui bʌ i sujmlel jiñi profecía chaʼan Hageo ili ora? Jehová woliʼ chaʼ ñijcan pejtelel jiñi tejclum tac, i joñonla woli laj coltan i mel. Laʼcu lac ñaʼtan iliyi: Ti 1914, Jehová tsiʼ waʼchoco Jesucristo bajcheʼ Rey yaʼ tiʼ Yumʌntel ti panchan (Sal. 2:6). Jiñi ñucoʼ bʌ i yeʼtel ti pañimil (mulawil) maʼañic tsiʼ mulayob iliyi. Tsiʼ pʌsʌ chaʼan tsaʼix tsʼʌctiyi «jiñi i yorajlel jiñi tejclum tac». Yom i yʌl, jiñi i yorajlel cheʼ bʌ maʼañic juntiquil yumʌl waʼchocobil bʌ ti Jehová (Luc. 21:24). Jin chaʼan, ti jimbʌ ora, i ñumento cʼʌlʌl cheʼ ti 1919, jiñi i tejclum Jehová woliʼ suben lac piʼʌlob chaʼan jin jach jiñi i Yumʌntel Dios mi caj i tojʼesan lac wocol tac. I subol «jiñi wen tʼan chaʼan bʌ Yumʌntel» an i ñijca pejtelel pañimil (Mat. 24:14).

8. Cheʼ bajcheʼ miʼ yʌl Salmo 2:1-3, ¿bajcheʼ yilal miʼ qʼuelob yonlel tejclum tac jiñi muʼ bʌ lac sub?

⁸ ¿Bajcheʼ yilal miʼ qʼuelob yambʌ lac piʼʌlob jiñi muʼ bʌ lac sub? Yonlelob maʼañic miʼ mulañob (pejcan Salmo 2:1-3). Jiñi tejclum tac wen michʼob. Maʼañic miʼ chʼʌmob ti ñuc jiñi yumʌl tsaʼ bʌ i waʼchoco Jehová. Maʼañic miʼ ñopob chaʼan jiñi muʼ bʌ lac sub jiñʌch «jiñi wen tʼan». Cheʼto jaʼel, an i mʌctayob lac subtʼan. I anquese cabʌl yumʌlob miʼ poj alob  chaʼan miʼ chʼujutesañob Dios, mach yomobic i cʌy jiñi i yeʼtel. Cheʼ bajcheʼ tiʼ yorajlel Jesús, ili ora miʼ contrajiñob jiñi Yajcʌbil bʌ i chaʼan Jehová cheʼ miʼ ticʼlʌbeñob jiñi xucʼul bʌ i wiñicob (Hech. 4:25-28).

9. ¿Chuqui miʼ yʌl Jehová cheʼ miʼ qʼuel chaʼan jiñi tejclum tac maʼañic miʼ mulañob jiñi wen tʼan?

⁹ ¿Chuqui miʼ yʌl Jehová cheʼ miʼ qʼuel chaʼan jiñi tejclum tac maʼañic miʼ mulañob jiñi wen tʼan? Salmo 2:10-12 miʼ yʌl: «Jini chaʼan laʼix julic laʼ pusicʼal, reyet bʌ la. Yom mi laʼ jacʼ laʼ cʌntesʌntel jatetla am bʌ laʼ weʼtel ti pañimil. Yom mi laʼ bʌcʼñan lac Yum cheʼ mi laʼ chʼujutesan. Yom tsiltsilñayetla cheʼ miʼ ñucʼan laʼ pusicʼal. Tsʼujtsʼunla i Yalobil lac Yum ame michʼac, ame jiliquetla ti laʼ bijlel cheʼ miʼ bʌcʼ michʼan Dios. Tijicñayob pejtel muʼ bʌ i sʌclañob i coltʌntel ti lac Yum». Jehová wen uts i woliʼ yʌqʼuen i yorajlel jiñi i contrajob chaʼan miʼ qʼuextañob i bʌ i miʼ chʼʌmob ti ñuc jiñi i Yumʌntel. Pero woliʼ jilel jiñi i yorajlel. Chumulonla ti «jiñi cojix tac bʌ qʼuin» (2 Tim. 3:1; Is. 61:2). Wen ñuc i cʼʌjñibal cheʼ jiñi lac piʼʌlob miʼ cʌñob i sujmlel i miʼ coltañob i Yumʌntel Jehová.

10. Cheʼ bajcheʼ miʼ yʌl Hageo 2:7-9, ¿chuqui tac wem bʌ mi caj i tajtʌl chaʼan i ñijcʌntel pañimil?

¹⁰ An weñʌch bʌ miʼ qʼuelob jiñi i ñijcʌntel tejclum tac tsaʼ bʌ i yʌlʌ Hageo. Tiʼ tsictesa chaʼan, cheʼ miʼ mejlel iliyi, «jini Cʼax i Tʼojol jax bʌ [ili yom i yʌl, jiñi lac piʼʌlob utsoʼ bʌ i pusicʼal] ti pejtelel pañimil» mi caj i yochelob chaʼan miʼ chʼujutesañob Jehová (pejcan Hageo 2:7-9). * Isaías yicʼot Miqueas tsiʼ yʌlʌyob jaʼel chaʼan iliyi mi caj i yujtel ti cojix tac bʌ qʼuin (Is. 2:2-4; Mi. 4:1, 2).

11. ¿Chuqui tsiʼ mele juntiquil hermano cheʼ bʌ cojaxto tsiʼ yubi jiñi wen tʼan?

¹¹ Laʼ laj qʼuel bajcheʼ ili tʼan tsiʼ ñijca juntiquil hermano i cʼabaʼ Ken, am bʌ yaʼ ti central mundial. Tsaʼix ñumi 40 jab cʼʌlʌl bajcheʼ tsiʼ yubi jiñi wen tʼan chaʼan bʌ Yumʌntel, pero wen cʼajalto i chaʼan. Miʼ yʌl: «Cheʼ bʌ tsaʼ cubi jiñi i sujmlel am bʌ yaʼ tiʼ Tʼan Dios, tijicñayon  cheʼ tsaʼ c ñaʼta chaʼan añonla ti cojix tac bʌ qʼuin. Mi com chaʼan utsʼat miʼ qʼuelon Dios yicʼot mic taj jiñi j cuxtʌlel, yom mij cʌy ili jontol bʌ pañimil i xucʼul mi cʌcʼ c bʌ ti Jehová. Tsaʼ c mele oración i ti ora tsaʼ j qʼuexta c bʌ. Tsaʼ j cʌyʌ ili jontol bʌ pañimil i tsaʼ caji j coltan jiñi i Yumʌntel Dios, mach bʌ añic miʼ mejlel ti ñijcʌntel».

12. ¿Bajcheʼ an i taja i ñuclel jiñi chʼujul bʌ i templo Jehová ti ili cojix tac bʌ qʼuin?

¹² Tsiquil chaʼan Jehová woliʼ yʌqʼuen i bendición jiñi i tejclum. Ti ili cojix tac bʌ qʼuin, woliʼ ñumen pʼojlelob jiñi muʼ bʌ i chʼujutesañob. Cheʼ ti 1914 maxto wen cabʌloñicla. Pero wʌleʼli ñumeñoñixla ti 8 millón woli bʌ lac melben i yeʼtel Dios, i ti jujumpʼejl jab yonlel lac piʼʌlob miʼ tempañob i bʌ yicʼotonla ti jiñi i Cʼajtesʌntel i chʌmel Jesús. Cheʼ bajcheʼ iliyi, «jini Cʼax i Tʼojol jax bʌ [...] ti pejtelel pañimil» an i butʼuyob i jumpatlel jiñi chʼujul bʌ i templo Jehová, ili jiñʌch pejtelel chuqui chajpʌbil i chaʼan chaʼan miʼ mejlel lac chʼujutesan ti wen. Cheʼ ili lac piʼʌlob miʼ chʼʌmob jiñi tsijiʼ bʌ i melbal (chaʼlibal) miʼ yʌqʼueñob i ñuclel i cʼabaʼ Jehová (Efes. 4:22-24).

13. ¿Baqui bʌ yambʌ profecía tac woliʼ tsʼʌctiyel? (Qʼuele jiñi foto am bʌ tiʼ tejchibal).

¹³ Jiñi woli bʌ i yujtel miʼ tsʼʌctesan yambʌ profecía tac, cheʼ bajcheʼ jiñi muʼ bʌ i tilel ti Isaías capítulo 60, versículo 22, muʼ bʌ i yʌl: «Jini mach bʌ ñuquic mi caj i pʼojlel ti jumpʼejl mil. Jini jumpʼejl alʌ colonia mi caj i colel ti colem tejclum. Joñon laʼ Yumon. Mi caj c tsʼʌctesan cheʼ i yorajlelix». Yonlelob woliʼ yochelob tiʼ tejclum Dios, jin chaʼan an chuqui wen utsʼatax bʌ woliʼ yujtel: Jiñi «Cʼax i Tʼojol jax bʌ» cabʌl chuqui yujilob i yomob i subob «jiñi wen tʼan chaʼan bʌ Yumʌntel». Cheʼ bajcheʼ iliyi, jiñi i tejclum Jehová miʼ mejlel i cʼʌn chuqui tac yujilob, Isaías tsiʼ laji bajcheʼ i chubʌʼan tejclum tac (Is. 60:5, 16). Tiʼ coltaya ili wiñicob yicʼot xʼixicob woliʼ sujbel jiñi wen tʼan ti 240 país yicʼot territorio tac, i miʼ mejlel jun tac ti ñumen ti mil tʼan.

14. ¿Chuqui yom miʼ ñaʼtañob i mel jiñi lac piʼʌlob ili ora?

¹⁴ Ti ili cojix tac bʌ qʼuin, jiñi i ñijcʌntel tejclum tac woliʼ yʌcʼ chaʼan jiñi lac piʼʌlob an chuqui miʼ ñaʼtañob i mel: ¿Muʼ ba  caj i coltañob jiñi i Yumʌntel Dios, o mi caj i chucob i bʌ ti jiñi yumʌlob ila ti Pañimil? Anquese jiñi i wiñicob Jehová miʼ jacʼob jiñi ley tac am bʌ yaʼ ti país baqui chumulob, maʼañic miʼ yotsañob i bʌ ti política (Rom. 13:1-7). Yujilob chaʼan jin jach jiñi i Yumʌntel Dios miʼ mejlel i tojʼesan jiñi lac wocol tac, i jiñi Yumʌntel mach i chaʼañic ili pañimil (Juan 18:36, 37).

15. ¿Chuqui miʼ yʌl Apocalipsis chaʼan mi caj i yujtel?

¹⁵ Ti Apocalipsis miʼ yʌl chaʼan ti cojix tac bʌ qʼuin mi caj i qʼuejlel mi xucʼulʌch jiñi i tejclum Dios. Ili yom i yʌl chaʼan mi caj lac bej ticʼlʌntel yicʼot lac bej contrajintel. Jiñi yumʌlob ti pañimil mi caj i mulañob chaʼan mi lac chʼujutesañob i mi caj i ticʼlañob jiñi maʼañic bʌ miʼ melob (Apoc. 13:12, 15). I «tiʼ pejtelelob, jiñi mach bʌ ñucobic yicʼot ñucoʼ bʌ, ricojoʼ bʌ yicʼot pʼumpʼuñoʼ bʌ, librejoʼ bʌ yicʼot xyaj eʼteloʼ bʌ», mi caj i subentelob «chaʼan wersa yom miʼ yʌqʼuentelob i marcajlel ti ñoj bʌ i cʼʌbob o tiʼ pamob» (Apoc. 13:16). Ti wajali, jiñi xyaj eʼtelob miʼ yʌqʼuentelob i marca muʼ bʌ i pʌs majqui jiñi i yumob. Ti ili ora, mi caj i pijtʌntel chaʼan pejtelel lac piʼʌlob añob i chaʼan jumpʼejl marca tiʼ cʼʌb o tiʼ pam. Ili yom i yʌl chaʼan miʼ pijtʌntel chaʼan tiʼ pejtelelob miʼ pʌsob tiʼ melbal yicʼot tiʼ ñaʼtʌbal chaʼan miʼ coltañob jiñi yumʌlob ti pañimil.

16. ¿Chucoch ñuc i cʼʌjñibal mi lac pʼʌtʼesan lac xucʼtʌlel ti Jehová?

¹⁶ Ixcu joñonla, ¿chuqui mi caj lac mel? ¿Muʼ ba caj lac jacʼ lac chʼʌm jiñi marca i mi caj laj coltan jiñi yumʌlob ti pañimil? Jiñi maʼañic bʌ miʼ jacʼob i chʼʌm ili marca mi caj i ñusañob wocol. Jiñi libro chaʼan Apocalipsis miʼ bej al chaʼan maʼañic majqui mi caj i «mejlel ti mʌñoñel o ti choñoñel, cojach jiñi am bʌ i chaʼan jiñi marca» (Apoc. 13:17). Pero jiñi i wiñicob Dios yujilob chuqui mi caj i chaʼleñob jiñi muʼ bʌ i chʼʌmob jiñi marca (Apoc. 14:9, 10). Jin chaʼan, lajal bajcheʼ miʼ tsʼijbuñob tiʼ cʼʌb: «I chaʼañoñʌch lac Yum» (Is. 44:5). I yorajlelix chaʼan mi laj qʼuel mi xucʼulʌch añonla ti Jehová. Mi cheʼʌchi, tijicña mi caj i yʌl chaʼan i chaʼañonla.

17. ¿Chuqui yom cʼajal lac chaʼan chaʼan jiñi i pijt Jehová?

¹⁷ Jehová an i wen pʌsʌ i pijt ti ili cojix tac bʌ qʼuin. Mach yomic chaʼan an majqui miʼ jisʌntel (2 Ped. 3:9). Woliʼ yʌcʼ i yorajlel chaʼan jiñi lac piʼʌlob miʼ chaʼ ñaʼtañob i bʌ i miʼ melob chuqui tac wem bʌ. Pero an jach baqui jaxʌl miʼ pʌs i pijt. Jiñi maʼañic bʌ miʼ qʼuextañob i melbal cheʼ mi caj i yujtelob bajcheʼ jiñi faraón cheʼ tiʼ yorajlel Moisés. Jehová tiʼ sube: «Come an c pʼʌtʌlel chaʼan mic tsʌnsañetla tiʼ pejteletla, pero mach cheʼic tsac chaʼle, come wolic pʌs c pʼʌtʌlel ti a tojlel chaʼan mi cʌcʼ c bʌ ti cʌjñel tiʼ pejtelel pañimil» (Éx. 9:15, 16). Ti wiʼil, tiʼ pejtelel jiñi tejclum tac mi caj i cʌn chaʼan jin jach Jehová jiñi i sujm bʌ Dios (Ez. 38:23). ¿Bajcheʼ mi caj i yujtel?

18. a) ¿Bajcheʼ yambʌ mi caj i ñijcʌntel pañimil miʼ yʌjlel ti Hageo 2:6, 20-22? b) ¿Bajcheʼ la cujil chaʼan jiñi tsaʼ bʌ i yʌlʌ Hageo mi caj i tsʼʌctiyel ti talto bʌ qʼuin?

¹⁸ Cheʼ bʌ cabʌlix jab i chʌmel (sajtel) Hageo, jiñi apóstol Pablo tsiʼ pʌsʌ chaʼan jiñi tʼan tac muʼ bʌ lac taj ti Hageo 2:6, 20-22 mi caj i tsʼʌctiyel ti talto bʌ qʼuin (pejcan). Tiʼ tsʼijbu: «Wʌle tsaʼix i yʌcʼʌ i tʼan: ‹Mi caj c chaʼ ñijcan jiñi lum, pero mach cojic jach jiñi, yicʼotʌch jiñi panchan›. Weno, jiñi tʼan ‹mi caj c chaʼ ñijcan› miʼ yʌcʼ ti ñaʼtʌntel chaʼan mi caj i jisʌntel pejtelel chuqui miʼ ñijcʌntel, jiñi melbil tac bʌ, chaʼan miʼ cʌytʌl jiñi mach bʌ añic miʼ ñijcʌntel» (Heb. 12:26, 27). Ili mach lajalic bajcheʼ muʼ bʌ i yʌjlel ti Hageo  2:7, yom bʌ i yʌl ila jiñʌch chaʼan mi caj i junyajl jisʌntelob jiñi maʼañic bʌ miʼ chʼʌmob ti ñuc Jehová bajcheʼ yumʌl, cheʼ bajcheʼ tsiʼ mele faraón.

19. ¿Chuqui jiñi maʼañic bʌ mi caj i ñijcʌntel, i bajcheʼ la cujil?

¹⁹ ¿Chuqui jiñi maʼañic bʌ mi caj i ñijcʌntel o mi caj i jisʌntel? Pablo tsiʼ bej alʌ: «Come mi caj lac chʼʌm jumpʼejl Yumʌntel mach bʌ añic miʼ mejlel ti ñijcʌntel, laʼ lac bej taj lac wenlel ti jiñi ñuc bʌ i yutslel Dios, chaʼan miʼ mejlel lac melben chʼujul bʌ i yeʼtel cheʼ bajcheʼ miʼ mulan, yicʼot i bʌcʼñʌntel Dios i mi laj qʼuel ti ñuc» (Heb. 12:28). Cheʼʌchi, cheʼ bʌ miʼ ñumel jiñi cojix bʌ i ñijcʌntel pañimil, jin jach jiñi i Yumʌntel Dios mi caj i cʌytʌl (Sal. 110:5, 6; Dn. 2:44).

20. ¿Chuqui yom miʼ melob jiñi lac piʼʌlob, i bajcheʼ miʼ mejlel laj coltañob?

²⁰ Mach wen cabʌlix i yorajlel. Jiñi lac piʼʌlob an chuqui yom miʼ melob. ¿Muʼ ba caj i bej tsajcʌbeñob i melbal ili pañimil i mi caj i jisʌntelob? ¿O mi caj i qʼuextañob i bʌ chaʼan miʼ melob chuqui yom Dios i miʼ tajob i cuxtʌlel mach bʌ añic miʼ jilel? (Heb. 12:25). Cheʼ mi lac chaʼlen subtʼan, mi lac chaʼlen coltaya. Jin chaʼan, laʼ lac bej coltan lac piʼʌlob chaʼan miʼ coltañob jiñi i Yumʌntel Dios. I yom chʌn cʼajal lac chaʼan tsaʼ bʌ i yʌlʌ Jesús: «Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil chaʼan miʼ yubiñob jiñi tejclum tac, cheʼ jiñi mi caj i tilel jiñi i jilibal» (Mat. 24:14).