Laʼ laj qʼuel chuqui miʼ yʌl jiñi Biblia.

Hechos 24:15 miʼ yʌl chaʼan «mi caj i chaʼ chʼojyelob jiñi tojoʼ bʌ yicʼot jiñi mach bʌ tojobic». Jiñi tojoʼ bʌ jiñʌch tsaʼ bʌ i jacʼbeyob i tʼan Dios cheʼ bʌ cuxulobto, jin chaʼan jiñi cʼabaʼob yaʼʌch tsʼijbubil ti jiñi libro chaʼan bʌ cuxtʌlel (Mal. 3:16). Ti jiñi mach bʌ tojobic yaʼ ochemob jiñi maʼañic bʌ tsaʼ mejli i cʌñob Jehová cheʼ bʌ cuxulobto, jin chaʼan mach yaʼic tsʼijbubil i cʼabaʼob ti jiñi libro chaʼan bʌ cuxtʌlel.

Juan 5:28, 29 jiñʌch miʼ taj ti tʼan jaʼel ili chaʼpʼejl grupo muʼ bʌ i yʌl Hechos 24:15. Jesús miʼ yʌl chaʼan «jiñi tsaʼ bʌ i meleyob chuqui tac wen mi caj i chʼojyelob chaʼan cuxtʌlel, i jiñi tsaʼ bʌ i meleyob chuqui tac mach bʌ weñic mi caj i chʼojyelob chaʼan meloñel». Jiñi tojoʼ bʌ tsiʼ meleyob (chaʼleyob) chuqui tac wem bʌ cheʼ bʌ cuxulobto. Mi caj i chʼojyelob chaʼan miʼ tajob i cuxtʌlel come yaʼ tsʼijbubil i cʼabaʼob yaʼ ti libro chaʼan bʌ cuxtʌlel. Pero jiñi mach bʌ tojobic tsiʼ meleyob chuqui tac mach bʌ weñic cheʼ bʌ cuxulobto. Mi caj i chʼojyelob chaʼan meloñel. Jiñi i cʼabaʼob maxto yaʼic tsʼijbubil ti jiñi libro chaʼan bʌ cuxtʌlel, i muʼto caj i qʼuejlel bajcheʼ yilal miʼ melob i bʌ. Ti jimbʌ ora mi caj i yʌqʼuentelob i cʌñob Jehová yicʼot chaʼan miʼ pʌsob mi yomʌch miʼ tsʼijbubentelob i cʼabaʼ ti jiñi libro chaʼan bʌ cuxtʌlel.

Apocalipsis 20:12, 13 miʼ yʌl chaʼan pejtelel jiñi muʼ bʌ caj i chaʼ chʼojyelob yom miʼ jacʼob jiñi tsʼijbubil bʌ yaʼ ti bʌlbil bʌ jun, ili jiñʌch jiñi tsijiʼ bʌ mandar tac muʼ bʌ caj la cʌqʼuentel ti jiñi tsijiʼ bʌ pañimil (mulawil). Jiñi maʼañic bʌ miʼ jacʼob mi caj i jisʌntelob (Is. 65:20).

Daniel 12:2 miʼ yʌl chaʼan an muʼ bʌ caj i chʼojyelob «chaʼan miʼ tajob i cuxtilel mach bʌ anic miʼ jilel. Yañoʼ bʌ mi caj i chʼojyelob chaʼan miʼ yubiñob quisin mach bʌ anic miʼ lajmel tiʼ pejtelel ora [«yicʼot chaʼan miʼ chojquelob tiʼ pejtelel ora», TNM]». Ili versículo woli (choncol) i taj ti tʼan chuqui mi caj i tajob jiñi muʼ bʌ i chaʼ chʼojyelob: «Cuxtilel mach bʌ anic miʼ jilel» o «miʼ chojquelob tiʼ pejtelel ora». Jin chaʼan, tiʼ yujtibal jiñi Mil jab an muʼ bʌ caj i tajob i cuxtʌlel mach bʌ añic miʼ jilel i yañoʼ bʌ mi caj i junyajl jisʌntelob (Apoc. 20:15; 21:3, 4).

Ili chaʼpʼejl grupo miʼ mejlelob ti lajintel bajcheʼ jiñi lac piʼʌlob yomoʼ bʌ chumtʌl ti yambʌ país. Jiñi tojoʼ bʌ lajalob bajcheʼ jiñi muʼ bʌ i yʌqʼuentelob jumpʼejl visa o permiso chaʼan miʼ chaʼleñob eʼtel (troñel) o chaʼan jal miʼ cʌytʌlob ti chumtʌl yaʼi. Pero jiñi mach bʌ tojobic lajalob bajcheʼ jiñi mucʼ jach bʌ i yʌqʼuentelob jiñi visa o permiso chaʼan miʼ mejlelob ti jumucʼ cʌytʌl yaʼi o chaʼan mucʼ jach i cʼotelob ti julaʼ. Chaʼan miʼ mejlelob ti bej chumtʌl ti jiñi país yom miʼ pʌsob chaʼan mucʼʌch i tsʼʌctesañob jiñi muʼ bʌ i cʼajtintel. Cheʼ jaʼel, chaʼan jiñi mach bʌ tojobic miʼ mejlelob ti cʌytʌl yaʼ ti Paraíso yom miʼ jacʼob jiñi i mandar tac Jehová yicʼot yom miʼ pʌsob chaʼan tojobʌch. I mach yʌlʌyic chuqui ti visa o chuqui ti permiso miʼ yʌqʼuentelob jiñi muʼ bʌ i cʼotelob ti yambʌ país, ti wiʼil an mucʼʌch caj i cʌytʌlob i yañoʼ bʌ mi caj i chojquelob loqʼuel. Muʼ bʌ caj i qʼuejlel jiñʌch bajcheʼ yilal tsiʼ meleyob i bʌ ti jiñi país. Cheʼʌch miʼ cajel jaʼel yaʼ ti tsijiʼ bʌ pañimil, jiñi muʼ bʌ caj i chʼojyelob mi caj i qʼuejlel mi xucʼulobʌch ti Dios yicʼot chuqui tac miʼ melob yaʼ ti tsijiʼ bʌ pañimil.

Jehová mach juntiquil jach Dios yujil bʌ pʼuntaya, tojʌch jaʼel (Dt. 32:4; Sal. 33:5). Mi caj i pʌs i cʼuxbiya cheʼ bʌ miʼ chaʼ cuxtesan jiñi tojoʼ bʌ yicʼot mach bʌ tojobic, pero miʼ pijtan jaʼel chaʼan tiʼ pejtelelob miʼ jacʼbeñob jiñi i mandar chaʼan chuqui wem bʌ yicʼot mach bʌ weñic. Jin jach jiñi muʼ bʌ i cʼuxbiñob yicʼot miʼ jacʼbeñob i mandar tac mi caj i bej chumtʌlob ti jiñi tsijiʼ bʌ pañimil.