Tsaʼ quila pañimil (chʼocʼayon) ti 19 i chaʼan mayo ti 1940 yaʼ ti tejclum Amiún, ti Líbano. Ti wiʼil, tsaʼ majliyon lon ti chumtʌl ti Trípoli. Tsaʼ coliyon ti jumpʼejl familia baqui wen chumulon lojon, an cʼuxbiya yicʼot miʼ wen cʼuxbiñob Jehová. Uxtiquil xchʼocob i chaʼtiquil wiñiconbʌlon, joñon xutʌlon. Jiñi ñumen ñuc bʌ i cʼʌjñibal tiʼ tojlel c tatob jiñʌch i pejcʌntel jiñi Biblia, jiñi tempa bʌ yicʼot cheʼ mij coltan lon yambʌlob chaʼan miʼ cʌñob Dios, i mach jiñic i sʌclʌntel jiñi taqʼuin.

Yaʼ ti lon j congregación cabʌl xñoptʼañob yajcʌbiloʼ bʌ chaʼan miʼ majlelob ti panchan. Juntiquil jiñʌch Michel Aboud, muʼ bʌ i ñusan jiñi estudio de libro ti jiñi bʌ ora. Tsiʼ cʌñʌ jiñi i sujmlel ti Nueva York, i tiʼ tejchibal majlel 1920 tsiʼ yʌcʼʌ ti cʌñol yaʼ ti Líbano. Cʼajal c chaʼan bajcheʼ miʼ wen qʼuel ti ñuc yicʼot miʼ coltan Anne yicʼot Gwen Beavor, chaʼtiquil hermanajob tsajñoʼ bʌ ti jiñi Escuela chaʼan Galaad. Jiñi hermanajob tsaʼ sujtiyob ti wem bʌ i yamigajob jiñi c familia. Cheʼ bʌ ñumeñix cabʌl jab, tsaʼ c taja c bʌ quicʼot Anne ti Estados Unidos, i tijicña tsaʼ cubi. Ti wiʼil tsaʼ c taja j qʼuel Gwen, tsaʼ bʌ ñujpuñi yicʼot Wilfred Gooch i woliyob ti eʼtel yaʼ ti sucursal am bʌ ti Londres (Inglaterra).

Cheʼ bʌ alʌlonto mach cabʌlobic Testigojob yaʼ ti Líbano. Pero tsaʼʌch c pʌsbelon yambʌlob chuqui miʼ yʌl jiñi Biblia. Tsaʼʌch c mele lon anquese jiñi añoʼ bʌ i yeʼtel ti ñopbalʌl maʼañic tsiʼ mulayob. Cʼʌlʌl ili ora cʼajalto c chaʼan chuqui tac tsaʼ ujti ti lon c tojlel.

Jumpʼejl bʌ qʼuin woliyon ti subtʼan quicʼot jiñi c chich Sana ti chan tac bʌ otot. Cheʼ bʌ woli c pejcan lon jiñi chumuloʼ bʌ yaʼi, tsaʼ tili juntiquil sacerdote. Mi cʌl an majqui tsiʼ pʌyʌ. Jiñi sacerdote tsaʼ caji i pʼaj jiñi c chich i tsaʼto i xit choco yaʼ ti escalera. An majqui tsiʼ pʌyʌ jiñi policía, i tsaʼʌch cʼoti yicʼot tsiʼ qʼuele chaʼan miʼ coltʌntel Sana come tsaʼ lojwi cheʼ bʌ tsaʼ yajli. Jiñi policíajob tsiʼ pʌyʌyob majlel jiñi sacerdote i tsiʼ qʼueleyob chaʼan an i pistola. Jiñi i yum policía tsiʼ cʼajtibe: «¿Chuquiyeset? ¿Juntiquil am bʌ i yeʼtel ti ñopbalʌl, o i yum maliantejob?».

Maʼañic miʼ ñajʌyel c chaʼan jaʼel cheʼ bʌ jiñi congregación tsiʼ majña jumpʼejl autobús i tsaʼ majliyon lon ti subtʼan ti jumpʼejl alʌ tejclum ñajt bʌ an. Wen woli c ñusan lojon jinto cheʼ bʌ jiñi sacerdote tsiʼ yubi chaʼan yaʼañon lojon i tsiʼ tempa jiñi lac piʼʌlob chaʼan miʼ ticʼlañon lon. Jiñi lac piʼʌlob tsaʼto i juluyon lon ti xajlel i tsiʼ lowoyob c papá tiʼ jol. Cʼajal c chaʼan wen an i chʼichʼel tiʼ wut. Tsaʼ chaʼ majli yicʼot c mamá yaʼ ti autobús i tsaʼ majliyon lon jaʼel, wen chʼijyemon lojon. Maʼañic miʼ ñajʌyel c chaʼan chuqui tsiʼ yʌlʌ c mamá cheʼ bʌ woliʼ sujcuben i wut c papá: «Jehová, ñusʌbeñob i mul, come mach yujilobic chuqui woliʼ melob».

Ti yambʌ qʼuin tsajñi c julaʼtan lon jiñi lon c familia yaʼ baqui chʼoyolon lojon. Cheʼ bʌ tsaʼ cʼotiyon lon tiʼ yotot jiñi c tatuch, yaʼan jiñi obispo, juntiquil wen ñuc bʌ i yeʼtel ti ñopbalʌl. Yujil chaʼan jiñi c tatob i testigojob Jehová. Anquese 6 jaxto c jabilel, tsiʼ cʼajtibeyon: «Ixcu jatet, ¿chucoch maxto a chʼʌmʌ jaʼ?». Tsaʼ c sube chaʼan alʌlonto i chaʼan mic mejlel ti chʼʌmjaʼ yom mic ñumen cʌn jiñi Biblia yicʼot yom an pʼʌtʌl bʌ c ñopoñel. Tiʼ caj maʼañic tsiʼ mulaj bajcheʼ tsaʼ c jacʼbe, tiʼ sube c jiñi c tatuch chaʼan mach weñic tsaʼ c jacʼʌ.

Tiʼ sujm, maʼañic jaysujtel tsaʼ ujtiyon lon bajcheʼ iliyi. Jiñi libanesob wen utsob. Lʌcʼʌ tiʼ pejtelel ora wen miʼ ñʌchʼtañob jiñi i Tʼan Dios i mi cʌcʼ lojon cabʌl estudio.

Cheʼ bʌ woliyonto ti clase, juntiquil hermano chʼoyol bʌ ti Venezuela tsaʼ cʼoti ti Líbano. Tsajñi ti jiñi tempa bʌ tac yaʼ ti lon j congregación i tsaʼ caji i cʌn i bʌ yicʼot jiñi c chich Wafa. Ti wiʼil, tsaʼ ñujpuñiyob i tsaʼ majliyob ti chumtʌl ti Venezuela. Cheʼ bʌ Wafa miʼ tsʼijbubeñon lon carta, miʼ suben c papá chaʼan mic majlel lon ti chumtʌl ti Venezuela, come miʼ wen ñaʼtañon lojon. Ti wiʼil, ¡tsaʼʌch majliyon lon!

Tsaʼ juliyon lon ti Venezuela ti 1953 i tsaʼ chumleyon lojon ti Caracas, tiʼ tʼejl jiñi presidencia. Cheʼ bʌ miʼ ñumel jiñi presidente ti jiñi wen utsʼatax bʌ i carro yicʼot jiñi i chofer, wen tijicña mi cubin come alobonto. Wocol tsiʼ yubi jiñi c papá  chaʼan miʼ ñʌmʼañob ti jumpʼejl tsijiʼ bʌ país, tʼan, cultura, ti bʌlñʌcʼʌl yicʼot ti jiñi clima. Wolito i cajel ti ñʌmʼañob cheʼ bʌ tsaʼ c taja lon wocol.

Ti ora tsaʼ caji ti cʼamʼan jiñi c papá. Tsaʼ toj sajti lon c pusicʼal come wen chʼejl yicʼot wen cʼocʼ yilal. Maʼañic baʼ lon j qʼuele ti cʼamʼan. Tsaʼ tajbenti cáncer tiʼ páncrea i tsiʼ chaʼleyob ti operar. Pero cheʼ bʌ tsaʼ ñumi jumpʼejl semana, tsaʼ chʌmi.

Maʼañic miʼ mejlel cʌl bajcheʼ cʼamel jiñi lon c chʼijyemlel tsaʼ bʌ lon cubi. An jaxto 13 c jabilel. Mach pijtʌbilic lon c chaʼan chaʼan mi caj i chʌmel (sajtel) jiñi lon c papá i maʼañix baʼ ora tijicña mi caj lon cajñel tsaʼ cubi. Jiñi c mamá wocol tsiʼ yubi chaʼan miʼ ñaʼtan chaʼan jiñi c papá tsaʼix chʌmi. Pero tsaʼ lon j qʼuele chaʼan yomʌch mic bej chaʼlen lojon wersa, i yicʼot i coltaya Jehová tsaʼʌch mejliyon lojon. Cheʼ bʌ tsaʼ loqʼuiyon yaʼ ti secundaria ti Caracas an 16 c jabilel, i tsaʼ j qʼuele chaʼan yom mij coltan jiñi c familia.

Ti jimbʌ ora, jiñi c chich Sana tsaʼ ñujpuñi yicʼot Rubén Araujo, tsajñi bʌ ti jiñi Escuela chaʼan Galaad i tsaʼ chaʼ tili ti Venezuela. Tsaʼ majliyob ti chumtʌl ti Nueva York. Jiñi c familia tsiʼ yʌlʌ chaʼan yom mic majlel ti universidad, jin chaʼan tsaʼ majliyon ti chumtʌl ti Nueva York quicʼot Sana yicʼot Rubén. Cheʼ bʌ yaʼañon quicʼotob, tsiʼ coltayon chaʼan mij colel tiʼ chaʼan bʌ Dios. Cheʼ jaʼel, yaʼ ti lon j congregación i cʼabaʼ Brooklyn Spanish, cabʌl hermanojob wen añobix bʌ i ñaʼtʌbal. Chaʼtiquil hermanojob tsaʼ bʌ sujtiyob ti wem bʌ camigojob jiñʌch Milton Henschel yicʼot Frederick Franz, añoʼ bʌ ti Betel am bʌ ti Brooklyn.

Cheʼ bʌ lʌcʼʌ jumpʼejlix jab j cajel ti clase yaʼ ti universidad, tsaʼ caji c ñaʼtan chuqui woli c mel tij cuxtʌlel. Yaʼ ti Lac Tsictesʌbentel tsaʼ c pejca temaj tac muʼ bʌ i taj ti tʼan bajcheʼ tac miʼ mejlel lac melben i yeʼtel Jehová, i jiñi tsiʼ yʌcʼʌyon ti pensar. Tsaʼ j qʼuele chaʼan jiñi precursorob yicʼot jiñi betelitajob añoʼ bʌ tij congregación wen tijicñayob, i cheʼʌch com sujtel jaʼel. Ti ora tsaʼ j qʼuele chaʼan yom mi cʌcʼ c bʌ ti Jehová. Cheʼʌch tsaʼ c mele, i ti 30 i chaʼan marzo ti 1957 tsaʼ c chʼʌmʌ jaʼ.

Cheʼ bʌ tsaʼix c chʼʌmʌ jaʼ, tsaʼ c ñaʼta ochel bajcheʼ precursor. Ti jujumpʼejl qʼuin tsaʼ caji c ñumen mulan, pero cujil chaʼan wocolʌch ti melol. Tsaʼ j cʼajtibe c bʌ bajcheʼ mi caj c locʼsʌben i yorajlel chaʼan mic majlel ti universidad yicʼot chaʼan mic mel queʼtel bajcheʼ precursor. Tsaʼ c chocbeyob majlel carta tac jiñi c mamá yicʼot querañob chaʼan mic tsictesʌbeñob chaʼan tsaʼix c ñaʼta j cʌy jiñi universidad, mic chaʼ majlel ti Venezuela i mi cochel bajcheʼ precursor.

Tsaʼ chaʼ majliyon ti Caracas ti junio ti 1957. Pero tsaʼ j qʼuele chaʼan mach ñoj weñic bajcheʼ an jiñi c familia. Yomob coltʌntel ti taqʼuin. ¿Bajcheʼ miʼ mejlel j coltañob? Tsaʼ subentiyon eʼtel ti jumpʼejl banco, pero joñon com sujtel ti precursor. Come jiñʌch chaʼan tsaʼ chaʼ tiliyon ti ili país. Tsaʼ c ñaʼta c mel tiʼ chaʼchajplel. Cabʌl jab tsaʼ c chaʼle  eʼtel yaʼ ti banco yicʼot precursoron. Cabʌl jax queʼtel, pero tijicñayon jaʼel.

Yambʌ tsaʼ bʌ i yʌqʼueyon c tijicñʌyel jiñʌch cheʼ tsaʼ j cʌñʌ Sylvia, juntiquil wen utsʼatax bʌ hermana chʼoyol bʌ ti Alemania, muʼ bʌ i wen cʼuxbin Jehová yicʼot tsaʼ bʌ tiliyob ti chumtʌl ti Venezuela. Ti wiʼil, tsaʼ ñujpuñiyon lojon i tsaʼ tili chaʼtiquil lon calobil: Michel (muʼ bʌ c suben lon bajcheʼ Mike) yicʼot Samira. Tsaʼ cʌlʌ lon jaʼel chaʼan jiñi c mamá miʼ chumtʌl yicʼoton lojon chaʼan miʼ mejlel lon j cʌntan. Anquese tsaʼ j cʌyʌ jiñi precursorado chaʼan mic mʌcʼlan jiñi c familia, maʼañic tsaʼ j cʌyʌ jiñi c bʌxlel bajcheʼ precursor. Joñon quicʼot Sylvia mi cochel lon bajcheʼ precursor auxiliar cheʼ bʌ mucʼʌch lon c mejlel cheʼ ti vacación tac.

Jiñi lon calobilob añobto ti escuela cheʼ bʌ tsaʼ ujti jiñi tsaʼ bʌ cʌlʌ tiʼ tejchibal. Cheʼ toj mi cʌl, wen chumulon lojon i miʼ qʼueloñob ti ñuc jiñi xʼeʼtelob ti banco. Pero com bʌ jiñʌch cheʼ mij qʼuejlel bajcheʼ juntiquil i wiñic Jehová. Maʼañic mij cʌy c ñaʼtan jiñi, jin chaʼan joñon quicʼot Sylvia tsaʼ caji c locʼsan lon j cuenta. Mi tsaʼ j cʌyʌ queʼtel yaʼ ti banco, mero on mi caj cʌqʼuentel taqʼuin. I come maʼañic lon c bet, tsaʼ lon c ñaʼta chaʼan mi pʼisbil jach mi lon j cʼʌn jiñi taqʼuin, mi caj i tsʼitaʼ jalijel.

Wocolʌch tsaʼ cubi chaʼan mic mel jiñi. Pero jiñi quijñam yicʼot c mamá tsaʼʌch i coltayoñob. Jin chaʼan, muqʼuix c chaʼ mejlel ti ochel bajcheʼ precursor. ¡Wen tijicñayon tsaʼ cubi! Maʼañix chuqui miʼ mʌctañon, pero ti wiʼil an chuqui tsaʼ subentiyon lon.

Ti jumpʼejl bʌ qʼuin, jiñi doctor tiʼ subeyon lon chaʼan Sylvia woliʼ cʌntan i yalobil. Mach pijtʌbilic lon c chaʼan jiñi. Wen tijicñayon lon, pero maʼañic mij cʌy c ñaʼtan chaʼan com ochel bajcheʼ precursor. ¿Muʼto ba caj i mejlel jiñi? Ti ora tsaʼ cʌcʼʌ lon ti lon c ñaʼtʌbal yicʼot ti lon c pusicʼal chaʼan talix yambʌ lon calobil, i comix lojon chaʼan miʼ yilan pañimil. Pero, ¿chuqui mi caj i yujtel yicʼot jiñi ñaʼtʌbil bʌ c chaʼan c mel?

Cheʼ bʌ tsaʼ lon j qʼuele chuqui jiñi com bʌ lojon, tsaʼ c mele lojon jiñi ñaʼtʌbil bʌ lon c chaʼan cʼʌlʌl tiʼ tejchibal. Gabriel tsiʼ yila pañimil ti abril ti 1985. Tsaʼ j cʌyʌ jiñi queʼtel ti banco i tsaʼ chaʼ ochiyon bajcheʼ precursor regular ti junio ti 1985. Ti wiʼil tsaʼ ochiyon ti jiñi Comité chaʼan sucursal wʌʼ ti país. Chaʼyajl o uxyajl ti jumpʼejl semana yom mic majlel yaʼ ti sucursal  come an cheʼ bʌ 80 kilómetro i ñajtlel yaʼ ti Caracas.

Jiñi sucursal yaʼan ti jiñi tejclum La Victoria, jin chaʼan tsaʼ majliyon lon ti chumtʌl yaʼi chaʼan lʌcʼʌl añon lon ti Betel. Wocolʌch tsaʼ lon cubi ti lon c pejtelel. Mic wen qʼuel ti ñuc tsaʼ bʌ i mele jiñi c familia. Tsaʼʌch i wen coltayoñob. Jiñi c chich Baha tsiʼ yʌlʌ chaʼan mi caj i cʌntan c mamá. Mike ñujpuñemix, pero Samira yicʼot Gabriel yaʼto an quicʼot lon. Jin chaʼan, yom miʼ cʌyob i yamigojob ti Caracas. Cheʼ jaʼel, jiñi quijñam Sylvia tsiʼ chaʼle wersa chaʼan miʼ ñʌmʼan ti jumpʼejl tejclum mach bʌ wen colemic. I ti lon c pejtelel tsaʼ lon c chaʼle wersa chaʼan mi lon c ñʌmʼan ti jumpʼejl otot mach bʌ wen colemic. Tiʼ sujm, cabʌlʌch chuqui tsaʼ lon j qʼuexta chaʼan mic loqʼuel lon ti Caracas i mic majlel lon ti La Victoria.

Pero anto chuqui yambʌ tsaʼ qʼuextʌyi. Gabriel tsaʼ ñujpuñi i Samira tsaʼ majli ti bajñel chumtʌl. Cheʼ jaʼel, cheʼ ti 2007, Sylvia yicʼot joñon tsaʼ pʌjyiyon lon ti Betel i cʼʌlʌl ili ora añon lon ti Betel. Mike, anciano i precursor yicʼot i yijñam i cʼabaʼ Mónica. Gabriel, anciano i an ti Betel am bʌ ti Italia yicʼot i yijñam i cʼabaʼ Ambra. Samira, precursora i miʼ coltan Betel cʼʌlʌl yaʼ baqui chumul.

Cabʌl chuqui ñuc tac bʌ i cʼʌjñibal tsaʼ c mele. Pero maʼañic mic chaʼ ñaʼtan c bʌ. Cheʼ muqʼuic i mejlel, mucʼʌch c chaʼ mel. Mic wen qʼuel ti ñuc pejtelel jiñi eʼtel am bʌ c mele tiʼ tojlel Jehová. Pejtelel ili jabil qʼuelbil c chaʼan chaʼan ñucʌch i cʼʌjñibal cheʼ lʌcʼʌl añonla la quicʼot. Mach yʌlʌyic chuqui jiñi yom bʌ mi lac yajcan lac mel, Jehová miʼ yʌqʼueñonla i ñʌchʼtʌlel lac pusicʼal mach bʌ añic i pʼisol (Fil. 4:6, 7). Joñon quicʼot Sylvia tijicñayon lojon mi lon c mel lon queʼtel ti Betel i cujil lojon chaʼan weñʌch am bʌ lon c mele tilel come tsaʼʌch lon c chʼʌmʌ ti ñuc Jehová tiʼ pejtelel ora.