1. ¿Bajcheʼ yilal tsaʼ ajñi tiʼ pejtelel chuqui tac melbil cʼʌlʌl tiʼ tejchibal?

CʼΛLΛL tiʼ tejchibal Pañimil yicʼot panchan chʌn temel tsaʼ ajñi chuqui melbil tac. Jehová yicʼot Jesús chʌn temel an i chaʼleyob eʼtel (troñel). Ñaxam bʌ tsiʼ mele Jehová jiñʌch Jesús. Ti wiʼil, Jesús tsiʼ «colta lac Yum tiʼ melol pejtel [jiñi] eʼtel» (Proverbios 8:30). Cheʼ jeʼel, jiñi i wiñicob Dios tiʼ pejtelel ora an i temel chaʼleyob eʼtel chaʼan miʼ tsʼʌctesañob chuqui subebilob. Jumpʼejl ejemplo, Noé yicʼot i familia temel tsiʼ meleyob jiñi arca. Cheʼ ñumeñix cabʌl jab, jiñi israelob temel tsiʼ meleyob jiñi tabernáculo, chaʼan miʼ chejob yicʼot miʼ cuchob majlel cheʼ mi’ chaʼleñob xʌmbal yaʼ tiʼ tiquiñal lum. Cheʼ bʌ añix jiñi templo, jiñi israelob tsiʼ chaʼleyob cʼay yicʼot temel tsiʼ ñijcayob utsʼatax bʌ música tac chaʼan miʼ yʌqʼueñob i ñuclel Jehová. Jiñi i wiñicob Dios an i meleyob tiʼ pejtelel iliyi come chʌn temel añob yicʼot temel an i chaʼleyob eʼtel (Génesis 6:14-16, 22; Números 4:4-32; 1 Crónicas 25:1-8).

2. a) ¿Chuqui toj sajtel bʌ ti lac pusicʼal chaʼan jiñi ñaxam bʌ xñoptʼañob? b) ¿Chuqui mi caj laj qʼuel ti ili temaj?

² Toj sajtel lac pusicʼal jaʼel cheʼ mi laj qʼuel chaʼan jiñi ñaxam bʌ  xñoptʼañob temel tsiʼ chaʼleyob eʼtel. Jiñi apóstol Pablo tsiʼ yʌlʌ chaʼan jiñi xñoptʼañob mach junlajalic chuqui yujilob melol yicʼot jiñi eʼtel aqʼuebiloʼ bʌ, pero wen temel tsaʼ ajñiyob come tiʼ tsajcayob Jesucristo. Pablo tsiʼ laji bajcheʼ lac bʌcʼtal (cuctal), chaʼan tiʼ chajp tiʼ chajp chuqui an ti lac bʌcʼtal, pero juntemel miʼ chaʼlen eʼtel (pejcan 1 Corintios 12:4-6, 12). ¿Ixcu joñonla? ¿Chuqui miʼ mejlel lac mel chaʼan juntemel mi la cajñel yicʼot cheʼ mi lac chaʼlen eʼtel ti subtʼan, ti laj congregación yicʼot ti lac familia? Ti ili temaj mi caj laj qʼuel.

3. ¿Chuqui tsiʼ qʼuele tiʼ ñajal jiñi apóstol Juan?

³ Ti jumpʼejl bʌ qʼuin, Jehová tsiʼ yʌqʼue i qʼuel jiñi apóstol Juan 7 ángelob choncol bʌ i wusob trompeta. Cheʼ bʌ jiñi i joʼticlel ángel tsiʼ wusu i trompeta, Juan tsiʼ qʼuele «jumpʼejl ecʼ tsaʼ bʌ yajli ti panchan cʼʌlʌl ti pañimil». Ili «ecʼ» tsiʼ cʼʌñʌ jumpʼejl llave chaʼan miʼ jamben i tiʼ jiñi tam bʌ «chʼen» yicʼot wen icʼchʼipan bʌ. Cheʼ jiñi, tsaʼ caji ti wen loqʼuel butsʼ. I tsaʼ loqʼui cabʌl sajcʼ ti jiñi butsʼ. Pero ili sajcʼ maʼañic tsiʼ cʼuxu teʼ yicʼot pimel tac, tsaʼ bʌ caji i cʼux jiñʌch jiñi wiñicob xʼixicob (quixtañujob) «mach bʌ añobic i sellojlel Dios tiʼ pam» (Apocalipsis 9:1-4). Juan yujil chaʼan tiʼ pejtelel jiñi sajcʼ miʼ mejlel i ticʼlañonla, cheʼ bajcheʼ tsaʼ ujti ti Egipto cheʼ tiʼ yorajlel Moisés (Éxodo 10:12-15). Jiñi sajcʼ tsaʼ bʌ i qʼuele Juan yom i yʌl jiñi xñoptʼañob bombiloʼ bʌ woli (choncol) bʌ i chʌn subob jiñi tsʌts bʌ tʼan tiʼ tojlel jiñi mach bʌ isujmic ñopbalʌl tac. I jiñi woli (yʌquel) bʌ i pijtañob chumtʌl tiʼ pejtelel ora wʌʼ ti Pañimil miʼ coltañob ti subtʼan. Temel woliʼ melob ili eʼtel am bʌ i colta cabʌlob chaʼan miʼ loqʼuelob yaʼ ti mach bʌ isujmic ñopbalʌl yicʼot tiʼ cʼʌb Satanás.

4. a) ¿Chuqui ti eʼtel yom miʼ tsʼʌctesan jiñi xñoptʼañob? b) ¿Bajcheʼ jach miʼ mejlel ti tsʼʌctesʌntel?

⁴ Jehová an i yʌqʼueyonla ñuc bʌ la queʼtel. Cheʼ maxto tilem i jilibal pañimil (mulawil), yom mi lac sub jiñi wen tʼan chaʼan Yumʌntel tiʼ pejtelel pañimil (Mateo 24:14; 28:19, 20). Yom mi lac pʌy añoʼ bʌ i tiquin tiʼ chaʼan miʼ japob jiñi jaʼ chaʼan bʌ laj cuxtʌlel. Yom i yʌl, tiʼ pejtelel yomoʼ bʌ i cʌn i sujmlel am bʌ ti Biblia yom mi laj cʌntesañob (Apocalipsis 22:17). Ili cojach miʼ mejlel lac tsʼʌctesan mi chʌn temel mi la cajñel yicʼot mi lac tem chaʼlen eʼtel ti laj congregación (Efesios 4:16).

5, 6. ¿Chuqui tac miʼ pʌs chaʼan i testigojonbʌla Jehová temel mi lac chaʼlen subtʼan?

⁵ Yom wen chajpʌbilonla chaʼan cabʌl quixtañu miʼ mejlel lac subeñob jiñi wen tʼan. Muʼ bʌ i mejlel i coltayonla jiñʌch muʼ bʌ lac subentel ti laj congregación, bajcheʼ yaʼ ti tempa bʌ chaʼan subtʼan. Yicʼot jiñi ticʼojel muʼ bʌ laj cʌqʼuentel miʼ mejlel lac sub jiñi wen tʼan chaʼan Yumʌntel tiʼ pejtelel pañimil yicʼot chaʼan mi lac puc yonlel jun loqʼuem bʌ ti Biblia. Cheʼ jaʼel, mi lac subentel chaʼan mi lac chaʼlen eʼtel cheʼ miʼ yujtel ñuc bʌ subtʼan. Cheʼ mi lac mel, woliyonla ti tem eʼtel yicʼot yonlel hermanojob lajal bʌ woliʼ melob tiʼ pejtelel pañimil. Woliyonla ti eʼtel yicʼot ángelob jaʼel, come jiñʌch miʼ coltañoñobla ti subtʼan (Apocalipsis 14:6).

⁶ Tiʼ sujm, mucʼʌch i wen aqʼueñonla tijicñʌyel cheʼ mi lac pejcan ti jujumpʼejl jab yaʼ ti Anuario baqui miʼ yʌl jiñi subtʼan tiʼ pejtelel pañimil. Jiñi uxpʼejl bʌ qʼuin colem tempa bʌ tac jiñʌch yambʌ muʼ bʌ i coltañonla chaʼan temel añonla. Ti jujumpʼejl jab, cheʼ maʼañix jaypʼejl qʼuin yom chaʼan jiñi colem tempa bʌ, jun temelonla mi lac pʌy tiʼ pejtelel quixtañu chaʼan miʼ majlelob. Cheʼ bʌ wolix jiñi programa, junsujm jach muʼ bʌ lac ñʌchʼtan ti lac pejtelel. Jiñi discurso tac, jiñi demostración yicʼot drama tac miʼ ñijcañonla lac ñumen aqʼuen laj cuxtʌlel Jehová. Yambʌ muʼ bʌ i coltañonla jiñʌch i Cʼajtesʌntel i chʌmel Jesús, muʼ bʌ i mejlel ti jujumpʼejl jab cheʼ ti 14 i chaʼan Nisán ti calendario judío  (1 Corintios 11:23-26). Cheʼ anto yom chaʼpʼejl uxpʼejl semana miʼ tejchel, mi lac pʌy tiʼ pejtelel quixtañujob chaʼan miʼ tilelob ti ili ñuc bʌ tempa bʌ. Cheʼ jiñi, ti lac pejtelel mi lac tempan lac bʌ cheʼ tsaʼix bʌjli qʼuin. Cheʼʌch mi lac jacʼ i mandar Jesús yicʼot mi lac pʌsben wocolix i yʌlʌ Jehová chaʼan tsaʼ bʌ i mele ti lac tojlel.

7. ¿Chuqui tac tajbil lac chaʼan cheʼ temel mi lac chaʼlen eʼtel?

⁷ Juncojt alʌ sajcʼ maʼañic chuqui miʼ wen mel. Cheʼ lac bajñel jach jaʼel, maʼañic mi lac mejlel ti subtʼan tiʼ pejtelel pañimil. Pero lajal bajcheʼ tiʼ pejtelel jiñi sajcʼ, temel mi lac chaʼlen eʼtel. Cheʼʌch miʼ mejlel lac subeñob i chaʼan bʌ Jehová cabʌl millón quixtañujob yicʼot mi laj coltañob i mejlel i yʌqʼueñob i ñuclel.

8, 9. a) ¿Chuqui tsiʼ taja ti tʼan Pablo chaʼan miʼ tsictesan chaʼan i cʼʌjñibalʌch cheʼ temel añonla? b) ¿Chuqui miʼ mejlel lac mel chaʼan chʌn temel miʼ yajñel jiñi congregación?

⁸ Jiñi apóstol Pablo tiʼ tsictesʌbe xñoptʼañob ti Éfeso bajcheʼ chajpʌbil jiñi congregación yicʼot tsiʼ tiqʼuiyob chaʼan yom miʼ tajob i «colel ti Cristo tiʼ pejtelel chuqui yom» (pejcan Efesios 4:15, 16). Pablo tsiʼ cʼʌñʌ ti tʼan lac bʌcʼtal chaʼan miʼ tsictesan chaʼan ti lac pejtelel miʼ mejlel laj coltan jiñi congregación chaʼan temel miʼ yajñel yicʼot miʼ tsajcañob Jesús, lajal bʌ bajcheʼ lac jol. Pablo tsiʼ yʌlʌ chaʼan tiʼ pejtelel chuqui an ti lac bʌcʼtal juntemel miʼ chaʼleñob eʼtel yicʼot i coltaya lac pʼaquel tac. Jin chaʼan, mi xcolelontola o añix lac jabilel, mi wen anto la cʼocʼlel o maʼañix, ¿chuqui miʼ mejlel lac mel chaʼan chʌn temel miʼ yajñel jiñi congregación?

⁹ Jesús tsiʼ waʼchoco ancianojob chaʼan miʼ qʼuelob jiñi congregación. Yom mi laj qʼuelob ti ñuc yicʼot mi lac jacʼ muʼ bʌ i subeñoñobla (Hebreos 13:7, 17). An i tajol wocolʌch. Pero mi mucʼʌch laj cʼajtiben i coltaya Jehová, mi caj i yʌqʼueñonla chʼujul bʌ i yespíritu yicʼot mi caj i coltañonla lac jacʼ tʼan. Mi añʌch lac pecʼlel yicʼot mi lac chaʼlen eʼtel yicʼot ancianojob, wen an laj cʼʌjñibal miʼ cajel yaʼ ti congregación. Luʼ temel mi caj la cajñel yicʼot mi caj laj cʼuxbin lac bʌ.

10. ¿Bajcheʼ mucʼob ti coltaya jiñi siervo ministerial chaʼan chʌn temel miʼ yajñel jiñi congregación? (Qʼuele jiñi recuadro am bʌ tiʼ tejchibal).

¹⁰ Jiñi añoʼ bʌ bajcheʼ siervo ministerial miʼ chaʼleñob coltaya chaʼan temel miʼ yajñel jiñi congregación. Miʼ chaʼleñob wersa i coltañob jiñi ancianojob, i mi lac wen aqʼueñob wocolix i yʌlʌ chaʼañob i coltaya. Jumpʼejl ejemplo, miʼ wen qʼuelob mi añʌch jiñi jun tac chaʼan subtʼan. Miʼ yʌqʼueñob i tijicñʌyel jiñi muʼ bʌ i cʼotelob tiʼ Yotlel Tempa bʌ. Yicʼot miʼ chaʼleñob eʼtel tiʼ tojʼesʌntel yicʼot i sʌqʼuesʌntel jiñi i Yotlel Tempa bʌ. Cheʼ mi lac chaʼlen eʼtel yicʼotob jiñi siervo ministerial, woli laj coltan jiñi congregación chaʼan temel miʼ yajñel yicʼot mi lac wen chajpan lac bʌ tiʼ melol i yeʼtel Jehová (mi caj a taj cheʼ bʌ miʼ yʌcʼ ti ñaʼtʌntel cheʼ bajcheʼ jiñi yaʼ ti Hechos 6:3-6).

11. ¿Chuqui miʼ mejlel i mel jiñi xcolelob chaʼan chʌn temel miʼ yajñel jiñi congregación?

¹¹ An ancianojob wajalix bʌ i cajelob ti tsʌts bʌ eʼtel ti congregación. Pero tajol wolix i ñoxʼañob i maʼañix miʼ wen mejlelob ti eʼtel. Jiñi xcolelob to bʌ cabʌl chuqui miʼ mejlel i melob. Mi jiñi añobix bʌ i jabilel miʼ coltañob, jiñi xcolelob ñumen cabʌl chuqui mi caj i mejlel i melob. Cheʼ jaʼel, mi jiñi añoʼ bʌ bajcheʼ siervo ministerial miʼ chaʼleñob wersa chaʼan wen miʼ melob i yeʼtel, ti wiʼil miʼ mejlelob ti sujtel bajcheʼ anciano (1 Timoteo 3:1, 10). An ancianojob xcolelob to bʌ wen cʼʌjqʼuemobix bʌ tiʼ chaʼan bʌ Jehová i tsaʼix sujtiyob bajcheʼ superintendente i chaʼan circuito yicʼot choncol i coltañob jiñi hermanojob ti cabʌl congregación. Ti lac pejtelel tijicña mi la cubin cheʼ an hermanojob xcolelob to bʌ yom bʌ i coltañob yambʌlob (pejcan Salmo 110:3 yicʼot Eclesiastés 12:1).

12, 13. ¿Chuqui miʼ mejlel i mel jiñi familia tac chaʼan chʌn temel miʼ yajñel?

¹² ¿Chuqui miʼ mejlel i mel jiñi familia tac chaʼan chʌn temel miʼ yajñel? Ñuc i cʼʌjñibal cheʼ ti jujumpʼejl semana mi lac mel jiñi chʼujutesaya ti familia. Mi jiñi tatʌl yicʼot i yalobilob mi yʌqʼueñob i yorajlel chaʼan miʼ tem cʌñob chaʼan Jehová, mi caj i ñumen cʼuxbiñob i bʌ. Ti jiñi bʌ ora miʼ mejlel i chajpañob muʼ bʌ caj i yʌlob ti subtʼan. Jiñʌch mi caj i ñumen coltañob. Cheʼ bʌ jumpʼejl familia miʼ tajob ti tʼan i chaʼan bʌ Jehová yicʼot miʼ pʌsob chaʼan mucʼʌch i cʼuxbiñob yicʼot yomob i mel chuqui utsʼat tiʼ tojlel, ñumen temel miʼ yubiñob i bʌ jiñi familia.

¹³ ¿Chuqui miʼ mejlel i mel jiñi wiñic yicʼot xʼixic ñujpuñemoʼ bʌ chaʼan temel miʼ yajñelob? (Mateo 19:6). Mi mucʼʌch i cʼuxbiñob Jehová yicʼot temel miʼ melbeñob i yeʼtel, ñumen pʼʌtʌl yicʼot tijicña mi caj i yajñelob. Wen ñucʌch cheʼ miʼ pʌsbeñob i bʌ cʼuxbiya, cheʼ bajcheʼ tsiʼ mele Abraham yicʼot Sara, Isaac yicʼot Rebeca, cheʼ jaʼel Elcana yicʼot Ana (Génesis 26:8; 1 Samuel 1:5, 8; 1 Pedro 3:5, 6). Cheʼʌch temel mi caj i yajñelob yicʼot wem bʌ i yamigojob Dios mi caj i sujtelob (pejcan Eclesiastés 4:12).

14. Mi maʼañic miʼ melben i yeʼtel Jehová jiñi a ñoxiʼal o a wijñam, ¿chuqui miʼ mejlel a mel chaʼan miʼ pʼʌtʼan a ñujpuñel?

¹⁴ Jiñi Biblia tsiquil miʼ yʌl chaʼan mach yomic mi lac ñujpuñel yicʼot mach bʌ añic miʼ melben i yeʼtel Jehová (2 Corintios 6:14). Pero an hermanojob ñujpuñemoʼ bʌ yicʼot mach bʌ Testigojic. ¿Chucoch? Tajol an tsaʼ bʌ sujti ti Testigo cheʼ bʌ ñujpuñemix, pero i yijñam o i ñoxiʼal maʼañic tsiʼ ñopo. Tajol yañoʼ bʌ tsaʼ ñujpuñiyob yicʼot juntiquil Testigo pero ti wiʼil tsiʼ ñajtʼesa i bʌ. Mi cheʼ añonla bajcheʼ jiñi, ¿chuqui miʼ mejlel lac mel chaʼan miʼ pʼʌtʼan lac ñujpuñel? Yom mi lac jacʼ jiñi ticʼojel am bʌ ti Biblia, anquese an i tajol wocolʌch. Laʼ laj qʼuel tsaʼ bʌ ujti tiʼ tojlel Mary yicʼot i ñoxiʼal, David. Testigojob tiʼ chaʼticlel, pero ti jumpʼejl bʌ qʼuin David tsiʼ cʌyʌ majlel ti tempa bʌ. Mary tsiʼ chaʼle wersa i pʌs chaʼan wem bʌ ijñamʌl yicʼot wen tac bʌ i melbal bajcheʼ xñoptʼan. Tsiʼ cʌntesa jiñi wʌctiquil i yalobilob i chaʼan bʌ Jehová yicʼot maʼañic tsiʼ cʌyʌ tempa bʌ yicʼot colem tempa bʌ tac. Ti wiʼil, tsaʼ coliyob i  yalobil i tsaʼ loqʼuiyob majlel tiʼ yotot. Mary ñumen wocol tsiʼ yubi chaʼan miʼ melben i yeʼtel Jehová tiʼ bajñelil, pero chʌn xucʼul tsaʼ ajñi. Miʼ cʌy revista tac yaʼ tiʼ yotot chaʼan miʼ qʼuel i ñoxiʼal. Ti jumpʼejl bʌ qʼuin, tsaʼ caji i pejcan. Ti wiʼil, tsaʼ caji ti chaʼ majlel ti tempa bʌ tac. Ili chaʼtiquilob añob juntiquil i buts wʌcpʼejl bʌ i jabilel, tiʼ pejtelel bʌ ora miʼ mʌctʌben i buchlib David yaʼ ti Yotlel Tempa bʌ. Cheʼ bʌ maʼañic miʼ cʼotel, jiñi alob miʼ yʌl: «Tatuch, tsaʼ c wen pijtayet ti tempa bʌ». Cheʼ ñumeñix 25 jab, David tsaʼ caji i chaʼ melben i yeʼtel Jehová. Ili ora, chaʼ temelix choncol i melbeñob i yeʼtel Dios yicʼot wen tijicñayob.

15. ¿Bajcheʼ miʼ mejlel jiñi xñujpuñelob añobix bʌ i jabilel chaʼan miʼ coltañob jiñi xñujpuñelob xcolelob to bʌ?

¹⁵ Satanás woliʼ ticʼlan jiñi familia tac. Jiñʌch junchajp chucoch jiñi ñujpuñemoʼ bʌ woli bʌ i melbeñob i yeʼtel Jehová yom wen temel miʼ yajñelob. Anquese cabʌlix jabil ñujpuñemob o maʼañic, yom miʼ ñaʼtañob chuqui miʼ mejlel i melob yicʼot i yʌlob chaʼan miʼ ñumen pʼʌtʼesañob i ñujpuñel. Jiñi xñujpuñelob añobix bʌ i jabilel, miʼ mejlel i pʌsbeñob chuqui wem bʌ jiñi xñujpuñelob xcolelob to bʌ. Tajol miʼ mejlel i pʌyob bixetic tiʼ chʼujutesaya ti familia. Cheʼʌch mi caj i qʼuelob jiñi xcolelob chaʼan anquese cabʌl jab miʼ ñumel, jiñi ñujpuñemoʼ bʌ chʌn temel yom miʼ yajñelob yicʼot miʼ pʌsbeñob i bʌ cʼuxbiya (Tito 2:3-7).

16, 17. ¿Chuqui ti bendición tac woli lac pijtan?

¹⁶ Cheʼ bʌ jiñi israelob miʼ majlelob ti Jerusalén chaʼan miʼ melob qʼuiñijel, juntemel miʼ chaʼleñob eʼtel. Miʼ chajpañob tiʼ pejtelel chuqui mi caj i cʼʌñob, ti wiʼil miʼ coltañob i bʌ cheʼ woliyobix ti xʌmbal majlel. Cheʼ bʌ miʼ cʼotelob yaʼ ti templo, miʼ chʼujutesañob Jehová yicʼot temel miʼ yʌqʼueñob i ñuclel (Lucas 2:41-44). Joñonla woli lac chajpan lac bʌ chaʼan mi lac chumtʌl yaʼ ti tsijiʼ bʌ pañimil. Jin chaʼan, ñuc i cʼʌjñibal cheʼ chʌn temel mi la cajñel yicʼot mi lac tem chaʼlen troñel. ¿Muʼ ba i tilel ti lac jol bajcheʼ to mi lac ñumen mejlel ti tem eʼtel la quicʼot la quermañojob?

¹⁷ Jiñi quixtañujob ila ti mulawil tʼoxol añob yicʼot miʼ cajatañob chuqui jach. Pero tiʼ coltaya Jehová, joñonla an lac ñʌchʼtʌlel yicʼot mi lac chʼʌmben isujm jiñi cʌntesa tac am bʌ ti Biblia. ¿Mach ba muqʼuic lac wen aqʼuen wocolix i yʌlʌ chaʼan jiñi? Tiʼ petol pañimil, jiñi i wiñiconbʌla Dios mi lac chʼujutesan cheʼʌch bajcheʼ yom. Cheʼ jeʼel, ñumen temel añonla ti ili cojix bʌ qʼuin. Cheʼʌch bajcheʼ tsiʼ wʌn alʌ Isaías yicʼot Miqueas, ti lac pejtelel juntemel woli lac letsel «tiʼ wits lac Yum» (Isaías 2:2-4; pejcan Miqueas 4:2-4). Mi chʌn temel mi la cajñel, cabʌl bendición mi caj lac taj. Lʌcʼʌlix mi caj laj qʼuel chaʼan ti lac pejtelel juntemel mi caj lac chʼujutesan Jehová wʌʼ ti Pañimil.