1. a) ¿Chucoch añʌch yom bʌ miʼ yʌjqʼuelob ti ñuc? b) ¿Chuqui mi caj laj qʼuel ti ili temaj?

CHEʼ bʌ an majqui mi laj qʼuel ti utsʼat yicʼot mi lac jacʼben i tʼan, mi lac pʌs chaʼan woli (choncol) laj cʌcʼ ti ñuc. Juntiquil quixtañu muʼ bʌ i mel chuqui wen o an ñuc bʌ i yeʼtel (troñel), mi la cʌcʼ ti ñuc. Ila ti temaj mi caj laj qʼuel majqui yom mi la cʌcʼob ti ñuc yicʼot chucoch.

2, 3. a) ¿Chucoch yom miʼ wen ajqʼuel ti ñuc Jehová? (Qʼuele jiñi dibujo am bʌ tiʼ tejchibal) b) ¿Majqui jiñi Tiñʌmeʼ muʼ bʌ i taj ti tʼan Apocalipsis 5:13, i chucoch yom mi la cʌcʼ ti ñuc?

² Ti Apocalipsis 5:13 miʼ yʌl chaʼan yom bʌ miʼ yʌjqʼuel ti ñuc jiñʌch «jini buchul bʌ tiʼ yumʌntel yicʼot jini Tiñʌmeʼ». «Jini buchul bʌ tiʼ yumʌntel» jiñʌch Jehová. Yaʼ ti capítulo 4 i chaʼan Apocalipsis miʼ taj ti tʼan junmojt ángelob woli (yʌquel) bʌ i tsictesañob chaʼan yom miʼ yʌqʼuentel i ñuclel Jehová, «jini cuxul bʌ ti pejtelel ora». Miʼ yʌlob: «Utsʼat c Yum lojon. Yom miʼ sujbel a ñuclel yicʼot a cʼuxbintel yicʼot a pʼʌtʌlel, come jatet tsaʼ mele pejtelel chuqui tac an. Tiʼ pejtelel  tsaʼ mejli chaʼan cheʼʌch a wom. Tsaʼ laj aqʼue i cuxtʌlel» (Apocalipsis 4:9, 11).

³ Jesucristo jiñʌch jiñi Tiñʌmeʼ muʼ bʌ i yʌjlel ti Apocalipsis 5:13. ¿Bajcheʼ la cujil? Come cheʼ bʌ wʌʼto an ti Pañimil, tsaʼ subenti bajcheʼ «i Tiñʌmeʼ Dios muʼ bʌ i chʼʌm majlel i mul pejtel pañimil» (Juan 1:29). Jin chaʼan, yomʌch mi laj cʌcʼ ti ñuc Jesús. Cojach jiñi rey acʼbil bʌ i chaʼan i cuxtʌlel chaʼan miʼ coltan jiñi wiñicob muʼ bʌ i yuman. I yomʌch miʼ yʌjqʼuel ti ñuc come jiñʌch «i Rey jini reyob, i Yum jini yumʌlob» (1 Timoteo 6:14-16). Tiʼ sujm, cheʼʌch mi la cubin lac bʌ bajcheʼ jiñi pʼʌtʌl bʌ ángelob woliyoʼ bʌ ti cʼay i woliʼ yʌlob: «Utsʼat jini Tiñʌmeʼ tsaʼ bʌ tsʌnsʌnti. Utsʼat miʼ chʼʌm i yeʼtel yicʼot i chubʌʼan, yicʼot i ñaʼtʌbal, yicʼot i pʼʌtʌlel yicʼot i ñuclel. Utsʼat mi lac sub i ñuclel» (Apocalipsis 5:12).

4. ¿Chucoch yomʌch mi la cʌcʼ ti ñuc Jehová yicʼot Cristo?

⁴ Ti Juan 5:22, 23 miʼ yʌl chaʼan Jehová tsiʼ waʼchoco Cristo bajcheʼ xmeloñel tiʼ pejtelel pañimil (mulawil). Ili jiñʌch i sujmlel cheʼ yom mi la cʌcʼ ti ñuc Jesús. Cheʼ mi la cʌqʼuen i ñuclel Jesús, woli la cʌcʼ ti ñuc Jehová. Mi mucʼʌch la cʌcʼ ti ñuc Jesús yicʼot i Tat, mi caj lac chumtʌl tiʼ pejtelel ora (pejcan Salmo 2:11, 12).

5. ¿Chucoch yomʌch mi la cʌjqʼuel ti ñuc anquese pʼisbil jach?

⁵ Ti lac pejtelel melbilonla «tiʼ yejtal Dios» (Génesis 1:27). Ili yom i yʌl chaʼan miʼ mejlel lac lajiben i melbal tac Dios. Miʼ mejlel lac pʌs cʼuxbiya, la cutslel yicʼot pʼuntaya. Cheʼ jaʼel, ti lac pejtelel tsaʼ aqʼuentiyonla jumpʼejl laj conciencia. Ili jiñʌch am bʌ ti lac malil muʼ bʌ i subeñonla chuqui wen yicʼot mach bʌ weñic, jiñi yom bʌ mi lac mel yicʼot mach bʌ yomic (Romanos 2:14, 15). Ti lac pejtelel mi lac mulan chuqui sʌc yicʼot utsʼat, i mi lac mulan chumtʌl ti ñʌchʼtʌlel. I tilelʌch cheʼ mi lac mulan bajcheʼ jiñi come Jehová miʼ mulan chuqui utsʼat melbil yicʼot jiñi ñʌchʼtʌlel. Wen tsiquil chaʼan ti lac pejtelel miʼ mejlel lac lajin Dios ti bajcheʼic jach. Jin chaʼan, yom mi laj qʼuejlel ti ñuc anquese pʼisbil jach (Salmo 8:5).

6, 7. ¿Chucoch mach lajalic bajcheʼ jiñi i testigojob Jehová miʼ yʌcʼob ti ñuc yambʌlob yicʼot cheʼ bajcheʼ miʼ mel jiñi yambʌ quixtañujob?

⁶ La cujil chaʼan yom mi la cʌcʼ ti ñuc jiñi yambʌlob, pero tajol maʼañic mi lac wen ñaʼtan bajcheʼ yom mi lac mel yicʼot baqui jaxʌl yom. Cheʼʌch miʼ yujtel bajcheʼ iliyi come jiñi wiñicob xʼixicob (quixtañujob) jiñʌch miʼ tsajcañob cheʼ bajcheʼ yilal miʼ mejlel ila ti pañimil am bʌ tiʼ cʼʌb Satanás. An wiñicob xʼixicob muʼ bʌ i qʼuejlelob bajcheʼ dios. Ñumeñix ti pʼis bajcheʼ miʼ yʌjqʼuelob ti ñuc i mach cheʼic jach miʼ qʼuejlelob bajcheʼ miʼ yʌl Jehová. An quixtañujob cheʼ bʌ miʼ xojob i pislel o miʼ melob i bʌ bajcheʼ jiñi wen cʌmbiloʼ bʌ. Tajol miʼ lajiñob bajcheʼ yilal jiñi ñucoʼ bʌ i yeʼtel ti ñopbalʌl o ti política, o jiñi wen cʌmbiloʼ bʌ ti película tac o jiñi ñuqui xʼalasob.

⁷ Jiñi isujm bʌ xñoptʼañonla la cujil chaʼan mach yomic ñumen ti pʼis yom mi laj cʌcʼ ti ñuc yambʌlob. Jesús cojach jiñi wiñic pʌsbil bʌ i chaʼan ti utsʼat bajcheʼ yom mi lac lajin (1 Pedro 2:21). Yom mi laj cʼajtesan chaʼan ti lac pejtelel tsaʼix lac chaʼle mulil i maʼañix mi lac tajben i ñuclel Dios (Romanos 3:23). Jin chaʼan, maʼañic juntiquil quixtañu yom bʌ miʼ chʼujutesʌntel  ila ti pañimil. Mi an majqui ñumeñix bʌ ti pʼis mi la cʌqʼuen i ñuclel, mi caj lac michʼesan Jehová.

8, 9. a) ¿Bajcheʼ yilal miʼ qʼuel yumʌlob jiñi i testigojob Jehová? b) ¿Baqui ora maʼañic mi lac jacʼben i tʼan yumʌlob?

⁸ An yomʌch bʌ mi la cʌcʼob ti ñuc chaʼan jiñi eʼtel muʼ bʌ i melob. Laʼ lac ñaʼtan tiʼ tojlel jiñi xʼeʼtelob ti yumʌl. Miʼ chaʼleñob eʼtel chaʼan bej an ñʌchʼtʌlel baqui chumulonla yicʼot miʼ qʼuelob chuqui yom lac chaʼan. Jiñi muʼ bʌ i melob mucʼʌch i yʌqʼueñonla lac wenlel. Jiñi apóstol Pablo tsiʼ yʌlʌ chaʼan mi laj qʼuelob ti ñuc «jini añoʼ bʌ i yeʼtel ti pañimil» yicʼot yom mi lac jacʼbeñob i mandar. Tsiʼ yʌlʌ: «Aqʼueñob tiʼ pejtelelob chuqui an ti laʼ wenta. Aqʼuenla tojoñel ti chajp ti chajp jini muʼ bʌ i chʼʌmob tojoñel [...]. Qʼuelela ti ñuc jini yom bʌ mi laʼ qʼuel ti ñuc» (Romanos 13:1, 7).

⁹ Jiñi i testigojonbʌla Jehová mi lac chaʼlen wersa chaʼan mi laj qʼuel ti ñuc jiñi xʼeʼtelob. Isujm chaʼan añobʌch i costumbre ti jujumpʼejl país. Jin chaʼan, tajol juntiquil yumʌl ti jumpʼejl país an chuqui miʼ cʼajtin maʼañic bʌ miʼ cʼajtintel ti yambʌ. Jiñi Testigojonbʌla mi lac mel chuqui miʼ yʌl jiñi yumʌlob, mach yʌlʌlic baqui chumulonla. Pero maʼañic mi lac jacʼ cheʼ bʌ an chuqui miʼ cʼajtiñob baqui yom mi lac ñusʌben i tʼan Dios. Mi lac jacʼben i tʼan Jehová yicʼot jin mi laj cʌcʼ ñuc, mach jiñic jiñi wiñicob (pejcan 1 Pedro 2:13-17).

10. ¿Chuqui wem bʌ ejemplo tsiʼ cʌybeyoñobla jiñi i wiñicob Jehová ti wajali?

¹⁰ Yaʼ ti Biblia mi lac taj wem bʌ ejemplo chaʼan tsaʼ bʌ i qʼueleyob ti ñuc jiñi xʼeʼtelob. Laʼ laj qʼuel tiʼ tojlel José yicʼot María. Cheʼ bʌ jiñi añoʼ bʌ i yeʼtel tsaʼ caji i qʼuelob jaytiquil chumulob ti jiñi tejclum tac am bʌ ti Roma, José yicʼot María tsaʼ majliyob ti Belén chaʼan miʼ chucob i bʌ ti jun, anquese María añix ti pijt chaʼan i yalobil (Lucas 2:1-5). Jiñi apóstol Pablo tsaʼʌch i qʼuele ti ñuc jaʼel jiñi yumʌlob. Cheʼ bʌ tsaʼ jopʼbenti i mul tiʼ tojlel jiñi rey Herodes Agripa yicʼot Festo, jiñi gobernador yaʼ ti Judea, wen jach bajcheʼ tsiʼ colta i bʌ (Hechos 25:1-12; 26:1-3).

11, 12. a) ¿Chucoch maʼañic mi laj cʌlʌx qʼuelob ti ñuc jiñi ñucoʼ bʌ i yeʼtel ti ñopbalʌl tac? b) ¿Chuqui tsaʼ ujti cheʼ bʌ juntiquil Testigo yaʼ ti Austria wen jach bajcheʼ tsiʼ pejca juntiquil am bʌ i yeʼtel?

¹¹ Pero ¿yom ba cʌlʌx jax mi la cʌcʼ ti ñuc jiñi ñucoʼ bʌ i yeʼtel ti ñopbalʌl tac? Mach cheʼiqui. Junlajal yom mi laj qʼuelob cheʼ bajcheʼ yambʌlob. Mach yomic mi laj cʌlʌx qʼuelob ti ñuc anquese cheʼʌch yomob mi lac mel. ¿Chucoch? Come maʼañic miʼ pʌsob i sujmlel chaʼan Dios yicʼot am bʌ tiʼ Tʼan. Jesús tsiʼ sube jiñi xcʌntesajob ti ñopbalʌl tac chaʼan chaʼchajp jax i pusicʼalob come mach weñic miʼ chaʼleñob cʌntesa (Mateo 23:23, 24). Pero maʼañic chubʌʼan cheʼ mucʼʌch lac wen qʼuelob ti ñuc jiñi xʼeʼtelob ti yumʌl. An i tajol coltʌbil i chaʼañoñobla cheʼ miʼ qʼuelob chaʼan cheʼʌch mi lac mel.

¹² Heinrich Gleissner jiñʌch juntiquil abogado yicʼot yujil bʌ chaʼan política yaʼ ti Austria tsaʼ bʌ i colta jiñi hermanojob. Cheʼ ti Segunda Guerra Mundial, tsaʼ chujqui majlel ti jumpʼejl campo i chaʼan nazijob. Cheʼ bʌ woliʼ pʌyob majlel ti tren, tsiʼ cʌñʌ juntiquil chʼejl bʌ Testigo chʼoyol bʌ yaʼ ti Austria i cʼabaʼ Leopold Engleitner. Jiñi hermano wen jach bajcheʼ tiʼ tsictesʌbe muʼ bʌ lac ñop, i Heinrich tsiʼ ñʌchʼta ti wen. Cheʼ bʌ tsaʼ ujti jiñi guerra, Heinrich  tsiʼ wen cʼʌñʌ jiñi i yeʼtel chaʼan miʼ coltan jiñi Testigojob yaʼ ti Austria. Tajol añʌch la cubi yan tac bʌ cheʼ bʌ ujtem jaʼel bajcheʼ jiñi.

13. ¿Majqui yom mi laj cʌcʼob ti ñuc, i chucoch?

¹³ Tiʼ pejtelel la quermañojob yomʌch mi laj cʌcʼob ti ñuc. Ñumento jiñi hermanojob añoʼ bʌ tiʼ wenta congregación tac, bajcheʼ ancianojob, superintendentejob i chaʼan circuito, ochemoʼ bʌ ti Comité i chaʼan Sucursal yicʼot ochemoʼ bʌ ti jiñi Junmojt muʼ bʌ i pʌsob bij (pejcan 1 Timoteo 5:17). Ili hermanojob miʼ cʌntʌbeñob i tejclum Dios. Jiñi Biblia miʼ yʌl chaʼan lajalobʌch bajcheʼ majtañʌl yaʼ ti congregación tac (Efesios 4:8). Jin chaʼan, yomʌch mi laj qʼuelob ti ñuc anquese yambʌ baqui chʼoyolob, bajcheʼ tsaʼ cʌntesʌntiyob, bajcheʼ yilal chumulob o mi wen añob i taqʼuin o maʼañic (qʼuele jiñi recuadro «¿Chuqui yom i yʌl?»). Jiñi xñoptʼañob cheʼ ti ñaxam bʌ siglo wen bajcheʼ tsiʼ pʌsbeyoñobla cʌytʌl. Tsiʼ yʌcʼʌyob ti ñuc jiñi hermanojob waʼchocobiloʼ bʌ, i cheʼʌch mi lac mel jaʼel. Pero maʼañic mi laj qʼuelob bajcheʼ ángelob o chaʼan wen ñucob jax cheʼ bʌ yaʼañob la quicʼot. Mi laj qʼuelob ti ñuc chaʼan jiñi eʼtel muʼ bʌ i melob yicʼot chaʼan añob i pecʼlel (pejcan 2 Corintios 1:24 yicʼot Apocalipsis 19:10).

14, 15. ¿Bajcheʼ mach lajalic jiñi ancianojob ti congregación yicʼot jiñi ñucoʼ bʌ i yeʼtel ti ñopbalʌl tac?

¹⁴ Jiñi ancianojob ti congregación añob i pecʼlel. Mach yomobic chaʼan miʼ cʌlʌx qʼuejlelob ti ñuc bajcheʼ yambʌlob. Maʼañic miʼ lajob i bʌ bajcheʼ ñucoʼ bʌ i yeʼtel ti yambʌ ñopbalʌl tac. Mach lajalobic bajcheʼ jiñi yambʌlob cheʼ tiʼ yorajlel Jesús.  Jesús tsiʼ yʌlʌ tiʼ tojlel jiñi ñucoʼ bʌ i yeʼtel ti ñopbalʌl tac: «Miʼ mulañob ñaxan bʌ buchlibʌl ti qʼuiñijel, yicʼot jini ñaxan bʌ buchlibʌl ti sinagoga. Miʼ mulañob i yʌqʼuentelob cortesía baʼan choñoñibʌl» (Mateo 23:6, 7).

¹⁵ Jiñi ancianojob miʼ jacʼob ili tsaʼ bʌ i yʌlʌ Jesús: «Mach yomic mi laʼ pejcʌntel ti maestro come an juntiquil jach laʼ maestro, jiñʌch Cristo. Ti pejteletla laʼ wermano laʼ bʌ. Mach mi laʼ tatin yambʌ winic ti pañimil, come juntiquil jach laʼ Tat, jiñʌch am bʌ ti panchan. Cheʼ jaʼel mach yomic mi laʼ pejcʌntel ti yumʌl come juntiquil jach laʼ yum, jiñʌch Cristo. Jini ñumen ñuc bʌ winic ti laʼ tojlel, laʼ i coltañetla. Majqui jach chan miʼ mel i bʌ mi caj i peqʼuesʌntel. Majqui jach pecʼ miʼ mel i bʌ, mi caj i chañʼesʌntel» (Mateo 23:8-12). Mi jiñi ancianojob tiʼ pejtelel pañimil miʼ chʼujbiñob tsaʼ bʌ i yʌlʌ Jesús yicʼot añobʌch i pecʼlel, jiñi yambʌ hermanojob mi caj i cʼuxbiñob yicʼot i qʼuelob ti ñuc.

16. ¿Chucoch yom mi lac chaʼlen wersa chaʼan mi la cʌcʼ ti ñuc yambʌlob?

¹⁶ Chaʼan pʼisbil jach bajcheʼ mi la cʌcʼ ti ñuc yambʌlob, tajol wocolʌch mi la cubin. Cheʼʌch tsaʼ ujti tiʼ tojlel jiñi xñoptʼañob cheʼ ti ñaxam bʌ siglo (Hechos 10:22-26; 3 Juan 9, 10). Pero yomʌch mi lac chaʼlen wersa. Mi caj lac taj cabʌl lac wenlel cheʼ mucʼʌch la cʌcʼ ti ñuc yambʌlob cheʼ bajcheʼ miʼ mulan Jehová.

17. ¿Baqui tac bʌ wenlel cheʼ mucʼʌch la cʌcʼ ti ñuc añoʼ bʌ i yeʼtel?

¹⁷ Cheʼ bʌ mi la cʌcʼ ti ñuc jiñi añoʼ bʌ i yeʼtel yaʼ baqui chumulonla, tajol miʼ mejlel i coltañoñobla chaʼan maʼañic miʼ mʌctʌntel lac subtʼan. Tajol utsʼat chuqui mi caj i ñaʼtañob chaʼan muʼ bʌ lac mel. Cheʼʌch tsaʼ ujti ti Alemania. Birgit jiñʌch juntiquil precursora tsaʼ bʌ majli i qʼuel i yixicʼal (yixicpʼeñal) cheʼ bʌ loqʼuelix mucʼ ti escuela. Jiñi maestrajob tsiʼ subeyob chaʼan tsiʼ mulayob i cʌntesan jiñi xbiʼtalob Testigojoʼ bʌ. Tsiʼ yʌlʌyob jaʼel chaʼan maʼañic bajcheʼ wen yilal yaʼ ti escuela come jiñi xbiʼtalob Testigojoʼ bʌ weñob i melbal. Jiñi hermana tiʼ tsictesa chaʼan mucʼʌch i cʌntesʌntelob tiʼ tat i ñaʼ chaʼan yom miʼ yʌcʼob ti ñuc jiñi maestrojob, cheʼʌch bajcheʼ miʼ mulan Dios. Juntiquil maestra tsiʼ yʌlʌ chaʼan utsʼatax miʼ chaʼlen cʌntesa cheʼ junlajalobic jiñi xbiʼtalob bajcheʼ jiñi Testigojoʼ bʌ. Jiñi maestrajob utsʼat chuqui tsiʼ ñaʼtayob tiʼ tojlel jiñi xcolelob Testigojoʼ bʌ, i ti wiʼil an juntiquil tsajñi bʌ ti jumpʼejl colem tempa bʌ.

18, 19. ¿Chuqui yom mi laj cʼajtesan cheʼ mi la cʌcʼ ti ñuc jiñi ancianojob?

¹⁸ Jiñi principio tac am bʌ tiʼ Tʼan Dios miʼ coltañonla lac ñaʼtan bajcheʼ yom mi la cʌcʼ ti ñuc jiñi ancianojob ti congregación (pejcan Hebreos 13:7, 17) (qʼuele jiñi recuadro «¿Chuqui yom i yʌl?»). Miʼ mejlel lac subeñob chuqui wen chaʼan jiñi eʼtel  muʼ bʌ i melob, i cheʼʌch yom mi lac mel. Cheʼ jaʼel, yom mi lac jacʼ chuqui miʼ subeñoñobla. Cheʼ jiñi, tijicña mi caj i melob i yeʼtel. Jiñi Biblia miʼ yʌl jaʼel chaʼan cheʼʌch yom lac ñopoñel (chʼujbiya) cheʼ bajcheʼ i chaʼañob. Pero ili mach yom i yʌl chaʼan cheʼ yom mi lac xoj lac pislel, mi lac chaʼlen tʼan o mi lac chaʼlen cʌntesa bajcheʼ juntiquil anciano wen cʌmbil bʌ. Cheʼ mi lac mel bajcheʼ jiñi, mach jiñix woli lac tsajcan Cristo. Yom mi laj cʼajtesan chaʼan xmulilob jaʼel jiñi ancianojob.

¹⁹ Cheʼ mi la cʌcʼ ti ñuc jiñi ancianojob, pero mach cheʼic mi laj qʼuelob bajcheʼ jiñi wen ñucoʼ bʌ, mi caj laj coltañob chaʼan miʼ chʌn pʌsob i pecʼlel. Bajcheʼ ili maʼañic mi caj i ñaʼtañob chaʼan ñumen ñucob bajcheʼ yambʌlob o chaʼan maʼañix miʼ tajob i sajtemal.

20. ¿Baqui tac bʌ wenlel mi lac taj cheʼ mi la cʌcʼ ti ñuc yambʌlob?

²⁰ Cheʼ mi la cʌcʼ ti ñuc yambʌlob miʼ coltañonla chaʼan maʼañic mi lac bajñel ñaʼtan lac bʌ i chaʼan mi lac pʌs lac pecʼlel cheʼ mi laj qʼuejlel ti ñuc jaʼel. Cheʼ mi laj cʌcʼ ti ñuc yambʌlob miʼ cʌntañonla jaʼel. Miʼ coltañonla chaʼan maʼañic mi laj cʌy Jehová cheʼ bʌ an juntiquil muʼ bʌ laj qʼuel ti ñuc, miʼ mel mach bʌ weñic. Yambʌ bajcheʼ miʼ coltañonla cheʼ mi laj cʌcʼ ti ñuc yambʌlob jiñʌch cheʼ chʌn lʌcʼʌl mi la cajñel tiʼ yorganización Jehová. Ili organización maʼañic majqui ñumeñix tiʼ pʼis miʼ yʌqʼuen i ñuclel.

21. ¿Baqui bʌ jiñi ñuc bʌ wenlel mi lac taj cheʼ mi la cʌcʼ ti ñuc yambʌlob?

²¹ Dios utsʼat miʼ qʼuelonla cheʼ mi la cʌcʼ ti ñuc yambʌlob, i jiñʌch ñumen ñuc bʌ lac wenlel. Cheʼ jaʼel, cheʼ mi la cʌcʼ ti ñuc yambʌlob mi lac pʌs chaʼan choncolʌch lac jacʼben i tʼan Dios yicʼot chʌn xucʼulonla tiʼ tojlel. Cheʼ bajcheʼ ili, Jehová miʼ mejlel i jacʼben tsaʼ bʌ i yʌlʌ Satanás chaʼan maʼañic majqui xucʼul mi caj i yajñel tiʼ tojlel Dios (Proverbios 27:11). Cabʌl quixtañu mach yujilobic bajcheʼ yom miʼ yʌjqʼuel ti ñuc jiñi yambʌlob. Yom tijicñayonla come Jehová miʼ cʌntesañonla chaʼan yom mi la cʌcʼ ti ñuc yambʌlob cheʼ bajcheʼ miʼ mulan.