Cheʼ ti jabil 2012, jiñi yujiloʼ bʌ chaʼan arqueología tsiʼ tajayob i xujtʼil tac jumpʼejl ucʼum melbil bʌ ti ocʼol añix bʌ 3,000 jab i ñoxlel. Jiñi wen yujiloʼ bʌ wen tijicña tsiʼ yubiyob chaʼan ili. ¿Chucoch? Mach jiñic tiʼ caj jiñi ucʼum tsaʼ bʌ i tajayob, jiñʌch chaʼan chuqui tsʼijbubil tsiʼ tajayob.

Cheʼ bʌ jiñi wen yujiloʼ bʌ chaʼan arqueología tsaʼ mejli i chaʼ pʌcʼob i xejpʼil tac jiñi ucʼum, tsaʼ mejli i pejcañob jiñi yaʼ bʌ tsʼijbubil tiʼ tʼan cananeojob, muʼ bʌ i yʌl: «Esbaal ben Bedá», yom bʌ i yʌl «Esbaal, i yalobil Bedá». Ili jiñʌch ñaxam bʌ baqui tsʼijbubil tsiʼ tajayob jiñi cʼabaʼʌl.

Jiñi Biblia miʼ taj ti tʼan juntiquil wiñic i cʼabaʼ Esbaal. Ili jiñʌch juntiquil i yalobil jiñi rey Saúl (1 Crónicas 8:33; 9:39). Jiñi maestro Yosef Garfinkel yaʼʌch an jeʼel cheʼ bʌ tsaʼ tajle jiñi ucʼum. Tsiʼ yʌlʌ chaʼan ñucʌch i cʼʌjñibal cheʼ ili cʼabaʼʌl cojach miʼ yʌjlel ti Biblia cheʼ tiʼ yorajlel jiñi rey David i chaʼan wʌle tsaʼix tajle yambʌ baqui miʼ tilel. An muʼ bʌ i yʌlob chaʼan ili cʼabaʼʌl cojach tsaʼ cʼʌjñi ti jiñi bʌ ora. Ili jiñʌch yambʌ bajcheʼ miʼ pʌs jiñi arqueología chaʼan isujmʌch muʼ bʌ i yʌl jiñi Biblia.

Jiñi cʼabaʼʌl Esbaal miʼ cʼʌjñel jaʼel yaʼ ti Biblia bajcheʼ Isboset (Is-bóset) (2 Samuel 2:10). ¿Chucoch miʼ cʼʌjñel bajcheʼ iliyi? Jiñi muʼ bʌ i wen tsajiñob tsiʼ yʌlʌyob chaʼan tajol maʼañic tsaʼ cʼʌjñi jiñi cʼabaʼʌl Esbaal yaʼ tiʼ chaʼpʼejlel libro i chaʼan Samuel come jiñi israelob jin miʼ ñaʼtañob i dios cananeojob i cʼabaʼ Baal, am bʌ tiʼ wenta jaʼal. Pero yaʼ ti ñaxam bʌ libro i chaʼan Crónicas miʼ cʼʌn Esbaal.