1-3. ¿Chuqui yom i yʌl cheʼ mi lac melben i yeʼtel Jehová ‹tiʼ pejtelel lac pusicʼal›? Acʼʌ jumpʼejl ejemplo.

TI LAC pejtelel xmulilonla yicʼot mi lac taj lac sajtemal. Jehová tsiʼ yʌcʼʌ i Yalobil chaʼan miʼ coltañonla yicʼot miʼ ñusʌbeñonla lac mul, jin chaʼan yom mi la cʌqʼuen wocolix i yʌlʌ. Miʼ mejlel laj cʼajtiben chaʼan miʼ ñusʌbeñonla lac mul mi mucʼʌch laj cʌy lac mel yicʼot mi lac pʌs lac pecʼlel. Mi lac ñop chaʼan Jehová maʼañic miʼ ticʼlañonla tiʼ caj xmulilonla (Salmo 103:10). Pero Jehová yom cheʼ mi lac melben i yeʼtel (troñel) ‹tiʼ pejtelel lac pusicʼal› (1 Crónicas 28:9). ¿Bajcheʼ miʼ mejlel lac mel anquese xmulilonla?

² Chaʼan mi lac ñaʼtan, miʼ mejlel lac lajin tsaʼ bʌ i mele jiñi rey Asa (Asá) yicʼot jiñi rey Amasías. Tiʼ chaʼticlel tsiʼ meleyob chuqui wen, pero tsiʼ tajayob i sajtemal jeʼel. Jiñi Biblia miʼ yʌl chaʼan «xucʼul tsiʼ mele Asa tiʼ tojlel lac Yum tiʼ pejtelel i jabilel» (2 Crónicas 15:16, 17; 25:1, 2; Proverbios 17:3). Asa tsiʼ chaʼle wersa chaʼan tiʼ pejtelel i pusicʼal miʼ mel chuqui wen tiʼ tojlel Jehová (1 Crónicas 28:9). Pero  Amasías maʼañic tsiʼ mele. Maʼañic tsiʼ melbe i yeʼtel Jehová ‹tiʼ pejtelel i pusicʼal›. Cheʼ bʌ tsiʼ jisa i contra Dios, tsiʼ chʼʌmʌ majlel jiñi diosteʼ tac i tsaʼ caji i chʼujutesan (2 Crónicas 25:11-16).

³ Jiñi muʼ bʌ i melben i yeʼtel Jehová ‹tiʼ pejtelel i pusicʼal›, tiʼ pejtelel i pʼʌtʌlel miʼ cʼuxbin yicʼot tiʼ pejtelel ora yom i chʼujutesan. Cheʼ bʌ jiñi Biblia miʼ cʼʌn jiñi tʼan pusicʼal lʌcʼʌl tiʼ pejtelel ora miʼ taj ti tʼan bajcheʼ yilalonla. Ila ochem jiñi lac pensar, chuqui mi lac mulan, muʼ bʌ lac ñaʼtan lac mel ti talto bʌ qʼuin yicʼot chucoch mi lac mel muʼ bʌ lac yajcan. Mucʼʌch i mejlel lac chʼujutesan Jehová ti jumpʼejl lac pusicʼal anquese xmulilonla. Maʼañic mi lac melben i yeʼtel chaʼan xicʼbilonla o chaʼan jach cheʼ miʼ mel yambʌlob, mi lac mel come cheʼʌch la com (2 Crónicas 19:9).

4. ¿Chuqui mi caj laj qʼuel ti ili temaj?

⁴ Chaʼan mi lac ñumen chʼʌmben isujm yom bʌ i yʌl cheʼ ti jumpʼejl lac pusicʼal yom mi lac melben i yeʼtel Jehová, laʼ laj qʼuel tiʼ tojlel Asa, Josafat (Jehosafat), Ezequías yicʼot Josías. Ili reyob ti Judá, xucʼul tsaʼ ajñiyob. Utsʼat tsaʼ qʼuejliyob ti Dios anquese tsiʼ tajayob i sajtemal. Jehová tsiʼ qʼuele chaʼan ti jumpʼejlob i pusicʼal tsiʼ melbeyob i yeʼtel. ¿Chucoch cheʼ tsiʼ qʼuele? ¿Bajcheʼ miʼ mejlel lac lajiñob? Laʼ laj qʼuel.

5. ¿Chuqui tsiʼ mele Asa cheʼ bʌ tsaʼ ochi ti rey?

⁵ Asa jiñʌch i yuxticlel rey tsaʼ bʌ ajñi ti Judá cheʼ bʌ jiñi tejclum Israel tsaʼ tʼoxle ti chaʼpʼejl yumʌntel, jiñi i chaʼan bʌ Israel yicʼot i chaʼan bʌ Judá. Cheʼ bʌ tsaʼ ochi ti rey jiñi Asa yaʼ ti Judá, tsiʼ jisa jiñi mach bʌ isujmic chʼujutesaya yicʼot tiʼ pejtelel jiñi tsʼiʼlel bibiʼ jax bʌ miʼ mejlel. Tsiʼ jisa jiñi diosteʼ tac muʼ bʌ i chʼujutesʌntel yicʼot tsiʼ choco loqʼuel ti templo jiñi wiñicob muʼ bʌ i melob tsʼiʼlel. Tsiʼ chilbe jiñi ñuc bʌ i yeʼtel i chuchuʼ (coʼ) «come tsiʼ mele diosteʼ i cʼabaʼ Asera» (1 Reyes 15:11-13). Asa tiʼ sube jaʼel jiñi tejclum chaʼan miʼ tsajcañob Jehová yicʼot miʼ jacʼbeñob «i mandar». Tsiʼ chaʼle wersa i coltan yambʌlob chaʼan miʼ chʼujutesañob Jehová (2 Crónicas 14:4).

6. ¿Chuqui tsiʼ mele Asa cheʼ bʌ Judá tsaʼ caji ti contrajintel ti etíopejob?

⁶ Ti jiñi ñaxam bʌ 10 jab tsiʼ chaʼle yumʌntel Asa, jiñi tejclum Judá tsaʼ ajñi ti ñʌchʼtʌlel. Ti wiʼil, jiñi etíopejob tsiʼ tempayob jumpʼejl millón soldado yicʼot 300 carreta chaʼan guerra i tsaʼ caji i contrajiñob Judá (2 Crónicas 14:1, 6, 9, 10). ¿Chuqui tsiʼ mele Asa? Ti jumpʼejl i pusicʼal tsiʼ ñopo chaʼan Jehová miʼ mejlel i coltan i tejclum. Jin chaʼan tsiʼ sube chaʼan laʼ i coltan i mʌl (jot) jiñi guerra (pejcan 2 Crónicas 14:11). Jehová añix i colta jiñi i tejclum chaʼan miʼ jisan i contrajob, anquese jiñi reyob mach xucʼulobic tiʼ tojlel. Cheʼ bajcheʼ jiñi tsiʼ pʌsʌ chaʼan jiñʌch isujm bʌ Dios (1 Reyes 20:13, 26-30). Pero Jehová tsiʼ colta jiñi tejclum Judá come Asa tsiʼ ñopo chaʼan jin mi caj i coltan. Jehová  tsiʼ jacʼbe i yoración Asa i tsaʼ mejli i jisan jiñi etíopejob (2 Crónicas 14:12, 13). Pero ti jumpʼejl bʌ qʼuin, Asa tsiʼ cʼajtibe i coltaya jiñi rey am bʌ ti Siria i mach jiñic tsiʼ cʼajtibe Jehová (1 Reyes 15:16-22). Pero Jehová tsiʼ taja i qʼuel i cʼuxbiya Asa tiʼ tojlel. «Xucʼul tsiʼ ñopo lac Yum ti pejtelel i jabilel». ¿Bajcheʼ miʼ mejlel lac tsajcan jiñi wem bʌ i melbal Asa? (1 Reyes 15:14).

7, 8. ¿Bajcheʼ miʼ mejlel lac tsajcan jiñi wem bʌ i melbal Asa?

⁷ ¿Bajcheʼ mi lac ñaʼtan mi wolʌch lac melben i yeʼtel Jehová tiʼ pejtelel lac pusicʼal? Miʼ mejlel laj cʼajtiben lac bʌ: «¿Muʼ ba c jacʼben i tʼan Jehová anquese wocol mi cubin? ¿Muʼ ba c chaʼlen coltaya chaʼan sʌc miʼ yajñel jiñi congregación?». Laʼ cu lac ñaʼtan bajcheʼ cʼamel tsiʼ pʌsʌ i chʼejlel Asa chaʼan miʼ chilben ñuc bʌ i yeʼtel jiñi i chuchuʼ. An i tajol yom mi lac pʌs lac chʼejlel bajcheʼ Asa. Jumpʼejl ejemplo, ¿chuqui mi caj lac mel cheʼ bʌ juntiquil ti lac familia o la camigo miʼ mel tsʌts bʌ mulil i miʼ chaʼlentel ti expulsar ti congregación? ¿Muʼ ba caj laj cʌy lac ñochtan? ¿Chuqui mi caj i ñijcañonla lac mel jiñi lac pusicʼal?

⁸ Cheʼ bajcheʼ Asa, an i tajol mi caj la cubin chaʼan tiʼ pejtelel wiñicob xʼixicob (quixtañujob) an ti laj contra. Tajol jiñi lac piʼʌlob ti qʼueljun o jiñi maestrojob miʼ wajleñoñobla tiʼ caj i testigojonla Jehová. Cheʼ jaʼel, jiñi lac piʼʌlob ti eʼtel miʼ wajleñoñobla cheʼ bʌ mi lac tsʼitaʼ cʌy la queʼtel chaʼan mi lac majlel ti colem tempa bʌ o tiʼ caj maʼañic mi lac ñumen chaʼlen eʼtel chaʼan mi lac ñumen taj taqʼuin. Ti jimbʌ ora, yom mi lac wen ñop Dios cheʼ bajcheʼ tsiʼ mele Asa. Laʼ lac melben oración Jehová, yom chʼejlonla yicʼot laʼ lac chʌn mel chuqui toj. Laʼ laj cʼajtesan chaʼan Jehová mi caj i pʼʌtʼesañonla cheʼ bajcheʼ tsiʼ mele tiʼ tojlel Asa.

9. ¿Chucoch mi lac tijicñesan Jehová cheʼ mi lac chaʼlen subtʼan?

⁹ Asa maʼañic tsiʼ bajñel ñaʼta i bʌ. Tsiʼ ñaʼta jaʼel bajcheʼ miʼ mejlel i coltan jiñi yambʌlob chaʼan miʼ sʌclañob Jehová. Joñonla jeʼel yom mi laj coltan jiñi quixtañujob chaʼan miʼ chʼujutesañob Jehová. Mucʼʌch i qʼuel ti ñuc cheʼ mi laj cʌcʼ ti cʌjñel tiʼ tojlel yambʌlob. Jehová wen tijicña miʼ yubin mi chaʼañʌch mi laj cʼuxbin yicʼot mi laj qʼuel ti ñuc jiñi quixtañujob cheʼ mi lac chaʼlen subtʼan.

10, 11. ¿Bajcheʼ miʼ mejlel lac tsajcan jiñi wem bʌ i melbal Josafat?

¹⁰ Josafat jiñʌch juntiquil i yalobil Asa. Jiñi Biblia miʼ yʌl chaʼan Josafat «xucʼul tsiʼ tsajcʌbe i melbal Asa» (2 Crónicas 20:31, 32). ¿Bajcheʼ tsiʼ mele? Tiʼ tsajcʌbe wem bʌ i melbal i tat yicʼot tsiʼ ñijcʌbe i pusicʼal jiñi tejclum chaʼan miʼ chʌn chʼujutesañob Jehová. Tsiʼ choco majlel wiñicob yaʼ ti tejclum tac i chaʼan Judá chaʼan miʼ cʌntesañob jiñi quixtañu muʼ bʌ i yʌl «i juñilel i mandar lac Yum» (2 Crónicas 17:7-10). Josafat tsajñi to  yaʼ ti lum am bʌ ti norte yaʼ tiʼ yumʌntel Israel, ti jiñi wits i cʼabaʼ Efraín, chaʼan miʼ coltan jiñi quixtañujob chaʼan miʼ chaʼ chʼujutesañob Jehová (2 Crónicas 19:4). Josafat jiñʌch juntiquil wem bʌ rey «tsaʼ bʌ i tsajca lac Yum tiʼ pejtelel i pusicʼal» (2 Crónicas 22:9).

¹¹ Ili ora, Jehová yom chaʼan miʼ cʌjñel tiʼ pejtelel quixtañujob, i joñonla miʼ mejlel laj coltañob. Laʼ laj cʼajtiben lac bʌ: «¿Muʼ ba c chaʼlen wersa subtʼan ti jujumpʼejl uw? ¿Am ba majqui mic mulan j cʌntesan muʼ bʌ i yʌl jiñi Biblia chaʼan miʼ melben i yeʼtel Jehová? ¿Muʼ ba j cʼajtiben i coltaya Jehová chaʼan mic taj?». Mi mucʼʌch lac chaʼlen wersa, Jehová mi caj i coltañonla chaʼan mi lac tech jumpʼejl estudio. Anquese tajol yomʌch mi lac locʼsʌben i yorajlel, ¿la comʌch ba laj cʌntesan juntiquil chaʼan miʼ cʌn muʼ bʌ i yʌl jiñi Biblia? Laʼ laj cʼajtesan chaʼan Josafat tsiʼ ñopo i coltan jiñi yambʌlob chaʼan miʼ chaʼ chʼujutesañob Jehová. Joñonla jaʼel miʼ mejlel laj coltañob jiñi tsaʼix bʌ i cʌyʌyob i bʌ ti subtʼan. Cheʼ jaʼel jiñi ancianojob miʼ mejlel i chajpañob chaʼan miʼ julaʼtañob yicʼot miʼ coltañob jiñi expulsadojoʼ bʌ tsaʼix bʌ i cʌyʌyob i mul.

12, 13. a) ¿Chuqui tsiʼ mele Josafat cheʼ bʌ tsiʼ chaʼle bʌqʼuen? b) ¿Chucoch yom mi lac tsajcʌben i melbal Josafat?

¹² Ti jumpʼejl bʌ qʼuin, jiñi siriojob tsaʼ chaʼ majliyob ti guerra tiʼ contra Judá. Pero Josafat tsiʼ mele bajcheʼ i tat i tsiʼ ñopo chaʼan Jehová mi caj i coltan (pejcan 2 Crónicas 20:2-4). Josafat tsiʼ wen chaʼle bʌqʼuen. Jin chaʼan, tsiʼ cʼajtibe i coltaya Jehová i tiʼ sube chaʼan mach mejlic i bajñel jotob jiñi guerra. Tsiʼ yʌlʌ jaʼel chaʼan mach yujilic chuqui yom miʼ mel. Josafat tsiʼ wen ñopo chaʼan Jehová mi caj i coltan, tiʼ sube: «Wʌʼ añon lojon ti a tojlel» (2 Crónicas 20:12).

¹³ Tajol mach la cujilic bajcheʼ yom mi lac ñusan jumpʼejl wocol jaʼel, i mi lac chaʼlen bʌqʼuen, cheʼ bajcheʼ Josafat (2 Corintios 4:8, 9). Pero laʼ laj cʼajtesan chuqui tsiʼ mele Josafat. Tiʼ wut jiñi tejclum, tsiʼ melbe oración Jehová i tsiʼ yʌlʌ chaʼan maʼañobic i pʼʌtʌlel chaʼan miʼ jisañob i contra (2 Crónicas 20:5). Mi jatet i jol jiñi familia, miʼ mejlel a mel bajcheʼ Josafat. Cʼajtiben i coltaya Jehová ti a tojlel yicʼot ti a familia cheʼ bʌ an a wocol. Mach a quisñin a cʼajtiben i coltaya Jehová cheʼ yaʼañet awicʼot a familia. Cheʼʌch mi caj i qʼuelob chaʼan maʼ ñop Jehová. Jiñʌch mi caj i coltañet cheʼ bajcheʼ tsiʼ colta Josafat.

14, 15. ¿Bajcheʼ tsiʼ pʌsʌ Ezequías chaʼan ti jumpʼejl i pusicʼal tsiʼ ñopo Dios?

¹⁴ Jiñi rey Ezequías tsiʼ chaʼle wersa chaʼan utsʼat miʼ yajñel yicʼot Jehová. Cheʼʌch tsiʼ mele anquese jiñi i tat tsiʼ chʼujutesa diosteʼ tac yicʼot mach weñic i melbal. Ezequías «tsiʼ jeme jini pulʌntib am bʌ ti bujbujtʌl. Tsiʼ laj topʼo jini waʼal tac bʌ i yejtal tac Asera. Tsiʼ cʼʌsʌ jini lucum melbil bʌ ti bronce tsaʼ bʌ i mele Moisés, come jini israelob tsaʼ caji i chʼujutesañob». Ti jumpʼejl i pusicʼal tsiʼ melbe i yeʼtel Jehová yicʼot «tsiʼ wen jacʼbe i mandar lac Yum cheʼ bajcheʼ tsiʼ subu Moisés» (2 Reyes 18:1-6).

¹⁵ Cheʼ bʌ Ezequías an tiʼ yumʌntel, jiñi asiriojob tsiʼ jisayob Judá yicʼot tsiʼ  yʌlʌyob chaʼan cheʼ mi caj i melob ti Jerusalén. Jiñi rey ti Asiria tsiʼ pʼaja Jehová yicʼot tiʼ sube Ezequías chaʼan miʼ yʌcʼ i bʌ. Pero Ezequías maʼañic tsiʼ cʌyʌ i ñop Jehová i tsiʼ cʼajtibe i coltaya. Wen yujil chaʼan ñumen pʼʌtʌl Dios bajcheʼ asiriojob i mucʼʌch i mejlel i coltan i tejclum (pejcan Isaías 37:15-20). Dios tsiʼ jacʼbe i yoración Ezequías i tsiʼ choco cʼotel juntiquil ángel chaʼan miʼ tsʌnsan 185 mil asiriojob (Isaías 37:36, 37).

16, 17. ¿Bajcheʼ miʼ mejlel lac tsajcʌben i melbal Ezequías?

¹⁶ Cheʼ bʌ Ezequías tsaʼ cʼamʼa yicʼot colelix i chʌmel (sajtel), tsiʼ wen cʼajtibe Jehová chaʼan laʼ i cʼajtesʌben i xucʼtʌlel yicʼot miʼ coltan (pejcan 2 Reyes 20:1-3). Jehová tsaʼʌch i ñʌchʼtʌbe i yoración i tiʼ tsʼʌca. Cʌmbilix lac chaʼan ti Biblia chaʼan maʼañic miʼ mejlel lac pijtan ili ora chaʼan Jehová miʼ mel jumpʼejl milagro i miʼ tsʼʌcañonla o ñumen jal mi lac chumtʌl. Pero miʼ mejlel lac ñop, cheʼ bajcheʼ Ezequías, chaʼan mucʼʌch caj i coltañonla. Miʼ mejlel lac suben: «Awocolic ñaʼtañon, c Yum. Xucʼul tsac chaʼle xʌmbal ti a tojlel tiʼ pejtelel c pusicʼal. Tsac mele chuqui utsʼat ti a wut». ¿Mucʼʌch ba lac ñop chaʼan tiʼ pejtelel ora mi caj i cʌntañonla Jehová, ñumento cheʼ bʌ cʼamonla? (Salmo 41:3).

¹⁷ Muʼ bʌ laj cʌn ti Ezequías miʼ coltañonla laj qʼuel mi an chuqui woli (choncol) i ñajtesañonla ti Jehová yicʼot woli (yʌquel) i mʌctañonla ti melol i yeʼtel. Jumpʼejl ejemplo, an cabʌl muʼ bʌ i cʼʌñob an tac bʌ ti internet chaʼan miʼ mejlelob ti tʼan yicʼot yambʌlob. An cabʌl muʼ bʌ i qʼuelob bajcheʼ i dios jiñi yambʌlob. Miʼ cʌlʌx qʼuelob ti ñuc jiñi wen cʌmbiloʼ bʌ yicʼot jiñi mach bʌ i cʌñʌyobic. Miʼ cʌlʌx aqʼueñob i yorajlel chaʼan miʼ pejcʌbeñob i juñilel yicʼot miʼ qʼuelbeñob i fotojlel. Maʼañic i wocolel cheʼ mi laj cʼʌn jiñi Internet chaʼan mi lac pejcan lac familia o wem bʌ lac camigojob, pero miʼ mejlel i yʌqʼueñonla lac sʌt cabʌl ora. Tajol mi lac tech lac chanʼesan lac bʌ cheʼ cabʌl muʼ bʌ caj i yʌl chaʼan miʼ mulan chuqui tsaʼ lac tsʼijbu letsel o jiñi foto tsaʼ bʌ lac letsa. O tajol mi lac michʼan mi maʼañix majqui miʼ qʼuel chuqui mi lac letsan. Mi cheʼ bajcheʼ jiñi, miʼ mejlel i coltañonla cheʼ mi laj cʌn tiʼ tojlel jiñi apóstol Pablo, Áquila yicʼot Priscila. ¿Jin jach ba tsiʼ ñumen aqʼueyob i yorajlel maʼ wʌl chaʼan miʼ ñaʼtañob chuqui miʼ mel yambʌ quixtañu, ñumento mi maʼañic miʼ chʼujutesañob Jehová? Jiñi Biblia miʼ yʌl chaʼan Pablo tsiʼ ‹chaʼle wersa subtʼan›. Miʼ yʌl chaʼan Priscila yicʼot Áquila tsiʼ yʌqʼueyob i yorajlel subtʼan jeʼel yicʼot tiʼ ‹tsictesʌbeyob i bijlel Dios ti toj› jiñi yambʌlob (Hechos 18:4, 5, 26). Miʼ mejlel laj cʼajtiben lac bʌ jaʼel: «¿Tsajalon ba chaʼan maʼañic mij qʼuelob bajcheʼ dios jiñi yambʌlob? ¿Muʼ ba j qʼuel chaʼan mach jiñic mic ñumen aqʼuen i yorajlel jiñi mach bʌ ñuquic i cʼʌjñibal?» (pejcan Efesios 5:15, 16).

18, 19. ¿Bajcheʼ miʼ mejlel lac tsajcan jiñi Josías?

¹⁸ Jiñi rey Josías tsiʼ jacʼbe i mandar tac Jehová «tiʼ pejtelel i pusicʼal» (2 Crónicas 34:31). Josías jiñʌch i buts (mam) i yalobil Ezequías, cheʼ bʌ chʼiton to, tsaʼ «caji i wen ñop lac Yum i Dios David». Cheʼ añix 20 i jabilel, tsaʼ caji i  jisan i chʼujutesʌntel diosteʼ tac yaʼ ti Judá (pejcan 2 Crónicas 34:1-3). Josías ñumento tsiʼ chaʼle wersa bajcheʼ yambʌ reyob chaʼan utsʼat miʼ qʼuejlel ti Jehová. Tsiʼ wen mele chuqui utsʼat tiʼ wut Jehová ñumento bajcheʼ tsiʼ mele yambʌ reyob ti Judá. Ti jumpʼejl bʌ qʼuin, jiñi ñuc bʌ motomaj tsiʼ taj jiñi libro baqui an i mandar Dios yaʼ ti templo. Ili libro tajol jiñʌch tsaʼ bʌ i tsʼijbu Moisés. Cheʼ bʌ Josías tsiʼ yubi tsaʼ bʌ i pejca yaʼ ti libro jiñi xtsʼijbaya, tsiʼ qʼuele chaʼan cabʌl to chuqui yom miʼ mel tiʼ tojlel Jehová. Josías tsiʼ ñijcʌbe i pusicʼal yambʌlob chaʼan cheʼʌch yom miʼ melob jaʼel. Come cheʼʌch tsiʼ mele, cheʼ bʌ cuxulto, jiñi quixtañujob «maʼanic tsiʼ chʌn tʌtsʼʌyob i bʌ baʼan lac Yum» (2 Crónicas 34:27, 33).

¹⁹ Josías jiñʌch i buts Manasés. Tajol tiʼ tojlelʌch i tatuch tsiʼ cʌñʌ chaʼan Jehová mucʼʌch i ñusʌbeñonla lac mul. Mi xcolelet to jaʼel, miʼ mejlel a mel bajcheʼ Josías yicʼot maʼ ñumen cʌn Jehová. Miʼ mejlel a cʌn wen bʌ tiʼ tojlel añobix bʌ i jabilel ti a familia yicʼot jiñi congregación. Jiñobʌch miʼ mejlel i subeñet chuqui tac wen bʌ melbil i chaʼan Jehová tiʼ tojlelob. Cʼajtesan bajcheʼ tsiʼ yubi i bʌ Josías cheʼ tsiʼ ñaʼta chuqui miʼ yʌl yaʼ tiʼ Mandar Dios. Ti orajach tsiʼ mele yom bʌ miʼ mel chaʼan utsʼat miʼ qʼuejlel ti Jehová. Cheʼ maʼ pejcan a Biblia jaʼel, mi caj a wubin ti a pusicʼal chaʼan a wom a jacʼben i tʼan Jehová. Jiñʌch mi caj i pʼʌtʼesañet bajcheʼ an awicʼot Jehová yicʼot mi caj i yʌqʼueñet a tijicñʌyel. Cheʼ jaʼel, mi caj a wubin chaʼan a wom a wʌcʼ ti cʌñol Jehová ti yambʌ quixtañujob (pejcan 2 Crónicas 34:18, 19). Cheʼ maʼ pejcan jiñi Biblia, tajol miʼ cʼotel a cʌn chaʼan an yom tac bʌ maʼ qʼuextan bajcheʼ yom maʼ ñumen melben i yeʼtel Jehová ti wen. Mi cheʼʌch maʼ wujtel, chaʼlen wersa chaʼan maʼ qʼuextan, cheʼʌch bajcheʼ tsiʼ mele Josías.

20, 21. a) ¿Chuqui junlajal bʌ tsiʼ meleyob jiñi chʌntiquil reyob tsaʼ bʌ lac tajayob ti tʼan? b) ¿Chuqui mi caj laj cʌn yaʼ ti yambʌ temaj?

²⁰ ¿Chuqui mi laj cʌn tiʼ tojlel jiñi chʌntiquil reyob ti Judá ti jumpʼejl bʌ i pusicʼal tsiʼ melbeyob i yeʼtel Jehová? Chaʼan tiʼ pejtelelob i pusicʼal tsiʼ meleyob chuqui miʼ mulan Jehová yicʼot tiʼ pejtelel ora tsiʼ chʼujutesayob. Tsiʼ wen ñopoyob Jehová cheʼ bʌ tsiʼ tajayob pʼʌtʌl bʌ i contrajob. Pero ñumen i cʼʌjñibal bʌ jiñʌch cheʼ tsiʼ melbeyob i yeʼtel Jehová chaʼan cʼuxbiya.

²¹ Anquese xmulilobʌch ili reyob i tsiʼ tajayob i sajtemal, Jehová tsaʼʌch i qʼueleyob ti utsʼat. Tsiʼ qʼuelbeyob i pusicʼal i tsaʼ mejli i cʌn chaʼan tiʼ sujm miʼ cʼuxbiñob. Joñonla xmulilonla jaʼel i mi lac taj lac sajtemal. Pero cheʼ bʌ Jehová miʼ qʼuel chaʼan tiʼ pejtelel lac pusicʼal mi lac melben i yeʼtel, tijicña miʼ yubin. Yaʼ ti yambʌ temaj mi caj laj qʼuel chuqui miʼ mejlel laj cʌn tiʼ sajtemal tsaʼ bʌ i tajayob ili reyob.