1, 2. Cheʼ bajcheʼ miʼ yʌl Hechos 8:27-31, 35-38, ¿chucoch tsiʼ chʼʌmʌ jaʼ jiñi wiñic ñuc bʌ i yeʼtel chʼoyol bʌ ti Etiopía?

¿A WOM baʼ chʼʌm jaʼ i maʼ sujtel ti xcʌntʼan i chaʼan Cristo? An i ñijcayob yonlel wiñicob xʼixicob (quixtañujob) chaʼan miʼ chʼʌmob jaʼ cheʼ miʼ cʼotel i cʼuxbiñob Dios yicʼot cheʼ miʼ yʌqʼueñob wocolix i yʌlʌ. Ñaʼtan tiʼ tojlel juntiquil wiñic am bʌ ñuc bʌ i yeʼtel (troñel) tiʼ tojlel jiñi yumʌl bʌ xʼixic ti Etiopía.

² Cheʼ tsaʼ cʼoti i chʼʌmben i sujm ili wiñic ti coltaya i Tʼan Dios chaʼan yom miʼ chʼʌm jaʼ, cheʼʌch tsiʼ mele (chaʼle) (pejcan Hechos 8:27-31, 35-38). ¿Chucoch? Tsiquil chaʼan miʼ chʼʌm ti ñuc jiñi i Tʼan Dios come cheʼ woli (choncol) i majlel tiʼ carreta woliʼ pejcan jiñi jun i chaʼan Isaías. I cheʼ bʌ Felipe tiʼ sube chuqui melbil i chaʼan Jesús tiʼ tojlel, tsiʼ wen taja i tijicñʌyel. Pero miʼ mejlel lac ñaʼtan chaʼan muqʼuix i cʼuxbin Jehová come sujtel mucʼ i chʼujutesan yaʼ ti Jerusalén. Tsiquil chaʼan cʌybilix i chaʼan jiñi mach bʌ i sujmic i ñopbal i tsaʼ ochi ti jiñi tejclum yajcʌbil bʌ i chaʼan jiñi i sujm bʌ Dios. I cʼuxbiya ti Jehová tsiʼ ñijca chaʼan an chuqui ñuc bʌ miʼ mel, jiñʌch chaʼan miʼ chʼʌm jaʼ yicʼot miʼ sujtel ti xcʌntʼan i chaʼan Cristo (Mt. 28:19).

3. ¿Chuqui miʼ mejlel i mʌctan juntiquil quixtañu chaʼan miʼ chʼʌm jaʼ? (Qʼuele jiñi recuadro « ¿Bajcheʼ yilal jiñi a pusicʼal?»).

³ Jiñi a cʼuxbiya ti Jehová miʼ mejlel i ñijcan a pusicʼal chaʼan maʼ cʼotel a chʼʌm jaʼ. Pero an yambʌ cʼuxbiya muʼ bʌ i mejlel i mʌctañet chaʼan maʼ mel. Jumpʼejl ejemplo, tajol maʼ wen cʼuxbin jiñi a familia yicʼot jiñi a wamigojob mach bʌ i testigojobic Jehová i maʼ bʌcʼñan chaʼan mach yometobix maʼ ñaʼtan cheʼ mi  tsaʼ chʼʌmʌ jaʼ (Mt. 10:37). O tajol ñʌmʌl a mel chuqui tac miʼ tsʼaʼlen Dios i wocol maʼ wubin chaʼan maʼ cʌy (Sal. 97:10). O tajol, cheʼ tsaʼ coliyet, tsaʼ mele jiñi qʼuiñijel tac ochem bʌ ti jiñi mach bʌ i sujmic ñopbalʌl i maʼ wen cʼajtesan. Jin chaʼan, wocol maʼ wubin chaʼan maʼ cʌy a mel jiñi qʼuiñijel tac mach bʌ muqʼuic i mulan Jehová (1 Co. 10:20, 21). Jiñi cʼajtiya yom bʌ maʼ melben a bʌ jiñʌch chaʼan chuqui o majqui mi caj a ñumen cʼuxbin.

4. ¿Chuqui miʼ ñijcañonla chaʼan mi lac chʼʌm jaʼ?

⁴ Tiʼ sujm, an cabʌl chuqui tac maʼ cʼuxbin yicʼot maʼ qʼuel ti ñuc, i weñʌch chuqui maʼ mel. Jumpʼejl ejemplo, tajol jatet muqʼuix a wen qʼuel ti ñuc jiñi Biblia cheʼ bʌ maxto a techeʼ jumpʼejl estudio yicʼot jiñi i testigojob Jehová. I tajol jaʼel muqʼuix a cʼuxbin Jesús. Ili ora, cheʼ cʌmbilix a chaʼan jiñi Testigojob, maʼ taj a tijicñʌyel yicʼotob. Pero pejtelel jiñi, mach jiñic muʼ bʌ i caj i ñijcañet chaʼan maʼ wʌqʼuen jiñi a cuxtʌlel Jehová yicʼot maʼ cʼotel a chʼʌm jaʼ. Come jiñi muʼ bʌ i ñijcañonla jiñʌch laj cʼuxbiya ti Dios. Cheʼ maʼ ñumen cʼuxbin bajcheʼ chuqui jach, maʼañic majqui o chuqui mi caj i mʌctañet chaʼan maʼ melben i yeʼtel. Jin chaʼan, jiñi laj cʼuxbiya ti Jehová mach jiñic jach muʼ bʌ i yʌqʼueñonla chaʼan mi laj cʼotel lac chʼʌm jaʼ, miʼ coltañonla chaʼan chʌn xucʼul mi la cajñel tiʼ melol jiñi eʼtel i chaʼan Dios.

5. ¿Chuqui ti cʼajtiya tac mi cajel lac jacʼ?

⁵ Jesús tsiʼ yʌlʌ chaʼan yom mi laj cʼuxbin Jehová tiʼ pejtelel lac pusicʼal, laj cuxtʌlel, lac ñaʼtʌbal yicʼot lac pʼʌtʌlel (Mr. 12:30). ¿Bajcheʼ miʼ mejlel a tech a cʼuxbin yicʼot chaʼan maʼ qʼuel ti ñuc? Jiñʌch cheʼ mi lac tsajin jiñi cʼuxbiya am bʌ i chaʼan ti lac tojlel (1 Jn. 4:19). Cheʼ bʌ mi cʼotel a wubin ili cʼuxbiya wen ñuc bʌ i cʼʌjñibal, ¿chuqui yambʌ tac mi caj a mel yicʼot mi caj a wubin ti a pusicʼal? * Laʼ laj qʼuel.

6. Cheʼ bajcheʼ miʼ yʌl Romanos 1:20, ¿bajcheʼ junchajp mi laj cʌn Jehová?

⁶ Cʌñʌ tiʼ tojlel Jehová cheʼ maʼ wen ñaʼtan chuqui tac melbil i chaʼan (pejcan Romanos 1:20; Ap. 4:11). Tsajin bajcheʼ miʼ pʌs i ñaʼtʌbal ti jiñi alʌ teʼ tac yicʼot jiñi añimal tac tsaʼ bʌ i mele (pʌtʌ). Sʌclan bajcheʼ chajpʌbil jiñi lac bʌcʼtal (Sal. 139:14). Yicʼot wen ñaʼtan bajcheʼ cʼamel tsiʼ yʌqʼue Jehová i pʼʌtʌlel jiñi Qʼuin, pero mach ñajʌyic a chaʼan chaʼan tsiʼ mele yonlel ecʼ tac cabʌl bʌ i pʼʌtʌlel jaʼel (Is. 40:26). * Mi cheʼ maʼ mel, mi cajel a ñumen qʼuel ti ñuc Jehová. Pero ti chʼʌmbentel i sujm chaʼan Jehová an i ñaʼtʌbal yicʼot wen pʼʌtʌl jiñʌch junchajp bajcheʼ pʼʌtʌl mi caj a wajñel a wicʼot bajcheʼ a wamigo. Chaʼan miʼ cʼotel a cʼuxbin tiʼ pejtelel a pusicʼal, yom maʼ ñumen cʌn.

7. Chaʼan miʼ cʼotel a cʼuxbin Jehová tiʼ pejtelel a pusicʼal, ¿chuqui jiñi yom bʌ maʼ ñumen ñop?

⁷ Yom maʼ wen ñop chaʼan Jehová miʼ qʼuelet ti ñuc. ¿Wocol baʼ maʼ ñop chaʼan jiñi tsaʼ bʌ i mele panchan yicʼot Lum yujil chaʼan cuxulet yicʼot chaʼan ñuc miʼ qʼuelet? Mi cheʼ bajcheʼ jiñi, ñaʼtan chaʼan «mach ñajtic an Dios ti lac tojlel ti jujuntiquilonla» (Hch. 17:26-28). Cheʼ bajcheʼ David tiʼ sube Salomón, Dios «miʼ wen cʌmben i pusicʼal winicob xʼixicob». Miʼ subeñet chaʼan cheʼ mucʼʌch a sajcan, mucʼʌch caj a taj (1 Cr. 28:9). Mi woli (yʌquel) a chʼʌm jumpʼejl estudio ñaʼtan chaʼan jiñʌch Jehová tsaʼ bʌ i pʌyʌyet tiʼ tojlel, cheʼ bajcheʼ miʼ yʌl Juan 6:44. Cheʼ maʼ ñumen chʼʌmben i sujm chuqui melbil i chaʼan Jehová ti a tojlel, mi cajel a ñumen cʼuxbin.

8. ¿Bajcheʼ miʼ mejlel a pʌs chaʼan maʼ qʼuel ti ñuc jiñi i cʼuxbiya Jehová?

 ⁸ Junchajp bajcheʼ maʼ pʌs chaʼan maʼ qʼuel ti ñuc jiñi i cʼuxbiya Jehová jiñʌch cheʼ maʼ pejcan ti oración. Mi caj i ñumen pʼojlel jiñi a cʼuxbiya tiʼ tojlel cheʼ maʼ suben chuqui maʼ cʼojoʼtan yicʼot cheʼ maʼ wʌqʼuen wocolix i yʌlʌ chaʼan chuqui melbil i chaʼan ti a tojlel. I mi caj i wen pʼʌtʼan bajcheʼ an awicʼot cheʼ maʼ qʼuel chaʼan mucʼʌch i jacʼbeñet a woración tac (Sal. 116:1). Mi caj a ñop chaʼan Dios miʼ chʼʌmbeñet i sujm. Pero chaʼan maʼ ñumen lʌcʼtesan a bʌ tiʼ tojlel Jehová, yom maʼ chʼʌmben i sujm chuqui miʼ ñaʼtan yicʼot muʼ bʌ i pijtan chaʼan maʼ mel. Ili miʼ mejlel a mel cheʼ maʼ pejcʌben i Tʼan, jiñi Biblia.

9. ¿Bajcheʼ miʼ mejlel a pʌs chaʼan mucʼʌch a qʼuel ti ñuc jiñi Biblia?

⁹ Qʼuele ti ñuc jiñi i Tʼan Dios. Jin jach jiñi Biblia miʼ yʌlben i sujmlel Jehová yicʼot yom bʌ i mel ti lac tojlel. ¿Bajcheʼ miʼ mejlel a pʌs chaʼan maʼ qʼuel ti ñuc? Jiñʌch cheʼ maʼ pejcan ti jujumpʼejl qʼuin, cheʼ maʼ chajpan a bʌ chaʼan jiñi estudio muʼ bʌ a wʌqʼuentel yicʼot maʼ cʼʌn ti a cuxtʌlel woli bʌ a cʌn majlel (Sal. 119:97, 99; Jn. 17:17). ¿Am ba a wʌqʼue jumpʼejl i yorajlel chaʼan maʼ pejcan ti jujumpʼejl qʼuin yicʼot mucʼʌch baʼ tsajcan?

10. ¿Chuqui cojach bʌ miʼ yʌl jiñi Biblia?

¹⁰ Junchajp cojach bʌ miʼ yʌjlel yaʼ ti Biblia jiñʌch jiñi relato tac tsaʼ bʌ i yʌlʌyob quixtañujob tsaʼ bʌ i qʼueleyob Jesús. Jin jach ti jiñi libro muʼ bʌ i tsictesan ti toj chuqui tsiʼ mele ti a tojlel. Cheʼ bʌ miʼ cʼotel a chʼʌmben i sujm chuqui tsiʼ mele yicʼot tsiʼ yʌlʌ Jesús, mi caj a mulan chaʼan maʼ wajñel bajcheʼ i yamigo.

11. ¿Chuqui mi caj i coltañet a ñumen cʼuxbin Jehová?

¹¹ Cʼuxbin Jesús. Ili mi caj i coltañet a ñumen cʼuxbin Jehová come Jesús miʼ lajiben wem bʌ i melbal jiñi i Tat (Jn. 14:9). Jin chaʼan, cheʼ maʼ ñumen cʌn Jesús, mi cajel a ñumen cʼotel a cʌn bajcheʼ yilal Jehová yicʼot mi caj a ñumen cʼuxbin. Ñaʼtan jiñi i pʼuntaya Jesús tsaʼ bʌ i pʌsbe jiñi quixtañujob maʼañic bʌ miʼ qʼuejlelob ti ñuc bajcheʼ jiñi pʼumpʼuñoʼ bʌ, cʼamoʼ bʌ yicʼot cʼuñoʼ bʌ. Ñaʼtan jaʼel jiñi wem bʌ ticʼojel tac muʼ bʌ i yʌqʼueñet i miʼ weñʼesan jiñi a cuxtʌlel cheʼ maʼ jacʼ (Mt. 5:1-11; 7:24-27).

12. Cheʼ maʼ cʌn tiʼ tojlel Jesús, ¿chuqui mi caj i ñijcañet a mel?

 ¹² Jiñi a cʼuxbiya ti Jesús mi caj i ñumen pʼʌtʼan cheʼ maʼ wen ñaʼtan jiñi i cuxtʌlel tsaʼ bʌ i yʌcʼʌ chaʼan miʼ ñusʌntel lac mul (Mt. 20:28). Cheʼ bʌ maʼ chʼʌmben i sujm chaʼan ti jumpʼejl i pusicʼal tsiʼ yʌcʼʌ i bʌ ti a tojlel, mi caj a wubin chaʼan a womʌch a cʌy a mul yicʼot maʼ sʌclan i ñusʌntel ti Jehová (Hch. 3:19, 20; 1 Jn. 1:9). I cheʼ maʼ ñumen cʼuxbin Jehová yicʼot Jesús, mi caj a ñumen mulan ajñel yicʼot cheʼ bʌ miʼ yubin i bʌ jaʼel bajcheʼ jatet.

13. ¿Chuqui an i yʌqʼueyet Jehová?

¹³ Cʼuxbin jiñi i familia Jehová. Tajol jiñi a familia mach bʌ i testigojobic Jehová yicʼot jiñi a wamigojoʼ bʌ ti ñaxan, maʼañic miʼ chʼʌmbeñob i sujm chucoch a wom a wʌqʼuen Dios jiñi a cuxtʌlel, i tajol miʼ contrajiñetob. Pero Jehová mi caj i coltañet cheʼ bʌ miʼ yʌqʼueñet yambʌ a familia muʼ bʌ i chʼujutesañob. Mi lʌcʼʌlʌch maʼ wajñel tiʼ tojlelob, mi caj a taj a cʼuxbintel yicʼot a coltʌntel i cʼʌjñibal bʌ a chaʼan (Mr. 10:29, 30; He. 10:24, 25). Tajol ti jumpʼejl bʌ qʼuin jiñi a familia mi caj i chʼujutesañob Jehová jaʼel yicʼot miʼ chumtañob bajcheʼ miʼ yʌl jiñi i mandar (1 P. 2:12).

14. Cheʼ bajcheʼ miʼ yʌl 1 Juan 5:3, ¿chuqui cʼotem a cʌn chaʼan jiñi i mandar tac Jehová?

¹⁴ Qʼuele ti ñuc yicʼot jacʼben i mandar tac Jehová. Cheʼ maxto a cʌñʌyic Jehová, tajol jin jach maʼ ñaʼtan chuqui bajñel a wom a mel, pero waʼli maʼ cʌn chaʼan jiñi i mandar tac Jehová jiñʌch ñumen wem bʌ (Sal. 1:1-3; pejcan 1 Juan 5:3). Ñaʼtan jiñi ticʼojel tac muʼ bʌ i yʌl jiñi Biblia tiʼ tojlel ñoxiʼalʌl, ijñamʌl, tatʌlob yicʼot i yalobilob (Ef. 5:22-6:4). ¿Am baʼ qʼuele chaʼan jiñi a familia wen miʼ yajñel cheʼ mi cʼʌñob tiʼ cuxtʌlel? ¿Ñumen wem ba añet cheʼ muqʼuix a jacʼ jiñi mandar chaʼan maʼ sʌclan ti wen jiñi a wamigojob? ¿Ñumen tijicñayet ba? (Pr. 13:20; 1 Co. 15:33). Tajol cheʼʌchi.

15. ¿Chuqui yom maʼ mel chaʼan maʼ cʼʌn ti a cuxtʌlel jiñi principio tac am bʌ ti Biblia?

¹⁵ Tajol mach muqʼuic a ñaʼtan bajcheʼ maʼ cʼʌn ti a cuxtʌlel jiñi mandar tac woli bʌ a cʌn. Jin chaʼan, Jehová miʼ cʼʌn i yorganización chaʼan miʼ yʌcʼ jun tac loqʼuem bʌ ti Biblia chaʼan miʼ cʼotel a ñaʼtan chuqui wen yicʼot mach bʌ weñic (He. 5:13, 14). Cheʼ bʌ maʼ pejcan yicʼot maʼ tsajin ili estudio, mi caj a qʼuel chaʼan wen i cʼʌjñibalʌch ti chuqui tac maʼ ñusan, i mi caj a mulan ochel tiʼ tejclum Jehová.

16. ¿Bajcheʼ an i chajpa Jehová jiñi i tejclum?

¹⁶ Cʼuxbin yicʼot coltan jiñi i yorganización Dios. Jehová an i chajpa jiñi i tejclum ti congregación tac, i jiñi i Yalobil, Jesús, jiñʌch jolʌl bʌ i chaʼan (Ef. 1:22; 5:23). Cheʼ jaʼel, Jesús an i waʼchoco alʌ junmojt wiñicob yajcʌbiloʼ bʌ chaʼan miʼ chajpañob jiñi eʼtel yom bʌ chaʼan miʼ mejlel ili ora. Ili xñoptʼañob, tsaʼ bʌ i yʌlʌ Jesús bajcheʼ «jini xucʼul bʌ xʼeʼtel am bʌ cabʌl i ñaʼtʌbal», miʼ qʼuelob ti ñuc cheʼ miʼ mʌcʼlañetob yicʼot miʼ cʌntañetob tiʼ chaʼan bʌ Dios (Mt. 24:45-47). Junchajp bajcheʼ miʼ cʌntañet jiñi xucʼul bʌ xʼeʼtel jiñʌch cheʼ miʼ waʼchocoñob ancianojob chajpʌbiloʼ bʌ yaʼ ti congregación tac (Is. 32:1, 2; He. 13:17; 1 P. 5:2, 3). Jiñi ancianojob cabʌl chuqui miʼ melob ti a tojlel, miʼ ñuqʼuesʌbeñetob a pusicʼal yicʼot miʼ coltañetob a ñumen lʌcʼtesan a bʌ tiʼ tojlel Jehová. Pero jiñi ñumen ñuc bʌ i cʼʌjñibal muʼ bʌ i mejlel i melob ti a tojlel jiñʌch cheʼ miʼ coltañetob a cʌntesan yambʌlob tiʼ chaʼan bʌ Jehová (Ef. 4:11-13).

17. Cheʼ bajcheʼ miʼ yʌl Romanos 10:10, 13, 14, ¿chucoch mi lac subeñob quixtañujob i chaʼan bʌ Jehová?

¹⁷ Coltan yambʌlob chaʼan miʼ cʼuxbiñob Jehová. Jesús tiʼ sube jiñi xcʌntʼañob i chaʼan chaʼan miʼ cʌntesan yambʌlob tiʼ chaʼan bʌ Dios (Mt. 28:19, 20). Ili mandar jiñʌch yom bʌ  mi lac jacʼ. Pero mi jatet maʼ ñumen cʼuxbin Jehová, cheʼ mi caj a wubin a bʌ bajcheʼ jiñi apóstol Pedro yicʼot Juan, tsaʼ bʌ i yʌlʌyob: «Mach mejlic mij cʌy lojon ili tʼan. Wersa mic sub lojon chuqui tsaj qʼuele lojon yicʼot chuqui tsaʼ cubi lojon» (Hch. 4:20). Mi caj lac wen ubin lac tijicñʌyel cheʼ an majqui mi laj coltan i cʼuxbin Jehová. ¿Muʼ ba i mejlel a ñaʼtan bajcheʼ cʼamel tsiʼ yubi i tijicñʌyel jiñi Felipe cheʼ bʌ tsiʼ colta jiñi wiñic chʼoyol bʌ ti Etiopía i cʌn i sujmlel am bʌ ti Tsʼijbujel yicʼot miʼ chʼʌm jaʼ? Cheʼ maʼ mel bajcheʼ tsiʼ mele Felipe yicʼot maʼ jacʼ jiñi mandar tsaʼ bʌ i yʌlʌ Jesús chaʼan jiñi subtʼan, mi caj a pʌs chaʼan a womʌch sujtel tiʼ testigo Jehová (pejcan Romanos 10:10, 13, 14). Cheʼ jiñi, tajol mi caj a melben a bʌ jiñi cʼajtiya tsaʼ bʌ i melbe i bʌ jiñi chʼoyol bʌ ti Etiopía: «¿Am ba chuqui miʼ mʌctañon chaʼan mic chʼʌm jaʼ?» (Hch. 8:36).

18. ¿Chuqui mi caj laj qʼuel ti yambʌ estudio?

¹⁸ Cheʼ bʌ maʼ ñaʼtan chʼʌm jaʼ, maʼ yajcan jiñi ñumen ñuc bʌ i cʼʌjñibal ti a cuxtʌlel. Come wen ñucʌch i cʼʌjñibal, yom maʼ wen ñaʼtan chuqui ochem yaʼi. Pero ¿chuqui yom maʼ ñaʼtan chaʼan jiñi chʼʌmjaʼ? ¿I chuqui yom maʼ ñaxan mel cheʼ maxto a chʼʌmʌ jaʼ yicʼot cheʼ tsaʼix a mele? Mi caj laj qʼuel ti yambʌ estudio.