DANIEL YICʼOT MÍRIAM tsaʼ ñujpuñiyob cheʼ ti septiembre i chaʼan 2000, i wen utsʼatax bajcheʼ tsaʼ chumleyob yaʼ ti Barcelona (España). Daniel miʼ yʌl: «Mic wen mulan lon majlel ti restaurante, ti yan tac bʌ país yicʼot lets tac bʌ i tojol pisil mic xoj lojon. Cheʼ jaʼel, maʼañic mij cʌy lon c bʌ ti subtʼan». Pero añʌch chuqui tsaʼ qʼuextʌyi tiʼ tojlelob

Ti jumpʼejl colem tempa bʌ cheʼ ti 2006, tsaʼ cʼoti tiʼ pusicʼal Daniel ili cʼajtiya tsaʼ bʌ mejli ti jumpʼejl discurso: «¿Woli (choncol) ba lac chaʼlen wersa laj coltañob i taj i cuxtʌlel tiʼ pejtelel bʌ ora jiñi quixtañujob ‹bʌbʌqʼuen bʌ miʼ chʌmelob›?» (Proverbios 24:11). Ti jiñi discurso tsaʼ tsictesʌnti chaʼan an ti lac wenta mi lac subeñob wen tʼan am bʌ ti Biblia jiñi wiñicob xʼixicob (quixtañujob) chaʼan miʼ tajob i cuxtʌlel (Hechos 20:26, 27). Daniel miʼ yʌl: «Joñon woli (yʌquel) i pejcañon tsaʼ cubi jiñi Jehová». Ti jiñi discurso tsaʼ ajli jaʼel chaʼan ñumen tijicñayonla cheʼ mi lac chaʼlen wersa lac melben i yeʼtel (troñel) Jehová. Daniel yujil chaʼan cheʼʌchi, come jiñi i yijñam ochem bajcheʼ precursora i wen tijicña.

Jiñi discurso tsaʼ wen cʼoti tiʼ pusicʼal Daniel, jin chaʼan tsiʼ ñaʼta i qʼuextan bajcheʼ yilal chumul. Tsʼitaʼ jax tsaʼ caji ti eʼtel, tsaʼ ochi bajcheʼ precursor i tsaʼ cʼoti i ñaʼtan chaʼan tijicña mi caj i yajñel yicʼot i yijñam cheʼ muqʼuic i majlelob ti coltaya baqui yom to xsubtʼañob.

Ti mayo i chaʼan 2007, Daniel yicʼot Míriam tsiʼ cʌyʌyob i yeʼtel i tsaʼ majliyob ti Panamá, jumpʼejl país baqui ajñemobix. Tsiʼ chaʼleyob subtʼan ti jiñi isla tac am bʌ yaʼ ti Bocas del Toro, yaʼ ti mar Caribe. Cabʌl quixtañu chumuloʼ bʌ yaʼi cʌmbilob bajcheʼ guaymí. Daniel yicʼot Míriam tsiʼ ñaʼtayob cʌytʌl 8 uw jinto miʼ jilelob i taqʼuin.

Tsiʼ xʌñʌyob ti barco yicʼot ti bicicleta jiñi isla tac. Cʼajalto i chaʼañob ti jumpʼejl bʌ qʼuin wen an ticwal, 30 kilómetro tsiʼ xʌñʌyob letsel ti bicicleta jumpʼejl chan bʌ wits. Daniel colelix i pucʼ yajlel come wen lujbeñix. Pero jiñi familiajob cʌmbiloʼ bʌ bajcheʼ guaymí tsiʼ wen pʌsʌyob i yutslel tiʼ tojlel Daniel yicʼot Míriam ñumento cheʼ tsiʼ ñopoyob tʼan tac ti guaymí. Mach wen jalic tsaʼ ñumi i tsaʼ caji i yʌcʼob 23 estudio loqʼuem bʌ ti Biblia.

¿Chuqui tsaʼ ujti cheʼ bʌ tsaʼ jiliyob i taqʼuin? Daniel miʼ yʌl: «Wen chʼijiyem tsaʼ lon cubi cheʼ tsaʼ c chaʼ ñaʼta lon sujtel ti España». Mach yomobic i cʌy jiñi muʼ bʌ i yʌqʼueñob estudio. Pero cheʼ ñumeñix jumpʼejl uw, tsiʼ wen tajayob i tijicñʌyel. Míriam miʼ yʌl: «Tsaʼ subentiyon lon ochel bajcheʼ precursor especial. Wen tijicña tsaʼ lon cubi cheʼ yaʼʌch mi caj lon c bej cʌytʌl».

Daniel yicʼot Míriam tsiʼ cʌyʌyob eʼtel bajcheʼ precursor especial cheʼ ti 2015 come an chuqui tsaʼ qʼuextʌyi yaʼ tiʼ yorganización Jehová. ¿Chuqui tsiʼ meleyob? Tsiʼ yʌcʼʌyob ti ñuc muʼ bʌ i yʌl Salmo 37:5: «Acʼʌ tiʼ wenta lac Yum pejtelel a melbal. Ñopo lac Yum. Mi caj i jolontesan chuqui maʼ ñaʼtan a mel». Tsiʼ tajayob wem bʌ i yeʼtel chaʼan miʼ chʌn mejlelob ti ajñel bajcheʼ precursor regular, i wʌle ora woliyob ti coltaya ti jumpʼejl congregación yaʼ ti Veraguas (Panamá).

Daniel miʼ yʌl: «Cheʼ yaʼto añon lon ti España mij cʌlʌx cʼojoʼtan lojon mi utsʼatʌch mi caj lon c chumtʌl cheʼ mach oñic chuqui an c chaʼan lojon. Cheʼʌch chumulon lojon waʼli, i añʌch lon c chaʼan jiñi i cʼʌjñibal bʌ». ¿Chuqui miʼ ñumen aqʼueñob i tijicñʌyel? Miʼ yʌlob: «Cheʼ mij coltan lojon i cʌn Jehová jiñi quixtañujob jiñʌch muʼ bʌ i ñumen aqʼueñon lon c tijicñʌyel.