Cabʌl muʼ bʌ i ñaʼtañob chaʼan maʼañic miʼ mejlel lac wis cʌn jiñi panchan come maʼañic majqui tilem yaʼi chaʼan miʼ subeñonla bajcheʼ yilal, pero mach isujmic. Jesucristo yaʼix ñaxan chumul ti panchan cheʼ bʌ muʼto caj i tilel wʌʼ ti Pañimil. I cheʼʌch tsiʼ yʌcʼʌ ti ñaʼtʌntel cheʼ bʌ tsiʼ sube jiñi ñaxam bʌ miʼ yʌcʼob i bʌ ti ñopbalʌl cheʼ ti ñaxam bʌ siglo: «Come tsaʼ jubiyon tilel ti panchan chaʼan mic mel chuqui yom c Tat tsaʼ bʌ i chocoyon tilel. Maʼanic tsaʼ tili c mel chuqui com tic bajñel pusicʼal». Jesús yujilʌch chuqui woli (choncol) i yʌl cheʼ bʌ tsiʼ sube jiñi apóstolob: «Tiʼ yotot c Tat an cabʌl chumlibʌl» (Juan 6:38; 14:2).

Jehová Dios, i Tat Jesús, yaʼʌch an i ‹chumlib› ti panchan (Salmo 83:18, TNM). Jiñob jach miʼ mejlel i tsictesʌbeñoñobla bajcheʼ yilal jiñi panchan. Jehová yicʼot Jesús tsiʼ cʼʌñʌyob ñajal tac chaʼan miʼ pʌsben i wiñicob bajcheʼ yilal yaʼ ti panchan.

Jiñi yambʌ temaj mi caj i tsictesan texto tac chaʼan Biblia baqui miʼ taj ti tʼan chuqui tsiʼ qʼueleyob ti ñajal tac jiñi wiñicob. Cheʼ bʌ woli (yʌquel) a qʼuel majlel, cʼajtesan chaʼan jiñi panchan mach lajalic bajcheʼ ili Lum baqui miʼ mejlel laj qʼuel yicʼot lac tʌl chuqui tac an. Jin chaʼan, Dios maʼañic tsiʼ cʼʌñʌ tʼan tac mach bʌ laj cʌñʌyic chaʼan miʼ tsictesʌbeñonla bajcheʼ yilal jiñi panchan, tsiʼ cʼʌñʌ ñajal tac chaʼan mach wen wocolic mi lac chʼʌmben isujm. Cheʼ maʼ wen qʼuel mi caj i coltañet a ñumen cʌn majqui yaʼañob ti jiñi «cabʌl chumlibʌl» ti panchan.