1, 2. a) ¿Chuqui miʼ yʌl lac piʼʌlob cheʼ ti jumpʼejl organización yom miʼ chʼujutesʌntel Dios? b) ¿Chuqui mi caj laj qʼuel ti ili temaj?

AN MUʼ bʌ i yʌlob chaʼan mach yʌlʌlic añonla ti jumpʼejl organización chaʼan mi lac chʼujutesan Dios. Miʼ yʌlob chaʼan cojach yom mi lac sujtel tiʼ yamigo. ¿Isujm ba jiñi?

² Ti ili temaj mi caj laj qʼuel chaʼan tiʼ pejtelel chuqui miʼ mel Jehová utsʼatʌch, i wen chajpʌbil i chaʼan i tejclum (qʼuele jiñi recuadro «¿Chuqui yom i yʌl?»). Mi caj laj qʼuel chuqui yom mi lac mel cheʼ bʌ an chuqui miʼ subeñonla jiñi i yorganización Jehová (1 Corintios 14:33, 40). Cheʼ ti ñaxam bʌ siglo, jiñi xñoptʼañob tsiʼ meleyob cheʼ bajcheʼ miʼ yʌl jiñi Tsʼijbujel tac. Jin chaʼan, tsaʼ mejli i subob jiñi wen tʼan chaʼan Yumʌntel ti cabʌl tejclum. Ili ora, jiñi i testigojonbʌla Jehová mi la cʌy chaʼan jiñi Biblia miʼ tojʼesañonla yicʼot mi lac chʼujbin muʼ bʌ lac subentel tiʼ yorganización Dios. Jin chaʼan, miʼ mejlel lac sub jiñi wen tʼan chaʼan Yumʌntel tiʼ petol Pañimil. Cheʼ jaʼel, sʌc miʼ yajñel jiñi congregación tac, temel miʼ yajñel yicʼot ti ñʌchʼtʌlel.

3. ¿Chuqui miʼ coltañonla lac ñop chaʼan wen chajpʌbil muʼ bʌ i mel Jehová?

³ Wen tsiquil chaʼan chajpʌbilʌch chuqui miʼ mel Jehová cheʼ mi lac wen ñaʼtan jiñi melbil tac bʌ i chaʼan. Ti Proverbios 3:19 miʼ yʌl chaʼan Dios tsiʼ wen cʼʌñʌ i «i ñaʼtʌbal» cheʼ tsiʼ mele jiñi Lum yicʼot «ti cabʌl i  pusicʼal [o wen tsajibil]» bajcheʼ tsiʼ mele panchan. Pero mach luʼ la cujilic chaʼan tsaʼ bʌ i mele tac. Jin chaʼan, jiñi Biblia miʼ yʌl chaʼan «i sajl tac jach [muʼ bʌ] laj qʼuel» (Job 26:14). Pero jiñi tsʼitaʼ la cujil bʌ chaʼan chuqui tac an ti panchan miʼ coltañonla lac ñaʼtan chaʼan utsʼatʌch bajcheʼ luʼ acʼbil (Salmo 8:3, 4). Laʼ lac ñaʼtan bajcheʼ utsʼatax miʼ ñijcan i bʌ tiʼ pejtelel jiñi ecʼ tac. Laʼ lac ñaʼtan jaʼel cheʼ wen jach bajcheʼ miʼ ñijcan i bʌ jiñi planeta tac tiʼ joytʌlel jiñi Qʼuin. Wen jach bajcheʼ miʼ ñijcan tac i bʌ come cheʼʌch tsiʼ mele Jehová. Cheʼ mi lac ñaʼtan chaʼan tsiʼ wen cʼʌñʌ i ñaʼtʌbal tiʼ melol panchan yicʼot Pañimil miʼ ñijcan lac pusicʼal chaʼan mi la cʌqʼuen i ñuclel, mi lac chʼujutesan yicʼot xucʼulonla tiʼ tojlel (Salmo 136:1, 5-9).

4. ¿Chucoch maʼañic mejlem i jacʼob ñuc tac bʌ cʼajtiya jiñi científicojob?

⁴ Jiñi científicojob cabʌl chuqui cʌmbil i chaʼañob chaʼan ili Lum yicʼot am bʌ yaʼ ti panchan, i añʌch i coltayonla. Pero maʼañic mejlem i jacʼob ñuc tac bʌ cʼajtiya. Jumpʼejl ejemplo, maʼañic miʼ mejlel i yoque alob bajcheʼ tsaʼ tejchi tiʼ pejtelel chuqui an ti panchan yicʼot chucoch an cuxtʌlel ila ti Lum. Cabʌlob maʼañic miʼ mejlel i tsictesañob chucoch mach la comic chʌmel (sajtel). Jiñi Biblia miʼ yʌl: «Utsʼat tiʼ pejtelel chuqui melbil i chaʼan tiʼ yorajlel. Pero Dios tsiʼ yotsa tiʼ pusicʼal jiñi quixtañujob chaʼan miʼ mulañob chumtʌl tiʼ pejtelel ora, chaʼan maʼañic miʼ mejlel i cʌñob tiʼ pejtelel tsaʼ bʌ i mele jiñi isujm bʌ Dios tiʼ tejchibal cʼʌlʌl tiʼ jilibal» (Eclesiastés 3:11, TNM). ¿Chucoch mach yujilobic i jacʼbal? Junchajp, come jiñi científicojob yicʼot yambʌ wiñicob xʼixicob (quixtañujob) miʼ yʌlob chaʼan maʼañic Dios yicʼot miʼ pʌsob chaʼan evolución. Pero Dios mucʼʌch i yʌqʼueñonla i jacʼbal yaʼ tiʼ libro, jiñi Biblia.

5. ¿Baqui bʌ ejemplo tac miʼ pʌs chaʼan yaʼʌch cʌyʌlonla cheʼ laj cʌñʌ bajcheʼ tsiʼ yʌcʼʌ Jehová jiñi melbil tac bʌ i chaʼan?

⁵ Tiʼ pejtelel chuqui tsiʼ mele Jehová tsaʼʌch i ñaʼta bajcheʼ yom miʼ yajñel, i maʼañic miʼ qʼuextʌyel. Jiñi xmel luzob, xʼotsa jaʼob, ingenierojob, xñijca avioñob, jiñi mucʼoʼ bʌ ti pʼoʼoñel yicʼot yambʌlob yujilob iliyi chaʼañob i yeʼtel (troñel). Jumpʼejl ejemplo, jiñi mucʼoʼ bʌ ti pʼoʼoñel yujilob baqui an lac pusicʼal. ¿Chucoch? Come junsujm jach baqui an ti lac bʌcʼtal ti lac pejtelel. La cujil jaʼel chaʼan mi chan baqui miʼ tijpʼel juntiquil quixtañu, miʼ yajlel yicʼot miʼ mejlel ti chʌmel. ¿Chucoch? Come jiñi pʼʌtʌlel am bʌ i chaʼan ili Lum miʼ tujcʼan jubel. Jin chaʼan, mi cuxul la com ajñel yom mi laj qʼuel ti ñuc bajcheʼ melbil i chaʼan Jehová chuqui tac an.

6. ¿Chucoch la cujil chaʼan Jehová yom cheʼ jiñi i tejclum chajpʌbil bajcheʼ miʼ chʼujutesan?

⁶ Jehová wen chajpʌbil chuqui tsiʼ mele ti panchan. Jin chaʼan, la cujil chaʼan yom cheʼ jiñi i tejclum chajpʌbil bajcheʼ miʼ chʼujutesan. An i yʌqʼueyonla jiñi Biblia chaʼan miʼ cʌntesañonla bajcheʼ yom mi lac chʼujutesan. Mi mucʼʌch lac chʼujbin muʼ bʌ i subeñonla Jehová yicʼot i yorganización, mi caj lac taj lac tijicñʌyel.

7. ¿Chuqui miʼ mejlel laj cʌn chaʼan bajcheʼ yilal tsʼijbubil jiñi Biblia?

⁷ An wen yujiloʼ bʌ miʼ yʌlob chaʼan jiñi Biblia jumpʼejl jach libro mach bʌ tojic tsaʼ bʌ i tsʼijbu jiñi judíojob yicʼot xñoptʼañob. Pero bajcheʼ tsʼijbubil jiñi Biblia miʼ pʌs chaʼan jumpʼejlʌch ñuc bʌ majtañʌl tilem bʌ ti Dios. Jehová tsiʼ yajca majqui miʼ tsʼijbuñob, baqui ora miʼ mejlel yicʼot chuqui miʼ tsʼijbuntel. Jin chaʼan, jujumpʼejl libro am bʌ ti Biblia tojʌch chuqui miʼ yʌl yicʼot miʼ coltañonla lac chʼʌmben isujm yom bʌ i cʌntesañonla Dios. Ti Génesis cʼʌlʌl ti Apocalipsis, miʼ pʌs chaʼan an juntiquil pʼolbalʌl muʼ bʌ caj i chaʼ sujtesan ti paraíso ili Pañimil. Miʼ pʌs chaʼan jiñi pʼolbalʌl jiñʌch Jesucristo i jiñi Yumʌntel mi caj i yʌcʼ ti cʌñol chaʼan cojach Jehová yom bʌ miʼ yumañonla (pejcan Génesis 3:15; Mateo 6:10; Apocalipsis 11:15).

8. ¿Chuqui miʼ pʌs chaʼan tsaʼʌch chajpʌntiyob jiñi israelob?

⁸ Dios tsiʼ wen chajpa jaʼel jiñi tejclum Israel.  ¿Bajcheʼ? Jiñʌch cheʼ tsiʼ yʌqʼue Mandar tac. Jumpʼejl ejemplo, an xʼixicob tsaʼ bʌ yajcʌntiyob chaʼan miʼ chaʼleñob eʼtel tiʼ tiʼ jiñi tabernáculo (Éxodo 38:8). Dios tsiʼ subeyob chaʼan yom wen chajpʌbil bajcheʼ miʼ xʌñob majlel yicʼot bajcheʼ yom miʼ cuchob majlel jiñi tabernáculo. Ti wiʼil, jiñi rey David tsiʼ tʼoxbeyob i yeʼtel jiñi motomajob yicʼot levíjob chaʼan miʼ melob i yeʼtel yaʼ ti templo (1 Crónicas 23:1-6; 24:1-3). Cheʼ bʌ jiñi israelob mucʼʌch i chʼujbibeñob i tʼan Jehová, miʼ yʌqʼuentelob bendición. Miʼ tajob i ñʌchʼtʌlel yicʼot temel miʼ yajñelob (Deuteronomio 11:26, 27; 28:1-14).

9. ¿Bajcheʼ chajpʌbil jiñi congregación tac cheʼ ti ñaxam bʌ siglo?

⁹ Jiñi congregación tac cheʼ ti ñaxam bʌ siglo tsaʼ wen chajpʌnti jeʼel. Ti jiñi bʌ ora an junmojt muʼ bʌ i pʌsob bij, yom i yʌl, wiñicob muʼ bʌ i qʼuelob jiñi congregación tac. Ti ñaxan cojach ochemob jiñi apóstolob. Pero ti wiʼil, tsaʼ ochiyob yambʌ xñoptʼañob ancianojoʼ bʌ (Hechos 6:1-6; 15:6). Jehová tsiʼ cʼʌñʌ jiñi junmojt muʼ bʌ i pʌsob bij yicʼot yambʌ xñoptʼañob chaʼan miʼ melob carta tac baqui miʼ yʌjlel yom bʌ miʼ mejlel ti congregación tac (1 Timoteo 3:1-13; Tito 1:5-9). ¿Bajcheʼ tsiʼ taja i wenlel jiñi congregación tac cheʼ tsiʼ jacʼʌyob tsaʼ bʌ i yʌlʌ jiñi junmojt muʼ bʌ i pʌsob bij?

10. ¿Chuqui tsaʼ ujti cheʼ bʌ jiñi congregación tac ti ñaxam bʌ siglo tsiʼ jacʼʌyob tsaʼ bʌ subentiyob? (Qʼuele jiñi dibujo am bʌ tiʼ tejchibal).

¹⁰ (Pejcan Hechos 16:4, 5). Cheʼ ti ñaxam bʌ siglo, an hermanojob tsaʼ bʌ i julaʼtayob congregación tac chaʼan miʼ subeñob «tsaʼ bʌ i comol ñaʼtayob jini apóstolob yicʼot ancianojob añoʼ bʌ ti Jerusalén». Jiñi congregación tac tsaʼʌch i jacʼʌyob tsaʼ bʌ i yʌlʌ jiñi junmojt muʼ bʌ i pʌsob bij, «jini chaʼan tsaʼ pʼʌtesʌntiyob tiʼ tʼan Dios [...]. Tsaʼ pʼojliyob ti jujumpʼejl qʼuin». ¿Bajcheʼ miʼ mejlel lac tsajcʌbeñob i melbal ti laj congregación?

11. ¿Chuqui yom miʼ mel jiñi hermanojob añoʼ bʌ i yeʼtel ti congregación cheʼ an chuqui miʼ yʌl i yorganización Dios?

¹¹ Jiñi ochemoʼ bʌ ti Comité i chaʼan Sucursal, superintendentejob i chaʼan circuito, siervo ministerial yicʼot ancianojob yom miʼ jacʼob muʼ bʌ i subentelob tiʼ yorganización Dios. Jiñi Biblia miʼ subeñonla chaʼan ti lac pejtelel yom mi lac jacʼ muʼ bʌ lac subentel (Deuteronomio 30:16; Hebreos 13:7, 17). Mi xucʼulonla ti Jehová, maʼañic mi caj lac ñusan ti chan muʼ bʌ lac subentel mi muqʼuic caj lac chaʼlen wulwul tʼan. Mach la comic lac mel bajcheʼ Diótrefes, maʼañic bʌ tsiʼ qʼuele ti ñuc jiñi añoʼ bʌ tiʼ wenta congregación (pejcan 3 Juan 9, 10). Cheʼ mi lac jacʼ muʼ bʌ lac subentel, ñʌchʼʌl yicʼot temel miʼ yajñel jiñi congregación. Jin chaʼan, laʼ laj cʼajtiben lac bʌ: «¿Muʼ ba c suben jiñi hermanojob chaʼan xucʼul yom miʼ yajñelob ti Jehová? ¿Ti ora ba mic jacʼ muʼ bʌ i yʌl i yorganización Dios?».

12. ¿Bajcheʼ miʼ waʼchocontel jiñi anciano yicʼot siervo ministerial?

¹² Maxto wen jalic, jiñi Junmojt muʼ bʌ i pʌsob bij tsiʼ qʼuextayob bajcheʼ yom miʼ waʼchocontel jiñi ancianojob yicʼot siervo ministerial. Jiñi Lac Tsictesʌbentel tsiʼ yʌlʌ chaʼan jiñi junmojt muʼ bʌ i pʌsob bij cheʼ ti ñaxam bʌ siglo tsiʼ yʌcʼʌyob i tʼan chaʼan jiñi superintendentejob miʼ mejlel i waʼchocoñob jiñi anciano yicʼot siervo ministerial (qʼuele jiñi sección «Jiñi xpejcaya juñob miʼ cʼajtibeñob i bʌ» yaʼ ti La Atalaya 15 i chaʼan noviembre, 2014). Jin chaʼan, cʼʌlʌl cheʼ ti septiembre i chaʼan 2014 jiñi superintendentejob i chaʼan circuito tsaʼ caji i waʼchocoñob jiñi hermanojob. Cheʼ jiñi ancianojob miʼ subob chaʼan an juntiquil hermano muʼ bʌ i mejlel ti ochel bajcheʼ anciano o siervo ministerial, jiñi superintendente i chaʼan circuito miʼ chaʼlen wersa i cʌn jiñi hermano yicʼot i familia. Tajol yom miʼ loqʼuel yicʼot ti subtʼan (1 Timoteo 3:4, 5). Ti wiʼil, jiñi superintendente i chaʼan circuito miʼ chaʼlen tʼan yicʼot jiñi ancianojob. Miʼ wen tsajiñob ti Biblia chuqui yom bʌ miʼ tsʼʌctesan juntiquil chaʼan miʼ yochel bajcheʼ anciano o siervo ministerial (1 Timoteo 3:1-10, 12, 13; 1 Pedro 5:1-3).

13. ¿Bajcheʼ mi lac pʌs chaʼan mucʼʌch laj coltan jiñi ancianojob?

 ¹³ Jiñi ancianojob miʼ cʼʌñob jiñi Biblia chaʼan miʼ tojʼesañoñobla come yomob i coltan yicʼot i cʌntañob jiñi congregación. Yom mi laj coltañob yicʼot mi lac jacʼbeñob i tʼan, come chaʼañʌch lac wenlel (1 Timoteo 6:3). Cheʼ ti ñaxam bʌ siglo, an xñoptʼañob cheʼ jach bʌ miʼ «toʼol ñusañob qʼuin». Maʼañic miʼ chaʼleñob troñel yicʼot miʼ yotsañob i bʌ baqui mach i wentajobic. Jiñi ancianojob tsiʼ ñopoyob i coltan, pero maʼañic tsiʼ jacʼʌyob. Pablo tsiʼ subeyob chuqui yom miʼ mel jiñi hermanojob ti jiñi congregación. Tsiʼ subeyob: «Qʼuelela jini winic» yicʼot «tʌtsʼʌx laʼ bʌ baʼan». Jiñi hermanojob yom miʼ cʌyob i wen ñochtan, pero mach yomic i yʌl chaʼan mach yomobix i qʼuelob (2 Tesalonicenses 3:11-15). Ili ora, jiñi ancianojob miʼ ñopob i coltan jiñi xñoptʼan tsaʼ bʌ i ñusʌbe i mandar Dios. Jumpʼejl ejemplo, mi juntiquil hermano woli (choncol) i cʌn juntiquil xcʼalʌl mach bʌ xñoptʼañic, miʼ yʌqʼueñob ticʼojel (1 Corintios 7:39). ¿Ixcu mi maʼañic miʼ jacʼ jiñi hermano? Jiñi ancianojob tajol miʼ ñusañob jumpʼejl discurso chaʼan miʼ tsictesañob chaʼan jiñi melbalʌl miʼ yʌcʼ ti ajlel jiñi congregación. ¿Chuqui mi lac mel mi jiñi ancianojob miʼ yʌcʼob jumpʼejl discurso ti laj congregación cheʼ bʌ bajcheʼ jiñi? Ixcu mi wen laj cʌñʌ jiñi hermano woli (yʌquel) bʌ i ñajtʌ tajtʌl ti tʼan, ¿muʼ ba caj laj cʌy lac ñochtan? Mi cheʼʌch mi lac mel, mi caj laj coltan i qʼuel chaʼan mach weñic jiñi melbalʌl yicʼot chaʼan Jehová miʼ tsʼaʼlen. Cheʼ jiñi, tajol miʼ qʼuextan i melbal ^[1] (qʼuele jiñi nota am bʌ tiʼ yujtibal ili temaj).

14. ¿Chuqui miʼ mejlel lac mel chaʼan sʌc miʼ yajñel jiñi congregación?

¹⁴ Jiñi i Tʼan Dios miʼ yʌl chuqui yom mi lac mel chaʼan maʼañic mulil yaʼ ti congregación. Laʼ lac ñaʼtan tsaʼ bʌ ujti yaʼ ti tejclum Corinto. Pablo tsiʼ wen cʼuxbi jiñi hermanojob yaʼ bʌ chʼoyolob. Cabʌlob jin bʌ tsiʼ cʌntesayob tiʼ sujmlel (1 Corintios 1:1, 2). Laʼ cu lac ñaʼtan bajcheʼ tsiʼ yubi i bʌ cheʼ bʌ tsaʼ cʼoti i ñaʼtan chaʼan jiñi congregación maʼañic chuqui woliʼ mel cheʼ bʌ an juntiquil wiñic woli bʌ ti tsʼiʼlel. Pablo tsiʼ sube chuqui yom miʼ mel jiñi ancianojob: «Laʼ poj chojquic loqʼuel ti laʼ tojlel jini winic chaʼan miʼ yajñel tiʼ wenta Satanás». Yom miʼ chaʼleñob ti expulsar jiñi wiñic (1 Corintios 5:1, 5-6, 12). Ili ora, jiñi ancianojob miʼ mejlel i chaʼleñob ti expulsar juntiquil tsaʼʌch bʌ i chaʼle mulil i maʼañic miʼ cʌy i tsucu melbal. Sʌc mi caj i yajñel jiñi congregación mi mucʼʌch lac jacʼ muʼ bʌ i yʌl jiñi Biblia chaʼan bajcheʼ yom mi laj qʼuel jiñi muʼ bʌ i chaʼlentel ti expulsar. Tajol mi laj coltañob jaʼel chaʼan miʼ cʌyob i mul yicʼot miʼ chaʼ lʌcʼtesañob i bʌ ti Jehová.

15. ¿Chuqui yom mi lac mel chaʼan jiñi congregación temel miʼ yajñel yicʼot ti ñʌchʼtʌlel?

¹⁵ Ti jiñi congregación tsaʼ ujti yambʌ wocol. An xñoptʼañob tsaʼ bʌ i pʌyʌyob majlel ti melobʌjʌl yambʌ xñoptʼan. Pablo tsiʼ cʼajtibeyob: «¿Chucoch maʼanic mi laʼ cuchben i mul laʼ wermano cheʼ miʼ techbeñetla wocol?» (1 Corintios 6:1-8). Wʌle ora, an hermanojob muʼ bʌ i melob trato chaʼan eʼtel yicʼot yambʌ hermano, pero an i sʌtʌyob taqʼuin o lotibil miʼ yubiñob i bʌ. Jin chaʼan miʼ majlelob ti melobʌjʌl. Mi cheʼ miʼ yujtel, tajol jiñi quixtañujob miʼ chaʼleñob tʼan tiʼ contra Jehová yicʼot i yorganización. Jiñi  congregación miʼ mejlel i taj wocol jaʼel. Jiñi i Tʼan Dios miʼ yʌl chuqui yom mi lac mel chaʼan ñʌchʼʌl mi la cajñel la quicʼot la quermañojob, anquese tajol mi lac sʌt lac taqʼuin ^[2] (qʼuele jiñi nota am bʌ tiʼ yujtibal ili temaj). Jesús tsiʼ yʌcʼʌ ticʼojel chaʼan bajcheʼ yom mi lac tojʼesan lac wocol (pejcan Mateo 5:23, 24; 18:15-17). Laʼ lac jacʼ jiñi ticʼojel. Cheʼ jiñi, ñʌchʼʌl yicʼot temel mi caj i yajñel jiñi congregación.

16. ¿Chucoch temel añob jiñi i wiñicob Dios?

¹⁶ Jiñi Biblia miʼ yʌl: «Utsʼatax cheʼ tijicña miʼ tem ajñelob hermanojob» (Salmo 133:1). Jiñi israelob chʌn temel yicʼot wen chajpʌbil tsaʼ ajñiyob cheʼ bʌ tsiʼ jacʼbeyob i tʼan Jehová. Dios tsiʼ yʌlʌ bajcheʼ mi caj i yajñel jiñi i wiñicob ti talto bʌ qʼuin, tsiʼ yʌlʌ: «Mi caj c muchʼquiñetla tilel cheʼ bajcheʼ tiñʌmeʼ» (Miqueas 2:12). Jehová tsiʼ wʌn alʌ jeʼel chaʼan jiñi i wiñicob temel mi caj i melbeñob i yeʼtel come mi caj i cʌñob i sujmlel am bʌ ti Biblia. Tsiʼ yʌlʌ: «Mi caj cʌqʼueñob c winicob jumpʼejl jach bʌ tʼan chaʼan miʼ laj pejcañoñob tiʼ Yum, chaʼan comol miʼ chʼujutesañoñob» (Sofonías 3:9). ¿Mach ba wen tijicñayic mi la cubin cheʼ juntemel mi lac chʼujutesan Jehová?

17. ¿Chuqui yom miʼ mel jiñi ancianojob cheʼ bʌ an majqui miʼ mel tsʌts bʌ mulil?

¹⁷ Mi an majqui miʼ chaʼlen tsʌts bʌ mulil, jiñi ancianojob ti ora yom miʼ tojʼesañob yicʼot cʼuxbiya. Yujilob chaʼan Jehová mach yomic cheʼ an mulil ti congregación, i cheʼʌch chʌn sʌc yicʼot temel miʼ mejlel ti ajñel (Proverbios 15:3). Pablo tsiʼ wen cʼuxbi jiñi hermanojob ti Corinto. Jin chaʼan, tsiʼ tiqʼuiyob cheʼ i cʼʌjñibalʌch. Cheʼʌch tsiʼ mele cheʼ bʌ tiʼ tsʼijbubeyob majlel jiñi ñaxam bʌ carta. Jiñi ancianojob ti ora tsiʼ chʼujbiyob jiñi ticʼojel. ¿Bajcheʼ la cujil? Come Pablo tsiʼ chocbeyob majlel yambʌ carta cheʼ ñumeñix chaʼpʼej uxpʼejl uw chaʼan miʼ yʌqʼueñob i tijicñʌyel. Jin chaʼan, «mi tsaʼ yajli ti mulil juntiquil» hermano, jiñi ancianojob yom miʼ tojʼesañob yicʼot i yutslel (Gálatas 6:1).

18. a) ¿Chucoch weñʌch cheʼ tsiʼ jacʼʌyob muʼ bʌ i yʌl i Tʼan Dios jiñi congregación tac ti ñaxam bʌ siglo? b) ¿Chuqui mi caj laj qʼuel ti yambʌ temaj?

¹⁸ Jiñi xñoptʼañob ti ñaxam bʌ siglo tsiʼ jacʼʌyob i Tʼan Dios, jin chaʼan chʌn sʌc tsaʼ ajñi jiñi congregación tac, temel yicʼot ti ñʌchʼtʌlel tsaʼ ajñiyob (1 Corintios 1:10; Efesios 4:11-13; 1 Pedro 3:8). Jin chaʼan, jiñi hermanojob tsaʼ mejli i subob jiñi wen tʼan «tiʼ pejtelel pañimil tiʼ yebal panchan» (Colosenses 1:23). Ili ora, jiñi i wiñiconbʌla Dios wen chajpʌbil yicʼot temel añonla, i mi lac chaʼlen subtʼan tiʼ pejtelel Pañimil. Ti yambʌ temaj mi caj lac bej qʼuel chucoch jiñʌch Jehová, jiñi Yumʌl bʌ ti panchan yicʼot ti pañimil, la com bʌ lac ñumen aqʼuen i ñuclel yicʼot lac chʼujbin muʼ bʌ i yʌl tiʼ libro, jiñi Biblia (Salmo 71:15, 16).