1. a) ¿Bajcheʼ mi lac ñaʼtan chaʼan tsaʼʌch cʼoti i yorajlel chaʼan jiñi i tejclum Dios miʼ cojlel ti Ñuc bʌ Babilonia? b) ¿Chuqui ti cʼajtiya tac mi caj lac jacʼ?

TSAʼIX laj qʼuele yaʼ ti yambʌ temaj chaʼan jiñi xucʼul bʌ xñoptʼañob cʌchʌl tsaʼ ajñiyob tiʼ tojlel jiñi Ñuc bʌ Babilonia. Pero ¿tsaʼ ba cʼoti i yorajlel chaʼan miʼ cojlelob? Tsaʼʌch, come jiñi Biblia miʼ yʌl chaʼan Dios tsiʼ sube loqʼuel i tejclum yaʼ ti Ñuc bʌ Babilonia (pejcan Apocalipsis 18:4). Ili miʼ pʌs chaʼan jiñi xñoptʼañob tsaʼʌch cojliyob. Pero ¿jalixqui? Chaʼan mi lac ñaʼtan, laʼ lac ñaxan jacʼ ili cʼajtiya tac: ¿Chuqui tsiʼ mele jiñi xPejcaya bibliajob tiʼ tojlel jiñi Ñuc bʌ Babilonia cheʼ bʌ maxto cʼoti jiñi jabil 1914? ¿Tsaʼ ba i chaʼleyob subtʼan tiʼ chʼejlel ti jiñi Primera Guerra Mundial? ¿Tsaʼ ba ajñiyob tiʼ tojlel Ñuc bʌ Babilonia ti jiñi bʌ ora tiʼ caj anto bajcheʼ tsaʼ tojʼesʌntiyob?

2. ¿Chuqui tsiʼ meleyob jiñi xPejcaya bibliajob cheʼ maxto tejchemic jiñi Primera Guerra Mundial?

² Jiñi Primera Guerra Mundial tsaʼ ujti cheʼ ti jabil 1914 cʼʌlʌl ti 1918. Cheʼ maxto cʼoti jiñi jabil, Charles Taze Russell yicʼot yambʌ xPejcaya bibliajob tsiʼ qʼueleyob chaʼan jiñi muʼ bʌ i yʌlob  chaʼan miʼ ñopob Cristo maʼañic miʼ pʌsob i sujmlel am bʌ ti Biblia. Jin chaʼan, tsiʼ cʌyʌyob jiñi mach bʌ isujmic ñopbalʌl. Cheʼ ti 1879, jiñi revista Lac Tsictesʌbentel ti inglés tsiʼ yʌlʌ chaʼan jiñi ñopbalʌl tac muʼ bʌ i yʌlob chaʼan ochemobix tiʼ tojlel Cristo pero temel añob yicʼot yumʌlob jiñʌch jiñi Ñuc bʌ Babilonia, jiñi Biblia miʼ lajin bajcheʼ tsʼiʼlel bʌ xʼixic (pejcan Apocalipsis 17:1, 2, Jiñi tsijiʼ bʌ wen tʼañ chaʼañ estudio). *

3. ¿Chuqui tsiʼ meleyob jiñi xPejcaya bibliajob chaʼan miʼ pʌsob chaʼan mach chʌn ochemobix ti jiñi mach bʌ isujmic ñopbalʌl? (Qʼuele jiñi foto am bʌ tiʼ tejchibal).

³ Jiñi xucʼul bʌ xñoptʼañob yujilob chaʼan mach i tajayobic i wenlel ti Dios miʼ maʼañic miʼ loqʼuelob yaʼ ti mach bʌ isujmic ñopbalʌl. Jin chaʼan, cabʌl tsaʼ bʌ i yʌcʼʌyob jumpʼejl jun baqui tiʼ tsictesayob chaʼan muqʼuix caj i loqʼuelob. An tsaʼto bʌ i pejcayob jiñi jun tiʼ tojlel jiñi tempʌbiloʼ bʌ. Jiñi mach añic tsaʼ mejli i melob, ti jujuntiquil tsiʼ chocbeyob majlel jun jiñi ochemoʼ bʌ yaʼ ti ñopbalʌl. Wen tsiquil tsiʼ yʌlʌyob chaʼan mach yomobix ajñel ti jiñi mach bʌ isujmic ñopbalʌl. Ti ñaxan, miʼ mejlelob ti tsʌnsʌntel cheʼ miʼ melob bajcheʼ jiñi. Pero cheʼ bʌ ti 1870, jiñi yumʌlob ti cabʌl país tsiʼ cʌyʌyob i coltan jiñi ñopbalʌl tac. Muqʼuix i mejlel i tsictesañob chaʼan Biblia yicʼot miʼ yʌlob chaʼan maʼañix miʼ mulañob i cʌntesa jiñi ñopbalʌl tac.

4. ¿Chuqui tsaʼ cʼoti i cʌñob jiñi xPejcaya bibliajob tiʼ tojlel jiñi Ñuc bʌ Babilonia, i chuqui tsiʼ meleyob?

⁴ Jiñi xPejcaya bibliajob tsaʼ cʼoti i cʌñob chaʼan mach jasʌlic yom miʼ subeñob i familia, jiñi i cʌñʌyoʼ bʌ yicʼot jiñi ochemoʼ bʌ ti jiñi ñopbalʌl chaʼan tsaʼix i cʌyʌyob mach bʌ isujmic ñopbalʌl. Tiʼ pejtelel wiñicob xʼixicob (quixtañujob) yom miʼ subeñob chaʼan lajal bajcheʼ juntiquil tsʼiʼlel bʌ xʼixic jiñi Ñuc bʌ Babilonia. Jin chaʼan cheʼ ti diciembre i chaʼan 1917 cʼʌlʌl tiʼ tejchibal jabil 1918, jiñi xPejcaya bibliajob ti jumpʼejlob i pusicʼal tsiʼ pucuyob 10 millón jiñi tratado «Babilonia tsaʼix yajli» (La caída de Babilonia). Tsiʼ cʼʌñʌyob ili tratado chaʼan jamʌ tsiquil miʼ subob i lot jiñi ñopbalʌl tac. Miʼ mejlel lac ñaʼtan chaʼan tsaʼ wen michʼayob jiñi ñaxañoʼ bʌ ti ñopbalʌl. Pero jiñi xpejcaya bibliajob maʼañic tsiʼ cʌyʌyob i bʌ. Tsiʼ bej chaʼleyob subtʼan yicʼot tsiʼ jacʼbeyob ‹i mandar Dios anquese tsiʼ ñusʌbeyob i mandar winicob›. (Hechos 5:29). Ili miʼ pʌsbeñonla chaʼan jiñi xñoptʼañob mach jiñic cheʼ ti Primera Guerra Mundial tsaʼ ochiyob tiʼ tojlel jiñi Ñuc bʌ Babilonia. Tiʼ sujm, loqʼuelix mucʼob yicʼot wolix (choncolix) i coltan yambʌlob chaʼan miʼ loqʼuelob jaʼel.

5. ¿Bajcheʼ la cujil chaʼan jiñi hermanojob tsaʼʌch i chaʼleyob subtʼan tiʼ chʼejlel ti jiñi Primera Guerra Mundial?

⁵ Ti yambʌ ora tsaʼ la cʌlʌ chaʼan jiñi hermanojob maʼañic tsaʼ qʼuejliyob ti utsʼat ti Dios cheʼ ti Primera Guerra Mundial come maʼañic tsiʼ chaʼleyob subtʼan tiʼ chʼejlel. Tsaʼ tsictesʌnti chaʼan tiʼ caj iliyi, Jehová tsiʼ jumucʼ acʼʌyob ti ajñel tiʼ tojlel jiñi Ñuc bʌ Babilonia. Pero jiñi hermanojob tsaʼ bʌ i melbeyob i yeʼtel (troñel) Dios cheʼ ti 1914 cʼʌlʌl ti 1918 tsiʼ yʌlʌyob chaʼan tsaʼʌch i chaʼleyob wersa i chʌn chaʼleñob subtʼan. Cheʼ mi lac  ñumen ñaʼtan bajcheʼ tsiʼ ñusa jiñi xPejcaya bibliajob ti jiñi jabil tac, miʼ mejlel lac ñumen chʼʌmben isujm chuqui yom i yʌl cheʼ tsaʼ ajñiyob tiʼ tojlel Babilonia.

6, 7. a) ¿Chuqui ti wocol tsiʼ tajayob cheʼ ti Primera Guerra Mundial jiñi xPejcaya bibliajob? b) ¿Chuqui miʼ pʌs chaʼan wen añobʌch i chʼejlel jiñi xPejcaya bibliajob?

⁶ Cheʼ bʌ woli (yʌquel) jiñi guerra, jiñi xPejcaya bibliajob tsiʼ wen chaʼleyob subtʼan. Pero tsaʼʌch i tajayob wocol tac. Laʼ laj qʼuel chaʼpʼejl. Ñaxam bʌ jiñʌch cheʼ mach yujilobic cʼʌñol tiʼ subtʼan jiñi Biblia. Cojach ñʌmʌlob i cʼʌn jiñi jun tac loqʼuem bʌ ti Biblia i jin jach miʼ cʌyben jiñi lac piʼʌlob chaʼan miʼ pejcañob. Jiñi libro The Finished Mystery (El misterio terminado) jiñʌch jumpʼejl. Jin chaʼan, cheʼ bʌ jiñi yumʌl tsiʼ mʌcta ili libro cheʼ ti 1918, cabʌl hermanojob wocol tsiʼ yubiyob chaʼan miʼ chaʼleñob subtʼan. I chaʼpʼejlel wocol jiñʌch cheʼ ti jiñi jach bʌ jabil tsaʼ tejchi jiñi tsʌts bʌ sijmal tsaʼ bʌ pam pujqui. Jiñi hermanojob maʼañic tsaʼ mejliyob ti loqʼuel ti subtʼan ti yambʌ tejclum come ti orajach miʼ toyonla ili cʼamʌjel. Pero jiñi xPejcaya bibliajob tsaʼʌch i chaʼleyob wersa subtʼan.

⁷ Jiñi hermanojob tsaʼ bʌ chumleyob ti 1914 tsiʼ pʌsʌyob jiñi «Foto-Drama de la Creación». Ili jiñʌch jumpʼejl programa muʼ bʌ i pʌs dibujo tac cabʌl bʌ i colorlel, muʼ bʌ i sub i bʌ yicʼot miʼ pʌs video, jin chaʼan, tsiʼ wen mulayob i qʼuel. Miʼ tsictesan bajcheʼ tsaʼ tejchi ili pañimil (mulawil) cʼʌlʌl baqui ora miʼ yujtel i yumʌntel Cristo. Ti jiñi ñaxam bʌ jabil cheʼ tsaʼ pʌsle, ñumen ti 9 millón tsiʼ qʼueleyob. Ñumen cabʌl tsaʼ bʌ i qʼueleyob bajcheʼ i yonlel i testigojob Jehová ili ora. Miʼ yʌjlel jaʼel chaʼan ti 1916 ñumen ti 809 mil tsajñiyob ti tempa bʌ tac tsaʼ bʌ ujti ti Estados Unidos. I cheʼ ti 1918 ñumen ti mil tsajñiyob. Jiñi xPejcaya bibliajob tsaʼʌch i wen pʌsʌyob i chʼejlel.

8. ¿Chuqui tsiʼ meleyob jiñi añoʼ bʌ tiʼ wenta subtʼan chaʼan miʼ coltañob jiñi xPejcaya bibliajob cheʼ ti Primera Guerra Mundial?

 ⁸ Cheʼ ti Primera Guerra Mundial, jiñi añoʼ bʌ tiʼ wenta chaʼan miʼ qʼuelob subtʼan tsiʼ chaʼleyob wersa chaʼan miʼ coltañob yicʼot miʼ yʌqʼueñob jun tac loqʼuem bʌ ti Biblia jiñi hermanojob, i tsaʼʌch i tajayob i pʼʌtʌlel chaʼan miʼ chʌn chaʼleñob subtʼan. Jiñi hermano Richard Barber tsiʼ wen chaʼle subtʼan yicʼot i chʼejlel ti jiñi jabil tac. Tsiʼ yʌlʌ: «Tsaʼ lon j colta jiñi muʼ bʌ i julaʼtañob congregación chaʼan maʼañic miʼ cʌyob jiñi eʼtel, i tsaʼ bej pujqui jiñi The Watch Tower. Tsaʼto chojqui tac majlel ti Canadá, yaʼ baqui maʼañic miʼ mejlel ti pujquel». Tsiʼ yʌlʌ jaʼel: «An hermanojob tsaʼ bʌ chilbentiyob i chaʼan jiñi libro i cʼabaʼ The Finished Mystery, pero tsaʼ mejli c chaʼ chocbeñob majlel ti correo. Jiñi hermano Rutherford tsiʼ ñaʼta chaʼan miʼ mejlel colem tempa bʌ tac tiʼ tejclum tac Estados Unidos yicʼot miʼ chojquel majlel xcʌntesajob chaʼan miʼ pʼʌtʼesan jiñi hermanojob».

9. a) ¿Chucoch tsaʼʌch tojʼesʌntiyob jiñi i wiñicob Dios cheʼ ti 1914 cʼʌlʌl ti 1919? b) Anquese tsaʼʌch tojʼesʌntiyob i wiñicob Dios, ¿chuqui mach yomic mi lac ñaʼtan?

⁹ Jiñi xPejcaya bibliajob an chuqui yom tsiʼ tojʼesayob. Maxto añic tsiʼ wen chʼʌmbeyob isujm cheʼ bʌ miʼ yʌl jiñi Biblia chaʼan yom miʼ jacʼbeñob i tʼan yumʌlob (Romanos 13:1). Jin chaʼan, mach wen xucʼulic tsaʼ ajñiyob tiʼ yorajlel guerra. Jumpʼejl ejemplo, jiñi presidente i chaʼan Estados Unidos tsiʼ yʌlʌ chaʼan yom miʼ cʼajtintel ñʌchʼtʌlel ti oración cheʼ ti 30 i chaʼan mayo, 1918. Jiñi revista ti inglés tsiʼ yʌlʌ chaʼan jiñi xPejcaya bibliajob cheʼʌch yom miʼ melob. An hermanojob tsaʼ bʌ i yʌcʼʌyob taqʼuin yicʼot tsaʼ bʌ ochiyob ti soldado chaʼan miʼ majlelob ti guerra. Jin chaʼan yomʌch miʼ tojʼesʌntelob. Pero mach yomic mi lac ñaʼtan chaʼan jin tiʼ caj tsaʼ ajñiyob tiʼ tojlel Babilonia. Tiʼ yorajlel jiñi Primera Guerra Mundial loqʼuelix mucʼob ti jiñi mach bʌ isujmic ñopbalʌl (pejcan Lucas 12:47, 48).

10. ¿Bajcheʼ tsiʼ pʌsʌyob chaʼan mucʼʌch i qʼuelob ti ñuc laj cuxtʌlel jiñi xPejcaya bibliajob?

¹⁰ Jiñi xPejcaya bibliajob maxto añic tsiʼ wen chʼʌmbeyob isujm yom bʌ i yʌl cheʼ mach yomic mi la cotsan lac bʌ ti política, pero yujilobʌch chaʼan mach yomic mi lac chaʼlen tsʌnsa. Jin chaʼan, jiñi tsaʼ bʌ ochiyob bajcheʼ soldado maʼañic majqui tsiʼ tsʌnsayob. Pero an ñaxam bʌ tsaʼ ajqʼuiyob ti guerra chaʼan miʼ tsʌnsʌntelob.

11. ¿Chuqui tsiʼ mele jiñi xʼeʼtelob cheʼ bʌ maʼañic tsiʼ jacʼʌyob majlel ti guerra jiñi xPejcaya bibliajob?

¹¹ Cheʼ xucʼul tsaʼ ajñiyob ti Dios jiñi hermanojob, jiñi Diablo maʼañic tsiʼ mulaj. Jin chaʼan tsiʼ cʼʌñʌ yumʌlob chaʼan miʼ ñop i jisañob (Salmo 94:20). Jumpʼejl ejemplo, juntiquil i yum soldadojob ti Estados Unidos tsiʼ sube jiñi hermano Rutherford yicʼot Van Amburgh chaʼan an yumʌlob tsaʼ bʌ i ñopoyob i yʌcʼ yambʌ tʼan chaʼan yom miʼ tsʌnsʌntelob jiñi maʼañic bʌ miʼ majlelob ti guerra. Tsaʼ bʌ i ñumen taja ti tʼan jiñi i yum soldadojob jiñʌch jiñi xPejcaya bibliajob. Pero wen michʼ tsiʼ sube jiñi hermano Rutherford chaʼan jiñi presidente ti jiñi país maʼañic tsiʼ yʌcʼʌ ti mejlel. I tsiʼ yʌlʌ: «Pero cujil lojon bajcheʼ miʼ mejlel c mʌctañetla, ¡i mi caj c mel lojon!».

12, 13. a) ¿Chucoch tsaʼ otsʌntiyob ti cárcel 8 hermanojob? b) ¿Tsaʼ ba i cʌyʌyob i jacʼben i tʼan Jehová anquese tsaʼ otsʌntiyob ti cárcel? Tsictesan.

¹² Jiñi xʼeʼtelob tsaʼʌch i tajayob bajcheʼ miʼ mejlel i ticʼlan jiñi xPejcaya bibliajob. Tsiʼ yotsayob  ti cárcel jiñi hermano Rutherford, Van Amburgh yicʼot yambʌ 6 hermanojob añoʼ bʌ tiʼ wenta jiñi Sociedad Watch Tower. Jiñi juez tsiʼ yʌlʌ chaʼan ñumen bʌbʌqʼuen jiñi hermanojob bajcheʼ junmojt soldadojob i chaʼan Alemania. Tsiʼ yʌlʌ chaʼan tsʌts yom miʼ tojob i mul come maʼañic tsiʼ qʼueleyob ti ñuc jiñi yumʌlob, jiñi soldadojob yicʼot yambʌ ñopbalʌl tac. Jiñi 8 hermanojob tsaʼ subentiyob chaʼan cabʌl jab mi caj i tojob i mul i tsaʼ chojquiyob majlel ti jumpʼejl cárcel am bʌ ti Atlanta (Georgia, Estados Unidos). Pero tsaʼ cojliyob cheʼ bʌ tsaʼ ujti jiñi guerra.

¹³ Anquese tsaʼ otsʌntiyob ti cárcel jiñi hermanojob, wen yujilob chaʼan yom miʼ jacʼbeñob i tʼan Dios. ¿Bajcheʼ la cujil? Come tsiʼ chocbeyob majlel jumpʼejl jun jiñi presidente i chaʼan Estados Unidos chaʼan yom miʼ cojlelob. Tsiʼ yʌlʌyob chaʼan maʼañic miʼ chaʼleñob tsʌnsa come cheʼʌch miʼ yʌl jiñi Biblia. Cheʼ jaʼel, tsiʼ yʌlʌyob chaʼan mi juntiquil tsaʼix bʌ i yʌcʼʌ i bʌ ti Dios miʼ ñusʌben i tʼan, mi caj i jisʌntel. ¡Jiñi hermanojob tsaʼʌch i wen pʌsʌyob i chʼejlel! Ti jumpʼejlob i pusicʼal tsiʼ jacʼbeyob i tʼan Jehová.

14. Tsictesan bajcheʼ miʼ yʌl yaʼ ti Biblia tsaʼ bʌ ujti cheʼ ti 1914 cʼʌlʌl ti 1919.

¹⁴ Jiñi tsaʼ bʌ ujti tiʼ tojlel jiñi xPejcaya bibliajob cheʼ ti 1914 cʼʌlʌl tiʼ tejchibal jiñi jabil 1919 miʼ tsictesʌntel ti Malaquías 3:1-3 (pejcan). Ti ili versículo tac, jiñi isujm bʌ lac Yum jiñʌch Jehová, i jiñi xsuboñel chaʼan bʌ jiñi trato jiñʌch Jesucristo. Tsaʼ tiliyob i sʌqʼuesan jiñi «levíjob», yom i yʌl, jiñi bombiloʼ bʌ o yajcʌbiloʼ bʌ. Cheʼ bʌ Jehová tsaʼix i tojʼesa yicʼot i sʌqʼuesa jiñi bombiloʼ bʌ, chajpʌbilobix chaʼan yambʌ troñel. Cheʼ ti 1919, Jesús tsiʼ waʼchoco jiñi «xucʼul bʌ xʼeʼtel am bʌ cabʌl i ñaʼtʌbal» chaʼan miʼ qʼuelben i tejclum Dios (Mateo 24:45). Jiñi i wiñicob Dios librejix tsaʼ cʌleyob tiʼ tojlel jiñi Ñuc bʌ Babilonia. Cʼʌlʌl ti jiñi bʌ ora tsaʼ caji i ñumen cʌñob chuqui miʼ mulan Dios, i woliʼ ñumen colelob i cʼuxbiya tiʼ tojlel. ¡Wen tijicñayob cheʼ añob i chaʼan i bendición Jehová! ^[1] (Qʼuele jiñi nota am bʌ tiʼ yujtibal ili temaj).

15. ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová cheʼ tsiʼ locʼsayonla ti jiñi Ñuc bʌ Babilonia?

¹⁵ Mi lac wen aqʼuen wocolix i yʌlʌ Jehová cheʼ tsiʼ locʼsayonla tiʼ tojlel jiñi Ñuc bʌ Babilonia. Satanás maʼañic mejlem i jisan jiñi isujm bʌ chʼujutesaya. Pero yom mi laj cʼajtesan chucoch tsiʼ locʼsayonla Jehová. Yom chaʼan tiʼ pejtelel lac piʼʌlob miʼ tajob i cuxtʌlel (2 Corintios 6:1). Yonlel lac piʼʌlob yom to bʌ miʼ coltʌntelob come añob ti mach bʌ isujmic ñopbalʌl. Laʼ lac chaʼlen wersa lac tsajcʌben i melbal jiñi xucʼul bʌ la quermañojob yicʼot laʼ laj coltañob loqʼuel yambʌlob ti jiñi mach bʌ isujmic ñopbalʌl.