1, 2. ¿Chucoch i cʼʌjñibalʌch cheʼ mi lac ñuqʼuesʌben i pusicʼal yambʌlob?

JUNTIQUIL xcʼalʌl am bʌ 18 i jabilel i cʼabaʼ Cristina miʼ yʌl: «Jiñi c tatob maʼañic miʼ ñuqʼuesañob c pusicʼal, ti bele ora mucʼ jach i wajleñoñob. Cʼux mi cubin muʼ bʌ i subeñoñob. Miʼ yʌlob chaʼan maʼañic mic ñaʼtan, chaʼan maʼañic baqui ora mi caj c chaʼlen pensar ti wen yicʼot chaʼan jujpʼeñon. Mic wen chaʼlen uqʼuel yicʼot maʼañic mic pejcañob. Maʼañic j cʼʌjñibal mi cubin c bʌ»  ^[1] (qʼuele jiñi nota am bʌ tiʼ yujtibal ili temaj). Ili ejemplo miʼ pʌs chaʼan wocolʌch mi lac ñusan cheʼ maʼañic majqui miʼ ñuqʼuesan lac pusicʼal.

² Cheʼ mi lac ñuqʼuesʌben i pusicʼal yambʌlob, miʼ mejlel lac wen coltañob. Juntiquil hermano i cʼabaʼ Rubén miʼ yʌl: «Cheʼ bʌ woliyon ti subtʼan quicʼot juntiquil anciano, tsiʼ qʼuele chaʼan mach wen tijicñayoñic. Tsaʼ c sube bajcheʼ yubil mi cubin c bʌ i tsiʼ wen acʼʌ ti ñuc tsaʼ bʌ c sube. Tsiʼ subeyon chuqui tac woli c mel ti wen. Tsiʼ cʼajtesʌbeyon tsaʼ bʌ i yʌlʌ Jesús chaʼan ñumen an laj cʼʌjñibal bajcheʼ cabʌl xpuruwoc. Mic chʌcʌ ñaʼtan jiñi texto, i miʼ cʼotel tic pusicʼal. Tsiʼ wen coltayon tsaʼ bʌ i subeyon jiñi anciano» (Mateo 10:31).

3. a) ¿Chuqui tsiʼ yʌlʌ jiñi apóstol Pablo yom bʌ mi lac mel? b) ¿Chuqui ti cʼajtiya tac mi caj laj qʼuelben i jacʼbal ti ili temaj?

³ Jiñi Biblia miʼ yʌl chaʼan yom mi lac chʌcʌ ñuqʼuesʌben lac bʌ lac  pusicʼal (qʼuele jiñi recuadro «¿Chuqui yom i yʌl?»). Jiñi apóstol Pablo tsiʼ sube jiñi xñoptʼañob hebreojoʼ bʌ: «Hermanojob, chʌcʌ qʼuele laʼ bʌ ame tejchic jontolil ti laʼ pusicʼal, ame mi laʼ cʌy jini cuxul bʌ Dios mi mach xucʼulic mi laʼ ñop. Pero yom mi laʼ xicʼben laʼ bʌ ti utsʼat ti jujumpʼejl qʼuin». Pablo tsiʼ yʌlʌ chaʼan yom mi lac ñuqʼuesʌben lac bʌ lac pusicʼal ‹ame tsʌtsʼac lac pusicʼal ti mulil yujil bʌ lotiya› (Hebreos 3:12, 13). Cheʼ mi lac ñaʼtan bajcheʼ yubil mi la cubin cheʼ bʌ an majqui miʼ ñuqʼuesan lac pusicʼal, miʼ cʼotel laj cʌn chaʼan ñucʌch i cʼʌjñibal cheʼ mi lac mel jaʼel. Ti ili temaj mi caj laj qʼuelben i jacʼbal ili cʼajtiya tac: ¿Chucoch yom mi lac ñuqʼuesʌben i pusicʼal yambʌyob? ¿Bajcheʼ miʼ mejlel lac lajin Jehová, Jesús yicʼot Pablo cheʼ mi lac ñuqʼuesʌben i pusicʼal yambʌlob? ¿I chuqui miʼ mejlel lac mel chaʼan mi lac ñuqʼuesʌben i pusicʼal yambʌlob?

4. a) ¿Majqui yom miʼ ñuqʼuesʌbentelob i pusicʼal? b) ¿Chucoch an quixtañujob maʼañic bʌ miʼ ñuqʼuesʌbeñob i pusicʼal yambʌlob?

⁴ Ti lac pejtelel la com cheʼ an majqui miʼ ñuqʼuesan lac pusicʼal. Pero jiñi alpʼeñelob jiñʌch yom bʌ miʼ ñumen ñuqʼuesʌbentelob i pusicʼal tiʼ tatob. Juntiquil maestro miʼ yʌl chaʼan jiñi alpʼeñelob «yom miʼ ñuqʼuesʌbentelob i pusicʼal cheʼʌch bajcheʼ yom miʼ mujlel jiñi alʌ teʼ tac». Tsiʼ bej alʌ: «Cheʼ miʼ ñuqʼuesʌbentelob i pusicʼal jiñi alpʼeñelob, ñumen añob i cʼʌjñibal yicʼot miʼ cʼuxbintelob miʼ yubin». Pero come chumulonla «ti cojix bʌ qʼuin», jiñi quixtañujob i bajñel jach miʼ ñaʼtañob i bʌ yicʼot maʼañic miʼ cʼuxbiñob yambʌlob (2 Timoteo 3:1-5). Jin chaʼan, maʼañic miʼ ñuqʼuesʌbeñob i pusicʼal yambʌlob. An tatʌlob maʼañic bʌ miʼ ñuqʼuesʌbeñob i pusicʼal i yalobilob come mach cheʼic tsaʼ melbentiyob. Anquese cheʼʌch yom miʼ melbentelob jaʼel jiñi ñucobix bʌ, cabʌl maʼañic bʌ miʼ melbentelob. Jin chaʼan, cabʌl miʼ yʌlob chaʼan maʼañic miʼ subentelob wem bʌ tʼan tiʼ troñelob.

5. ¿Chuqui miʼ mejlel lac mel chaʼan mi lac ñuqʼuesʌben i pusicʼal yambʌlob?

⁵ An cabʌl bajcheʼ miʼ mejlel lac ñuqʼuesʌben i pusicʼal yambʌlob. Miʼ mejlel la cʌqʼueñob i tijicñʌyel cheʼ bʌ an chuqui wen miʼ melob o mi lac subeñob chaʼan mi laj qʼuel ti ñuc jiñi wem bʌ i melbalob. Miʼ mejlel lac ñuqʼuesʌbeñob i pusicʼal jaʼel cheʼ chʼijiyemob (1 Tesalonicenses 5:14). Come ti bele ora an la quicʼot la quermañojob, wen an i yorajlel chaʼan mi lac subeñob muʼ bʌ i ñuqʼuesʌbeñob i pusicʼal (pejcan Eclesiastés 4:9, 10). Jin chaʼan laʼ laj cʼajtiben lac bʌ: «¿Muʼ ba c subeñob chucoch mij cʼuxbiñob yicʼot mij qʼuelob ti ñuc? ¿Muʼ ba c mel cheʼ jajayajl mic mejlel?». Laʼ laj cʼajtesan muʼ bʌ i yʌl jiñi Biblia: «Jini yujil bʌ wen bʌ tʼan an cabʌl i cʼʌjñibal ti coltaya» (Proverbios 15:23).

6. ¿Chucoch yom i cʼunʼesʌben i wiñicob Dios jiñi Satanás? Alʌ bajcheʼ tsiʼ ñopo i mel ti wajali.

⁶ Satanás yom i cʼuñʼesañonla come yujil chaʼan cheʼʌch miʼ mejlel laj cʌy Jehová. Proverbios 24:10 miʼ yʌl chaʼan miʼ jubel lac «pʼʌtʌlel» mi tsaʼ laj cʼunʼesa lac bʌ cheʼ an lac wocol. Satanás tsiʼ yʌqʼue cabʌl wocol Job chaʼan miʼ ñop i cʼunʼesan. Pero maʼañic tsaʼ mejli come Job xucʼul tsaʼ ajñi ti Jehová (Job 2:3; 22:3; 27:5). Miʼ mejlel laj contrajin jaʼel jiñi Satanás chaʼan maʼañic miʼ cʼuñʼesañonla. Mi mucʼʌch lac bej ñuqʼuesʌben i pusicʼal lac familia yicʼot jiñi hermanojob, tijicña mi caj la cajñel ti lac pejtelel yicʼot xucʼul mi caj la cajñel tiʼ tojlel Jehová.

7, 8. a) ¿Bajcheʼ an i ñuqʼuesʌbe i pusicʼal yambʌ quixtañujob jiñi Jehová? b) ¿Bajcheʼ miʼ mejlel i lajiñob Jehová jiñi tatʌlob? (Qʼuele jiñi dibujo am bʌ tiʼ tejchibal).

⁷ Jehová miʼ mulan i ñuqʼuesan lac pusicʼal. Juntiquil tsaʼ bʌ i tsʼijbu jiñi Salmo, tsiʼ yʌlʌ: «Lʌcʼʌl an lac Yum baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal» o cʼuñoʼ bʌ (Salmo 34:18). Cheʼ bʌ jiñi Jeremías tsiʼ chaʼle bʌqʼuen yicʼot tsaʼ cʼunʼa, Jehová tsiʼ sube chaʼan mi caj i coltan (Jeremías 1:6-10). Jehová tsiʼ  pʼʌtʼesa jaʼel jiñi xʼaltʼan Daniel cheʼ tsiʼ choco cʼotel juntiquil ángel yaʼ baqui an. Jiñi ángel tsiʼ sube chaʼan wen cʼuxbibil ti Dios (Daniel 10:8, 11, 18, 19). ¿Muʼ ba i mejlel lac lajin Jehová cheʼ mi lac ñuqʼuesʌben i pusicʼal la quermañojob, jiñi precursorob yicʼot añobix bʌ i jabilel maʼañix bʌ miʼ wen mejlelob ti subtʼan?

⁸ Jehová yicʼot Jesús cabʌl jab tsaʼ laja ajñiyob ti panchan. Pero Jehová yujil chaʼan yomʌch miʼ bej ñuqʼuesʌbentel i pusicʼal i Yalobil cheʼ bʌ tsaʼ ajñi wʌʼ ti Pañimil. Jin chaʼan, chaʼ sujtel tsiʼ chaʼle tʼan Jehová cʼʌlʌl ti panchan i tsiʼ yʌlʌ: «Jiñʌch Calobil muʼ bʌ j cʼuxbin. Wen utsʼat mij qʼuel» (Mateo 3:17; 17:5). Jehová tsiʼ yʌlʌ ili tʼan cheʼ bʌ Jesús tsiʼ teche jiñi subtʼan yicʼot cheʼ cojax jumpʼejl jab cʌylem wʌʼ ti Pañimil. Miʼ mejlel la cʌl chaʼan Jesús tsaʼʌch ñucʼa i pusicʼal cheʼ bʌ tsiʼ yubi i yʌl i Tat chaʼan miʼ cʼuxbin yicʼot miʼ qʼuel ti ñuc. Jehová tsiʼ ñuqʼuesʌbe i pusicʼal Jesús ti jiñi cojix bʌ acʼʌlel cheʼ wʌʼan ti Pañimil. Come an cabʌl chuqui woliʼ cʼojoʼtan Jesús, Jehová tsiʼ choco cʼotel juntiquil ángel chaʼan miʼ pʼʌtʼesan (Lucas 22:43). Jiñi tatʌlob miʼ mejlel i lajiñob Jehová cheʼ miʼ chʌcʌ ñuqʼuesʌbeñob i pusicʼal i yalobilob yicʼot miʼ yʌqʼueñob i tijicñʌyel cheʼ miʼ melob chuqui wen. Miʼ chaʼleñob wersa chaʼan miʼ pʼʌtʼesañob yicʼot chaʼan miʼ coltañob i ñusan jiñi wocol tac muʼ bʌ i tajob ti escuela.

9. ¿Chuqui mi laj cʌn chaʼan bajcheʼ tsiʼ mele Jesús tiʼ tojlel i apóstolob?

⁹ Jesús tsiʼ pʌsbeyonla cʌytʌl yom bʌ mi lac mel. Ti jiñi cojix bʌ acʼʌlel tsiʼ ñusa ti Pañimil, tsiʼ pocbe i yoc jiñi apóstolob yicʼot tsiʼ subeyob chaʼan ñuc i cʼʌjñibal cheʼ añob i pecʼlel. Pero maʼañic tsiʼ jacʼʌyob, tsiʼ letojiyob majqui ñumen ñuc tiʼ tojlelob. Cheʼ jaʼel, Pedro tsaʼ cʼoti i yʌl chaʼan maʼañic ba ora mi caj i cʌy Jesús (Lucas 22:24, 33, 34). Pero Jesús maʼañic tsiʼ wen acʼʌ ti ñuc mach bʌ weñic tiʼ tojlel i apóstolob. Tsiʼ yʌqʼueyob i tijicñʌyel cheʼ xucʼul tsaʼ ajñiyob tiʼ tojlel. Tsiʼ subeyob jaʼel chaʼan ñumen ñuc chuqui mi caj i melob yicʼot chaʼan Jehová miʼ cʼuxbiñob (Lucas 22:28; Juan 14:12; 16:27). Laʼ laj cʼajtiben lac bʌ: «¿Cheʼ ba mic mel bajcheʼ Jesús i mi cʌqʼueñob i tijicñʌyel yambʌlob chaʼan wem bʌ i melbalob, o jin jach mij qʼuelbeñob i sajtemal?».

10, 11. ¿Chuqui tsiʼ mele Pablo chaʼan miʼ ñuqʼuesʌben i pusicʼal jiñi hermanojob?

¹⁰ Jiñi apóstol Pablo ñʌmʌl i yʌl chuqui tac wen tiʼ tojlel jiñi hermanojob. Cabʌl jab tsiʼ chaʼle xʌmbal yicʼotob i tsaʼ mejli i wen cʌñob. Pero maʼañic tiʼ tsʼijbu mach bʌ weñic tiʼ tojlelob. Wen chuqui tsiʼ yʌlʌ tiʼ tojlelob. Jumpʼejl ejemplo, tsiʼ yʌlʌ chaʼan Timoteo jiñʌch cʼuxbibil bʌ i yalobil yicʼot xucʼul bʌ i pusicʼal ti lac Yum, i chaʼan mucʼʌch caj i cʌntan jiñi hermanojob (1 Corintios 4:17; Filipenses 2:19, 20). Pablo tsiʼ sube jiñi xñoptʼañob ti Corinto tiʼ tojlel Tito: «Jiñʌch c piʼʌl muʼ bʌ i coltañon ti jini eʼtel ti laʼ tojlel» (2 Corintios 8:23). Miʼ mejlel la cʌl chaʼan Timoteo yicʼot Tito tsaʼʌch ñucʼayob i pusicʼal cheʼ bʌ tsiʼ yubiyob muʼ bʌ i ñaʼtan Pablo tiʼ tojlelob.

¹¹ Pablo yicʼot Bernabé ti jumpʼejlob i pusicʼal tsiʼ ñaʼtayob i yʌcʼ i cuxtʌlel chaʼan miʼ ñuqʼuesʌbeñob i pusicʼal jiñi hermanojob. Jumpʼejl ejemplo, yujilob chaʼan yaʼ ti Listra an quixtañujob yom bʌ i tsʌnsañob. Pero tsaʼ chaʼ sujtiyob yaʼi chaʼan miʼ ñuqʼuesʌbeñob i pusicʼal yicʼot xucʼul miʼ yajñelob ti Jehová jiñi tsijiʼ bʌ xñoptʼañob (Hechos 14:19-22). Ti wiʼil, Pablo tsiʼ taja wocol yaʼ ti Éfeso come an tsaʼ bʌ wen michʼayob i qʼuel, pero yaʼʌch tsaʼ cʌyle i ñuqʼuesʌben i pusicʼal jiñi hermanojob. Hechos 20:1, 2 miʼ yʌl: «Pablo tsiʼ pʌyʌ tilel xcʌntʼañob. Tsiʼ xicʼbeyob ti jini wen tʼan. Tsiʼ lajlaj jatsʼbeyob i pat. Tsiʼ subeyob i bʌ adiós. Pablo tsaʼ loqʼui chaʼan miʼ majlel ti Macedonia. Cheʼ bʌ woliʼ ñumel majlel tiʼ bijlel Grecia tsiʼ wen xicʼbeyob ti jini wen tʼan. Tsaʼ cʼoti ti Grecia».

12. ¿Chucoch yomʌch mi lac majlel ti tempa bʌ tac?

¹² Jehová yom chaʼan mi lac taj chuqui wen. Jiñi chaʼan miʼ subeñonla chaʼan maʼañic mi laj cʌy lac tempan lac bʌ. Yaʼ ti tempa bʌ tac mi laj cʌn tiʼ tojlel Dios yicʼot mi lac ñuqʼuesʌben lac bʌ  lac pusicʼal (1 Corintios 14:31; pejcan Hebreos 10:24, 25). Laʼ laj qʼuel muʼ bʌ i yʌl Cristina, jiñi xcʼalʌl tsaʼ bʌ lac taja ti tʼan yaʼ ti párrafo 1: «Muʼ bʌ c ñumen mulan yaʼ ti tempa bʌ tac jiñʌch jiñi cʼuxbiya yicʼot cheʼ mic taj i ñuqʼuesʌntel c pusicʼal. An i tajol wen chʼijiyemon mij cʼotel yaʼ tiʼ Yotlel Tempa bʌ. Pero jiñi hermanajob miʼ tilelob baqui añon, miʼ mecʼoñob yicʼot miʼ subeñoñob wen tac bʌ tʼan. Miʼ yʌlob chaʼan miʼ cʼuxbiñoñob yicʼot chaʼan tijicñayob cheʼ miʼ qʼuelob bajcheʼ woli j colel majlel tiʼ chaʼan bʌ Dios. Miʼ wen aqʼueñoñob c tijicñʌyel». ¡Wen utsʼatax cheʼ ti lac pejtelel mi lac ñuqʼuesʌben lac bʌ lac pusicʼal! (Romanos 1:11, 12).

13. ¿Chucoch yomʌch miʼ ñuqʼuesʌbentelob i pusicʼal jaʼel jiñi añix bʌ ora cajel i melbeñob i yeʼtel Jehová?

¹³ Jiñi cabʌlix bʌ jab i cajel i melbeñob i yeʼtel Jehová yom miʼ ñuqʼuesʌbentelob i pusicʼal jaʼel. Laʼ cu lac ñaʼtan tiʼ tojlel Josué. Jehová tsiʼ yajca chaʼan miʼ yujtesan i pʌy ochel jiñi israelob yaʼ ti Lum tsaʼ bʌ wʌn Subentiyob. Josué cabʌlix jab cajel i melben i yeʼtel Jehová, pero Jehová tsiʼ sube Moisés: «Waʼchocon Josué ti a weʼtel. Xicʼben chaʼan miʼ chʼejlʼan, come jini mi caj i pʌy ochel israelob. Mi caj i yʌqʼueñob ili lum woli bʌ a qʼuel» (Deuteronomio 3:27, 28). Yomʌch miʼ ñuqʼuesʌbentel i pusicʼal Josué come jiñi tejclum tsiʼ wen chaʼle guerra i añʌch tsaʼ bʌ i sʌtʌyob (Josué 7:1-9). Ili ora, jiñi ancianojob yicʼot superintendentejob i chaʼan circuito yom mi lac ñuqʼuesʌbeñob i pusicʼal jaʼel. ¿Chucoch? Come miʼ chaʼleñob wersa chaʼan miʼ cʌntʌbeñob i tejclum Dios (pejcan 1 Tesalonicenses 5:12, 13). Juntiquil superintendente i chaʼan circuito tsiʼ yʌlʌ: «An i tajol, jiñi hermanojob miʼ yʌqʼueñon lon jumpʼejl carta baqui miʼ yʌlob chaʼan tsiʼ wen mulayob lon c julaʼ. Cheʼ bʌ chʼijiyemon lojon, mi lon c pejcan jiñi carta tac, i miʼ chaʼ aqʼueñon lojon c tijicñʌyel».

14. ¿Chuqui ti ejemplo tac miʼ pʌs chaʼan yomʌch mi lac ñuqʼuesʌben i pusicʼal yambʌlob cheʼ mi la cʌqʼueñob ticʼojel?

¹⁴ Ti jumpʼejl bʌ qʼuin, Pablo tsiʼ yʌqʼue ticʼojel jiñi xñoptʼañob ti Corinto. Cheʼ bʌ tsiʼ jacʼʌyob jiñi ticʼojel, Pablo tsiʼ yʌqʼueyob i yubin i tijicñʌyel (2 Corintios 7:8-11). Tsaʼ bʌ i yʌlʌ jiñi apóstol tsaʼʌch i ñijcʌbeyob i pusicʼal chaʼan miʼ bej melob chuqui wen. Jiñi ancianojob yicʼot tatʌlob miʼ mejlel i lajibeñob i melbal Pablo. Juntiquil tatʌl i cʼabaʼ Andreas am bʌ chaʼtiquil i yalobil tsiʼ yʌlʌ chucoch yomʌch mi lac ñuqʼuesʌbeñob i pusicʼal yambʌlob: «Cheʼ mi lac ñuqʼuesʌbeñob i pusicʼal la calobilob miʼ coltañob chaʼan miʼ ñumen lʌcʼtiyelob ti Dios yicʼot miʼ ñumen tajob i ñaʼtʌbal, i cheʼʌch miʼ ñumen cʌytʌlob tiʼ jol jiñi ticʼojel. Anquese yujilob chuqui yom melol, mucʼʌch caj i chʌn melob cheʼ ti bele ora mi la cʌqʼueñob i tijicñʌyel».

15. Alʌ junchajp bajcheʼ miʼ mejlel la cʌqʼueñob i tijicñʌyel la quermañojob.

¹⁵ Yom mi lac suben jiñi hermanojob chaʼan mi laj qʼuel ti ñuc jiñi wem bʌ i melbalob yicʼot cheʼ miʼ chaʼleñob wersa (2 Crónicas 16:9; Job 1:8). Mi mucʼʌch lac mel, mi caj lac lajin Jehová yicʼot Jesús. Anquese mach cabʌlic miʼ mejlel lac mel cheʼ bajcheʼ la com, miʼ qʼuelob ti ñuc muʼ bʌ  lac mel tiʼ tojlelob (pejcan Lucas 21:1-4 yicʼot 2 Corintios 8:12). Jumpʼejl ejemplo, jiñi la quermañojob añobix bʌ i jabilel miʼ chaʼleñob wersa chaʼan miʼ majlelob ti tempa bʌ yicʼot miʼ loqʼuelob ti subtʼan. ¿Muʼ ba la cʌqʼueñob i yubin i tijicñʌyel chaʼan jiñi?

16. ¿Baqui ora miʼ mejlel lac ñuqʼuesʌben i pusicʼal yambʌlob?

¹⁶ Yom mi lac ñuqʼuesʌbeñob i pusicʼal yambʌlob jajayajl mi lac mejlel. Mi an majqui miʼ mel chuqui wen mi laj qʼuel, laʼ la cʌqʼuen i yubin i tijicñʌyel. Cheʼ bʌ Pablo yicʼot Bernabé yaʼañob ti Antioquía ti Pisidia, jiñi añoʼ bʌ tiʼ wenta sinagoga tsiʼ yʌlʌyob: «Winicob, c piʼʌlob, mi an chuqui laʼ wom laʼ subeñob winicob xʼixicob chaʼan mi laʼ ñuqʼuesʌbeñob i pusicʼal, subula». Jin chaʼan, Pablo tsiʼ chaʼle wersa i ñuqʼuesʌben i pusicʼal jiñi yaʼ bʌ añob (Hechos 13:13-16, 42-44). Mi mucʼʌch lac ñuqʼuesʌben i pusicʼal yambʌlob, tajol cheʼʌch mi caj i melob ti lac tojlel jaʼel (Lucas 6:38).

17. ¿Bajcheʼ ñumen wen miʼ mejlel lac ñuqʼuesʌben i pusicʼal yambʌlob?

¹⁷ Yom jamʌ tsiquil muʼ bʌ la cʌl. Cheʼ bʌ Jesús tsiʼ yʌqʼue i yubin i tijicñʌyel jiñi xñoptʼañob ti Tiatira, wen tsiquil tsiʼ subeyob chuqui tac wen woliʼ melob (pejcan Apocalipsis 2:18, 19). ¿Bajcheʼ miʼ mejlel lac lajin Jesús? Mi an juntiquil hermana i bajñel bʌ woliʼ cosan i yalobilob, miʼ mejlel lac suben muʼ bʌ i yʌqʼuen i tijicñʌyel. Mi tatʌlonla, miʼ mejlel lac suben la calobilob chaʼan utsʼatʌch cheʼ woliyob ti wersa i melbeñob i yeʼtel Jehová. Mach ñajʌyic lac subeñob chuqui wen mi laj qʼuel tiʼ tojlelob. Mi jamʌ tsiquil mi lac subeñob, mi caj i qʼuelob chaʼan woliyʌch laj qʼuelob ti ñuc.

18, 19. ¿Bajcheʼ miʼ mejlel laj coltan yambʌlob chaʼan chʌn pʼʌtʌl miʼ yajñelob tiʼ tojlel Jehová?

¹⁸ Jehová tsiʼ sube Moisés chaʼan miʼ pʼʌtʼesʌben i pusicʼal Josué. Anquese ili ora Jehová maʼañic mi caj i subeñonla majqui yom mi lac ñuqʼuesʌben i pusicʼal, mucʼʌch i yubin i tijicñʌyel cheʼ miʼ qʼuel chaʼan cheʼʌch woli lac mel (Proverbios 19:17; Hebreos 12:12). Jumpʼejl ejemplo, cheʼ bʌ juntiquil hermano miʼ ñusan jumpʼejl discurso ti congregación, miʼ mejlel lac suben chucoch tsaʼ lac mulaj i discurso. Tajol tsiʼ coltayonla laj qʼuel bajcheʼ miʼ mejlel lac ñusan jumpʼejl wocol, o tsiʼ coltayonla lac chʼʌmben isujm jumpʼejl versículo. Laʼ laj qʼuel bajcheʼ tsiʼ mele juntiquil hermana. Cheʼ bʌ juntiquil hermano tsaʼ ujti i ñusan jumpʼejl discurso, tsiʼ yʌqʼue wocolix i yʌlʌ i tiʼ tsʼijbube majlel jumpʼejl jun cheʼ ñumeñix chaʼpʼejl uxpʼejl qʼuin. Ti jiñi jun tsiʼ sube chaʼan anquese mach jalic tsiʼ chaʼleyob tʼan, tsaʼʌch i ñaʼta chuqui woli bʌ i ñusan i chaʼan tsiʼ tijicñesʌbe yicʼot tsiʼ pʼʌtʼesʌbe i pusicʼal. Tsiʼ yʌqʼue wocolix i yʌlʌ jeʼel cheʼ tsiʼ ñusa i discurso yicʼot cʼuxbiya i chaʼan tsiʼ pʌsʌ i yutslel cheʼ tsiʼ pejca. Tsiʼ yʌlʌ chaʼan jumpʼejlʌch majtañʌl tilem bʌ ti Jehová cheʼ bajcheʼ tsiʼ chaʼle tʼan jiñi hermano.

¹⁹ Ti lac pejtelel miʼ mejlel laj coltan yambʌlob chaʼan chʌn pʼʌtʌl miʼ yajñelob tiʼ tojlel Jehová. ¿Bajcheʼ? Jiñʌch cheʼ mi lac chʼujbin ili i ticʼojel Pablo: «Ñuqʼuesʌben laʼ bʌ laʼ pusicʼal. Pʼʌtesʌben laʼ bʌ laʼ pusicʼal ti utsʼat cheʼ bajcheʼ woli laʼ mel» (1 Tesalonicenses 5:11). Mi mucʼʌch lac chʌcʌ ñuqʼuesʌben lac bʌ lac pusicʼal, mi caj la cʌqʼuen i tijicñʌyel Jehová.