1. ¿Chuqui tsaʼ ujti cheʼ bʌ tsaʼ jisʌnti Jerusalén?

TI JABIL 607 cheʼ bʌ maxto tilemic Cristo, jiñi rey ti Babilonia yicʼot i soldadojob tsiʼ jisayob Jerusalén. Jiñi Biblia miʼ yʌl chaʼan tiʼ tsʌnsayob jiñi chʼiton wiñicob, jiñi xʼixicob, jiñi ñoxobix bʌ yicʼot jiñi cʼamoʼ bʌ. Ti wiʼil, «tsiʼ pulbeyob i Templo Dios. Tsiʼ laj jemeyob jini tsʼajc am bʌ tiʼ joytʌlel Jerusalén. Tsiʼ laj puluyob pejtelel jini colem otot. Tsiʼ jisayob [pejtelel] jini utsʼat bʌ i bʌl Templo» (2 Crónicas 36:17, 19).

2. ¿Chuqui tsiʼ wʌn sube Jehová jiñi judíojob, i chuqui tsaʼ ujti?

² Jiñi judíojob tsaʼʌch i wʌn ñaʼtayob chaʼan mi caj i jisʌntel Jerusalén. ¿Bajcheʼ? Dios tsiʼ cʼʌñʌ xʼaltʼañob chaʼan miʼ wʌn tsictesʌbeñob chaʼan mi maʼañic miʼ jacʼob tʼan, mi caj i jisʌntelob tiʼ tojlel babiloniojob. Jin mecu chaʼan, cabʌl judíojob tsaʼ bʌ tsʌnsʌntiyob yicʼot tsaʼ bʌ cʌjchiyob majlel ti Babilonia (Jeremías 15:2). ¿Bajcheʼ yilal tsaʼ chumleyob yaʼi? ¿Lajal ba tsaʼ ujtiyob jiñi xñoptʼañob cheʼ bajcheʼ jiñi judíojob? Mi cheʼʌchi, ¿jalixqui tsaʼ ujti?

3. ¿Chucoch mach lajalic bajcheʼ tsiʼ ñusa jiñi judíojob ti Babilonia bajcheʼ jiñi israelob ti Egipto?

³ Jehová tsiʼ sube jiñi judíojob chaʼan yom miʼ ñʌntesañob i  bʌ yicʼot yom miʼ cʌñob chumtʌl ti wen. Dios tsiʼ subeyob tiʼ tojlel Jeremías: «Waʼchocon laʼ wotot. Chaʼlenla chumtʌl yaʼi. Chaʼlenla pacʼ yicʼot cʼajbal. Cʼuxbenla i wut laʼ pʌcʼʌb». Yicʼot tsiʼ subeyob: «Melela chuqui mi caj i coltan jini tejclum yaʼ baʼ añetla. Cʼajtibenla Dios chaʼan miʼ coltan jaʼel, come tijicñayetla cheʼ tijicña [jiñi] tejclum» (Jeremías 29:5, 7). Jiñi tsaʼʌch bʌ i jacʼbeyob i tʼan Jehová tijicña tsaʼ chumleyob. Jiñi babiloniojob tsiʼ cʌyʌyob chaʼan jiñi judíojob miʼ melob chuqui yomob i mel yicʼot miʼ majlelob baqui jach yomob yaʼ ti país. Ti jiñi bʌ ora, Babilonia jiñʌch jumpʼejl tejclum wen ñuc bʌ i cʼʌjñibal chaʼan choñoñel tac. An tsʼijbujel tac muʼ bʌ i pʌs chaʼan cabʌl judíojob tsaʼ sujtiyob ti ñuc bʌ xchoñoñelob, i an tsaʼ bʌ cʼoti i wen tajob i taqʼuin. Jiñi judíojob mach cheʼic tsiʼ wen ñusayob wocol bajcheʼ jiñi israelob tsaʼ bʌ ajñiyob ti Egipto (pejcan Éxodo 2:23-25).

4. a) ¿Majqui tsaʼ cʌjchiyob majlel jaʼel lajal bajcheʼ jiñi judíojob xñusatʼañoʼ bʌ? b) ¿Chucoch maʼañic tsaʼ mejli i tsʼʌctesañob jiñi xucʼul bʌ judíojob tiʼ pejtelel muʼ bʌ i yʌl jiñi Mandar?

⁴ Ti jiñi tsaʼ bʌ cʌjchiyob majlel ti Babilonia, yaʼ ochem jaʼel jiñi xucʼul bʌ judíojob. Maʼañic chuqui leco tsiʼ meleyob, pero lajal tsaʼ ujtiyob bajcheʼ jiñi xñusatʼañob. Anquese jiñi judíojob tsaʼʌch i tajayob chuqui i cʼʌjñibal i chaʼañob, pero ¿bajcheʼ mi caj i mejlel i chʼujutesañob Jehová? Jiñi templo yicʼot pulʌntib tsaʼ jisʌnti, i jiñi xmotomajob mach weñix bajcheʼ miʼ melob i yeʼtel (qʼuele jiñi recuadro «¿Chuqui yom i yʌl?»). Pero jiñi xucʼul bʌ judíojob tsiʼ chaʼleyob wersa i melob muʼ bʌ i yʌl i Mandar Dios. Jumpʼejl ejemplo jiñobʌch Daniel, Sadrac, Mesac yicʼot Abednego, maʼañic tsiʼ jacʼʌyob i cʼux jiñi bibiʼ bʌ tiʼ wut Dios. Jiñi Biblia miʼ yʌl chaʼan Daniel ti bele ora tsiʼ pejca Dios (Daniel 1:8; 6:10). Pero jiñi xucʼul bʌ judíojob maʼañic tsaʼ mejli i jacʼob tiʼ pejtelel i Mandar Dios. ¿Chucoch? Come chumulob ti jumpʼejl tejclum baʼ maʼañic miʼ chʼujutesʌntel Jehová.

5. a) ¿Chuqui tsiʼ wʌn sube Jehová i wiñicob? b) ¿Chucoch maʼañic miʼ mejlel lac wen ñop yubil tsaʼ bʌ i yʌlʌ?

⁵ ¿Tsaʼto ba mejli i chaʼ chʼujutesañob Jehová jiñi israelob cheʼ bajcheʼ miʼ yʌl jiñi Mandar? Ti jiñi bʌ ora, maʼañic yilal, come jiñi babiloniojob maʼañic ba ora miʼ colob jiñi cʌchʌl bʌ i chaʼañob. Pero Jehová tsiʼ yʌcʼʌ i tʼan chaʼan mi caj i chaʼ cojlel jiñi i wiñicob. I tsaʼʌch tsʼʌctiyi, cheʼʌch bajcheʼ miʼ tsʼʌctiyel tiʼ pejtelel muʼ bʌ i yʌl (Isaías 55:11).

6, 7. ¿Chucoch yom mi lac tsijib tsictesan baqui ora tsaʼ ajñi i tejclum Dios tiʼ tojlel Babilonia?

⁶ ¿Ajñemoʼ ba jaʼel jiñi xñoptʼañob cheʼ bajcheʼ tsaʼ ajñi jiñi judíojob ti Babilonia? Jiñi Lac Tsictesʌbentel an i yʌlʌ chaʼan jiñi xucʼul bʌ xñoptʼañob tsaʼ ajñiyob tiʼ tojlel Babilonia cheʼ ti 1918 i tsaʼ cojliyob cheʼ ti 1919 (qʼuele jiñi recuadro «¿Chuqui yom i yʌl?»). Ti ili temaj yicʼot ti yambʌ mi caj laj qʼuel chucoch yom miʼ tsijib tsictesʌntel iliyi.

⁷ Yom mi laj cʼajtesan chaʼan jiñi Ñuc bʌ Babilonia jiñʌch tiʼ pejtelel jiñi ñopbalʌl tac mach bʌ isujmic am bʌ tiʼ pejtelel pañimil (mulawil). Pero ¿jimba cheʼ ti jabil 1918 tsaʼ caji ti ajñel tiʼ tojlel Babilonia jiñi i tejclum Dios? Maʼañic. Anquese jiñi bombiloʼ bʌ o yajcʌbiloʼ bʌ tsaʼʌch cajiyob ti contrajintel ti jiñi bʌ ora, jiñʌch yumʌlob tsaʼ bʌ caji i ñumen melob, mach jiñic ñopbalʌl tac. Cheʼ jaʼel, maxto tejchi jiñi Primera Guerra Mundial cheʼ bʌ jiñi bombiloʼ bʌ tsiʼ tʌtsʼʌyob i bʌ ti jiñi mach bʌ isujmic ñopbalʌl. Jin chaʼan, miʼ mejlel la cʌl chaʼan mach jiñic ti 1918 tsaʼ caji ti ajñel jiñi i tejclum Dios tiʼ tojlel jiñi Ñuc bʌ Babilonia.

8. ¿Chuqui tsaʼ ujti cheʼ bʌ tsaʼ chʌmi jiñi apóstolob? (Qʼuele jiñi dibujo am bʌ tiʼ tejchibal).

⁸ Ti jiñi qʼuiñijel chaʼan Pentecostés cheʼ ti jabil 33, cabʌl tsijiʼ bʌ xñoptʼañob tsaʼ bojñiyob ti espíritu. Ili wiñicob xʼixicob (quixtañujob) tsaʼ sujtiyob ti yajcʌbiloʼ bʌ, ñuc bʌ motomajob tiʼ tojlel jiñi Rey, chʼujul bʌ tejclum yicʼot i chaʼañoʼ bʌ Dios (pejcan 1 Pedro 2:9, 10). Cheʼ bʌ cuxulto jiñi apóstolob tsiʼ wen cʌntayob jiñi congregación tac. Pero cheʼ bʌ tsaʼ chʌmiyob (sajtiyob) an tsaʼ bʌ caji i yotsañob mach bʌ isujmic cʌntesa chaʼan miʼ ñajtʼesan jiñi xñoptʼañob. Tsaʼ wen caji i mulañob i cʌntesa yambʌ wiñicob bajcheʼ Aristóteles yicʼot Platón, i tsaʼ caji i pʌsob i cʌntesa jiñi wiñicob i mach jiñix muʼ bʌ i yʌl i Tʼan Dios (Hechos 20:30; 2 Tesalonicenses 2:6-8). Cabʌl ñucoʼ bʌ i yeʼtel ti congregación xucʼu xucʼul tsaʼ caji i tʼoxob i bʌ, anquese Jesús tsiʼ lon sube jiñi xcʌntʼañob chaʼan luʼ i yermañojob i bʌ (Mateo 23:8).

9. Tsictesan bajcheʼ tsaʼ caji ti temel eʼtel jiñi mach isujmic ñopbalʌl yicʼot jiñi yumʌl ti Roma, i chuqui tsaʼ ujti.

⁹ Ti jabil 313 cheʼ bʌ tsajñix Cristo, jiñi yumʌl bʌ ti Roma i cʼabaʼ Constantino tsaʼ caji i qʼuel ti utsʼat jiñi ñopbal mach bʌ isujmic. Cheʼ jiñi, jiñi ñopbalʌl yicʼot yumʌl ti Roma temel tsaʼ cajiyob ti eʼtel. Jiñi tempa bʌ tsaʼ bʌ i mele Constantino yicʼot cabʌl ñucoʼ bʌ i yeʼtel ti ñopbalʌl jiñʌch miʼ yʌqʼueñonla lac ñaʼtan, ili jiñʌch jiñi tempa bʌ tsaʼ bʌ ujti ti Nicea. Cheʼ ñumeñix jiñi tempa bʌ, Constantino tsiʼ choco loqʼuel jiñi xmotomaj i cʼabaʼ Arrio, come maʼañic tsiʼ ñopo chaʼan Jesús jiñʌch Dios. Ti wiʼil, tiʼ yumʌntel Teodosio, jiñi Iglesia Católica tsaʼ cʌyle bajcheʼ i ñopbal Roma. Jiñi yujiloʼ bʌ chaʼan historia miʼ yʌlob chaʼan cheʼ tiʼ yorajlel Teodosio tsaʼ poj ochi bajcheʼ xñoptʼan tiʼ pejtelel jiñi Roma. Pero ti jiñi bʌ ora, jiñi xñoptʼañob tsaʼ bʌ i cʌyʌyob i sujmlel tsaʼix i ñopbeyob i cʌntesa yambʌ wiñicob yicʼot ochemobix tiʼ wiñicob jiñi Ñuc bʌ Babilonia. Anquese cheʼix ujtem, anto xucʼul bʌ xñoptʼañob bombiloʼ bʌ lajaloʼ bʌ bajcheʼ jiñi trigo tsaʼ bʌ i yʌlʌ Jesús. Tsiʼ chaʼleyob wersa chaʼan miʼ chʼujutesañob Dios, anquese maʼañic tsaʼ wen ñʌchʼtʌntiyob (pejcan Mateo 13:24, 25, 37-39). Tiʼ sujm, jiñi xucʼul bʌ xñoptʼañob añobʌchix tiʼ tojlel Babilonia.

10. ¿Chucoch an maʼañic bʌ tsiʼ ñopbeyob i cʌntesa jiñi Iglesia?

¹⁰ Cheʼ bʌ tsaʼ ñumi cabʌl jabil cheʼ tsajñix Cristo, an muʼto bʌ i mejlel i pejcañob jiñi Biblia ti griego o ti latín. Jin chaʼan, tsiʼ lajiyob muʼ bʌ i yʌl i Tʼan Dios yicʼot i cʌntesa jiñi Iglesia Católica. Cheʼ bʌ miʼ qʼuelob yaʼ ti Biblia chaʼan mach isujmic i cʌntesa jiñi ñopbalʌl, maʼañix miʼ ñopob. Pero an i wocolel mi tiʼ tsictesayob, tajol miʼ mejlelob ti tsʌnsʌntel.

11. ¿Chuqui tsiʼ mele jiñi Iglesia chaʼan jiñi quixtañujob maʼañic miʼ mejlel i pejcañob jiñi Biblia?

¹¹ Ti wiʼil, cabʌl lac piʼʌlob tsiʼ cʌyʌyob tʼan ti griego yicʼot latín. Jiñi ñucoʼ bʌ i yeʼtel ti Iglesia maʼañic tsiʼ yʌcʼʌyob ti tsʼijbuntel ti yan tac bʌ tʼan jiñi Biblia. Cojach miʼ mejlel i pejcañob jiñi ñucoʼ bʌ i yeʼtel ti Iglesia yicʼot wen chajpʌbiloʼ bʌ. An xmotomajob mach bʌ wen yujilobic i pejcʌntel jun yicʼot mach bʌ wen yujilobic tsʼijb. Mi an mach bʌ añic miʼ ñop i cʌntesa jiñi Iglesia, miʼ yʌqʼuentel tsʌts bʌ wocol. Jiñi xucʼuloʼ bʌ xñoptʼan tsiʼ chaʼleyob wersa i tempañob i bʌ, pero an mach bʌ añic tsaʼ mejliyob. Lajal bajcheʼ tsaʼ ujti jiñi judíojob, jiñi bombiloʼ bʌ chaʼan motomajob tiʼ tojlel jiñi Rey, maʼañic tsaʼ mejli i wen chʼujutesañob Dios cheʼ bajcheʼ yom melol. Jiñi quixtañujob tsaʼ ajñiyob tiʼ cʼʌb jiñi Ñuc bʌ Babilonia.

12, 13. ¿Baqui bʌ chaʼpʼejl i sujmlel cheʼ maʼañic tsiʼ sʌtʌyob i pijtaya jiñi isujm bʌ xñoptʼañob?

¹² ¿Anto ba pijtaya chaʼan jiñi isujm bʌ xñoptʼañob  miʼ mejlel i chaʼ chʼujutesañob Dios cheʼ bajcheʼ yom? Chaʼpʼejl i sujmlel chucoch añʌch. Jiñi ñaxam bʌ jiñʌch cheʼ ti jabil 1450 tsaʼ mejli jiñi imprenta de tipos móviles, jumpʼejl máquina muʼ bʌ i mel libro tac. Cheʼ bʌ maxto añic ili imprenta, tsʼijbubil miʼ melbentel i copiajlel jiñi Biblia, i wen wocol ti melol. Juntiquil wen yujil bʌ tsʼijb miʼ mejlel ti jalʼan 10 uw chaʼan miʼ mel jumpʼejl Biblia, i miʼ tsʼijbuntel ti pʌchi. Jin chaʼan, maʼañic miʼ wen mejlel yicʼot wen letsem i tojol. Pero cheʼ bʌ tsaʼ mejli jiñi imprenta yicʼot jiñi jun, ñumen ti 1,300 i yopol jiñi Biblia miʼ mejlel i chaʼlentel ti imprimir ti jumpʼejl qʼuin.

¹³ I chaʼpʼejlel jiñʌch cheʼ tsaʼ caji ti mejlel ti yambʌ tʼan tac jiñi i Tʼan Dios. Cheʼ bʌ ti jabil 1500, an chʼejl bʌ wiñicob tsaʼ bʌ caji i ñusañob jiñi Biblia ti tʼan tac yujiloʼ bʌ cabʌl lac piʼʌlob, anquese yujilob chaʼan miʼ mejlelob ti tsʌnsʌntel. Jiñi ñucoʼ bʌ i yeʼtel ti Iglesia tsaʼ wen michʼayob. ¿Chucoch? Come tsiʼ bʌcʼñayob chaʼan jiñi quixtañujob miʼ pejcañob jiñi Biblia yicʼot miʼ cʼajtibeñob i bʌ: «¿Baqui miʼ yʌl jiñi Biblia chaʼan cheʼ mi lac chʌmel yom mi lac ñaxan sʌqʼuesʌntel chaʼan mi lac majlel ti panchan? ¿Baqui miʼ yʌl chaʼan yom mi lac toj jiñi xmotomajob chaʼan miʼ yʌcʼob jumpʼejl cʌntesa tiʼ tojlel juntiquil chʌmen bʌ? ¿Baqui mi lac taj ti Biblia  chaʼan jiñi papa yicʼot jiñi añoʼ bʌ i yeʼtel bajcheʼ cardenal?». Cabʌl i cʌntesa jiñi Iglesia loqʼuem tiʼ cʌntesa Aristóteles yicʼot Platón, tsaʼ bʌ chumleyob cheʼ bʌ maxto tilemic Cristo. Jiñi ñucoʼ bʌ i yeʼtel ti Iglesia tsaʼ wen michʼayob cheʼ maʼañic tsaʼ ñopbentiyob i cʌntesa. Jin chaʼan, tsiʼ yʌcʼʌyob ti tsʌnsʌntel cabʌl wiñicob yicʼot xʼixicob. Mach yomobic cheʼ an majqui yambʌ miʼ pejcan jiñi Biblia yicʼot cheʼ miʼ mel cʼajtiya tac, i tsaʼʌch i mʌctayob. Pero an maʼañic bʌ tsaʼ yajliyob tiʼ cʼʌb jiñi Ñuc bʌ Babilonia. Tsiʼ tajayob jiñi i sujmlel tiʼ Tʼan Dios i tsiʼ mulayob i ñumen cʌn. Tsʼitaʼ jachix yom chaʼan miʼ cojlelob ti jiñi mach bʌ isujmic ñopbalʌl.

14. a) ¿Chuqui tsiʼ meleyob jiñi yomoʼ bʌ i pejcan jiñi Biblia? b) Tsictesan bajcheʼ tsiʼ sʌcla i sujmlel am bʌ ti Biblia jiñi hermano Russell.

¹⁴ Cabʌl quixtañu tsiʼ mulaj i pejcan jiñi Biblia yicʼot i tsictesañob woli (choncol) bʌ i cʌñob. Maʼañic tsiʼ mulayob cheʼ jiñi ñucoʼ bʌ i yeʼtel ti ñopbalʌl miʼ subeñob yom bʌ miʼ ñopob. An tsaʼ bʌ putsʼiyob ti yambʌ país, bajcheʼ ti Estados Unidos, chaʼan miʼ mejlel i pejcañob jiñi Biblia. Yaʼʌch tsaʼ chumle Charles Taze Russell. Ti 1870, tsaʼ caji i wen pejcan jiñi Biblia yicʼot yambʌ i piʼʌlob. Ti ñaxan, jiñi hermano Russell tsiʼ qʼuele baqui bʌ ñopbalʌl miʼ pʌs i sujmlel. Tsiʼ wen laji muʼ bʌ i yʌl jiñi Biblia yicʼot i cʌntesa tiʼ pejtelel ñopbalʌl. Ti ora tsiʼ taja i qʼuel chaʼan mi jumpʼejlic ñopbalʌl miʼ chaʼlen cʌntesa bajcheʼ miʼ yʌl i Tʼan Dios. Ti jumpʼejl bʌ qʼuin, tsiʼ chaʼle tʼan yicʼot jiñi ñucoʼ bʌ i yeʼtel ti yambʌ ñopbalʌl tac chaʼan jiñi i sujmlel am bʌ ti Biblia tsaʼ bʌ i tajayob. Jiñi hermano Russell tsiʼ ñaʼta chaʼan mucʼʌch caj i chʼujbiñob jiñi i sujmlel yicʼot chaʼan mi caj i cʼʌñob tiʼ cʌntesa. Pero mach cheʼic tsaʼ ujti. Jiñi xPejcaya bibliajob tsaʼ cʼoti i ñaʼtañob chaʼan maʼañic miʼ mejlel i chʼujutesañob Dios cheʼ temelob yicʼot mach bʌ isujmic ñopbalʌl (pejcan 2 Corintios 6:14).

15. a) ¿Jalixqui tsaʼ ajñiyob tiʼ tojlel Babilonia jiñi isujm bʌ xñoptʼañob? b) ¿Baqui bʌ cʼajtiya tac mi caj lac jacʼ ti yambʌ temaj?

¹⁵ Tsaʼix laj qʼuele chaʼan jiñi isujm bʌ xñoptʼañob tsaʼ ajñiyob tiʼ tojlel Babilonia cheʼ bʌ tsaʼ chʌmi jiñi cojix bʌ apóstol. Pero yom to mi la cʌqʼuen i jacʼbal ili cʼajtiya tac: ¿Chucoch miʼ mejlel la cʌl chaʼan jiñi xucʼul bʌ xñoptʼañob bombiloʼ bʌ wolix (yʌquelix) i cojlelob tiʼ tojlel jiñi Ñuc bʌ Babilonia cheʼ maxto cʼoti jiñi jabil 1914? ¿Isujm ba cheʼ mach tijicñayic tsaʼ ajñi Jehová tiʼ tojlel i wiñicob cheʼ maʼañic tsiʼ wen chaʼleyob subtʼan ti jiñi Primera Guerra Mundial? ¿Am ba hermanojob mach bʌ xucʼulic tsaʼ ajñiyob yicʼot tsiʼ cʌyʌyob Jehová ti jiñi bʌ ora? Mi tsaʼʌch ajñiyob tiʼ tojlel jiñi mach bʌ isujmic ñopbalʌl jiñi xñoptʼañob cheʼ bʌ tsaʼ chʌmi jiñi apóstolob, ¿jalixqui tsaʼ cojliyob? Ili cʼajtiya tac mi caj lac jacʼ ti yambʌ temaj.