1, 2. ¿Chuqui tajol tsaʼ mejli ti ujtel tiʼ tojlel Evodia yicʼot Síntique? (Qʼuele jiñi dibujo am bʌ tiʼ tejchibal).

JIÑI xñoptʼañonbʌla mi lac wen qʼuel ti ñuc jiñi Biblia come la cujil chaʼan i librojʌch Dios. Miʼ chʼʌm tilel ticʼojel tac chaʼan maʼañic mi lac taj wocol yicʼot miʼ tojʼesañonla cheʼ mi lac mel mach bʌ weñic. ¿Bajcheʼ yilal mi laj qʼuel jiñi ticʼojel tac? Laʼ laj qʼuel tsaʼ bʌ ujti tiʼ tojlel Evodia yicʼot Síntique, chaʼtiquil hermanajob ti wajali. Jiñi Biblia miʼ yʌl chaʼan tsaʼ tejchi wocol tiʼ tojlelob, pero maʼañic miʼ yʌl chucoch. Laʼ lac ñaʼtan tajol tsaʼ bʌ ujti.

² Tajol Evodia tsiʼ pʌyʌ ti uchʼel yambʌ hermanojob, pero maʼañic tsiʼ pʌyʌ Síntique. Cheʼ bʌ Síntique tsiʼ yubi chaʼan jiñi hermanojob wen tsiʼ ñusayob tiʼ yotot Evodia, maʼañic tsiʼ mulaj. Tajol tsiʼ ñaʼta: «¿Chucoch maʼañic tsiʼ pʌyʌyon Evodia? ¡Tsaʼ c ñaʼta chaʼan wem bʌ camiga lon c bʌ!». Tajol tsiʼ ñaʼta chaʼan Evodia mach yomix i qʼuel, i jin chaʼan maʼañic tsaʼ pʌjyi. Cheʼ jiñi, Síntique tsiʼ chajpa uchʼel tiʼ yotot i tsiʼ pʌyʌ jaʼel jiñi hermanojob, pero maʼañic tsiʼ pʌyʌ Evodia. Jiñi yambʌ hermanojob mach utsʼatic tsiʼ qʼueleyob ili tsaʼ bʌ ujti. Yaʼ ti Biblia miʼ yʌl chaʼan Pablo tsiʼ tiqʼui jiñi chaʼtiquilob yicʼot tsiʼ subeyob  chaʼan miʼ ñusʌbeñob i bʌ. Miʼ mejlel lac ñaʼtan chaʼan tsaʼʌch i jacʼʌyob i tijqʼuel yicʼot tsiʼ chʌn melbeyob i yeʼtel (troñel) Jehová tiʼ xucʼtʌlel (Filipenses 4:2, 3).

3. ¿Chuqui yom mi lac mel chaʼan maʼañic mi lac taj wocol la quicʼot yambʌ hermanojob?

³ Joñonla jaʼel miʼ mejlel lac taj wocol la quicʼot yambʌ hermano ti laj congregación. Pero chaʼan miʼ mejlel lac tojʼesan yicʼot maʼañic mi lac taj jiñi wocol, yom mi lac jacʼ i ticʼojel jiñi Biblia. Mi cheʼʌch mi lac mel, mi lac pʌs chaʼan mucʼʌch laj qʼuel ti ñuc jiñi Biblia, i libro Dios (Salmo 27:11).

4, 5. ¿Baqui bʌ ticʼojel miʼ yʌqʼueñonla i Tʼan Dios chaʼan mi lac ticʼ lac bʌ?

⁴ An i tajol wocolʌch chaʼan mi lac ticʼ lac bʌ. Tajol chʼijiyem o michʼ mi la cubin lac bʌ cheʼ an majqui miʼ yʌl o miʼ mel mach bʌ añic mi lac mulan chaʼan tiʼ caj laj cultura, i colorlel lac pʌchʌlel o bajcheʼ yilalonla. Tajol ñumen cʼux mi la cubin mi juntiquil hermano ti laj congregación muʼ bʌ i mel. ¿Baqui bʌ ticʼojel am bʌ tiʼ Tʼan Dios miʼ mejlel i coltañonla?

⁵ Mi maʼañic mi lac ticʼ lac bʌ, Jehová yujil chuqui miʼ mejlel ti ujtel. Cheʼ bʌ michʼonla, miʼ mejlel la cʌl o lac mel muʼ bʌ i chaʼ aqʼueñonla lac ñaʼtan lac bʌ. Jehová miʼ subeñonla yaʼ ti Biblia chaʼan yom mi lac ticʼ lac bʌ. Miʼ yʌl: «Mach a bʌcʼ michʼan». Laʼ lac ñaʼtan tiʼ pejtelel jiñi wocol muʼ bʌ i mejlel lac taj mi maʼañic mi lac jacʼ ili ticʼojel (pejcan Eclesiastés 7:9 yicʼot Proverbios 16:32). Jiñi Biblia miʼ subeñonla jaʼel chaʼan yom mi lac ñusʌben i mul yambʌlob. Jesús tsiʼ yʌlʌ chaʼan Jehová maʼañic mi caj i ñusʌbeñonla lac mul mi maʼañic mi lac ñusʌben i chaʼan yambʌlob (Mateo 6:14, 15). ¿Yom to ba ñumen utsonla yicʼot mi lac ñusʌben i mul yambʌlob?

6. Mi maʼañic mi lac ticʼ bajcheʼ yubil mi la cubin lac bʌ, ¿chuqui miʼ mejlel ti ujtel?

⁶ Mi maʼañic mi lac ticʼ bajcheʼ yubil mi la cubin lac bʌ, tajol mi caj lac chʌn pʌs lac michʼlel yicʼot mi lac tech lac tsʼaʼlen yambʌlob. Jiñi yambʌ hermanojob miʼ mejlel i tech i yubiñob i bʌ jaʼel bajcheʼ joñonla. Tajol mach michʼoñicla mi caj lac pʌs o maʼañic majqui choncol lac tsʼaʼlen yilal. Pero xucʼu xucʼul mi caj laj cʌjñel i tajol maʼañix majqui mi caj i pejcañonla (Proverbios 26:24-26). Mi cheʼ añonla bajcheʼ jiñi, jiñi ancianojob mi caj i ñopob i ticʼoñobla yicʼot jiñi Biblia chaʼan mi laj cʌy lac michʼlel i mi lac ñusan tsaʼ bʌ tumbentiyonla (Levítico 19:17, 18; Romanos 3:11-18). Mi tsaʼ aqʼuentiyonla jiñi ticʼojel, ¿muʼ ba caj lac chʼujbin?

7. ¿Bajcheʼ miʼ tojʼesan majlel i tejclum Jehová?

⁷ Ili ora, Jehová miʼ tojʼesan yicʼot miʼ cʌntesan jiñi jumpʼejl parte i yorganización wʌʼ ti Pañimil. ¿Bajcheʼ? Tsiʼ waʼchoco Cristo bajcheʼ i yum o i jol Congregación (Efesios 5:23). Cristo tsiʼ waʼchoco jiñi «xucʼul bʌ xʼeʼtel am bʌ cabʌl i ñaʼtʌbal» chaʼan miʼ cʌntesan yicʼot miʼ qʼuelben i tejclum Dios (Mateo 24:45-47). Ili xucʼul bʌ xʼeʼtel miʼ wen qʼuel ti ñuc jiñi Biblia come jiñʌch i Tʼan Dios. Cheʼʌch tsiʼ meleyob jaʼel jiñi junmojt muʼ bʌ i pʌsob bij cheʼ ti ñaxam bʌ siglo (pejcan 1 Tesalonicenses 2:13). ¿Chuqui miʼ yʌl jiñi Biblia chaʼan yom mi lac mel?

8. ¿Chuqui yom mi lac mel miʼ subeñonla jiñi Biblia, i chucoch yom mi lac jacʼ?

⁸ Jiñi Biblia miʼ subeñonla lac tempan lac bʌ tiʼ bele ora (Hebreos 10:24, 25). Miʼ subeñonla chaʼan junlajal yom mi lac ñop muʼ bʌ i yʌl jiñi Biblia (1 Corintios 1:10). Cheʼ jaʼel, miʼ yʌl chaʼan yom mi lac ‹ñaxan sajcan i yumʌntel Dios› (Mateo 6:33). Miʼ subeñonla chaʼan mi lac chaʼlen subtʼan ti jujumpʼejl otot yicʼot baqui jach an wiñicob xʼixicob (quixtañujob) (Mateo 28:19, 20; Hechos 5:42; 17:17; 20:20). Miʼ yʌl chuqui yom miʼ mel jiñi ancianojob chaʼan chʌn sʌc miʼ yajñel jiñi congregación tac (1 Corintios 5:1-5, 13; 1 Timoteo 5:19-21). Miʼ subeñonla jaʼel chaʼan yom sʌconla ti lac bʌcʼtal, mi lac choc loqʼuel lac  tsucul pensar yicʼot melbalʌl tac muʼ bʌ i tsʼaʼlen Jehová (2 Corintios 7:1).

9. ¿Majqui cʼʌmbil i chaʼan Jesús chaʼan miʼ coltañonla lac chʼʌmben i sujm i Tʼan Dios?

⁹ An muʼ bʌ i ñaʼtañob chaʼan mach cʼʌñʌlic miʼ tsictesʌbentelob muʼ bʌ i yʌl jiñi Biblia. Pero cʼʌlʌl ti 1919, Jesús cʼʌmbil i chaʼan jiñi «xucʼul bʌ xʼeʼtel am bʌ cabʌl i ñaʼtʌbal» chaʼan miʼ coltan i wiñicob Dios i chʼʌmbeñob i sujm yicʼot miʼ jacʼob muʼ bʌ i yʌl jiñi Biblia. Cheʼ mi lac jacʼ i ticʼojel jiñi Biblia, chʌn sʌc miʼ yajñel jiñi congregación, junmujchʼ miʼ yajñel yicʼot ti ñʌchʼtʌlel. Laʼ laj cʼajtiben lac bʌ: «¿Xucʼul ba mi caj cajñel tiʼ tojlel Jesús yicʼot mi caj c chʌn chʼujbiben i tʼan jiñi xucʼul bʌ xʼeʼtel?».

10. ¿Bajcheʼ yilal miʼ pʌstʌl yaʼ ti libro i chaʼan Ezequiel jiñi jumpʼejl parte i yorganización Dios yaʼ ti panchan?

¹⁰ Jiñi Biblia miʼ pʌs chaʼan jiñi ángelob ti panchan wen chajpʌbil añob jaʼel. Jumpʼejl ejemplo, Ezequiel tsiʼ qʼuele ti ñajal chaʼan Jehová cʼʌchʌl ti juncojt carro ti ora bʌ miʼ ñijcan i bʌ cheʼ bajcheʼ yom Jehová (Ezequiel 1:4-28). Jiñi carro yom i yʌl jiñi jumpʼejl parte i yorganización Dios yaʼ ti panchan. Wen chajpʌbil chaʼan miʼ jacʼ muʼ bʌ i yʌl Jehová. Wʌʼ ti Pañimil an i yambʌ jumpʼejl parte i yorganización Jehová woli (choncol) bʌ i tojʼesan majlel. Laʼ cu lac ñaʼtan chuqui tac qʼuextʌyem tiʼ yorganización wʌʼ ti pañimil ti jiñi 10 jab ñumeñix bʌ. Yom mi laj cʼajtesan chaʼan Jehová woli (yʌquel) i tojʼesan majlel i yorganización cheʼ bajcheʼ yom. Tsʼitaʼ jachix yom chaʼan Jesucristo yicʼot jiñi ángelob miʼ jisañob ili jontol bʌ pañimil. Cheʼʌch mi caj i qʼuejlel ti ñuc Jehová, i cʼabaʼ yicʼot cheʼ cojach yom miʼ chaʼlen yumʌntel.

11, 12. ¿Chuqui tajbil i chaʼan i yorganización Jehová ili ora?

¹¹ Laʼ lac ñaʼtan tiʼ pejtelel chuqui melbil ili ora tiʼ yorganización Jehová. Ñaxan, tiʼ melol i yototlel chʼujutesaya. Cabʌl hermanojob an i wen chaʼleyob eʼtel tiʼ melol jiñi tsijib central i chaʼan i testigojob Jehová yaʼ ti Warwick (Nueva York, Estados Unidos). Yambʌlob woliyob ti eʼtel chaʼan miʼ mejlel i Yotlel Tempa bʌ yicʼot sucursal tac tiʼ petol pañimil. Ili hermanojob yaʼʌch chuculob ti Oficina muʼ bʌ i qʼuel i melol i yototlel chʼujutesaya tiʼ petol pañimil. ¿Maʼañic ba mi la cubin lac tijicñʌyel tiʼ tojlel jiñi woliyoʼ bʌ ti tsʌts bʌ eʼtel? Ili eʼtel miʼ mejlel come jiñi i wiñicob Jehová tiʼ pejtelel pañimil miʼ chaʼleñob wersa i yʌcʼob i taqʼuin. Jehová miʼ yʌqʼuen i bendición i tejclum cheʼ miʼ yʌcʼob i coltaya tiʼ pecʼlelob yicʼot tiʼ xucʼtʌlelob (Lucas 21:1-4).

¹² I chaʼpʼejlel, laʼ laj qʼuel chuqui tajbil ti jiñi cʌntesa muʼ bʌ i yʌjqʼuel. Jehová miʼ wen mulan i cʌntesan i tejclum (Isaías 2:2, 3). Laʼ lac ñaʼtan jiñi cʌntesa tac muʼ bʌ i cʼʌn. Miʼ yʌjqʼuel jiñi Cʌntesʌntel chaʼan Eʼtel ti Precursor, Cʌntesʌntel chaʼan xSubtʼañob chaʼan bʌ i Yumʌntel Dios, Cʌntesʌntel i chaʼan Galaad, Cʌntesʌntel chaʼan tsijib ochemoʼ bʌ ti Betel, Cʌntesʌntel chaʼan superintendentejob i chaʼan circuito yicʼotob i yijñam, Cʌntesʌntel chaʼan Ancianojob ti Congregación, Cʌntesʌntel tiʼ chaʼan bʌ i Yumʌntel Dios yicʼot jiñi Cʌntesʌntel chaʼan Comité i chaʼan Sucursal yicʼotob i yijñam. An lac chaʼan jaʼel jiñi página i chaʼan Internet www.pr418.com/ctu, i yaʼ miʼ mejlel lac taj jiñi Biblia yicʼot yambʌ jun tac ti cabʌl tʼan. Ili página miʼ chʼʌm tilel sección tac yʌlol ñaʼtʌbil bʌ tiʼ tojlel alobob yicʼot familiajob, an jumpʼejl sección jeʼel chaʼan noticia tac (am bʌ ti español). ¿Choncol ba laj cʼʌn jiñi página www.pr418.com/ctu ti lac subtʼan yicʼot ti lac chʼujutesaya ti familia?

13. ¿Chuqui yom mi lac mel ti lac pejtelel i wiñiconbʌla Jehová?

¹³ Jiñʌch ñuc bʌ lac majtan cheʼ ochemonla tiʼ yorganización Jehová yicʼot cheʼ mi laj cʌn chuqui yom mi lac mel. Yom mi lac jacʼben i tʼan  yicʼot mi lac mel chuqui wen come la cujil chuqui miʼ mulan. Cabʌl lac piʼʌlob miʼ mulañob i mel mach bʌ weñic. Pero joñonla yom mi lac tsʼaʼlen mach bʌ weñic, come Jehová miʼ tsʼaʼlen (Salmo 97:10). Mach yomic lajalonla bajcheʼ muʼ bʌ i ‹lon qʼuelob ti utsʼat jontolil. Miʼ yʌlob jontol jiñi utsʼat bʌ› (Isaías 5:20). La com sʌconla ti lac bʌcʼtal, ti lac melbal yicʼot tiʼ chaʼan bʌ Dios come utsʼat la com ajñel tiʼ tojlel (1 Corintios 6:9-11). La cujil chaʼan chaʼañʌch lac wenlel muʼ bʌ i subeñonla Jehová yaʼ ti Biblia. Mi laj cʼuxbin Jehová yicʼot xucʼul la com ajñel tiʼ tojlel. Jin chaʼan, mi lac chʼujbiben i mandar ti la cotot, ti congregación, ti la queʼtel, ti escuela o baqui jach añonla (Proverbios 15:3). Laʼ laj qʼuel baqui tac yom xucʼulonla tiʼ tojlel Jehová.

14. ¿Bajcheʼ miʼ mejlel i pʌs jiñi tatʌlob chaʼan xucʼulob tiʼ tojlel Jehová?

¹⁴ Cheʼ maʼ cʌntesan a walobilob. Jehová miʼ suben jiñi tatʌlob yaʼ ti Biblia bajcheʼ yom miʼ cʌntesañob i yalobil. Cheʼ bʌ miʼ jacʼbeñob i tʼan Jehová, miʼ pʌsbeñob i xucʼtʌlel. Jiñi tatʌlob mach cheʼic yom miʼ ñaʼtañob bajcheʼ miʼ ñaʼtan yambʌ quixtañujob (Efesios 2:2). Jumpʼejl ejemplo, an cultura tac baqui jiñi tatʌl tajol miʼ yʌl chaʼan jin xʼixic yom bʌ miʼ cʌntesan i yalobilob. Pero wen tsiquil miʼ yʌl jiñi Biblia chaʼan jin an tiʼ wenta jiñi tatʌlob chaʼan miʼ cʌntesañob i yalobil tiʼ chaʼan bʌ Jehová (Efesios 6:4). Jiñi tatʌl ñaʼʌl muʼ bʌ i cʼuxbin Jehová yomob chaʼan jiñi i yalobilob miʼ sujtelob tiʼ yamigo Dios, lajal bajcheʼ Samuel cheʼ bʌ chut to (1 Samuel 3:19).

15. ¿Bajcheʼ mi lac pʌsben lac xucʼtʌlel Jehová cheʼ an chuqui ñuc i cʼʌjñibal woli lac ñaʼtan?

¹⁵ Cheʼ bʌ an chuqui woli lac ñaʼtan. Cheʼ bʌ maxto lac ñaʼta chuqui mi caj lac mel, yom mi lac ñaxan qʼuel chuqui miʼ ñaʼtan Jehová. ¿Bajcheʼ? Jiñʌch cheʼ mi lac sʌclan chuqui miʼ subeñonla yaʼ ti Biblia yicʼot tiʼ yorganización. Cheʼʌch mi lac pʌsben lac xucʼtʌlel Jehová. Jumpʼejl ejemplo, an muʼ bʌ i majlelob ti eʼtel ti yambʌ país i yaʼ miʼ chʼocʼañob (yilañob pañimil) i yalobil,  pero miʼ ñaʼtañob i choc sujtel baqui chʼoyolob chaʼan yaʼ miʼ cosʌntel. Cheʼʌch miʼ mejlelob ti bej eʼtel ti yambʌ país jiñi tatʌlob. Ti jujuntiquil an tiʼ wenta miʼ ñaʼtan iliyi. Pero jiñi tatʌlob yom miʼ ñaʼtañob bajcheʼ yilal miʼ qʼuel Jehová (pejcan Romanos 14:12). Laʼ laj cʼajtesan chaʼan ñaxan yom mi lac ñaʼtan muʼ bʌ i yʌl jiñi Biblia cheʼ maxto la cʌlʌ chuqui mi caj lac mel chaʼan lac familia o la queʼtel. I cʼʌjñibal i coltaya lac Tat am bʌ ti panchan chaʼan mi lac ñaʼtan yom bʌ mi lac mel (Jeremías 10:23).

16. ¿Chuqui tsiʼ ñaʼta i mel juntiquil ñaʼʌl cheʼ bʌ tsaʼ chʼocʼa i yalobil? ¿Chuqui tsiʼ colta chaʼan miʼ wen ñaʼtan yom bʌ i mel?

¹⁶ Jumpʼejl xñujpuñel tsaʼ majli ti chumtʌl ti yambʌ país, i yaʼ tsaʼ chʼocʼa i yalobil. Ti wiʼil, tsiʼ ñaʼtayob i choc majlel yaʼ baqui chʼoyolob i familia chaʼan yaʼ miʼ cosʌntel. Pero ti jiñi bʌ ora, jiñi xʼixic tsaʼ caji ti aqʼuentel estudio loqʼuem bʌ ti Biblia yicʼot juntiquil i testigo Jehová. Tsiʼ cʌñʌ chaʼan an tiʼ wenta miʼ cʌntesan i yalobil tiʼ chaʼan bʌ Jehová (Salmo 127:3; Proverbios 22:6). Jin chaʼan, tsaʼ caji i wen ñaʼtan mi mucʼʌch i choc majlel i yalobil. Jiñi Biblia miʼ subeñonla chuqui yom mi lac mel. I jiñi xʼixic cheʼʌch tsiʼ mele, tsiʼ cʼajtibe i coltaya Jehová chaʼan miʼ ñaʼtan yom bʌ miʼ mel (Salmo 62:7, 8). Tsiʼ sube jiñi hermana muʼ bʌ i yʌqʼuen estudio yicʼot yambʌ hermanojob ti congregación chaʼan jiñi i wocol. Jiñi i familia tsiʼ bej xiqʼui chaʼan mucʼʌch i choc majlel i yalobil. Pero yujil chaʼan mach cheʼic yom miʼ mel. Jiñi i ñoxiʼal tsiʼ qʼuele chaʼan jiñi hermanojob miʼ wen coltañob i yijñam yicʼot i yalobil. Ili tsiʼ wen ñijcʌbe i pusicʼal, jin chaʼan tsiʼ mulaj chaʼan miʼ yʌqʼuentel estudio i tsaʼ caji ti majlel ti tempa bʌ yicʼot i familia. Wen tijicña tsiʼ yubi i bʌ jiñi xʼixic come Jehová tsaʼʌch i jacʼbe i yoración.

17. ¿Chuqui mi lac subentel lac mel cheʼ woli lac mel jumpʼejl estudio?

¹⁷ Cheʼ mi lac subentel chuqui yom mi lac mel. Junchajp bajcheʼ mi lac pʌs lac xucʼtʌlel tiʼ tojlel Dios jiñʌch cheʼ mi lac jacʼ muʼ bʌ i subeñonla i yorganización. Jumpʼejl ejemplo, laʼ lac ñaʼtan yom bʌ mi lac mel cheʼ mi lac tech la cʌcʼ jumpʼejl estudio yicʼot jiñi libro Muʼ bʌ i cʌntesañonla jiñi Biblia. Subebilonla chaʼan yom mi lac tsʼitaʼ locʼsʌben i yorajlel cheʼ tsaʼix ujtiyonla ti estudio chaʼan mi laj coltan i cʌn i yorganización Jehová jiñi woli bʌ la cʌqʼuen estudio. Miʼ mejlel laj cʼʌn jiñi video ¿Chuqui miʼ mejlel yaʼ ti i Yotlel Tempa bʌ? yicʼot jiñi folleto ¿Majquiyob woli bʌ i melob chuqui yom Jehová ti ili ora? chaʼan mi laj coltañob. I cheʼ tsaʼix ujti laj qʼuel jiñi libro Muʼ bʌ i cʌntesañonla jiñi Biblia yom mi laj cʼʌn jiñi libro «Chʌn ajñenla tiʼ cʼuxbiya Dios», anquese chʼʌmʌlobix i chaʼan jaʼ. Cheʼʌch mi caj laj coltañob chaʼan chʌn xucʼulob ti chuqui miʼ ñopob (Colosenses 2:7). ¿Mu ba lac jacʼ ili ticʼojel muʼ bʌ i yʌqʼueñonla i yorganización Jehová?

18, 19. ¿Chucoch yom mi la cʌqʼuen wocolix i yʌlʌ Jehová?

¹⁸ Añʌch chucoch yom mi la cʌqʼuen wocolix i yʌlʌ Jehová. Ñaxan, «come tilem ti Dios laj cuxtʌlel yicʼot lac pʼʌtʌlel ti xʌmbal. Tiʼ pʼʌtʌlel Dios añonla» (Hechos 17:27, 28). I chaʼpʼejlel, come an i yʌqʼueyonla i libro, jiñi Biblia. Cheʼ bajcheʼ tsiʼ meleyob jiñi xñoptʼañob ti Tesalónica, mi laj qʼuel ti ñuc jiñi majtañʌl come «i tʼañʌch Dios» (1 Tesalonicenses 2:13).

¹⁹ I yuxpʼejlel, mi la cʌqʼuen wocolix i yʌlʌ come yaʼ ti Biblia an i cʌntesayonla bajcheʼ miʼ mejlel lac sujtel tiʼ yamigo (Santiago 4:8). I chʌmpʼejlel, yom mi la cʌqʼuen wocolix i yʌlʌ come miʼ yʌcʼonla ti ajñel tiʼ yorganización. Cheʼʌch mi la cubin lac bʌ bajcheʼ tsaʼ bʌ i tsʼijbu jiñi Salmo 136, tsiʼ yʌlʌ: «Subenla wocolix i yʌlʌ lac Yum, come utsʼat i pusicʼal. Come tiʼ pejtelel ora an i yutslel i pusicʼal» (Salmo 136:1). Ti jujumpʼejl versículo am bʌ i chaʼan ili salmo miʼ yʌjlel jiñi tʼan «tiʼ pejtelel ora an i yutslel i pusicʼal». Mi xucʼuloñʌchla tiʼ tojlel Jehová yicʼot mi lac chʼujbin muʼ bʌ i subeñonla i yorganización, mi caj i pʌsbeñonla i yutslel i pusicʼal tiʼ pejtelel ora.