Jiñi Biblia maʼañic chuqui tsiʼ chaʼle, jin chaʼan miʼ mejlel a taj a chaʼan yicʼot maʼ pejcan. Cheʼ maʼ yajcan jiñi wem bʌ traducción, miʼ mejlel a ñop chaʼan utsʼatʌch bajcheʼ tsaʼ mejli jiñi woli (choncol) bʌ a pejcan. * Pero ¿chucoch tsaʼ coltʌyi jiñi Biblia anquese tsaʼ jili majlel tsaʼ bʌ cʼʌjñi ti tsʼijbuntel, tsiʼ taja tsʌts bʌ i contrajintel yicʼot tsaʼ ñojpi ti qʼuextʌntel i tʼan? ¿Chucoch utsʼatax ili libro?

Cabʌl muʼ bʌ i pejcañob jiñi Biblia lajal cʼotem i ñaʼtañob bajcheʼ jiñi apóstol Pablo: «Chʼoyol ti Dios pejtelel i Tsʼijbujel» (2 Timoteo 3:16). Miʼ ñopob chaʼan jiñi Biblia maʼañic chuqui tsiʼ chaʼle come i tʼañʌch Dios yicʼot jiñʌch tsaʼ bʌ i cʌnta cʼʌlʌl wʌle ora. Faizal, tsaʼ bʌ lac taja tiʼ tʼan ti ñaxam bʌ temaj, tsiʼ ñaʼta i sʌclan yaʼ ti Biblia bajcheʼ an i sujmlel jiñi i cʼajtiya tac. Toj sajtel i pusicʼal chaʼan chuqui tsiʼ cʌñʌ come ti orajach tsaʼ cʼoti i qʼuel chaʼan mach loqʼuemic ti Biblia cabʌl i cʌntesa jiñi yambʌ ñopbalʌl tac. Cheʼ jaʼel, tsaʼ ñijcʌyi i pusicʼal cheʼ bʌ tsiʼ cʌñʌ chuqui mi caj i mel Dios wʌʼ ti Pañimil, cheʼʌch bajcheʼ miʼ tsictesan i Tʼan.

Faizal miʼ yʌl: «Waʼli muqʼuix c ñop chaʼan jiñi c Biblia jumpʼejlʌch majtañʌl tilem bʌ ti Dios. Come mi tsaʼ mejli i mel panchan yicʼot pañimil, ¿mach bʌ añic i pʼʌtʌlel chaʼan miʼ yʌqʼueñonla i Tʼan yicʼot miʼ cʌntan? Mi tsaʼ j cʌlʌ chaʼan maʼañic, mi cʌcʼ ti ñaʼtʌntel chaʼan jiñi Cʼax Ñuc bʌ Dios mach wen añic i pʼʌtʌlel. ¿Majquiyon chaʼan mi cʌl chaʼan Dios mach wen pʼʌtʌlic?» (Isaías 40:8).