1. ¿Chucoch yom wen yʌxʌl laj co ili ora yicʼot mi lac wen qʼuel chuqui woli bʌ ti ujtel? Alʌ jumpʼejl ejemplo (qʼuele jiñi foto am bʌ tiʼ tejchibal).

LAʼ lac ñaʼtan chaʼan añonla ti colem tempa bʌ i muqʼuix caj i tejchel. Chajpʌbilix chaʼan miʼ tech tʼan jiñi muʼ bʌ caj i yʌqʼuen i tejchibal. Muqʼuix caj i tech i sub i bʌ jiñi música. Jiñi hermanojob yujilob chaʼan yomix miʼ buchtʌlob. Wen yomobix i ñʌchʼtan jiñi cʼay tac yicʼot discurso tac. Pero tajol an maʼañic bʌ woli (choncol) i qʼuelob chaʼan yaʼix buchul jiñi woli (yʌquel) bʌ i yʌqʼuen i tejchibal i maʼañic woliʼ ñʌchʼtañob jiñi música. Maʼañic woliʼ qʼuelob chaʼan tsaʼix tejchi come mach yʌxʌlobic i yoj, woliyob to ti xʌmbal ñumel o ti tʼan yicʼot yambʌlob. Ili miʼ yʌqʼueñonla laj qʼuel chuqui miʼ mejlel ti ujtel mi mach yʌxʌlic laj co chaʼan chuqui woli ti ujtel. Wen ñuc chuqui miʼ mejlel laj cʌn, yom chajpʌbilonla come an chuqui wen ñuc bʌ miʼ caj ti ujtel i wen lʌcʼʌlix. ¿Chuqui jiñi?

2. ¿Chucoch tsiʼ yʌlʌ Jesús chaʼan yom miʼ chʌcʌ qʼuelob i bʌ jiñi xcʌntʼañob i chaʼan?

² Jesucristo tsiʼ yʌlʌ chaʼan cheʼ «tiʼ jilibal pañimil» jiñi xcʌntʼañob i chaʼan yom chajpʌbilob. Tsiʼ subeyob: «Chʌcʌ qʼuele laʼ bʌ. Yom yʌxʌl laʼ wo, come mach laʼ wujilic baqui ora mi caj i cʼotel i yorajlel». Ti wiʼil, mach junyajl jach tsiʼ subeyob:  «Yom yʌxʌl laʼ wo» (Mateo 24:3; pejcan Marcos 13:32-37). Muʼ bʌ i yʌl ti Mateo miʼ pʌs jaʼel chaʼan Jesús tsaʼʌch i sube jiñi xcʌntʼañob i chaʼan. Tsiʼ yʌlʌ: «Jini chaʼan chʌcʌ qʼuele laʼ bʌ, come mach ñaʼtʌbilic laʼ chaʼan baqui bʌ qʼuin miʼ tilel laʼ Yum». Ti wiʼil tsiʼ chaʼ subeyob: «Yom chajpʌbiletla jaʼel, come tal i Yalobil Winic tiʼ yorajlel cheʼ mach yʌxʌlic laʼ wo». I tsaʼto i chaʼ subeyob: «Chʌcʌ qʼuele laʼ bʌ cheʼ jini, come mach laʼ wujilic baqui bʌ qʼuin baqui bʌ ora miʼ tilel i Yalobil Winic» (Mateo 24:42-44; 25:13).

3. ¿Chucoch yom mi lac wen acʼ ti ñuc tsaʼ bʌ i yʌlʌ Jesús?

³ Jiñi i testigojonbʌla Jehová mi lac jacʼ tsaʼ bʌ i yʌlʌ Jesús. ¿Chucoch? Come la cujil chaʼan chumuloñixla «ti jini cojix bʌ ora» yicʼot chaʼan tsʼitaʼ jax yom miʼ tejchel jiñi ñuc bʌ wocol (Daniel 12:4; Mateo 24:21). Jiñi i tejclum Jehová woliʼ sub jiñi wen tʼan chaʼan Yumʌntel tiʼ pejtelel pañimil (mulawil), cheʼʌch bajcheʼ tsiʼ yʌlʌ Jesús. I cheʼ jaʼel, mi laj qʼuel chaʼan cabʌl baqui woliʼ ñumen ujtel guerra, cʼamʌjel tac, yujquel lum, wiʼñal, jontolil yicʼot tsʌnsa. Ili ora jaʼel, cabʌl ñaxañoʼ bʌ ti ñopbalʌl muʼ bʌ i lotiñob wiñicob xʼixicob (quixtañujob) (Mateo 24:7, 11, 12, 14; Lucas 21:11). La comix chaʼan Jesús miʼ tilel yicʼot miʼ mel cheʼ bajcheʼ yom i Tat (Marcos 13:26, 27).

4. a) ¿Chucoch mi mejlel lac ñaʼtan chaʼan Jesús yujilix jala miʼ cajel jiñi Armagedón? b) Anquese mach la cujilic jala mi caj i tejchel jiñi ñuc bʌ wocol, ¿chuqui muʼ bʌ mejlel lac ñop?

⁴ Ti jumpʼejl colem tempa bʌ la cujil bajcheʼ ora mi caj i tejchel jujumpʼejl programa. Pero jiñi ñuc bʌ wocol maʼañic miʼ mejlel lac ñaʼtan jala miʼ caj i yoque tejchel. Jesús tsiʼ yʌlʌ cheʼ wʌʼto an ila ti Pañimil: «Maanic majch yujil baqui bʌ qʼuin baqui bʌ ora mi caj i yujtel jini, mi ángelob ti panchan, mi i Yalobil Dios. Jini jach c Tat yujil» (Mateo 24:36). Miʼ mejlel lac ñaʼtan chaʼan Jesús yujilix jala mi caj i tejchel jiñi guerra chaʼan Armagedón, come jiñʌch muʼ bʌ caj i chʼʌm tiʼ wenta (Apocalipsis 19:11-16). Pero joñonla maxto la cujilic jiñi qʼuin. Jin chaʼan ñuc i cʼʌjñibal cheʼ chʌn yʌxʌl laj co. Jehová tsaʼix i ñaʼta baqui ora mi caj i tejchel jiñi ñuc bʌ wocol. I wʌle ñumen lʌcʼʌlix. Jiñi Biblia miʼ yʌl: «Mi caj i bʌcʼ tilel cheʼ tiʼ yorajlel» (pejcan Habacuc 2:1-3). ¿Chucoch miʼ mejlel lac ñop chaʼan cheʼʌchi?

5. Alʌ jumpʼejl ejemplo muʼ bʌ i pʌs chaʼan tiʼ yorajlel jach miʼ tsʼʌctiyel chuqui miʼ yʌl Jehová.

⁵ Jiñi albil tac bʌ i chaʼan Jehová añʌch tsʼʌctiyem tiʼ yorajlel. Jumpʼejl ejemplo, laʼ lac ñaʼtan cheʼ ti 14 i chaʼan nisán ti jabil 1513 cheʼ bʌ maxto tilemic Cristo (m.t.C.). Ti jiñi bʌ qʼuin Dios tsiʼ locʼsa jiñi israelob yaʼ ti Egipto. Ti wiʼil, Moisés tsiʼ yʌlʌ chaʼan Jehová tsiʼ coltayob «ti jini jach bʌ qʼuin» cheʼ bʌ jilelix mucʼ jiñi «jumbajcʼ yicʼot lujumpʼejl i chaʼcʼal (430) jab» (Éxodo 12:40-42). Jiñi 430 jab tsaʼ tejchi cheʼ ti 14 i chaʼan nisán ti jabil 1943 m.t.C., cheʼ bʌ Jehová tsaʼ caji i tsʼʌctesan i tʼan tsaʼ bʌ i yʌqʼue Abraham chaʼan mi caj i yʌqʼuen i bendición i pʼolbalob (Gálatas 3:17, 18). Ti wiʼil, Jehová tsiʼ sube Abraham chaʼan jiñi i pʼolbalob mi caj i chumtʌlob ti yambʌ tejclum tac, mi caj i sujtelob ti xyaj eʼtelob yicʼot mi caj i ticʼlʌntelob «jumbajcʼ [400] jab» (Génesis 15:13; Hechos 7:6). Ili 400 jab tsaʼ caji cheʼ ti jabil 1913 m.t.C., cheʼ bʌ Ismael tsaʼ caji i wajlen Isaac. Tsaʼ ujti cheʼ bʌ Jehová tsiʼ locʼsa jiñi israelob yaʼ ti Egipto (Génesis 21:8-10; Gálatas 4:22-29). Mi lac taj laj qʼuel chaʼan cabʌl to jab tsiʼ wʌn alʌ Jehová baqui ora mi caj i coltan i tejclum.

6. ¿Chucoch miʼ mejlel lac ñop chaʼan Jehová mi caj i coltan i tejclum?

 ⁶ Josué jiñʌch juntiquil bʌ tsaʼ bʌ loqʼui yaʼ ti Egipto. Cheʼ ñumeñix cabʌl jab tsiʼ cʼajtesʌbe jiñi israelob: «Yom mi laʼ ñaʼtan ti pejtelel laʼ pusicʼal maʼanic chuqui anto yom miʼ tsʼʌctiyel ti pejtelel chuqui tsiʼ subeyetla lac Yum Dios. Tsaʼix laj tsʼʌctiyi» (Josué 23:2, 14). Jehová albil i chaʼan jaʼel chaʼan cheʼ ti ñuc bʌ wocol mi caj i coltan i wiñicob yicʼot mi caj i yʌqʼueñob i cuxtʌlel mach bʌ añic miʼ jilel yaʼ ti tsijiʼ bʌ pañimil. Miʼ mejlel lac ñop chaʼan mucʼʌch caj i tsʼʌctesan. Jin chaʼan, mi la com chumtʌl yaʼ ti tsijiʼ bʌ pañimil, yom yʌxʌl laj co.

7, 8. a) ¿Chuqui miʼ mel juntiquil xcʌntaya ti wajali, i chuqui mi laj cʌn? b) ¿Chuqui miʼ yujtel mi tsaʼ wʌyi jiñi xcʌntaya? Alʌ jumpʼejl ejemplo.

⁷ Ili miʼ mejlel laj cʌn tiʼ tojlel jiñi xcʌntayajob ti wajali. Ti Jerusalén yicʼot yambʌ tejclum tac melbil chan bʌ i tsʼajquil tac chaʼan maʼañic miʼ yochel i contrajob. Jiñi xcʌntayajob yaʼañob tiʼ pam jiñi tsʼajquil chaʼan miʼ tajob i qʼuel i joytʌlel jiñi tejclum. An yaʼ bʌ miʼ cʌytʌlob tiʼ tiʼ jiñi tejclum. Yom wen yʌxʌlob i yoj ti qʼuiñil yicʼot ti acʼʌlel. Cheʼ bʌ miʼ qʼuelob i contra yom miʼ tsictesañob yaʼ ti tejclum (Isaías 62:6). Wen yujilob chaʼan yom wen cañalob i wut yicʼot chaʼan yʌxʌlob i yoj ti chuqui jach miʼ yujtel. Mi maʼañic, cabʌl miʼ mejlelob ti chʌmel (Ezequiel 33:6).

⁸ Jiñi soldadojob i chaʼan Roma tsaʼ ochiyob ti Jerusalén ti jabil 70 cheʼ bʌ tsajñix Cristo. ¿Bajcheʼ tsaʼ mejliyob? Juntiquil yujil bʌ chaʼan historia i cʼabaʼ Josefo tsiʼ yʌlʌ chaʼan an xcʌntaya tsaʼ bʌ wʌyiyob. Jin chaʼan tsaʼ mejliyob ti ochel jiñi romanojob, tsiʼ puluyob jiñi templo yicʼot tsiʼ jisayob jiñi tejclum. Ili jiñʌch i yujtibal jiñi tsʌts bʌ wocol tsaʼ bʌ i ñusa jiñi judíojob.

9. ¿Chuqui maʼañic miʼ cʼotel i cʌn cabʌl quixtañu?

⁹ Cabʌl yumʌlob ili ora añob i soldado yicʼot cabʌlix chuqui tac miʼ cʼʌñob chaʼan miʼ cʌntañob i tejclum. Cheʼ bajcheʼ jiñi maʼañic majqui miʼ yochel i yʌcʼ wocol ti jiñi i país. Pero maʼañic miʼ ñaʼtañob ili yumʌlob chaʼan anto yambʌ ñumen pʼʌtʌl bʌ yumʌntel yaʼ ti panchan am bʌ tiʼ wenta Jesucristo. Ili yumʌl lʌcʼʌlix mi caj i jisan tiʼ pejtelel jiñi yumʌl am bʌ wʌʼ ti Pañimil (Isaías 9:6, 7; 56:10; Daniel 2:44). La comix miʼ cʼotel jiñi qʼuin yicʼot la com chaʼan chajpʌbilonla cheʼ miʼ cʼotel. Jin chaʼan, mi lac wen qʼuel bajcheʼ woli ti tsʼʌctiyel jiñi profecía tac yicʼot chʌn xucʼul woli lac melben i yeʼtel (troñel) Jehová (Salmo 130:6).

10, 11. a) ¿Chuqui mach bʌ yomic mi lac chaʼlen, i chucoch? b) ¿Chucoch maʼ wʌl chaʼan jiñi Diablo an i mʌcta jiñi quixtañujob chaʼan maʼañic miʼ ñopob jiñi profecía tac am bʌ ti Biblia?

¹⁰ Laʼ cu lac ñaʼtan juntiquil xcʌntaya maʼañic bʌ tsaʼ wʌyi ti jumpʼejl acʼʌlel. Wen lujbix cheʼ tsʼitaʼ jax yom miʼ sʌcʼan, i wocol jax cañal i wut. Lʌcʼʌl lajal añonla jaʼel, chumulonla ti cojix bʌ qʼuin. Jin chaʼan yom mi lac chʌcʌ qʼuel lac bʌ. ¿Chucoch? Come ñumen wocol mi caj la cubin chaʼan chʌn cañal lac wut cheʼ woliʼ ñumen lʌcʼtiyel i jilibal. Chʼijiyemtic jax yubil mi tsaʼ ochi lac wʌyel. Laʼ laj qʼuel uxchajp muʼ bʌ caj i coltañonla chaʼan maʼañic mi lac wʌyel tiʼ chaʼan bʌ Dios.

¹¹ Jiñi Diablo miʼ lotin quixtañujob. Jesús tsiʼ sube jiñi xcʌntʼañob i chaʼan cheʼ tsʼitaʼ jax yom miʼ chʌmel chaʼan Satanás jiñʌch «i yum pañimil» (Juan 12:31; 14:30; 16:11). Jiñi Diablo miʼ cʼʌn mach bʌ isujmic ñopbalʌl tac chaʼan miʼ lotin quixtañujob. Jin chaʼan, cabʌlob maʼañic miʼ ñopob jiñi profecía tac wen tsiquil bʌ miʼ pʌs chaʼan ili  pañimil tsʼitaʼ jax yom miʼ jilel (Sofonías 1:14). Wen tsiquil chaʼan Satanás «tsaʼix i yʌpbeyob i wut» quixtañujob (2 Corintios 4:3-6). Jin chaʼan, yonlelob maʼañic miʼ ñʌchʼtañoñobla cheʼ mi lac tsictesan chaʼan lʌcʼʌlix mi caj i jilel ili pañimil yicʼot chaʼan wolix ti yumʌntel Cristo. Miʼ wen alob: «Mach comic».

12. ¿Chucoch mach yomic mi laj cʌy chaʼan miʼ lotiñonla jiñi Diablo?

¹² Cabʌl maʼañic miʼ yʌcʼob ti ñuc jiñi profecía tac am bʌ ti Biblia. Pero mach yomic miʼ yʌqʼueñonla lac chʼijiyemlel. La cujil chucoch ñuc i cʼʌjñibal cheʼ yʌxʌl laj co. Jiñi apóstol Pablo tsiʼ sube jiñi hermanojob: «Laʼ wujil mi caj i tilel i qʼuiñilel lac Yum cheʼ bajcheʼ xujchʼ ti acʼʌlel» (pejcan 1 Tesalonicenses 5:1-6). Jesús tsiʼ yʌlʌ jeʼel: «Yom chajpʌbiletla jaʼel, come tal i Yalobil Winic tiʼ yorajlel cheʼ mach yʌxʌlic laʼ wo» (Lucas 12:39, 40). Lʌcʼʌlix chaʼan Satanás mi caj i ñop i lotin jiñi quixtañujob. Mi caj i yʌqʼueñob i ñaʼtan chaʼan «ñʌchʼʌlix pañimil» yicʼot maʼañix chuqui «bʌbʌqʼuen bʌ». Pero mach yʌxʌlobic i yoj mi caj i tilel i qʼuiñilel Jehová. Miʼ wen cajelob ti bʌqʼuen. ¿Ixcu joñonla? Mach yomic mi laj cʌy chaʼan miʼ lotiñonla jiñi Diablo mi la com chajpʌbilonla ti jiñi bʌ qʼuin. Yom mi lac mel tsaʼ bʌ i yʌlʌ Pablo: «Yom chʼejlonla. Yom cʼajal la co». Ti jujumpʼejl qʼuin yom mi lac pejcan lac Biblia yicʼot mi lac wen ñaʼtan muʼ bʌ i subeñonla Jehová.

13. a) ¿Chuqui miʼ mel jiñi i yespíritu pañimil tiʼ tojlel quixtañujob? b) ¿Chuqui miʼ mejlel lac mel chaʼan maʼañic miʼ ticʼlañonla?

¹³ Jiñi espíritu i chaʼan bʌ pañimil miʼ ticʼlʌben i pensar quixtañujob. Ili ora, cabʌlob miʼ ñaʼtan chaʼan maʼañic chucoch miʼ cʌñob Dios (Mateo 5:3). Cojach miʼ wen aqʼueñob i yorajlel yicʼotob i pʼʌtʌlel tiʼ tajol chuqui an ti pañimil (1 Juan 2:16). Ili ora ñumen cabʌlix ñusaqʼuin tac. Ili tac cojach miʼ yʌcʼ chaʼan jiñi quixtañujob mucʼ jach i ñaʼtañob chuqui yom i melob yicʼot i tajob i tijicñʌyel (2 Timoteo 3:4). Cheʼʌch miʼ ñajʌtesañob jiñi ñumen i cʼʌjñibal bʌ i maʼañic miʼ ñaʼtañob ajñel ti utsʼat yicʼot Dios. Chaʼan maʼañic miʼ ticʼlañonla i yespíritu pañimil, ¿chuqui yom mi lac mel? Pablo tsiʼ yʌlʌ chaʼan mach jin jach yom mi lac ñaʼtan chuqui bajñel la com. Mi mucʼʌch lac jacʼben i ticʼojel, chʌn pʼixil mi caj la cajñel tiʼ chaʼan bʌ Dios (Romanos 13:11-14).

14. ¿Baqui bʌ ticʼojel mi lac taj ti Lucas 21:34, 35?

¹⁴ La com chaʼan i yespíritu Dios miʼ tojʼesañonla, mach i yespíritujic pañimil. Jehová miʼ cʼʌn i yespíritu chaʼan miʼ coltañonla lac chʼʌmben isujm chuqui mi caj i yujtel (1 Corintios 2:12) ^[1] (qʼuele jiñi nota am bʌ tiʼ yujtibal ili temaj). Pero yom mi laj cʌntan lac bʌ. Cabʌl chuqui miʼ mejlel i mʌctañonla tiʼ melol i yeʼtel Jehová (pejcan Lucas 21:34, 35). Tajol an muʼ bʌ i yʌlob chaʼan sojquemonla cheʼ mi lac ñop chaʼan chumuloñixla ti cojix bʌ qʼuin (2 Pedro 3:3-7). Pero mach yomic mi laj cʌcʼ ti ñuc. Wen la cujil chaʼan lʌcʼʌlix i jilibal ili pañimil. Mach yomic mi laj cʌy jiñi tempa bʌ ti congregación mi la com chaʼan miʼ tojʼesañonla i yespíritu Dios.

15. ¿Chuqui tsiʼ mele Pedro, Jacobo yicʼot Juan, i chuqui miʼ mejlel lac chaʼlen jeʼel?

 ¹⁵ Jiñi laj cʼunlel tac miʼ mejlel i mʌctañonla chaʼan chʌn yʌxʌl laj co. Jesús wen yujil chaʼan xmulilonla yicʼot an laj cʼunlel. Laʼ lac ñaʼtan cheʼ lʌcʼʌlix mi caj i chʌmel. Jesús mach xmulilic, pero yujil chaʼan yom miʼ cʼajtiben i coltaya Jehová chaʼan xucʼul miʼ yajñel. Cheʼ bʌ tsaʼ majli ti oración, Jesús tsiʼ sube Pedro, Jacobo (Santiago) yicʼot Juan chaʼan maʼañic miʼ wʌyelob. Pero maʼañic tsiʼ cʼajtesayob chaʼan yom pʼixilob. ¿Chuqui tsiʼ chaʼleyob? Tsaʼ wʌyiyob come wen lujbeñob. Jesús lujbeñix jaʼel, pero maʼañic tsaʼ wʌyi come woliʼ melben oración i Tat. I wentʌlel cheʼʌch tsiʼ meleyob jaʼel jiñi apóstolob (Marcos 14:32-41).

16. Cheʼ bajcheʼ miʼ yʌl Lucas 21:36, ¿chuqui tsiʼ yʌlʌ Jesús chaʼan yom mi lac mel chaʼan chʌn yʌxʌl laj co?

¹⁶ ¿Chuqui mi caj i coltañonla chaʼan chʌn yʌxʌl laj co yicʼot chajpʌbilonla tiʼ qʼuiñilel Jehová? Yom ti jumpʼejl lac pusicʼal la com lac mel chuqui utsʼat. Pero mach jasʌlic. Jesús tsiʼ sube jiñi xcʌntʼañob i chaʼan cheʼ bʌ lʌcʼʌlix mi caj i chʌmel chaʼan yom miʼ chʌn cʼajtiñob i coltʌntel ti Jehová (pejcan Lucas 21:36). Chaʼan yʌxʌl laj co ti ili cojix bʌ qʼuin, tiʼ pejtelel ora yom mi lac mel oración (1 Pedro 4:7).

17. ¿Chuqui yom mi lac mel chaʼan mi lac ñaʼtan mi chajpʌbiloñʌchla chaʼan chuqui miʼ caj ti ujtel?

¹⁷ Jesús tsiʼ sube jiñi xcʌntʼañob i chaʼan chaʼan jiñi i jilibal tal ‹tiʼ yorajlel cheʼ mach yʌxʌlobic i yoj› (Mateo 24:44). Jin chaʼan tiʼ pejtelel ora yom chajpʌbilonla. Mach i yorajlelic mi lac sʌclan chuqui tac an ila tiʼ pañimil Satanás. Jiñi quixtañujob miʼ yʌlob chaʼan yaʼʌch cʌyʌl lac tijicñʌyel. Pero la cujil chaʼan mach cheʼiqui. Yaʼ ti Biblia Jehová yicʼot Jesús miʼ subeñonla chuqui yom mi lac mel chaʼan chʌn yʌxʌl laj co. Jin chaʼan, yom mi lac chʌcʌ qʼuel jiñi profecía tac yicʼot bajcheʼ woli ti tsʼʌctiyel. Laʼ lac ñumen pʼʌtʼesan bajcheʼ añonla la quicʼot Jehová yicʼot laʼ laj cʌcʼ ti ñaxan i Yumʌntel. Cheʼʌch chajpʌbil mi caj la cajñel cheʼ miʼ tilel i jilibal (Apocalipsis 22:20). Yom mi laj cʼajtesan chaʼan yaʼʌch cʌyʌl laj cuxtʌlel.