1. ¿Chucoch mach lajalic cheʼ an chuqui i cʼʌjñibal lac chaʼan yicʼot cheʼ an chuqui la com?

MACH lajalic cheʼ an chuqui i cʼʌjñibal lac chaʼan yicʼot cheʼ an chuqui la com. ¿Chucoch? Come mach cabʌlic chuqui i cʼʌjñibal bʌ chaʼan mi lac chumtʌl, cojach bajcheʼ i bʌl lac ñʌcʼ, lac pislel yicʼot jumpʼejl lac chumlib. Pero chuqui la com bʌ miʼ mejlel ti pʼojlel. Cabʌl wiñicob xʼixicob (quixtañujob) maʼañic miʼ ñaʼtañob chaʼan mach luʼ i cʼʌjñibalic ti laj cuxtʌlel chuqui tac an.

2. ¿Chuquiyes ñumen yom bʌ jiñi quixtañujob?

² Jiñi chumuloʼ bʌ ti pʼumpʼun bʌ país tajol mach lajalic chuqui yomob bajcheʼ jiñi chumuloʼ bʌ baqui wen an taqʼuin. An muʼ bʌ i mulañob jumpʼejl i celular, jumpʼejl moto o yomob i yalʌ lum. Pero an yambʌlob yomoʼ bʌ wen lets tac bʌ i tojol i pislel, ñumen colem bʌ otot o carro wen lets bʌ i tojol. Pero mach yʌlʌlic mi an o mach wen añic taqʼuin baqui chumulonla, miʼ mejlel lac ñumen mulan lac taj chubʌʼañʌl mach bʌ i cʼʌjñibalic lac chaʼan o wocol bʌ tiʼ tajol.

3. ¿Chuqui yom i yʌl cheʼ mi la cʌcʼ lac pusicʼal ti chubʌʼañʌl?

³ ¿Chuqui yom i yʌl cheʼ mi la cʌcʼ lac pusicʼal ti chubʌʼañʌl? Chaʼan jin jach mi lac ñumen acʼ ti ñuc i mach jiñic bajcheʼ añonla la quicʼot Jehová. Mi cheʼ mi lac mel, ñumen cabʌl chuqui la com tiʼ pejtelel ora, i mach jasʌlic mi la cubin am bʌ lac chaʼan. Ti lac pejtelel mi lac mejlel ti ujtel bajcheʼ ili, anquese mach wen añic lac taqʼuin o maʼañic mi lac mʌn lets tac bʌ i tojol. Tajol mach jiñix i Yumʌntel Dios mi caj lac chʌn acʼ ti ñaxan (Hebreos 13:5).

4. ¿Chucoch miʼ cʼʌn Satanás jiñi «lolom wem bʌ mi la quilan ti lac wut»?

⁴ Satanás yom mi lac ñaʼtan chaʼan cʼʌñʌl cabʌl lac chubʌʼan chaʼan tijicñayonla. Jin chaʼan, miʼ cʼʌn ili pañimil (mulawil) yicʼot jiñi «lolom wem bʌ mi la quilan ti lac wut» chaʼan miʼ ñijcʌyel lac pusicʼal tiʼ tajol cabʌl chubʌʼan (1 Juan 2:15-17, Jini wen bʌ tʼan; Génesis 3:6; Proverbios 27:20). Cabʌl mi laj qʼuel yicʼot mi lac ñʌchʼtan miʼ sujbel woli (choncol) bʌ ti chojñel chaʼan mi lac mʌn. ¿Am ba chuqui mʌmbil lac chaʼan tiʼ cajach wen utsʼatax tsaʼ laj qʼuele o chaʼan jach woli ti chojñel? Mi cheʼʌchi, tajol tsaʼ wiʼil cʼoti laj qʼuel chaʼan mach i cʼʌjñibalic. Mi woli (yʌquel) lac bej mʌn mach tac bʌ i cʼʌjñibalic, mi caj lac taj wocol. Miʼ mejlel i mʌctañonla tiʼ melol i yeʼtel (troñel) Jehová. Tajol maʼañix mi caj lac wen tajben i yorajlel chaʼan mi lac pejcan lac Biblia, lac chajpan lac bʌ yicʼot majlel ti tempa bʌ tac, i maʼañix mi caj lac wen loqʼuel ti subtʼan. Laʼ laj cʼajtesan chaʼan jiñi apóstol Juan tsiʼ yʌlʌ chaʼan mi caj i jilel ili pañimil yicʼot chuqui tac an.

5. ¿Chuqui miʼ mejlel ti ujtel tiʼ tojlel muʼ bʌ i ñumen acʼ i bʌ tiʼ sʌclʌntel chubʌʼañʌl?

⁵ Yom bʌ Satanás jiñʌch cheʼ mi laj cʼʌn lac pʼʌtʌlel chaʼan mi lac ñumen taj taqʼuin yicʼot chubʌʼañʌl tac. Mach yomic chaʼan mi laj cʼʌn tiʼ melol i yeʼtel Jehová (Mateo 6:24). Pero mi lac bajñel jach mi lac ñaʼtan lac bʌ cheʼ an chuqui la com, maʼañic i sujmlel yubil bajcheʼ añonla. Miʼ mejlel lac taj lac chʼijiyemlel o mi la cotsan lac bʌ ti wocol tiʼ caj taqʼuin. Pero ñumen wocol cheʼ mi lac sʌt lac ñopoñel (chʼujbiya) ti Jehová yicʼot tiʼ Yumʌntel (1 Timoteo 6:9, 10; Apocalipsis 3:17). Jesús tsiʼ yʌlʌ chaʼan «i mulʌntel chuqui tac [an]» lajal bajcheʼ chʼix maʼañic bʌ miʼ yʌcʼ ti colel yicʼot i yʌcʼ i wut pʌcʼʌbʌl (Marcos 4:14, 18, 19).

6. ¿Chuqui mi laj cʌn tsaʼ bʌ ujti tiʼ tojlel Baruc?

⁶ Laʼ lac ñaʼtan tiʼ tojlel Baruc, xtsʼijbaya bʌ i chaʼan jiñi xʼaltʼan Jeremías. Cheʼ bʌ Baruc tsaʼ caji i mulan chubʌʼañʌl tac, Jehová tsiʼ cʼajtesʌbe chaʼan Jerusalén lʌcʼʌlix mi caj i jisʌntel. Pero tsiʼ yʌqʼue i tʼan chaʼan mi caj i coltan i taj i cuxtʌlel (Jeremías 45:1-5). Baruc maʼañic miʼ mejlel i pijtan chaʼan Jehová mi caj i cʌntan ti wen i chubʌʼan quixtañujob (Jeremías 20:5). ¿Chuqui mi laj cʌn tsaʼ bʌ ujti tiʼ tojlel Baruc? Ili ora jaʼel, tsʼitaʼ jax yom chaʼan miʼ jisʌntel i pañimil Satanás. Jin chaʼan, mach i yorajlelix mi lac ñumen sʌclan chubʌʼañʌl tac. Mach yomic mi lac ñaʼtan chaʼan cheʼ ñumeñix jiñi ñuc bʌ wocol muʼto caj lac taj am bʌ lac chaʼan waʼli, anquese i cʼʌjñibalʌch mi laj qʼuel (Proverbios 11:4; Mateo 24:21, 22; Lucas 12:15).

7. ¿Chuqui mi caj lac tsajin, chucoch?

⁷ Jin chaʼan, ¿bajcheʼ miʼ mejlel laj cʌntan lac bʌ yicʼot lac familia i maʼañic mi lac ñajʌtesan jiñi ñuc bʌ i cʼʌjñibal? ¿Chuqui miʼ mejlel lac mel chaʼan maʼañic mi la cʌcʼ ti ñuc chubʌʼañʌl tac? ¿Chuqui miʼ mejlel i coltañonla chaʼan mi laj cʌy laj cʌlʌx cʼojoʼtan chuqui i cʼʌjñibal bʌ lac chaʼan? Tiʼ Cʌntesa yaʼ ti Bujtʌl, Jesús tsiʼ yʌqʼueyonla wem bʌ ticʼojel (Mateo 6:19-21). Mi caj lac pejcan yicʼot lac tsajin Mateo 6:25-34. Ili mi caj i coltañonla lac wen qʼuel chaʼan jiñʌch yom mi lac chʌn sʌclan jiñi Yumʌntel i mach jiñic chubʌʼañʌl tac (Lucas 12:31).

8, 9. a) ¿Chucoch mach yomic mi lac wen mel lac pusicʼal chaʼan chuqui i cʼʌjñibal lac chaʼan? b) ¿Chuqui yujil Jesús chaʼan jiñi i cʼʌjñibal bʌ i chaʼan quixtañujob?

⁸ (Pejcan Mateo 6:25). Jesús tsiʼ qʼuele chaʼan jiñi xcʌntʼañob i chaʼan tsaʼʌch i wen ñaʼtayob bajcheʼ mi caj i tajob i bʌl i ñʌcʼ yicʼot i pislelob. Jin chaʼan tsiʼ subeyob tiʼ Cʌntesa yaʼ ti Bujtʌl: «Mach mi laʼ mel laʼ pusicʼal». Jesús tsiʼ ñopo i coltañob i chʼʌmben isujm chaʼan mach yomic miʼ cʌlʌx ñaʼtañob. Anquese tajol i cʼʌjñibalʌch, Jesús yujil chaʼan miʼ mejlel i ñajʌtesañob jiñi ñumen ñuc bʌ mi tsaʼ caji i wen cʼojoʼtañob jiñi. Come Jesús tsiʼ wen qʼuele ti ñuc jiñi xcʌntʼañob i chaʼan, chʌnyajl tsiʼ chaʼ subeyob baqui bʌ i wocolel cheʼ mi laj cʌlʌx cʼojoʼtan lac bʌ (Mateo 6:27, 28, 31, 34).

⁹ Pero ¿chucoch tsiʼ yʌlʌ Jesús chaʼan mach yomic mi lac mel lac pusicʼal chaʼan i bʌl lac ñʌcʼ o lac pislel? ¿Mach ba i cʼʌjñibalic lac chaʼan ili tac? I cʼʌjñibalʌch. I tilelʌch cheʼ mi laj cʼojoʼtan lac bʌ mi mach wen añic lac taqʼuin chaʼan mi lac mʌn. Jesús yujilʌch jiñi, i yujil chuqui i cʼʌjñibal i chaʼan jiñi quixtañujob. Yujil jaʼel chaʼan wocolʌch mi caj i ñusan jiñi xcʌntʼañob i chaʼan cheʼ ti «cojix bʌ qʼuin tac» (2 Timoteo 3:1). Ili ora, cabʌlob maʼañic bʌ miʼ tajob i troñel, i woliʼ ñumen letsel i tojol chuqui tac an. An cabʌl baqui wen pʼumpʼuñob i mach wen añic chuqui miʼ cʼuxob. Pero Jesús yujil jaʼel chaʼan ñumen ñuc i cʼʌjñibal laj cuxtʌlel i mach jiñic i bʌl lac ñʌcʼ, i ñumen ‹i cʼʌjñibal lac bʌcʼtal bajcheʼ lac pislel›.

10. Cheʼ bajcheʼ tsiʼ yʌlʌ Jesús, ¿baqui bʌ yom ñumen i cʼʌjñibal chaʼañonla?

¹⁰ Jesús ujtel jaxto i suben jiñi xcʌntʼañob chaʼan yom miʼ cʼajtibeñob i Tat chuqui i cʼʌjñibal i chaʼañob cheʼ bʌ miʼ melob oración. Tsiʼ subeyob i mel cheʼ bajcheʼ iliyi: «Aqʼueñon lojon c waj chaʼan ili qʼuin» (Mateo 6:11). Ti yambʌ qʼuin tsiʼ chaʼ subeyob i mel oración bajcheʼ iliyi: «Aqʼueñon lojon wʌle c waj chaʼan ili qʼuin» (Lucas 11:3). Pero ili mach yomic i yʌl chaʼan jin jax mi caj lac ñaʼtan bajcheʼ mi lac taj chuqui i cʼʌjñibal lac chaʼan. Jesús tsiʼ cʌntesa jiñi xcʌntʼañob chaʼan ñumen ñuc i cʼʌjñibal cheʼ miʼ cʼajtiñob chaʼan miʼ tilel i Yumʌntel Dios (Mateo 6:10; Lucas 11:2). Jesús tsiʼ colta jiñi xcʌntʼañob i chaʼan cheʼ bʌ tsiʼ cʼajtesʌbeyob chaʼan Jehová miʼ cʌntan tiʼ pejtelel chuqui an i mele.

11, 12. ¿Chuqui mi laj cʌn chaʼan bajcheʼ miʼ cʌntan Jehová jiñi teʼlemut? (Qʼuele jiñi foto am bʌ tiʼ tejchibal).

¹¹ (Pejcan Mateo 6:26). Laʼ lac ñaʼtan jiñi «teʼlemut» tac. Anquese mach wen colemobic, pero on yujilob bucʼbal. Cheʼ colemic jiñi alʌ teʼlemut tac bajcheʼ joñonla, ñumen on miʼ chaʼleñob bucʼbal. Miʼ cʼuxob i wut teʼ, chup yicʼot motsoʼ tac. Pero maʼañic miʼ chaʼleñob pacʼ yicʼot cʼajbal come Jehová miʼ yʌqʼueñob i bucʼbal (Salmo 147:9). Ili mach yomic i yʌl chaʼan jin miʼ yotsʌbeñob tiʼ yej. Jiñʌch jiñi teʼlemut muʼ bʌ i sʌclan. Pero mucʼʌch i tajob i bucʼbal.

¹² Jesús yujil chaʼan Jehová mi caj i cʌntan wiñicob xʼixicob jaʼel mi mucʼʌch i cʌntan jiñi teʼlemut (1 Pedro 5:6, 7) ^[1] (qʼuele jiñi nota am bʌ tiʼ yujtibal ili temaj). Pero yom mi lac chaʼlen eʼtel jaʼel. Yom mi lac pʌcʼ chuqui mi laj cʼux o mi lac sʌclʌben i tojol. Jehová mi caj i yʌqʼueñonla i bendición mi cheʼ mi lac mel. Mi mach wen añic lac taqʼuin o i bʌl lac ñʌcʼ, miʼ mejlel i yʌqʼueñonla i cʼʌjñibal bʌ lac chaʼan. Jumpʼejl ejemplo, tajol an majqui miʼ tʼoxbeñonla chuqui an i chaʼan. Jehová miʼ yʌqʼuen i yotot jiñi teʼlemut. An bajcheʼ tsiʼ meleyob chaʼan miʼ mejlel i melob i met. Yicʼot melbil i chaʼan muʼ bʌ i cʼʌñob i mel i met. Jehová miʼ mejlel i coltañonla jaʼel chaʼan mi lac taj baqui mi lac mejlel ti chumtʌl la quicʼot lac familia.

13. ¿Chuqui miʼ pʌs chaʼan ñumen ñuc laj cʼʌjñibal?

¹³ Ti Mateo 6:26, Jesús tsiʼ cʼajtesʌbe jiñi xcʌntʼañob chaʼan Jehová miʼ yʌqʼuen i bucʼbal jiñi xteʼlemut. Ti wiʼil tsiʼ cʼajtibeyob: «¿Mach ba  ñumenic laʼ cʼʌjñibal bajcheʼ teʼlemut?» (mi caj a taj cheʼ bʌ miʼ yʌcʼ ti ñaʼtʌntel jaʼel yaʼ ti Lucas 12:6, 7). Cheʼ bʌ tsiʼ subeyob iliyi, tajol woliʼ ñaʼtan chaʼan ti wiʼil mi caj i yʌcʼ i cuxtʌlel tiʼ tojlel quixtañujob. Jesús maʼañic tsaʼ chʌmi tiʼ caj teʼlemut o juncojt añimal. Tsaʼ chʌmi chaʼan joñonla miʼ mejlel lac taj laj cuxtʌlel tiʼ pejtelel ora (Mateo 20:28). Ili miʼ pʌs chaʼan ñumen ñuc laj cʼʌjñibal i mach cheʼic bajcheʼ teʼlemut.

14. Jiñi muʼ bʌ i wen cʼojoʼtan i bʌ, ¿chuqui mach mejlic i taj?

¹⁴ (Pejcan Mateo 6:27). Jesús tsiʼ yʌlʌ chaʼan maʼañic majqui miʼ mejlel ti chumtʌl yambʌ ‹junxujcubʌyel› anquese miʼ wen cʼojoʼtan chuqui i cʼʌjñibal i chaʼan. ¿Chuqui yom i yʌl? Anquese miʼ wen cʼojoʼtan jiñi, mach yom i yʌl chaʼan ñumen jal mi caj i chumtʌl. Mi cheʼ miʼ mel, miʼ mejlel ti cʼamʼan o miʼ chʌmel.

15, 16. a) ¿Chuqui miʼ cʌntesañonla chaʼan bajcheʼ miʼ cʌntan Jehová i ñichteʼ tac? (Qʼuele jiñi foto am bʌ tiʼ tejchibal). b) ¿Chuqui yom mi laj cʼajtiben lac bʌ, i chucoch maʼ ñop?

¹⁵ (Pejcan Mateo 6:28-30). Ti lac pejtelel mi lac mulan utsʼat bʌ lac pislel chaʼan mi laj cʼʌn ti subtʼan, ti tempa bʌ yicʼot ti colem tempa bʌ tac. Cheʼ jiñi, ¿yom ba mi laj cʌlʌx ñaʼtan bajcheʼ mi lac taj lac pislel? Jesús tsiʼ chaʼ cʼajtesʌbe jiñi xcʌntʼañob chaʼan Jehová miʼ cʌntan chuqui tac melbil i chaʼan. Tsiʼ tajbeyob ti tʼan i ñich tac pimel. Jiñi ñichteʼ tac mach yʌlʌlic miʼ  mel i pislel. Pero Jesús tsiʼ yʌlʌ chaʼan wen i tʼojol tac jax ñumento bajcheʼ «i pislel Salomón tiʼ pejtelel i ñuclel».

¹⁶ Cheʼ bʌ Jesús tsaʼix ujti i suben jiñi xcʌntʼañob i chaʼan bajcheʼ qui «i tʼojol jax miʼ mel pimel Dios», tsiʼ cʼajtibeyob: «¿Mach ba muqʼuic i yʌqʼueñetla chuqui mi laʼ xoj jatetla mach bʌ anic mi laʼ ñop tiʼ pejtelel laʼ pusicʼal?». Cheʼʌch mi caj i mel. Pero jiñi xcʌntʼañob i chaʼan Jesús yom to miʼ ñumen ñopob jiñi (Mateo 8:26; 14:31; 16:8; 17:20). Yom miʼ yʌcʼob ti ñuc chaʼan Jehová yomʌch i cʌntañob i chaʼan cheʼʌch mi caj i mel. Yom mi lac ñaʼtan yicʼot mi laj cʼajtiben lac bʌ: «¿Tiʼ sujm ba mic ñop chaʼan Jehová mi caj i cʌntañon?».

17. ¿Chuqui miʼ mejlel i jem bajcheʼ an la quicʼot Jehová?

¹⁷ (Pejcan Mateo 6:31, 32). Mach bʌ i cʌñʌyobic Dios cojach miʼ sʌclañob taqʼuin yicʼot chubʌʼañʌl. Pero cheʼic mi caj lac mel jeʼel, miʼ mejlel ti jejmel bajcheʼ an la quicʼot Jehová. Jiñʌch lac Tat yicʼot miʼ wen cʼuxbiñonla. Jin chaʼan, la cujil chaʼan mi caj i yʌqʼueñonla chuqui i cʼʌjñibal lac chaʼan o tajol ñumento, mi mucʼʌch lac mel muʼ bʌ i yʌl yicʼot mi la cʌcʼ ti ñaxan jiñi i Yumʌntel. Mi lac ñop jaʼel chaʼan cheʼ i yamigojonla Jehová miʼ yʌqʼueñonla isujm bʌ tijicñʌyel. Jiñʌch muʼ bʌ i yʌqʼueñonla lac tijicñʌyel cheʼ añʌch jiñi lac pislel yicʼot i bʌl lac ñʌcʼ i cʼʌjñibal bʌ lac chaʼan (1 Timoteo 6:6-8).

18. ¿Chuqui tac yujil Jehová chaʼañonla, i chuqui mi caj i mel ti lac tojlel?

¹⁸ (Pejcan Mateo 6:33). Mi mucʼʌch la cʌcʼ ti ñaxan i Yumʌntel Dios, Jehová miʼ yʌcʼ i tʼan chaʼan mi caj i yʌqʼueñonla i cʼʌjñibal bʌ lac chaʼan. ¿Chucoch miʼ mejlel lac ñop iliyi? Ti Mateo 6:32, Jesús tsiʼ yʌlʌ: «Laʼ Tat ti panchan yujil pejtelel chuqui tac yom laʼ chaʼan». Cheʼ bʌ joñonla maxto lac ñaʼta chuqui la com, Jehová yujilix (Filipenses 4:19). Yujil baqui bʌ lac pislel yicʼot bajcheʼ yilal bʌ bʌlñʌcʼʌl i cʼʌjñibal lac chaʼan, i chaʼan i cʼʌjñibalʌch baqui miʼ mejlel ti chumtʌl lac familia. Jiñʌch mi caj i yʌqʼueñonla chuqui i cʼʌjñibal lac chaʼan.

19. ¿Chucoch mach yomic mi laj cʼojoʼtan chuqui miʼ mejlel ti ujtel ti talto bʌ qʼuin?

¹⁹ (Pejcan Mateo 6:34). Jesús tsiʼ chaʼ sube jiñi xcʌntʼañob i chaʼan: «Mach mi laʼ mel laʼ pusicʼal». Jehová mi caj i yʌqʼueñonla i cʼʌjñibal bʌ lac chaʼan ti jujumpʼejl qʼuin. Jin chaʼan, mach yomic mi laj cʌlʌx ñaʼtan chuqui miʼ mejlel ti ujtel ti talto bʌ qʼuin. Mi tsaʼ caji laj cʌlʌx ñaʼtan, tajol lac bajñel jax mi caj laj qʼuel lac bʌ ti ñuc, i mach jiñix Jehová. I jiñʌch miʼ mejlel i ñajtʼesañonla tiʼ tojlel. Jin chaʼan, ti jumpʼejl lac pusicʼal yom mi lac ñop Jehová (Proverbios 3:5, 6; Filipenses 4:6, 7).

20. a) ¿Chuqui miʼ mejlel a mel tiʼ tojlel Jehová? b) ¿Chuqui miʼ mejlel a mel chaʼan maʼañic chuqui miʼ mʌctañet?

²⁰ Chʼijiyemtic jax cheʼ mach tiʼ pejtelelic lac pʼʌtʌlel mi lac melben i yeʼtel Jehová tiʼ caj mi lac ñumen sʌclan chubʌʼañʌl. Yom mi la cʌqʼuen Jehová jiñi ñumen wem bʌ ti lac tojlel. Miʼ mejlel lac ñaʼtan chuqui miʼ mejlel lac mel. Jumpʼejl ejemplo, ¿muʼ ba lac mejlel ti majlel ti jumpʼejl congregación baqui ñumen yom coltʌntel chaʼan subtʼan? ¿Muʼ ba lac mejlel ti ochel bajcheʼ precursor? Mi cheʼix añonla, ¿muʼ ba lac mejlel ti majlel yaʼ ti Cʌntesʌntel chaʼan xSubtʼañob chaʼan bʌ i Yumʌntel Dios? ¿Muʼ ba lac mejlel ti coltaya chaʼpʼejl uxpʼejl qʼuin ti jumpʼejl semana yaʼ ti Betel o ti jumpʼejl Oficina chaʼan Traducción? ¿Muʼ ba lac mejlel ti coltaya cheʼ miʼ mejlel i Yotlel Tempa bʌ tac yaʼ baqui chumulonla o ti lʌcʼʌl? Laʼ lac ñaʼtan chuqui miʼ mejlel lac mel chaʼan maʼañic cabʌl chuqui miʼ mʌctañonla. Cheʼʌch mi caj lac ñumen tajben i yorajlel yicʼot lac pʼʌtʌlel tiʼ melol jiñi eʼtel chaʼan i Yumʌntel Dios. Yaʼ ti recuadro « Yom bʌ maʼ mel chaʼan maʼañic chuqui miʼ wen mʌctañet» miʼ coltañonla lac ñaʼtan. Laʼ laj cʼajtiben i coltaya Jehová chaʼan mi lac ñaʼtan chuqui yom mi lac mel. Cheʼ jiñi, laʼ lac mel chuqui yom bʌ melol.

21. ¿Chuqui mi caj i coltañonla chaʼan ñumen lʌcʼʌl mi la cajñel ti Jehová?

²¹ Jesús tsiʼ pʌsʌ chaʼan yom mi laj cʌcʼ ti ñaxan i Yumʌntel Dios. Mi cheʼʌch mi lac mel, maʼañix mi caj laj cʌlʌx cʼojoʼtan chuqui la com. Ñumen mi caj lac ñop chaʼan jiñʌch mi caj i cʌntañonla. Cheʼ jaʼel, mi caj laj cʌn chuqui yom mi lac mel i maʼañic mi caj lac mʌn tiʼ pejtelel chuqui an, anquese tajol añʌch lac taqʼuin. Jin tacʌch mi caj i coltañonla chaʼan ñumen lʌcʼʌl mi la cajñel ti Jehová. Cheʼ maʼañic cabʌl lac chubʌʼan mi caj i coltañonla chaʼan xucʼulonla ti Jehová yicʼot chaʼan mi lac taj laj cuxtʌlel mach bʌ yujilic jilel (1 Timoteo 6:19).