TEMAJ AM BɅ TIʼ TEJCHIBAL | JIÑI BIBLIA: ÑUSɅBIL BɅ I CHAʼAN CʼɅLɅL TI WAJALI
Jiñi Biblia cabʌl ora tsiʼ lʌtʼʌ
I CONTRAJINTEL. Tsaʼ bʌ i tsʼijbuyob jiñi Biblia tsiʼ cʼʌñʌyob jun melbil bʌ ti teʼ i cʼabaʼ papiro yicʼot pʌchi cʌmbil bʌ bajcheʼ pergamino (2 Timoteo 4:13, TNM). ¿Bajcheʼ qui colel i yʌcʼ ti jilel jiñi Biblia ili tsaʼ bʌ cʼʌjñi tac ti mejlel?
Jiñi papiro yujil cʼunʼan yicʼot mach wocolic miʼ yʌsiyel. Richard Parkinson yicʼot Stephen Quirke, yujiloʼ bʌ chaʼan Egiptología, miʼ yʌlob: «Xucʼu xucʼul miʼ jilel majlel jinto jochʼontiquix miʼ sujtel yicʼot cheʼix bajcheʼ tsʼubejn miʼ sujtel. Miʼ mejlel ti cuxʼan yicʼot ti pʌcʼman chaʼan i yʌchʼlel pañimil anquese wen lotol, i mi an bajcheʼ mujlʌbil o wen mucul, miʼ mejlel i cʼux jiñi tsuc o sʌsʌc xiñichʼ». An papiro tac tsaʼ bʌ i wen taja qʼuin o i yʌchʼlel pañimil cheʼ bʌ tsaʼ tajle, i maʼañic tsiʼ wen lʌtʼʌ.
Muʼ bʌ i ñumen jalijel jiñʌch jiñi pergamino, pero mi maʼañic miʼ cʼʌjñel ti wen i miʼ wen taj qʼuin o i yʌchʼlel pañimil maʼañic miʼ jalijel. * Miʼ mejlel ti jilel jaʼel tiʼ caj motsoʼ. Jin chaʼan, an yambʌ tsʼijbujel tac maʼañix bʌ tsiʼ lʌtʼʌ cʼʌlʌl ili ora. Cheʼic tsaʼ ujti jaʼel jiñi Biblia, maʼañic bajcheʼ miʼ mejlel lac ñaʼtan chuqui miʼ yʌl.
BAJCHEʼ TSAʼ COLTɅYI JIÑI BIBLIA. Jiñi Mandar tsaʼ bʌ aqʼuenti jiñi israelob miʼ yʌl chaʼan tiʼ pejtelel jiñi reyob yom ‹miʼ chaʼ tsʼijbuñob ti jun pejtel jiñi mandar›, jiñi ñaxam bʌ joʼpʼejl libro i chaʼan jiñi Biblia (Deuteronomio 17:18). Cheʼ jaʼel, jiñi wen yujiloʼ bʌ tsʼijbuntel i copiajlel Biblia tsiʼ meleyob cabʌl tsʼijbujel, i tiʼ jilibal jiñi ñaxam bʌ siglo tsaʼto cʼoti ili Tsʼijbujel tac yaʼ ti sinagoga an tac bʌ tiʼ pejtelel Israel yicʼot cʼʌlʌl ti Macedonia (Lucas 4:16, 17; Hechos 17:11). ¿Bajcheʼ tsaʼ coli ili wajalix bʌ tsʼijbujel tac cʼʌlʌl ili ora?
Jiñi tsʼijbujel tac cʌmbil bʌ bajcheʼ Bʌlbil bʌ Jun tsaʼ bʌ tajle yaʼ ti mar Muerto maʼañic chuqui tsiʼ chaʼle ti cabʌl siglo come tsaʼ ajqʼui ti ucʼum melbil bʌ ti ocʼol, i tsaʼ lojti ti jumpʼejl chʼen baqui tiquin pañimil.
Philip Comfort, wen yujil bʌ chaʼan jiñi Nuevo Testamento, miʼ yʌl: «Cʼotem ti ñaʼtʌntel chaʼan jiñi judíojob miʼ lotob ti ucʼum tac melbil bʌ ti ocʼol jiñi Tsʼijbujel tac». I cheʼʌch tsaʼ caji i melob jiñi xñoptʼañob cʼʌlʌl ti wajali. Jin chaʼan, tajbil tsʼijbujel tac ti ucʼum, ti alʌ cuarto tac wen mʌcʌl bʌ, ti chʼen yicʼot yaʼ baqui wen tiquin pañimil.
I WENLEL. Cabʌl i xujtʼil tsʼijbujel tac chaʼan jiñi Biblia, an ñumeñix bʌ ti chaʼpʼejl mil jab i ñoxlel, chʌn anto bʌ ili ora. Maʼañic yambʌ texto muʼ bʌ i mejlel ti tajtʌl ti cabʌl tsʼijbujel wen wajalix bʌ.
^ parr. 5 Jumpʼejl ejemplo, jiñi Declaración de Independencia de los Estados Unidos tsaʼ ñaxan tsʼijbunti ti pergamino. Maxto i taja 250 jab i mejlel i wolix i yʌjpel majlel jiñi tsʼijb yicʼot mach wen tsiquilix.
