CHEʼ bʌ an majqui miʼ yʌqʼueñonla lac majtan, yom mi la cʌqʼuen wocolix i yʌlʌ. Jesús tsiʼ pʌsʌ chaʼan ñucʌch i cʼʌjñibal iliyi cheʼ bʌ tsiʼ cʼoqʼuesa diez wiñicob añoʼ bʌ leco bʌ i tsoy maʼañic bʌ i tsʼʌcal ti jin bʌ ora. Pero juntiquil jach «tsaʼ chaʼ tili baʼan Jesús cheʼ bʌ tsiʼ qʼuele lajmenix i tsoy. Cʼam tsiʼ subu i ñuclel Dios». Jesús tsiʼ yʌlʌ: «¿Mach ba lujuntiquilic tsaʼ bʌ lajmesʌntiyob? Jixcu jini bolontiquil, ¿baqui añob?» (Lucas 17:12-17). Ili miʼ pʌsbeñonla chaʼan mach jalic miʼ mejlel lac ñajʌtesan chuqui melbil i chaʼan yambʌlob ti lac tojlel.

Cheʼ bajcheʼ qʼuelbil lac chaʼan, maʼañic yambʌ majtañʌl lajal bʌ yicʼot jiñi i tojol mulil, jiñi ñumen ñuc bʌ majtañʌl. Jin chaʼan, ¿bajcheʼ yilal yom mi laj qʼuel jiñi tsaʼ bʌ i mele Dios ti lac tojlel?

• Cʌñʌ tsaʼ bʌ i yʌcʼʌ jiñi majtañʌl. Jiñi i tojol mulil mach cheʼic jach mi’ waʼ ʌq’ueñonla laj cuxtʌlel maʼañic bʌ miʼ jilel. Jesús tsiʼ yʌlʌ yom bʌ mi lac mel cheʼ bʌ tsiʼ sube i Tat: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3). Mi tsaʼ cʼoti a  ñaʼtan chaʼan juntiquil wiñic tsiʼ coltayet cheʼ colelix a chʌmel cheʼ chutet to, ¿mach ba muqʼuic a mulan a ñumen cʌn yicʼot a cʼajtiben chucoch tsiʼ mele? Jehová Dios, tsaʼ bʌ i yʌcʼʌ jiñi i tojol mulil chaʼan mi lac taj laj cuxtʌlel, yom chaʼan mi laj cʌn i mi lac sujtel tiʼ yamigo. Jiñi Biblia miʼ subeñonla: «Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (Santiago 4:8).

• Acʼʌ a ñopoñel (chʼujbiya) tiʼ tojol jiñi mulil. «Jini muʼ bʌ i ñop i Yalobil Dios, an i chaʼan i cuxtʌlel mach bʌ anic miʼ jilel» (Juan 3:36). ¿Chuqui yom i yʌl cheʼ an lac ñopoñel? Yom i yʌl chaʼan mi lac pʌs ti lac melbal. Cheʼʌch mi lac pʌs lac ñopoñel tiʼ tojol jiñi mulil (Santiago 2:17). Cheʼ mi a wʌqʼuentel jumpʼejl majtañʌl, cʼʌñʌlʌch maʼ tichʼ a cʼʌb chaʼan mi a chʼʌm. Cheʼʌch yom maʼ mel jaʼel chaʼan maʼ chʼʌm jiñi i tojol mulil. Ili yom i yʌl chaʼan yom maʼ cʌn bajcheʼ miʼ mulan Dios chaʼan mi lac chumtʌl, i cheʼʌch yom maʼ mel. * Pejcan Dios ti oración yicʼot cʼajtiben chaʼan miʼ ñusʌbeñet a mul i miʼ yʌqʼueñet sʌc bʌ a conciencia. Lʌcʼtesan a bʌ ti Dios yicʼot ñopo chaʼan jiñi i tojol mulil mucʼʌch caj i yʌqʼuen i ñʌchʼtʌlel yicʼot i wenlel jiñi muʼ bʌ i yʌcʼob i chʼujbiya (Hebreos 11:1).

• Cucu tiʼ Cʼajtesʌntel i chʌmel Jesús. Chaʼan maʼañic mi lac ñajʌtesan jiñi i tojol mulil, Jesús tsiʼ yʌlʌ chaʼan yom mi lac tempan lac bʌ ti jujumpʼejl jab. Tsiʼ yʌlʌ: «Cheʼʌch yom mi laʼ mel chaʼan c ñaʼtʌntel» (Lucas 22:19). Ili jabil, jiñi i testigojonbʌlon Jehová mi caj lon j cʼajtesan i chʌmel (sajtel) Jesús cheʼ ti martes 11 i chaʼan abril, cheʼ bʌjlemix (pʼʌjqui) jiñi Qʼuin. Mi caj i jalʼan lʌcʼʌ jumpʼejl ora i mi caj i tsictesʌntel chuqui yom i yʌl cheʼ tsaʼ chʌmi Jesús yicʼot bajcheʼ miʼ coltañonla ili ora yicʼot ti talto bʌ qʼuin. Ti jiñi jabil tsaʼ bʌ ñumi, cheʼ bʌ 20 millón wiñicob xʼixicob (quixtañujob) tiʼ pejtelel pañimil (mulawil) tsajñiyob tiʼ cʼajtesʌntel i chʌmel Jesús. Mic pʌyet lon chaʼan juntemel mi la cʌqʼuen wocolix i yʌlʌ Dios cheʼ tsiʼ yʌqʼueyonla jiñi ñuc bʌ majtañʌl.