JIÑI Iglesia Católica Romana, jiñi ortodoxojob, jiñi budismo yicʼot yan tac bʌ ñopbalʌl, miʼ wersa cʼajtiñob chaʼan jiñi xcʌntesajob i chaʼan maʼañic miʼ ñujpuñelob. Pero an cabʌl muʼ bʌ i ñaʼtañob chaʼan tiʼ caj iliyi miʼ wen ujtel tsʼiʼlel, i jin miʼ tajtʌlob ti tʼan jiñi añoʼ bʌ i yeʼtel ti ñopbalʌl.

Jin mecu chaʼan, miʼ mejlel laj cʼajtiben lac bʌ mi loqʼuemʌch ti Biblia cheʼ jiñi xcʌntesajob ti ñopbalʌl mach yomic miʼ ñujpuñelob. Chaʼan mi lac tajben i jacʼbal, laʼ laj qʼuel bajcheʼ tsaʼ tejchi iliyi, bajcheʼ tsaʼ qʼuextʌyi majlel yicʼot chuqui miʼ ñaʼtan Dios.

Cheʼ ti jabil 2006, jiñi papa Benedicto XVI tsiʼ yʌcʼʌ jumpʼejl discurso tiʼ tojlel jiñi ñucoʼ bʌ i yeʼtel yaʼ ti Iglesia, tsiʼ yʌlʌ chaʼan ili cʌntesʌntel miʼ taj i bʌ yicʼot «junchajp ñʌmʌl bʌ i mel jiñi quixtañujob ti wajali lʌcʼʌ cheʼ tiʼ yorajlel jiñi Apóstolob».

Pero jiñi ñaxam bʌ xñoptʼañob maʼañic tsaʼ subentiyob chaʼan mach yomic miʼ ñujpuñelob. Jiñi apóstol Pablo tsaʼ bʌ chumle cheʼ ti ñaxam bʌ siglo, tsiʼ wʌn sube jiñi xñoptʼañob chuqui miʼ caj ti ujtel. Tsiʼ yʌlʌ: «Mi quej i chʼujbiñob jini muʼ bʌ i quej i lotiñob». Tsiʼ yʌlʌ jaʼel: «Miʼ ticʼob chaʼan mach yom i pʌyeʼ i yijñam winic» (1 Timoteo 4:1-3, Jini wen bʌ t’an).

Cheʼ ti jabil 101 cʼʌlʌl ti 200 cheʼ bʌ tsajñix Cristo (t.C.), tsaʼ caji i ñojpel yaʼ ti ñopbalʌl tac chaʼan mach yomic miʼ ñujpuñel juntiquil xcʌntesa, i ti wiʼil, jiñi Iglesia Católica Romana cheʼʌch tsaʼ caji i mel jeʼel. Jiñi libro Celibacy and Religious Traditions tiʼ tsictesa chaʼan iliyi «tsiʼ taja i bʌ yicʼot tsaʼ bʌ caji yaʼ  ti Roma, chaʼan mach yomic miʼ chaʼleñob piʼleya».

Ti jiñi jabil tac ñumen bʌ tilel, jiñi tempa bʌ tac muʼ bʌ i melob jiñi añoʼ bʌ tiʼ wenta Iglesia yicʼot jiñi Ñaxam bʌ tsiʼ techeyob jiñi Iglesia, tsiʼ yʌlʌyob chaʼan mach yomic miʼ ñujpuñel juntiquil xcʌntesa ti ñopbalʌl. Tsiʼ ñaʼtayob chaʼan jiñi piʼleya miʼ bibʼesan jiñi quixtañujob, i chaʼan mach mejlic i melob i yeʼtel ti wen bajcheʼ xcʌntesajob. Pero jiñi Encyclopædia Britannica tsiʼ yʌlʌ chaʼan «ti jabil 901 cʼʌlʌl ti 1000 anto xmotomajob yicʼot obispojob añoʼ bʌ i yijñam».

Ti jiñi tempa bʌ tac ti Letrán tsaʼ bʌ ujti ti Roma ti 1123 yicʼot 1139, jiñi Iglesia Católica tsiʼ yʌcʼʌ i tʼan chaʼan mach yomic miʼ ñujpuñel jiñi ñaxañoʼ bʌ ti ñopbalʌl. Cʼʌlʌl wʌle cheʼʌch miʼ melob. Bajcheʼ jiñi, jiñi Iglesia maʼañic tiʼ sʌtʌ i pʼʌtʌlel yicʼot i taqʼuin, come cheʼ ñujpuñemob jiñi xcʌntesajob, miʼ mejlel i ñusʌbeñob i yalobil chuqui añob i chaʼan yaʼ ti Iglesia.

Jiñi Biblia miʼ yʌl chuqui miʼ ñaʼtan Dios cheʼ miʼ xijqʼuel juntiquil wiñic chaʼan maʼañic miʼ ñujpuñel. Yaʼi miʼ mejlel laj qʼuel chuqui tsiʼ yʌlʌ Jesús tiʼ tojlel jiñi muʹbʌ i yajñelob tiʼ bajñelil «chaʼan i yeʼtel tiʼ yumʌntel panchan» (Mateo 19:12). Cheʼ jaʼel, jiñi apóstol Pablo tsiʼ taja ti tʼan chaʼan an xñoptʼañob tsaʼ bʌ i tsajcʌbeyob i melbal, i bajñel jach tsaʼ ajñiyob chaʼan i subol «jini wen tʼan» (1 Corintios 7:8; 9:23).

Jesús yicʼot Pablo maʼañic tsiʼ waʼchocoyob i tʼan chaʼan jiñi xñoptʼañob mach yomic miʼ ñujpuñelob. Jesús tsaʼ jach i tsictesa chaʼan mach tiʼ pejtelelic jiñi xñoptʼañob miʼ mejlel i yajñelob tiʼ bajñelil. Pablo tiʼ tsʼijbu jaʼel tiʼ tojlel jiñi maxto bʌ ñujpuñemobic, tsiʼ yʌlʌ: «Maʼix aqʼuebilon mandar ti lac Yum chaʼan jini max tyo bʌ tiʼ pʌyʌ yijñam. Pero mi cʌleʼ bajcheʼ mic ñaʼtyan» (Mateo 19:11; 1 Corintios 7:25, Jini wen bʌ tʼan).

Cheʼ jaʼel, yaʼ ti Biblia miʼ pʌs chaʼan cabʌl xñoptʼañob tsaʼʌch ñujpuñiyob, juntiquil jiñʌch jiñi apóstol Pedro (Mateo 8:14; Marcos 1:29-31; 1 Corintios 9:5). Cheʼ ti ñaxam bʌ siglo, yaʼ ti Roma miʼ yujtel cabʌl tsʼiʼlel, jin chaʼan Pablo tiʼ tsʼijbu chaʼan yom ‹juntiquil jach i yijñam› jiñi am bʌ i yeʼtel ti congregación, i chaʼan «yom miʼ qʼuejlel ti ñuc tiʼ yalobilob» (1 Timoteo 3:2, 4, Jini wen bʌ tʼan).

Maʼañic woliʼ yʌcʼ ti ñaʼtʌntel chaʼan jiñi xñujpuñelob maʼañic miʼ mejlel i piʼleñob i bʌ, come jiñi Biblia jamʌ tsiquil miʼ yʌl: «Jini winic laʼ i piʼlen i yijñam ti utsʼat». Cheʼ jaʼel, miʼ bej tsictesan: «Mach laʼ cʌy laʼ piʼlen laʼ bʌ» (1 Corintios 7:3-5). Miʼ mejlel laj qʼuel chaʼan Dios maʼañic miʼ yʌl mi muqʼuic i xicʼ jiñi xñoptʼañob chaʼan mach yomic miʼ ñujpuñelob.

Mi mach xicʼbilic chaʼan maʼañic miʼ ñujpuñel jiñi xñoptʼañob, ¿chucoch tsiʼ yʌlʌ Jesús yicʼot Pablo chaʼan wen cheʼ lac bajñel jach? Come bajcheʼ jiñi, mi lac ñumen mejlel lac sub jiñi wen tʼan. Jiñi i bajñelob to bʌ miʼ mejlel i ñumen melbeñob i yeʼtel Dios, come maʼañic chuqui miʼ cʌlʌx cʼojoʼtañob bajcheʼ jiñi ñujpuñemobix bʌ (1 Corintios 7:32-35).

Laʼ laj qʼuel tiʼ tojlel David, tsiʼ cʌyʌ i yeʼtel baʼ wen miʼ tojtʌl yaʼ ti México, i tsaʼ majli ti jumpʼejl alʌ tejclum yaʼ ti Costa Rica chaʼan miʼ mejlel i cʌntesan yambʌlob. ¿Am ba i wenlel miʼ qʼuel cheʼ i bajñel jaxto? David miʼ yʌl: «An cu. Cheʼ bʌ tsaʼ cʼotiyon, wocol tsaʼ ñʌmʼayon come mach lajalic jiñi cultura yicʼot bajcheʼ yilal chumulob, pero tsaʼʌch mejliyon come c bajñel jach».

Juntiquil xñoptʼan i bajñel to bʌ, i cʼabaʼ Claudia, tsaʼ bʌ majli ti chumtʌl baqui yom to xsubtʼañob, miʼ yʌl: «Mic wen mulan muʼ bʌ c mel. Jiñi c ñopoñel miʼ pʼʌtʼan yicʼot ñumen lʌcʼʌl mi cubin c bʌ ti Dios cheʼ bʌ mij qʼuel bajcheʼ woliʼ cʌntañon».

Maʼañic i wocolel cheʼ lac bajñel jaxto. Cheʼʌch miʼ yʌl Claudia: «Mach yʌlʌlic mi ñujpuñemet o a bajñel jaxto, miʼ mejlel a taj a tijicñʌyel cheʼ maʼ chaʼlen wersa a melben i yeʼtel Jehová» (Salmo 119:1, 2).