Cheʼ bʌ juntiquil quixtañu ñuc bʌ i yeʼtel o muʼ bʌ laj qʼuel ti ñuc miʼ yʌqʼueñonla jumpʼejl majtañʌl, mucʼʌch laj qʼuel ti ñuc. Anquese mach wen letsic i tojol jiñi muʼ bʌ la cʌqʼuentel, añʌch muʼ bʌ lac lot come tajol tsiʼ yʌqʼueyonla juntiquil lac familia cʼux bʌ mi la cubin o juntiquil wen bʌ la camigo. Jiñʌch tsaʼ bʌ ujti tiʼ tojlel Russell chaʼan jiñi majtan tsaʼ bʌ i yʌqʼue Jordan. Pero ¿chucoch woli lac taj ti tʼan iliyi yicʼot i tojol jiñi mulil?

Ti ñaxan, jiñi Biblia miʼ yʌl chaʼan «Dios [...] tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel» (1 Juan 4:9). Mi lac wen qʼuel ti ñuc jiñi majtañʌl come maʼañic yambʌ ñumen ñuc bʌ bajcheʼ Dios. Juntiquil salmista tiʼ tsʼijbu chaʼan Jehová * jiñʌch jiñi Cʼax ñuc bʌ tiʼ pejtelel pañimil (Salmo 83:18). Maʼañic yambʌ ñumen ñuc bʌ muʼ bʌ i yʌqʼueñonla lac majtan.

I chaʼpʼejlel, come Dios jiñʌch lac ‹Tat› (Isaías 63:16). ¿Chucoch mi la cʌl iliyi? Come jiñʌch tsiʼ yʌqʼueyonla laj cuxtʌlel. Cheʼ jaʼel, miʼ cʌntañonla yicʼot miʼ chʼʌmonla ti ñuc cheʼ bajcheʼ miʼ mel juntiquil wem bʌ tatʌl tiʼ tojlel i yalobilob. Cheʼ bʌ Dios tsiʼ taja ti tʼan i tejclum i cʼabaʼ Efraín, tsiʼ cʼajti: «¿Mach ba calobilic Efraín? ¿Mach ba cʼuxbibilic c chaʼan? ¿Mach ba jinic tsaʼ bʌ c meqʼue? [...] Mi caj c pʌsben i yutslel c pusicʼal» (Jeremías 31:20). Ili ora, Dios cheʼʌch miʼ yubin jaʼel tiʼ tojlel jiñi muʼ bʌ i chʼujutesañob. Mach jiñic jach jiñi cʼax pʼʌtʌl bʌ tsaʼ bʌ i Meleyonla, jiñʌch lac Tat yicʼot la camigo am bʌ  i cʼuxbiya. Jin chaʼan, mi lac wen qʼuel ti ñuc baqui jach bʌ majtañʌl miʼ yʌqʼueñonla.

An majtañʌl tac wen ñuc bʌ miʼ qʼuejlel come mach xicʼbilic jiñi tsaʼ bʌ i yʌcʼʌ, chaʼañʌch i cʼuxbiya. Jiñi am bʌ i yutslel maʼañic miʼ pijtan chaʼan an chuqui yom miʼ yʌqʼuentel jaʼel.

Dios tsiʼ yʌcʼʌ i Yalobil come miʼ cʼuxbiñonla. Jiñi Biblia miʼ yʌl: «Tsiʼ pʌsbeyonla i cʼuxbiya Dios cheʼ bʌ tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel» (1 Juan 4:9). Dios mach xicʼbilic chaʼan miʼ mel jiñi. Tsaʼʌch i pʌsʌ «i yutslel i pusicʼal» cheʼ bʌ Cristo Jesús tsiʼ mʌñʌyonla chaʼan miʼ yʌcʼonla ti colel (Romanos 3:24).

¿Chucoch jiñʌch bajcheʼ miʼ pʌs «i yutslel i pusicʼal» Dios ili majtañʌl? Jiñi Biblia miʼ tsictesan: «Tsaʼ chʌmi Cristo chaʼañonla cheʼ xmulilon tola. Cheʼ jini, Dios tsiʼ pʌsbeyonla cʼux miʼ yubiñonla» (Romanos 5:8). Tiʼ caj i cʼuxbiya, Dios tsiʼ colta jiñi quixtañujob cʼuñoʼ bʌ, chocbiloʼ bʌ yicʼot xmuliloʼ bʌ. Mach i wentʌlelic miʼ pʌsbeñonla i cʼuxbiya i maʼañic ba ora mi caj i mejlel lac tojben. Ili majtañʌl jiñʌch ñumen ñuc bʌ aqʼuebil bʌ i chaʼañonla.

Jumpʼejl majtañʌl ñumen an i cʼʌjñibal cheʼ bʌ jiñi muʼ bʌ i yʌcʼ tsaʼʌch i chaʼle wersa chaʼan miʼ taj. Cheʼ bʌ an majqui miʼ yʌqʼueñonla chuqui an i chaʼan muʼ bʌ i wen cʼuxbin, muʼto lac ñumen qʼuel ti ñuc.

Dios «tsiʼ yʌcʼʌ cojach bʌ i Yalobil» (Juan 3:16). Tsiʼ yʌqʼueyonla jiñi muʼ bʌ i ñumen cʼuxbin. Jesús jiñʌch jiñi «cʼuxbibil bʌ i Yalobil» Dios yicʼot jiñʌch i yejtal. Jiñi Biblia miʼ yʌl chaʼan Dios tsiʼ mele Jesús cheʼ bʌ maxto mejli jiñi panchan yicʼot pañimil. Jin chaʼan ti cabʌl jabil tsaʼ bajñel tem ajñiyob (Colosenses 1:13-15). Maʼañic ba’ ora mi lac taj yambʌ quixtañujob wen temeloʼ bʌ bajcheʼ iliyob.

Pero Jehová ti jumpʼejl i pusicʼal tsiʼ yʌcʼʌ i Yalobil (Romanos 8:32). Tsiʼ yʌcʼʌ jiñi ñumen wen bʌ chuqui an i chaʼan. Maʼañic yambʌ majtañʌl wen letsem bʌ i tojol acʼbil bʌ i chaʼan.

An majtañʌl tac wen ñuc bʌ mi laj qʼuel come miʼ coltañonla cheʼ bʌ ñoj i cʼʌjñibal lac chaʼan, tajol ti orajach bʌ yom. Ñaʼtancu iliyi, cheʼ añic jumpʼejl a cʼamʌjel i yom maʼ mʌn jumpʼejl tsʼac muʼ bʌ mejlel i coltañet i maʼañic i tojol a chaʼan, ¿mach ba muqʼuic a wen aqʼuen wocolix i yʌlʌ cheʼ juntiquil quixtañu miʼ subeñet chaʼan jin mi caj i toj?

«Cheʼ bajcheʼ miʼ chʌmelob pejtelel i pʼolbal Adán, cheʼ jaʼel mi caj i chaʼ cuxtʌyelob pejtelel añoʼ bʌ tiʼ Cristo» (1 Corintios 15:22). Tiʼ pejtelel i polbalonbʌla Adán woli lac chʌmel come jiñi cʼamʌjel yicʼot chʌmel mi luʼ tajonla, maʼañic mi lac mejlel ti chaʼ ajñel ti utsʼat yicʼot Dios i chʌn xmulilontola tiʼ tojlel. Maʼañic miʼ mejlel laj cuxtesan yambʌ quixtañu come maʼañic lac pʼʌtʌlel. Jiñi Biblia miʼ yʌl chaʼan maʼañic majqui «miʼ mejlel i tojben i mul i piʼʌl chaʼan miʼ loqʼuel tiʼ pʼʌtʌlel mulil. Mach mejlic i yʌqʼuen Dios i tojol i mul», come maʼañic miʼ mejlel lac mel (Salmo 49:7, 8). Laj comʌch coltʌntel ti ora come maʼañic miʼ mejlel laj cʌcʼ i tojol jiñi mulil. Maʼañic chuqui miʼ mejlel lac mel ti lac bajñelil.

Chaʼan i cʼuxbiya Jehová tsiʼ tojo jiñi «tsʼac» muʼ bʌ i yʌqʼueñonla laj cuxtʌlel, i jiñʌch tiʼ cuxtʌlel Jesús. ¿Bajcheʼ? «I chʼichʼel Jesús i Yalobil Dios woliʼ sʌqʼuesañonla tiʼ pejtelel mulil». Ili yom i yʌl chaʼan mi lac ñusʌbentel lac mul yicʼot miʼ mejlel lac taj laj cuxtʌlel maʼañic bʌ miʼ jilel cheʼ mucʼʌch la cʌcʼ lac  ñopoñel tiʼ cuxtʌlel Jesús (1 Juan 1:7; 5:13). Jiñi i tojol mulil mi caj i yʌqʼuen i wenlel jaʼel jiñi chʌmeñoʼ bʌ, come jiñi Biblia miʼ yʌl: «Tiʼ caj juntiquil winic miʼ chʌmelob pejtelel winicob, cheʼ jaʼel chaʼan tiʼ caj juntiquil winic [Jesús] miʼ tejchelob chʼojyel jini chʌmeñoʼ bʌ» (1 Corintios 15:21). *

I cuxtʌlel tsaʼ bʌ i yʌcʼʌ Jesús jiñʌch ñumen ñuc bʌ majtañʌl, come tsaʼ bʌ i yʌqʼueyonla jiñʌch Jehová, jiñi wen ñuc bʌ ti panchan yicʼot pañimil, tiʼ caj i cʼuxbiya. Maʼañic yambʌ melbil bʌ i chaʼan bajcheʼ Jehová. Maʼañic yambʌ majtañʌl muʼ bʌ i mejlel i coltañonla ti orajach chaʼan mi lac loqʼuel ti mulil yicʼot chʌmel. Tiʼ sujm, jiñi i tojol mulil jiñʌch jumpʼejl majtañʌl maʼañic bʌ miʼ lajintel bajcheʼ yan tac bʌ.