«LAʼ majlic jiñi autobús, ¡pero jatet maʼ cʌytʌl!». Jiñʌch tsaʼ bʌ i taja i yubin Alexandra yaʼ baqui buchul cheʼ bʌ woliʼ pijtan chaʼan miʼ cʼaxel ti jiñi yambʌ país chaʼan Sudamérica. Cheʼ bʌ tsaʼ jubi i qʼuel jiñi choncol bʌ ti ujtel, yaʼan juntiquil chʼiton wiñic chʼoyol bʌ ti China mach bʌ wen yujilic español, yaʼ woliʼ ñop i tsictesʌben juntiquil am bʌ i yeʼtel yaʼ baqui miʼ cʼaxelob ti yambʌ país chaʼan jiñi i wocol. Come Alexandra an ti jumpʼejl congregación chino i yujil jiñi tʼan, tsaʼ caji i yʌl ti español choncol bʌ i yʌl majlel jiñi wiñic chʼoyol bʌ ti China.

Jiñi wiñic tsiʼ yʌlʌ chaʼan añʌch i jun chaʼan miʼ mejlel ti chumtʌl ti jiñi país, pero tsiʼ xujchʼibeyob tiʼ pejtelel yicʼot i taqʼuin. Ti ñaxan, jiñi am bʌ i yeʼtel maʼan tiʼ chʼujbibe i tʼan jiñi wiñic i tsaʼto i yʌlʌ chaʼan Alexandra yaʼ ochem ti jiñi muʼ bʌ i choñob quixtañu. Ti wiʼil tsaʼ ñopbenti anquese tsiʼ tojo jumpʼejl multa tiʼ caj maʼañic i jun. Alexandra tsiʼ majñʌbe 20 dólar. Jiñi wiñic tsiʼ wen sube wocolix i yʌlʌ yicʼot tsiʼ sube chaʼan mi caj i chaʼ qʼuextʌben jiñi i taqʼuin i ñumen to mi caj i yʌqʼuen. Alexandra tsiʼ sube chaʼan maʼañic woliʼ pijtan chaʼan miʼ chaʼ qʼuextʌbentel pero añʌch i tijicñʌyel chaʼan tsiʼ colta come jiñʌch yom bʌ miʼ mejlel. Cheʼ jaʼel, tsiʼ yʌqʼue jun tac i tiʼ sube chaʼan miʼ chʼʌm estudio loqʼuem bʌ ti Biblia yicʼot jiñi i testigojob Jehová.

Cheʼ bʌ miʼ yʌjlel chaʼan utsʼat chuqui miʼ melbentel juntiquil mach bʌ cʌmbilic miʼ wen acʼ tijicñʌyel. Jiñi tsaʼ bʌ i mele Alexandra an i meleyob jaʼel jiñi añoʼ bʌ i ñopbal yicʼot maʼañic bʌ. Cheʼ jatetic, ¿tsaʼ baʼ mulaj a chaʼlen coltaya tiʼ tojlel yañoʼ bʌ anquese maʼan chuqui maʼ wʌqʼuentel? Wen ñuc ili cʼajtiya. Jesús tsiʼ yʌlʌ: «Ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hechos 20:35). Jiñi científicojob cʼotem i ñaʼtañob jaʼel chaʼan cheʼ bʌ mi lac tʼox lac chubʌʼan miʼ yʌqʼueñonla tijicñʌyel. Laʼ laj qʼuel bajcheʼ.

Jiñi tsaʼ bʌ ujti miʼ pʌs chaʼan cheʼ mi lac tʼox am bʌ lac chaʼan, tijicñayonla jeʼel. Jiñi apóstol Pablo tiʼ tsʼijbu chaʼan «Dios miʼ cʼuxbin jiñi muʼ bʌ i yʌcʼ tiʼ tijicñʌyel i pusicʼal». Pablo woliʼ taj ti tʼan jiñi xñoptʼañob tsaʼ bʌ i tʼoxbeyob i chubʌʼan jiñi i piʼʌlob añoʼ bʌ ti wocol (2 Corintios 8:4; 9:7). Pablo maʼañic tsiʼ yʌlʌ chaʼan añob i yutslel come tijicñayob. Tsiʼ yʌlʌ chaʼan tijicñayob come añob i yutslel.

Jumpʼejl estudio tsaʼ bʌ mejli tsiʼ pʌsʌ chaʼan cheʼ la cujil i tʼoxol jiñi am bʌ lac chaʼan, «miʼ ñijcan lac sicojc chaʼan tijicñayonla, mi lac taj wem bʌ la camigojob yicʼot chaʼan mi lac ñop chuqui miʼ yʌl yañoʼ bʌ». Yambʌ estudio tsiʼ yʌlʌ chaʼan «ñumen tijicña jiñi muʼ bʌ i yʌqʼuen taqʼuin yambʌlob i mach lajalic bajcheʼ jiñi muʼ bʌ i bajñel cʼʌn».

¿Am baʼ ñaʼta chaʼan maʼan maʼ mejlel ti coltaya cheʼ bajcheʼ maʼ mulan? Tiʼ sujm, ti lac pejtelel miʼ mejlel la cubin tijicñʌyel cheʼ bajcheʼ jiñi muʼ bʌ «i yʌcʼ tiʼ tijicñʌyel i pusicʼal». Cheʼ bʌ mi lac mel ti jumpʼejl lac pusicʼal  mach yʌlʌyic bajcheʼ cʼamel mi la cʌcʼ. Juntiquil i testigo Jehová tsiʼ choco majlel taqʼuin yaʼ baqui miʼ mejlel ili revista yicʼot tiʼ tsʼijbu majlel ili tʼan: «Tiʼ pejtelel ili jabil mach wen cabʌlic taqʼuin an cʌcʼʌ yaʼ tiʼ Yotlel Tempa bʌ». Tsiʼ chaʼ alʌ: «Joñon mach wen cabʌlic chuqui acʼbil c chaʼan, pero Jehová añix i ñumen chaʼ aqʼueyon. [...] Wocolix laʼ wʌlʌ chaʼan mi laʼ chʼʌm jiñi muʼ bʌ j cʌcʼ, miʼ yʌqʼueñon c tijicñʌyel».

Tiʼ sujm, cabʌl bajcheʼ miʼ mejlel lac tʼox lac chubʌʼan mach cojach cheʼ mi la cʌcʼ taqʼuin.

Jiñi Biblia miʼ yʌl chaʼan jiñi yujil bʌ pʼuntaya miʼ coltan i bʌ, pero miʼ ticʼlan i bʌ jiñi jontol bʌ i pusicʼal (Proverbios 11:17). Jiñi utsoʼ bʌ miʼ tʼoxob i chubʌʼan, cheʼ jaʼel miʼ yʌcʼob i yorajlel tiʼ melol chuqui jach yicʼot miʼ pʌsob chʼejlel. Cheʼ bʌ miʼ melob bajcheʼ iliyi, miʼ wen tajob i wenlel, junchajp miʼ coltañob tiʼ cʼocʼlel.

Cabʌl estudio an i yʌlʌ chaʼan jiñi muʼ bʌ i coltan yambʌ maʼañic miʼ wen cʼamʼan yicʼot maʼañic i cʌlʌx pensar. Ñumen an i cʼocʼlel. Isujmʌch iliyi, yaʼ mi laj qʼuel tiʼ tojlel jiñi añoʼ bʌ i chaʼan jiñi esclerosis múltiple o jiñi VIH. Cheʼ jaʼel, qʼuelbil chaʼan jiñi woli bʌ i cʌyob jap lembal maʼañic miʼ tajob i chʼijiyemlel cheʼ miʼ chaʼleñob coltaya yicʼot maʼañix miʼ chʌn ñaʼtañob i jap.

¿Chuqui yom i yʌl jiñi? Miʼ ñaʼtʌntel chaʼan «jiñi pʼuntaya, utslel yicʼot cheʼ miʼ tʼox i chubʌʼan maʼañic miʼ yʌcʼ ti ochel mach bʌ weñic pensar». Cheʼ mi lac tʼox lac chubʌʼan miʼ mejlel i tsʼitaʼ lajmesan jiñi cʼamʌjel tac. Cheʼ jaʼel, jiñi am bʌ chʌmeñob i yijñam o i ñoxiʼal miʼ cʌy i yubiñob i chʼijiyemlel cheʼ bʌ miʼ coltan yambʌlob

Tiʼ sujm, cheʼ bʌ mi lac tʼox lac chubʌʼan miʼ wen aqʼueñonla lac wenlel.

Jesús tsiʼ sube jiñi xcʌntʼañob i chaʼan: «Aqʼuenla. Cheʼ jini, mi caj laʼ wʌqʼuentel wen bʌ i pʼisol, tsʌts tejñʌbil, chejpʌbil, cheʼ wolix ti wejtuyel. Come cheʼ bajcheʼ mi laʼ pʼisben winicob cheʼʌch mi caj laʼ wʌqʼuentel» (Lucas 6:38). Cheʼ mi lac tʼox lac chubʌʼan, jiñi quixtañujob miʼ yʌqʼueñoñobla wocolix la cʌlʌ, i cheʼ jaʼel miʼ cʌñob chaʼan yom miʼ tʼoxob i chubʌʼan. Cheʼ miʼ mejlel iliyi miʼ yʌcʼ chaʼan mi laj coltan lac bʌ yicʼot mi lac ñumen lʌcʼtesan lac bʌ.

Yan tac bʌ estudio an i yʌlʌ chaʼan cheʼ jiñi laj camigojob miʼ qʼuelob chaʼan mi lac tʼox lac chubʌʼan «mi caj i mulañob i mel jaʼel». Tiʼ sujm, «cheʼ bʌ miʼ pejcañob baqui miʼ yʌl bajcheʼ an i chaʼleyob ñuc bʌ coltaya yambʌlob, miʼ ñijcañob yambʌ chaʼan miʼ melob jaʼel». Yambʌ estudio miʼ yʌl «chaʼan ti jujuntiquilonla miʼ mejlel laj coltan yañoʼ bʌ anquese mach laj cʌñʌyobic». Cheʼ bʌ juntiquil miʼ qʼuejlel chaʼan miʼ tʼox i chubʌʼan miʼ mejlel i ñijcʌben i pusicʼal jumpʼejl tejclum chaʼan cheʼ miʼ melob jaʼel. ¿Mach baʼ womic chumtʌl ti jumpʼejl tejclum bajcheʼ jiñi? Tsaʼix laj cʌñʌ, cheʼ ñumen añic quixtañu muʼ bʌ i tʼoxob i chubʌʼan, ti lac pejtelel mi lac taj lac wenlel.

 Jiñi tsaʼ bʌ ujti ti Florida (Estados Unidos) jiñʌch muʼ bʌ i pʌs chaʼan añʌch i wenlel cheʼ mi lac pʌs i yutslel lac pusicʼal. Cheʼ bʌ tsaʼ ñumi jiñi tsʌts bʌ icʼ jaʼal, junmojt i testigojob Jehová tsiʼ chaʼleyob coltaya. Cheʼ bʌ wolito i pijtañob chaʼan miʼ cʼotel jiñi muʼ bʌ caj i cʼʌñob chaʼan miʼ tojʼesañob jiñi otot tac, tsiʼ taja i qʼuelob chaʼan i yotot juntiquil mach bʌ testigojic wen jejmeñix, i tsiʼ subeyob chaʼan mi caj i tojʼesʌbeñob. Ti wiʼil, jiñi wiñic tsaʼ bʌ coltʌnti tsiʼ choco majlel jumpʼejl carta yaʼ ti central mundial chaʼan i testigojob Jehová. Tiʼ tsʼijbu: «Tiʼ pejtelel ora mi caj cʌqʼueñetla wocolix laʼ wʌlʌ, wen utsetla maʼañic yambʌ bajcheʼ jatetla». Chaʼan miʼ yʌcʼ wocolix i yʌlʌ chaʼan jiñi tsaʼ bʌ melbenti, tsiʼ choco majlel taqʼuin i tsaʼ yotsʌbe i cʼabaʼ bajcheʼ: «Wen utsʼatax bʌ i yeʼtel jiñi Testigojob».

Jumpʼejl estudio tsiʼ yʌlʌ: «Jiñi quixtañujob añob tiʼ pusicʼal chaʼan miʼ mulan i coltan yañoʼ bʌ». Tsiʼ chaʼ alʌ chaʼan jiñi xbiʼtalob «miʼ mulan i chaʼleñob coltaya anquese maxto yujilobic tʼan». Jiñi Biblia miʼ yʌl chaʼan cheʼonla bajcheʼ jiñi come melbilonla ‹tiʼ yejtal Dios›, lajal lac melbal bajcheʼ Dios (Génesis 1:27).

Junchajp wen utsʼat bʌ i melbal Jehová Dios jiñʌch cheʼ miʼ tʼox chuqui an i chaʼan. Tsiʼ yʌqʼueyonla laj cuxtʌlel yicʼot chuqui i cʼʌjñibal lac chaʼan (Hechos 14:17; 17:26-28). Jiñi Biblia miʼ coltañonla lac ñumen cʌn jiñi lac Tat am bʌ ti panchan yicʼot chuqui yom bʌ ti lac tojlel. Cheʼ jaʼel miʼ yʌcʼ ti cʌñol chaʼan chajpʌbilix i chaʼan chuqui mi caj i mel chaʼan tijicña mi la cajñel * (1 Juan 4:9, 10). Dios jiñʌch tsaʼ bʌ i pʌsʌ chaʼan yom mi lac tʼox lac chubʌʼan yicʼot tsiʼ meleyonla tiʼ yejtal, jin chaʼan mucʼʌch lac taj lac wenlel cheʼ mi lac tʼox lac chubʌʼan cheʼ bajcheʼ miʼ mel Dios, i miʼ coltañonla chaʼan miʼ qʼuelonla ti utsʼat (Hebreos 13:16).

¿Bajcheʼ tsaʼ ujti jiñi tsaʼ bʌ la cʌlʌ tiʼ tejchibal ili temaj? Juntiquil yaʼ bʌ majlel ti carro jaʼel tiʼ sube Alexandra chaʼan maʼañix mi caj i chʌn sutqʼuibentel i taqʼuin. Pero jiñi wiñic tsaʼ bʌ coltʌnti tsiʼ pejca i yamigojob yaʼ bʌ chumulob yaʼ ti tejclum baʼ mi caj i cottʌl jiñi autobús chaʼan miʼ mejlel i sutqʼuin jiñi 20 dólar tsaʼ bʌ majñʌbenti. Tsaʼʌch i mele tsaʼ bʌ i sube Alexandra i tsaʼ caji i chʼʌm jiñi estudio. Cheʼ ñumeñix uxpʼejl uw, wen tijicña Alexandra cheʼ bʌ tsiʼ chaʼ qʼuele jiñi wiñic tsaʼ bʌ i colta, pero ti jumpʼejlix colem tempa bʌ ti chino muʼ bʌ i melob i testigojob Jehová yaʼ ti Perú. Jiñi wiñic tsiʼ pʌyʌ majlel Alexandra yicʼot i piʼʌlob yaʼ tiʼ restaurante chaʼan miʼ yʌqʼuen wocolix i yʌlʌ chaʼan jiñi tsaʼ bʌ i mele.

Cheʼ mi lac tʼox lac chubʌʼan yicʼot cheʼ mi laj coltan yañoʼ bʌ miʼ yʌqʼueñonla lac tijicñʌyel. Cheʼ mi lac pʌs laj coltaya ti juntiquil i miʼ cʼotel i cʌn Jehová Dios, jiñi ñumen yujil bʌ tʼoxol i chubʌʼan, ¡jiñʌch ñumen wem bʌ! (Santiago 1:17). Ixcu jatet, ¿woli baʼ taj a tijicñʌyel chaʼan a wujil tʼoxol a chubʌʼan?