1. ¿Chuqui tsiʼ wʌn alʌ Jehová chaʼan mi caj i yujtel ili ora?

JEHOVÁ tsiʼ wʌn alʌ jumpʼejl profecía woli (choncol) bʌ i tsʼʌctiyel ili ora, tsiʼ yʌlʌ: «Ti jiñi bʌ qʼuin 10 wiñicob yujiloʼ bʌ tiʼ pejtelel i tʼan jiñi tejclum tac mi caj i chucbeñob, cheʼʌchi, mi caj i chucbeñob i bujc judío bʌ, mi caj i yʌlob: ‹Mi caj c majlel lojon quicʼotetla, come tsaʼ cubi lojon chaʼan laʼ wicʼot Dios›» (Zac. 8:23, TNM). Ili «judío bʌ» jiñobʌch jiñi bombiloʼ bʌ o yajcʌbiloʼ bʌ i chaʼan Dios ti chʼujul bʌ i yespíritu, cʌmbiloʼ bʌ jaʼel bajcheʼ jiñi «i chaʼañoʼ bʌ Dios» (Gá. 6:16). I jiñi «10 wiñicob» jiñobʌch jiñi añoʼ bʌ i pijtaya chaʼan miʼ chumtʌlob tiʼ pejtelel ora ila ti Pañimil. Yujilob chaʼan Jehová jiñʌch tsaʼ bʌ i yajca jiñi bombiloʼ bʌ i miʼ qʼuelob ti ñuc cheʼ miʼ tem chʼujutesañob Jehová yicʼotob.

2. ¿Chuqui yom i yʌl cheʼ jiñi 10 wiñicob miʼ majlelob yicʼot jiñi yajcʌbiloʼ bʌ?

² Anquese ili ora mach la cujilic i cʼabaʼob pejtelel jiñi yajcʌbiloʼ bʌ wʌʼto bʌ añob ti Pañimil, * jiñi añoʼ bʌ i pijtaya chaʼan miʼ chumtʌlob ila ti Lum miʼ mejlel i ‹majlelob› yicʼotob. ¿Bajcheʼ? Jiñi Biblia miʼ yʌl chaʼan jiñi «10 wiñicob» mi caj i chucbeñob i bujc juntiquil «judío bʌ» i mi caj i yʌlob: «Mi caj c majlel lojon quicʼotetla, come tsaʼ cubi lojon chaʼan laʼ wicʼot Dios». Ili versículo miʼ yʌl juntiquil judío bʌ. Pero jiñi 10 wiñicob miʼ pejcañob bajcheʼ «quicʼotetla». Ili miʼ  yʌcʼ ti ñaʼtʌntel chaʼan jiñi «judío bʌ» mach juntiquil jach, yom bʌ i yʌl jiñʌch tiʼ pejtelel jiñi yajcʌbiloʼ bʌ. Jiñi mach bʌ yajcʌbilobic miʼ tem melbeñob i yeʼtel (troñel) Jehová yicʼot jiñi yajcʌbiloʼ bʌ. Pero maʼañic miʼ qʼuelob bajcheʼ i yumob come yujilob chaʼan juntiquil jach i Yumob, jiñʌch Jesús (Mt. 23:10).

3. ¿Chuqui ti cʼajtiya tac mi caj lac jacʼ ti ili estudio?

³ Ili ora añixto yajcʌbiloʼ bʌ tiʼ tejclum Dios. Jin chaʼan, tajol an majqui miʼ cʼajtiben i bʌ: ¿Bajcheʼ yom miʼ qʼuelob i bʌ jiñi yajcʌbiloʼ bʌ? ¿Bajcheʼ yilal yom lac melbal tiʼ tojlelob jiñi muʼ bʌ i cʼuxob jiñi pan yicʼot miʼ japob vino tiʼ Cʼajtesʌntel i chʌmel Jesús? Yicʼot ¿yom ba mi laj cʼojoʼtan cheʼ woli (yʌquel) i bej pʼojlel jiñi yajcʌbiloʼ bʌ? Ti ili estudio mi caj lac tajben i jacʼbal.

4. ¿Chuqui ti ticʼojel miʼ yʌl 1 Corintios 11:27-29 yom bʌ miʼ chʼʌmob ti ñuc jiñi yajcʌbiloʼ bʌ, i chucoch?

⁴ Jiñi yajcʌbiloʼ bʌ yom miʼ chʼʌmob ti ñuc jiñi ticʼojel am bʌ ti 1 Corintios 11:27-29 (pejcan). ¿Bajcheʼ miʼ mejlel i mel «mach bʌ wenic» juntiquil yajcʌbil bʌ cheʼ ti Cʼajtesʌntel i chʌmel Jesús? Jiñʌch cheʼ miʼ cʼux jiñi pan yicʼot miʼ jap jiñi vino cheʼ maʼañic miʼ  chʼujbiben i mandar tac Jehová (He. 6:4-6; 10:26-29). Jiñi yajcʌbiloʼ bʌ yujilob chaʼan yom chʌn xucʼulob miʼ yajñelob ti Jehová miʼ yomob i taj «jini cʼax utsʼat bʌ», i ‹pʌyol ti chan ti Cristo Jesús› (Fil. 3:13-16).

5. ¿Bajcheʼ yom miʼ qʼuelob i bʌ jiñi yajcʌbiloʼ bʌ?

⁵ Jiñi chʼujul bʌ i yespíritu Jehová miʼ coltan jiñi wiñicob xʼixicob chaʼan ñumento añob i pecʼlel, mach chaʼañic miʼ ñumen chañʼesañob i bʌ (Ef. 4:1-3; Col. 3:10, 12). Jin chaʼan, jiñi yajcʌbiloʼ bʌ mach wen ñuquic miʼ yubiñob i bʌ bajcheʼ yambʌlob. Yujilob chaʼan Jehová maʼañic miʼ ñumen aqʼueñob chʼujul bʌ espíritu bajcheʼ yambʌlob i wiñicob. Mi jiñicto miʼ ñaʼtañob chaʼan ñumento yujilob jiñi i sujmlel tac am bʌ ti Biblia bajcheʼ yambʌ wiñicob xʼixicob (quixtañujob). Yicʼot maʼañic baqui ora an majqui miʼ caj i subeñob: «Jatet yajcʌbilet jaʼel, yom maʼ cʼux jiñi pan yicʼot maʼ jap jiñi vino cheʼ ti Cʼajtesʌntel i chʌmel Jesús». Miʼ pʌsob i pecʼlel yicʼot miʼ ñaʼtañob chaʼan jin jach Jehová miʼ mejlel i yajcan juntiquil chaʼan miʼ majlel ti panchan.

6. Cheʼ bajcheʼ miʼ yʌl 1 Corintios 4:7, 8, ¿bajcheʼ yilal yom i melbalob jiñi yajcʌbiloʼ bʌ?

⁶ Jiñi yajcʌbiloʼ bʌ yujilob chaʼan wen ñuc bʌ majtañʌl cheʼ mi caj i majlelob ti panchan, pero maʼañic miʼ pijtañob chaʼan ñumen wen chuqui miʼ melbentelob (Fil. 2:2, 3). Cheʼ jaʼel, yujilob chaʼan Jehová maʼañic tsiʼ yʌqʼue i ñaʼtan pejtelel quixtañujob cheʼ baqui ora tsiʼ yajcayob. Jin chaʼan, juntiquil xñoptʼan yajcʌbil bʌ maʼañic miʼ toj sajtel i pusicʼal cheʼ yambʌ hermanojob wocol bʌ miʼ ñopob ti ñaxan chaʼan tsaʼʌch yajcʌnti. Come tiʼ sujm, jiñi Biblia miʼ cʌntesañonla chaʼan mach yomic mi lac ñop ti ora mi an majqui miʼ yʌl chaʼan tsaʼ aqʼuenti ti Dios jumpʼejl ñuc bʌ eʼtel (Ap. 2:2). Cheʼ jaʼel, come mach yomobic chaʼan miʼ wen qʼuejlelob ti ñuc, maʼañic miʼ subeñob juntiquil quixtañu chaʼan yajcʌbilob cheʼ cojaxto i cʌñʌyob. Yicʼot maʼañic miʼ chʌcʌ alob chaʼan yajcʌbilob (pejcan 1 Corintios 4:7, 8).

7. ¿Chuqui maʼañic miʼ melob jiñi yajcʌbiloʼ bʌ, i chucoch?

⁷ Jiñi yajcʌbiloʼ bʌ mach cojach miʼ yajñelob yicʼotob yambʌ yajcʌbiloʼ bʌ, bajcheʼ junmojt quixtañujob wen ñucoʼ bʌ. Maʼañic miʼ sʌclañob i bʌ chaʼan miʼ yʌlob chaʼan mi caj i majlelob ti panchan o chaʼan jin jach miʼ tempañob i bʌ chaʼan miʼ comol pejcañob jiñi Biblia (Gá. 1:15-17). Mi cheʼic miʼ melob miʼ tʼoxob jiñi congregación. Miʼ contrajiñob jiñi chʼujul bʌ espíritu, muʼ bʌ i yʌcʼ jiñi  ñʌchʼtʌlel yicʼot chaʼan temel miʼ yajñel jiñi i wiñicob Dios.

8. ¿Chucoch yom wen tsajilonla chaʼan bajcheʼ yilal lac melbal tiʼ tojlel jiñi yajcʌbiloʼ bʌ?

⁸ ¿Bajcheʼ yilal yom lac melbal tiʼ tojlel jiñi hermanojob o hermanajob yajcʌbiloʼ bʌ? Mach weñic cheʼ an majqui mi laj cʌlʌx qʼuel ti ñuc, anquese juntiquil yajcʌbil o i yermañu cristo (Mt. 23:8-12). Jiñi Biblia miʼ yʌl tiʼ tojlel jiñi ancianojob: ‹Ñopola Dios cheʼ bajcheʼ miʼ ñopob›, pero maʼañic miʼ yʌl chaʼan yom mi lac tsajcan juntiquil quixtañu (He. 13:7). Isujmʌch chaʼan añʌch yom bʌ mi laj qʼuelob ti «ñumen ñuc». Pero mach chaʼañic yajcʌbilob, chaʼañʌch miʼ ‹wen chaʼleñob eʼtel› ti congregación, «ti subtʼan yicʼot ti cʌntesa» (1 Ti. 5:17). Mi ti bele ora mi lac subeñob wen utsʼatax bʌ tʼan o ñumen utsʼatax chuqui mi lac mel tiʼ tojlelob, maʼañic mi caj i mulañob * o miʼ mejlel i chañʼesañob i bʌ chaʼan yajcʌbilobʌch (Ro. 12:3). Tiʼ sujm, mach la comic chaʼan miʼ yajlelob ti mulil tiʼ caj lac melbal (Lc. 17:2).

9. ¿Bajcheʼ miʼ mejlel lac pʌs chaʼan mi laj qʼuel ti ñuc jiñi yajcʌbiloʼ bʌ?

⁹ ¿Bajcheʼ miʼ mejlel lac pʌs chaʼan mi laj qʼuelob ti ñuc jiñi yajcʌbiloʼ bʌ i chaʼan Jehová? Ti ñaxan, maʼañic mi caj laj cʼajtibeñob bajcheʼ tsaʼ yajcʌntiyob. Maʼañic ti lac wenta lac ñaʼtan, jiñob jach yujilob (1 Ts. 4:11; 2 Ts. 3:11). Cheʼ jaʼel, mach yomic mi lac ñaʼtan chaʼan jiñi i yijñam, i tat i ña o yambʌ tiʼ familiajob yajcʌbilob jaʼel. Cheʼ bʌ juntiquil miʼ yajcʌntel mach yomic i yʌl chaʼan luʼ yajcʌbil i familia. Cojach Dios miʼ yajcan majqui mi caj i majlel ti panchan (1 Ts. 2:12). Jumpʼejl ejemplo, maʼañic mi caj laj cʼajtiben i yijñam juntiquil yajcʌbil bʌ bajcheʼ yubil miʼ yubin i bʌ cheʼ maʼañic mi caj i chumtʌl tiʼ pejtelel ora yicʼot i ñoxiʼal ila ti Pañimil. Come mi lac ñop chaʼan Jehová yaʼ ti tsijiʼ bʌ pañimil mi caj i yʌqʼueñonla pejtelel chuqui la com (Sal. 145:16).

10. ¿Chucoch mach yomic mi laj cʼʌn «tʼojol bʌ tʼan»?

¹⁰ Cheʼ jaʼel, cheʼ junlajal mi laj qʼuel jiñi yajcʌbiloʼ bʌ cheʼ bajcheʼ mi laj qʼuel yambʌlob, miʼ cʌntañonla. ¿Bajcheʼ? Jiñi Biblia miʼ yʌl chaʼan tajol an yajcʌbiloʼ bʌ mach bʌ xucʼulobic mi caj i yajñelob (Mt. 25:10-12; 2 P. 2:20, 21). Mi maʼañic majqui mi lac pejcan ti «tʼojol bʌ tʼan», maʼañic mi caj lac tsajcan wiñicob, anquese yajcʌbilob, wen cʌmbilob o añix cabʌl jab woliʼ melbeñob i yeʼtel Jehová (Judas 16). Cheʼ jiñi, mi mach chʌn xucʼulic miʼ yajñelob o miʼ cʌyob jiñi congregación, maʼañic mi caj lac sʌt lac ñopoñel mi jiñicto mi caj laj cʌy Jehová.

11. ¿Chuqui an ujtem tiʼ tojlel jiñi muʼ bʌ i cʼuxob pan yicʼot miʼ japob vino tiʼ Cʼajtesʌntel i chʌmel Jesús?

¹¹ Ti cabʌl jab, jiñi muʼ bʌ i cʼuxob jiñi pan yicʼot miʼ japob jiñi vino tsaʼ caji ti bej jubel. Pero ili jabil maxto bʌ jalic ñumi, añix wen ocʼayob. ¿Yom ba mi laj cʼojoʼtan? Maʼañic. Laʼ lac tsajin muʼ bʌ caj i coltañonla lac ñaʼtan chucoch.

12. ¿Chucoch mach yomic mi laj cʼojoʼtan jaytiquil jiñi muʼ bʌ i cʼuxob pan yicʼot miʼ japob vino?

¹² «Lac Yum miʼ cʌn i chaʼañoʼ bʌ» (2 Ti. 2:19). Jehová yujil tiʼ sujm majqui yajcʌbilob i chaʼan. Pero jiñi hermanojob muʼ bʌ i tsicob jaytiquil miʼ cʼuxob jiñi pan yicʼot miʼ japob vino cheʼ tiʼ Cʼajtesʌntel i chʌmel  Jesús, maʼañic miʼ mejlel i ñaʼtañob. Yaʼ ochemob jaʼel jiñi muʼ bʌ i lon ñaʼtañob chaʼan yajcʌbilob, pero mach jiñobic. An tsaʼ bʌ i cʌn cʼuxuyob jiñi pan yicʼot tsiʼ japʌyob vino, pero ili ora maʼañix miʼ melob. I an muʼ bʌ i pensaliñob chaʼan mi caj i chaʼleñob Yumʌntel yicʼot Cristo yaʼ ti panchan tiʼ caj cʼamʼob tiʼ jol. Jin chaʼan, maʼañic mi lac ñoj ñaʼtan jaytiquilobto cʌylemob ila ti Lum jiñi yajcʌbiloʼ bʌ.

13. ¿Muʼ ba i yʌl jiñi Biblia chaʼan jaytiquil yajcʌbiloʼ bʌ wʌʼto añob ti Pañimil cheʼ miʼ tejchel jiñi ñuc bʌ wocol?

¹³ Jiñi yajcʌbiloʼ bʌ añob tiʼ joytʌlel Pañimil cheʼ bʌ tal Jesús chaʼan miʼ pʌyob majlel ti panchan (Mt. 24:31). Jiñi Biblia miʼ yʌqʼueñonla lac ñaʼtan chaʼan ti cojix bʌ qʼuin tac anto cʌylemob alʌ junmojt yajcʌbiloʼ bʌ ila ti Lum (Ap. 12:17, TNM). Pero maʼañic miʼ yʌl jaytiquil wʌʼto añob cheʼ miʼ tejchel jiñi ñuc bʌ wocol.

14. ¿Chuqui miʼ cʌntesañonla Romanos 9:11, 16 chaʼan i yajcʌntel jiñi bombiloʼ bʌ?

¹⁴ Cojach Jehová yujil jala miʼ pʌy jiñi yajcʌbiloʼ bʌ i chaʼan (Ro. 8:28-30). Jehová tsaʼ caji i yajcan jiñi bombiloʼ bʌ cheʼ bʌ chaʼ cuxtʌyemix Jesús. Cheʼ ti ñaxam bʌ siglo, luʼ yajcʌbilob jiñi i sujm bʌ xñoptʼañob. Ti wiʼil, cheʼ ñumeñix cabʌl jab yonlel tsaʼ bʌ i lon alʌyob chaʼan xñoptʼañob, tiʼ sujm mach jiñobic. Pero Jehová tsiʼ boño tiʼ yespíritu jiñi i sujm bʌ xñoptʼañob añoʼ bʌ ti jiñi bʌ ora. Iliyi, lajalob bajcheʼ jiñi trigo tsaʼ bʌ i yʌlʌ Jesús muʼ bʌ caj i colel baqui an mach bʌ weñic pacʼ (Mt. 13:24-30). Ti ili cojix bʌ qʼuin, Jehová woliʼ chʌn yajcan jiñi muʼ bʌ caj i yochelob  ti jiñi 144 mil. * Jin chaʼan, mi jiñi Dios muʼto i yajcan chaʼtiquil uxtiquil quixtañu cheʼ tsʼitaʼ jachix yom chaʼan i jilibal ili pañimil, ¿majquiyonla chaʼan mi lac suben chaʼan mach weñic chuqui miʼ mel? (Pejcan Romanos 9:11, 16). * Mach la comic lac mel bajcheʼ jiñi xʼeʼtelob tsaʼ bʌ i taja ti tʼan Jesús, tsaʼ bʌ i cajiyob ti wulwul tʼan tiʼ tojlel i yum tsʼusubil chaʼan wen chuqui tsiʼ mele tiʼ tojlel wiʼilix bʌ tsaʼ cajiyob ti eʼtel (Mt. 20:8-15).

15. ¿Chucoch la cujil chaʼan mach tiʼ pejtelelobic jiñi yajcʌbiloʼ bʌ ochemob ti jiñi «xucʼul bʌ xʼeʼtel am bʌ cabʌl i ñaʼtʌbal» muʼ bʌ i yʌl Mateo 24:45-47?

¹⁵ Mach tiʼ pejtelelobic jiñi añoʼ bʌ i pijtaya chaʼan mi caj i chumtʌlob ti panchan ochemob ti jiñi «xucʼul bʌ xʼeʼtel am bʌ cabʌl i ñaʼtʌbal» (pejcan Mateo 24:45-47). Lajal bajcheʼ ti ñaxam bʌ siglo, ili ora Jehová yicʼot Jesús mach cabʌlobic miʼ cʼʌñob chaʼan miʼ mʌcʼlan o miʼ cʌntesan cabʌl quixtañu. Ti ñaxam bʌ siglo, mach cabʌlobic jiñi yajcʌbiloʼ bʌ tsiʼ cʼʌñʌ Jehová chaʼan miʼ tsʼijbuñob jiñi Tsʼijbujel ti Griego. Wʌle bʌ ora, mach cabʌlobic yajcʌbiloʼ bʌ añob tiʼ wenta chaʼan «miʼ yʌqʼueñob i bʌl i ñʌcʼ» jiñi i tejclum Dios cheʼ tiʼ yorajlel.

16. ¿Chuqui tsaʼ cʌñʌ ti ili estudio?

¹⁶ Laʼ lac chaʼ al tsaʼ bʌ laj cʌñʌ ti ili estudio. Jehová tsaʼix i ñaʼta chaʼan yonlel i wiñicob mi caj i chumtʌlob ila ti Lum yicʼot majqui mi caj i chumtʌlob ti panchan chaʼan miʼ chaʼleñob yumʌntel yicʼot Jesús. Dios miʼ yʌqʼuen i majtan jiñi i wiñicob, cheʼ bajcheʼ jiñi «judío bʌ» yicʼot jiñi «10 wiñicob», i miʼ cʼajtibeñob chaʼan miʼ jacʼbeñob i mandar yicʼot yom xucʼulob. Yom añob i pecʼlel yicʼot miʼ tem melbeñob i yeʼtel. I tiʼ pejtelelob yom miʼ chaʼleñob wersa chaʼan añob i ñʌchʼtʌlel ti congregación. Wolix i lʌcʼtiyel i jilibal ili pañimil, jin chaʼan laʼ lac chʌn melben i yeʼtel Jehová yicʼot laʼ lac tsajcan majlel Cristo bajcheʼ «junmojt jach» (Jn. 10:16).