«¿MUʼ BA cʌcʼ wocolix a wʌlʌ?» Ili cʼajtiya jiñʌch yom bʌ mi lac melben lac bʌ. Jiñi Biblia tsiʼ wʌn alʌ chaʼan jiñi lac piʼʌlob ti ili ora maʼañix mi caj i yʌlob: Wocolix a wʌlʌ (2 Ti. 3:2). Tajol cʌmbil lac chaʼan lac piʼʌlob muʼ bʌ i yʌlob chaʼan yomʌch cheʼ añʌch chuqui añob i chaʼan o chuqui miʼ yʌqʼuentelob i chaʼan mach cʼʌñʌlic miʼ yʌcʼob wocolix a wʌlʌ. Maʼañic majqui miʼ mulan cheʼoʼ bʌ bajcheʼ jiñi.

Pero Jehová miʼ suben jiñi i wiñicob: «Pʌsʌla chaʼan mi laʼ wʌcʼ wocolix a wʌlʌ» yicʼot «acʼʌla wocolix a wʌlʌ ti chuqui jach» (Col. 3:15; 1 Ts. 5:18, TNM). Tiʼ sujm, mi lac tajben i wenlel cheʼ mi la cʌcʼ wocolix a wʌlʌ. ¿Chucoch? Laʼ laj qʼuel chaʼpʼejl uxpʼejl i sujmlel.

Junchajp i sujmlel cheʼ yom mi lac cʌcʼ wocolix a wʌlʌ jiñʌch cheʼ miʼ coltañonla chaʼan ñumen wen mi la cubin lac bʌ. Wen miʼ yubin i bʌ jiñi muʼ bʌ i subentel wocolix i yʌlʌ yicʼot jiñi muʼ bʌ i yʌl. ¿Bajcheʼ an jiñi? Laʼcu lac ñaʼtan iliyi: Mi juntiquil lac piʼʌl añʌch chuqui yom i mel (chaʼlen) chaʼan miʼ coltañonla chaʼañʌch miʼ ñaʼtan chaʼan yomʌch cheʼ miʼ mel yicʼot chaʼan i wentajoñʌchla. Jiñi miʼ coltañonla chaʼan ñumen wen mi la cubin lac bʌ. Cheʼʌch tsiʼ yubi i bʌ jiñi Rut. Cheʼ bʌ jiñi Boaz tsiʼ pʌsʌ i yutslel i pusicʼal tiʼ tojlel, Rut tijicña tsiʼ yubi i bʌ cheʼ bʌ tsiʼ qʼuele chaʼan tsiʼ cʼojoʼta chaʼan weñʌch miʼ yajñel (Rt. 2:10-13).

Ñumento yom mi la cʌqʼuen wocolix i yʌlʌ jiñi Dios. Tiʼ sujm, añix lac ñaʼta chuqui tac an i mele Jehová ti lac tojlel yicʼot wolito bʌ i bej mel (Dt. 8:17, 18; Hch. 14:17). Pero mach yom jach mi lac pam ñaʼtan bajcheʼ an i pʌsbeyonla i yutslel i pusicʼal Jehová. Laʼ la cʌqʼuen i yorajlel lac wen ñaʼtan jiñi i yutslel i pusicʼal ti lac tojlel yicʼot tiʼ tojlel lac chaʼañoʼ bʌ. Cheʼ jiñi, mi caj lac ñumen qʼuel ti ñuc yicʼot lac ñumen ñop chaʼan miʼ cʼuxbiñonla i miʼ qʼuelonla ti ñuc (1 Jn. 4:9).

Mach cojach yom mi lac wen ñaʼtan i yutslel i pusicʼal Jehová yicʼot jiñi i bendición tac, yom mi la cʌqʼuen wocolix i yʌlʌ (Sal. 100:4, 5). «Cheʼ mi la cʌcʼ wocolix a wʌlʌ miʼ ñumen coltañonla chaʼan tijicñayonla».

Yambʌ i sujmlel cheʼ yom mi la cʌcʼ wocolix a wʌlʌ jiñʌch cheʼ miʼ pʼʌtʼesan bajcheʼ an la quicʼot jiñi la camigojob. Ti lac pejtelel la com chaʼan mi lac chʼʌjmel ti ñuc. Cheʼ ti jumpʼejl lac pusicʼal mi la cʌqʼuen wocolix i yʌlʌ juntiquil tsaʼ bʌ i mele chuqui wen ti lac tojlel, miʼ pʼʌtʼan bajcheʼ an laʼ quicʼot (Ro. 16:3, 4). Cheʼ jaʼel, jiñi muʼ bʌ i qʼuelob ti ñuc chuqui miʼ melbentelob mi caj i ñumen mulañob i coltan yambʌlob. Come miʼ qʼuelob chuqui miʼ mejlel tiʼ tojlelob miʼ ñijcan i pʌsob i yutslel i pusicʼal ti yañoʼ bʌ. I cheʼ an majqui mi laj coltan miʼ yʌqʼueñonla lac tijicñʌyel cheʼ bajcheʼ tsiʼ yʌlʌ Jesús, «ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hch. 20:35).

Robert Emmons ti jiñi Universidad i chaʼan California tsiʼ yʌlʌ:«Chaʼan juntiquilonla bʌ quixtañu muʼ bʌ la cʌcʼ wocolix a wʌlʌ yom mi laj qʼuel bajcheʼ mi lac lajal coltan lac bʌ yicʼot yambʌlob, an i tajol, an chuqui miʼ mel juntiquil ti lac tojlel i an i tajol joñonla an chuqui mi lac mel tiʼ tojlel yambʌlob». Cheʼʌchi, ti laj cuxtʌlel yicʼot chaʼan wen mi la cajñel yaʼʌch cʌyʌl cheʼ an tacʌch baqui miʼ cʼʌjñibʌyel lac chaʼan yambʌlob. Jumpʼejl ejemplo, tajol yambʌlob miʼ mejlel i yʌqʼueñonla bʌl lac  ñʌcʼ yicʼot miʼ pʌyonla majlel ti doctor (1 Co. 12:21). Jiñi añʌch bʌ chuqui miʼ qʼuelob ti ñuc miʼ cʌñob chuqui miʼ melob jiñi yambʌlob tiʼ tojlel. Mi cheʼʌchi, ¿ñʌmʌl ba la cʌl wocolix a wʌlʌ?

Yambʌ chucoch yom mi laj qʼuel ti ñuc chuqui mi lac melbentel jiñʌch cheʼ miʼ coltañonla lac ñaʼtan chuqui tac wen. Jiñi lac pensar miʼ coltañonla cheʼ an tac chuqui miʼ yʌcʼ ñumel yicʼot maʼañic bʌ. Jiñi lac piʼʌlob am bʌ chuqui miʼ qʼuelob ti ñuc miʼ ñaʼtañob chuqui tac wen i tsʼitaʼ jax miʼ ñaʼtañob jiñi i wocol tac. Cheʼ an chuqui tac mi laj qʼuel ti ñuc, ñumen wen tac chuqui mi laj qʼuel yicʼot miʼ coltañonla chaʼan an tacʌch chuqui mi lac ñumen qʼuel ti ñuc. Cheʼ mi lac ñusan laj cuxtʌlel bajcheʼ iliyi mi coltañonla lac mel jiñi tsaʼ bʌ i yʌlʌ jiñi apóstol Pablo: «Tijicñesan laʼ pusicʼal ti lac Yum tiʼ pejtelel ora» (Fil. 4:4).

Mi añʌch chuqui mi laj qʼuel ti ñuc, maʼañic mi caj lac ñaʼtan mach tac bʌ weñic. Maʼañic chuqui miʼ mejlel laj qʼuel ti ñuc, mi an lac tsʼaʼleya, chʼijiyemonla o lotol ti lac pusicʼal michʼajel. Cheʼ jaʼel, jiñi lac piʼʌlob am bʌ chuqui miʼ qʼuel ti ñuc maʼañic miʼ wen mulañob chubʌʼañʌl, miʼ qʼuelob ti wen chuqui añob i chaʼan yicʼot maʼañic miʼ bej sʌclañob (Fil. 4:12).

La cujil chaʼan Satanás miʼ mulan chaʼan jiñi wocol tac muʼ bʌ lac ñusan ili ora miʼ cʼuñʼesañonla yicʼot miʼ yʌcʼ lac chʼijiyemlel. Yom chaʼan mi lac ñaʼtan mach tac bʌ weñic yicʼot tiʼ bele ora mi la cʌl muʼ bʌ i cʼojyel lac chaʼan. Ili maʼañic mi caj i coltañonla chaʼan wen mi lac mel tiʼ subol jiñi wen tʼan. Pero cheʼ an chuqui mi laj qʼuel ti ñuc mi caj lac pʌs chaʼan an lac chaʼan i wut muʼ bʌ i yʌcʼ jiñi espíritu. Jumpʼejl ejemplo, ñumen tijicñayonla yicʼot mi lac ñumen acʼ lac ñopoñel ti Dios (Gá. 5:22, 23, TNM).

Jiñi i wiñiconbʌla Dios mi la cʌl chaʼan i sujmʌch pejtelel añix bʌ ajli chaʼan cheʼ yom mi la cʌcʼ wocolix a wʌlʌ. Pero cheʼ jaʼel, mi laj cʌn chaʼan maʼañic mi la cʌcʼ wocolix a wʌlʌ ti lac melbal yicʼot ti lac tʼan yicʼot chaʼan an tac mach bʌ weñic mi lac ñaʼtan mach lac taj lac chʼijiyemlel. Miʼ mejlel lac tech lac pʌs chaʼan mi la cʌcʼ wocolix a wʌlʌ ti lac melbal yicʼot ti lac tʼan ti bele ora. Jin chaʼan, laʼ la cʌqʼuen i yorajlel chaʼan ti bele qʼuin mi lac ñaʼtan ti chuqui tac yom mi la cʌcʼ wocolix a wʌlʌ. Cheʼ mi lac ñumen mel, mi caj lac ñʌmʼan la cʌcʼ wocolix a wʌlʌ. I ñumen tijicña mi caj la cubin lac bʌ mach cheʼic bajcheʼ jiñi wiñicob xʼixicob mucʼ jach bʌ i ñaʼtañob i wocol tac. Laʼ lac ñaʼtan chuqui tac wen mi mel Dios yicʼot jiñi yambʌlob chaʼan miʼ ñuqʼuesañob lac pusicʼal, pejtelel muʼ bʌ i yʌqʼueyonla lac tijicñʌyel. Cheʼto jaʼel, miʼ mejlel lac tsʼijbun ti jun ti jujumpʼejl qʼuin chaʼpʼejl uxpʼejl chucoch yom mi la cʌcʼ wocolix a wʌlʌ.

Jiñi científicojob an cʼoti i cʌñob chaʼan cheʼ ti bele ora mi la cʌcʼ wocolix a wʌlʌ miʼ coltan bajcheʼ mucʼ ti eʼtel (troñel) jiñi lac sicojc i chaʼan mach wocolic mi la cubin chaʼan mi lac ñaʼtan chuqui tac wen. Jiñi lac piʼʌlob muʼ bʌ i yʌcʼob wocolix a wʌlʌ tiʼ tʼan yicʼot tiʼ melbal ñumen tijicñayob. Jin chaʼan, la lac wen qʼuel chuqui tac wen an lac chaʼan, laʼ lac wen ñusan chuqui mi laj cʌn ti laj cuxtʌlel i laʼ la cʌcʼ wocolix a wʌlʌ. Mach la cʌcʼ chaʼan mi lac mʌlbentel, laʼ lac mel chuqui miʼ yʌl jiñi Biblia: «Subenla wocolix i yʌlʌ lac Yum, come utsʼatʌch» «acʼʌla wocolix a wʌlʌ ti chuqui jach» (1 Cr. 16:34; 1 Ts. 5:18, TNM).