¿Muʼ ba i mejlel a jacʼ ili cʼajtiya tac chaʼan jiñi tsaʼ bʌ ajli ti Lac Tsictesʌbentel i chaʼan 2019?

¿Chuqui yom i yʌl cheʼ Dios tsiʼ yʌqʼueyonla i tʼan chaʼan ‹maʼanic mi junchajpic eʼtijibʌl chaʼan guerra muʼ bʌ mejlel i jisañonla›? (Is. 54:17)

Miʼ mejlel lac ñop chaʼan jiñi Dios mi caj i cʌntañonla tiʼ pʼʌtʌlel jiñi «jontoloʼ bʌ» (Is. 25:4, 5). Jiñi laj contrajob mach tiʼ pejtelel ora mi caj i ticʼlañoñobla (w19.01, i yopol 6 yicʼot 7).

¿Bajcheʼ tsiʼ pʌsʌ Dios cheʼ miʼ mel chuqui toj chaʼan bajcheʼ tsiʼ mele tiʼ tojlel cananeojob yicʼot israelitajob xñusatʼañoʼ bʌ?

Dios tsiʼ yʌqʼue i xot i mul jiñi tsaʼ bʌ meleyob bibiʼ jax bʌ tsʼiʼlel yicʼot tsaʼ bʌ i meleyob mach bʌ tojic tiʼ tojlel xʼixicob yicʼot alʌlob. Tsiʼ yʌqʼue bendición jiñi tsaʼ bʌ i jacʼbeyob i tʼan yicʼot tsiʼ meleyob chuqui toj (w19.02, i yopol 22 yicʼot 23).

¿Chuqui mi caj lac mel cheʼ an baqui añonla i miʼ subentel juntiquil mach bʌ i testigo Jehová chaʼan miʼ mel oración?

Ñʌchʼʌl jach miʼ mejlel laj cʌytʌl i maʼañic mi lac mel chuqui lecoj tiʼ tojlelob. Pero maʼañic mi caj la cʌl «amén» o mi lac chucben lac bʌ laj cʼʌb yicʼot yambʌlob. Miʼ mejlel lac bajñel mel la coración ti mucul jach (w19.03, i yopol 31).

¿Chucoch jumpʼejlʌch tsʌts bʌ mulil tiʼ tojlel alob o xchʼoc cheʼ bʌ miʼ ticʼlʌntel?

Jumpʼejlʌch tsʌts bʌ mulil tiʼ contra tsaʼ bʌ ticʼlʌnti, tiʼ contra jiñi congregación, ti jiñi añoʼ bʌ i yeʼtel yicʼot tiʼ contra Jehová. Cheʼ an baqui waʼchocobil mandar tac chaʼan yom miʼ subob jiñi tsaʼ bʌ i chaʼle ticʼlaya, jiñi ancianojob mucʼʌch i jacʼob (w19.05, i yopol 9 yicʼot 10).

¿Bajcheʼ miʼ mejlel lac tsijibtesan jiñi lac pensar?

Uxchajp ñuc bʌ i cʼʌjñibal yom mi lac mel: Laʼ lac pejcan ti oración Jehová, laʼ lac wen ñaʼtan bajcheʼ la quilal tiʼ sujm yicʼot laʼ lac sʌclan wem bʌ la camigojob (w19.06, i yopol 11).

¿Bajcheʼ miʼ mejlel lac chajpan lac bʌ ili ora chaʼan jiñi ticʼlʌntel?

Laʼ lac pʼʌtʼesan bajcheʼ añonla la quicʼot Jehová, laʼ lac ñop chaʼan Jehová miʼ cʼuxbiñonla yicʼot chaʼan maʼañic baʼ ora mi caj i cʌyonla, laʼ lac pejcan jiñi Biblia ti jujumpʼejl qʼuin, laʼ lac chaʼlen oración ti bele ora, laʼ lac ñop chaʼan mucʼʌch caj i tsʼʌctiyel jiñi bendición tac muʼ bʌ caj i chʼʌm tilel i Yumʌntel Dios, laʼ laj cʌy jiñi texto tac muʼ bʌ lac wen mulan ti lac jol yicʼot jiñi cʼay tac am bʌ ti laj cʼʌyoñib yicʼot ti Internet (w19.07, i yopol 2 cʼʌlʌl ti 4).

¿Chuqui miʼ mejlel lac mel chaʼan mi laj coltan jiñi lac familia?

Ñuc i cʼʌjñibal cheʼ mi lac pʌs chaʼan la cujil ubintel bajcheʼ miʼ yubiñob i bʌ, cheʼ mi lac pʌs wen tac bʌ lac melbal, la cujil pijt yicʼot utsonla (w19.08, i yopol 15 cʼʌlʌl ti 17).

¿Chucoch mi lac taj lac tijicñʌyel ti jiñi eʼtel tsaʼ bʌ i yʌqʼueñonla Jesús? (Mt. 11:28).

An lac chaʼan xcʌntayajob utsoʼ bʌ i pusicʼal, wem bʌ lac piʼʌlob ti eʼtel yicʼot wen utsʼatax bʌ eʼtel (w19.09, i yopol 23).

¿Bajcheʼ miʼ mejlel i ñijcañonla Dios chaʼan mi lac mel chuqui yom yicʼot bajcheʼ miʼ yʌqʼueñonla lac pʼʌtʌlel? (Fil. 2:13, TNM).

Cheʼ bʌ mi lac pejcan i Tʼan Dios yicʼot mi lac wen ñaʼtan muʼ bʌ i yʌl , Dios mi yʌqʼueñonla lac pʼʌtʌlel chaʼan mi lac mel chuqui yom. Miʼ cʼʌn jiñi chʼujul bʌ i yespíritu chaʼan miʼ ñumen weñʼesan jiñi la cujilix bʌ melol (w19.10, i yopol 21).

¿Chuqui tac yom mi lac ñaxan mel cheʼ woli lac yajcan chuqui mi caj lac mel?

Joʼpʼejl yom bʌ mi lac mel: Laʼ laj cʼajtiben Dios jiñi lac ñaʼtʌbal, laʼ lac ñumen sʌclan chuqui yom mi lac mel, laʼ lac tsajin chuqui miʼ ñijcañonla chaʼan mi lac mel, laʼ lac wen ñaʼtan chuqui com lac mel yicʼot laʼ lac ñaʼtan chaʼan mach luʼ mejlic lac mel (w19.11, i yopol 27 cʼʌlʌl ti 29).

¿Yaʼ ba ti pʌcʼʌbʌl Edén tsaʼ tejchi jiñi cʌntesʌntel chaʼan maʼañic miʼ chʌmel jiñi lac chʼujlel cheʼ bʌ Satanás tsiʼ chaʼle tʼan yicʼot Eva?

Maʼañic. Satanás maʼañic tiʼ sube Eva chaʼan an i chʼujlel mach bʌ yujilic chʌmel. Maʼañic tiʼ sube chaʼan an chuqui cuxul, mach bʌ mejlic ti qʼuelol, mi caj i cʌytʌl cheʼ miʼ chʌmel. Tsaʼ bʌ i sube jiñʌch cheʼ maʼañic mi caj i chʌmel. Pejtelel jiñi ñaʼtʌbal mach tac bʌ i sujmic ñopbalʌl tac tsaʼ luʼ jili ti jiñi ñuc bʌ Butʼ jaʼ. Tajol jiñi cʌntesʌntel chaʼan an lac chʼujlel mach bʌ yujilic chʌmel tsaʼ tejchi cheʼ bʌ Dios maxto i pam pucuyob jiñi wiñicob xʼixicob yaʼ ti Babel cheʼ wolito i melob jiñi chan bʌ qʼueloñib (w19.12, i yopol 15).