1. ¿Chuqui an i yʌqʼue tiʼ wenta Jehová jiñi tatʌlob?

JEHOVÁ tsiʼ mele Adán yicʼot Eva chaʼan miʼ mulañob i taj i yalobilob. Jin chaʼan, jiñi Biblia miʼ yʌl: «La calobilob lac majtañʌch aqʼuebilonla i chaʼan lac Yum» (Sal. 127:3). Chaʼan mi lac ñaʼtan chuqui yom i yʌl ili tʼan tac, laʼ lac ñaʼtan chaʼan juntiquil la camigo miʼ cʼajtibeñonla laj cʌntʌben i taqʼuin. Tiʼ sujm, wen mi caj la cubin lac bʌ cheʼ tsiʼ qʼueleyonla ti ñuc cheʼ miʼ cʌy ti lac wenta. Pero cheʼ jaʼel, mi laj cʼojoʼtan bajcheʼ mi caj laj cʌntan. Jehová, jiñi wem bʌ la camigo an i yʌqʼue tiʼ wenta jiñi tatʌlob ñumento am bʌ i cʼʌjñibal bajcheʼ jiñi taqʼuin: Jiñi i wenlel yicʼot i tijicñʌyel i yalobilob.

2. ¿Chuqui ti cʼajtiya tac mi caj i jacʼ ili temaj?

² ¿Majqui an tiʼ wenta i ñaʼtan chaʼan yom miʼ tilel i yalobilob jiñi ñujpuñemoʼ bʌ yicʼot jala? Yicʼot ¿chuqui miʼ mejlel i melob jiñi tatʌlob chaʼan tijicña miʼ yajñel i yalobilob? Laʼ laj qʼuel principio tac muʼ bʌ i mejlel i coltan jiñi xñoptʼañob ñujpuñemoʼ bʌ chaʼan wen chuqui miʼ yajcañob i mel (chaʼleñob).

3. a) ¿Majqui yom miʼ ñaʼtan mi jiñi ñujpuñemoʼ bʌ yom chaʼan añob i yalobil? b) ¿Chuqui ti principio tac yom miʼ cʼajtesañob jiñi i yamigojob yicʼot i familia jiñi ñujpuñemoʼ bʌ?

³ An lumal tac baqui miʼ pijtʌntel chaʼan jiñi tsaʼ jaxto bʌ ñujpuñiyob yom miʼ tilel i yalobilob ti ora. Cheʼto jaʼel jiñi i familia yicʼot yambʌ wiñicob xʼixicob (quixtañujob) miʼ mejlel i xicʼob chaʼan cheʼʌch miʼ melob. Juntiquil Testigo chʼoyol bʌ ti  Asia i cʼabaʼ Jethro * miʼ yʌl: «Ti jiñi congregación, an hermanojob añoʼ bʌ i yalobilob muʼ bʌ i xicʼob jiñi yambʌ ñujpuñemoʼ bʌ chaʼan yom añob i yalobil». Jefri yambʌ hermano chʼoyol bʌ ti Asia miʼ yʌl: «An muʼ bʌ i subeñob jiñi ñujpuñemoʼ bʌ maʼañobic bʌ i yalobil chaʼan maʼañic majqui mi caj i cʌntañob cheʼ baʼ ora ñoxobix». Pero jiñi ñujpuñemobix bʌ jiñʌch yom miʼ ñaʼtañob mi yomobʌch i yalobil. Jin añob tiʼ wenta (Gá. 6:5). Tiʼ sujm, jiñi i yamigojob yicʼot i familia yom chaʼan tijicña miʼ yajñelob jiñi tsaʼ jaxto bʌ ñujpuñiyob pero yom mi laj cʼajtesan chaʼan mach an ti lac wenta chaʼan mi lac subeñob chuqui yom miʼ melob (1 Ti. 5:13).

4, 5. a) ¿Chuqui chaʼchajp ñuc bʌ i cʼʌjñibal yom miʼ yʌlob jiñi ñujpuñemoʼ bʌ? b) Tsictesan baqui ora yom miʼ yʌlob mi yomob i yalobil.

⁴ Mi jumpʼejl xñujpuñel yom i yalobil, yom miʼ yʌlob chaʼan ili chaʼchajp ñuc bʌ i cʼʌjñibal: Ñaxam bʌ, jalaqui yomob i taj i yalobil. I chaʼpʼejlel, jaytiquil yomob. Jin chaʼan, ¿jalaqui yom miʼ yʌlob ili chaʼchajp? ¿I chucoch ñuc i cʼʌjñibal?

⁵ Jiñi añobto bʌ bajcheʼ novio yom miʼ ñaxan chaʼleñob tʼan chaʼan mi yomob i yalobil come ñucʌch i cʼʌjñibal chaʼan jiñi muʼ bʌ i yajcañob i mel jiñʌch lajal yomoʼ bʌ. Cheʼ jaʼel, yom miʼ ñaʼtañob mi chajpʌbilobix miʼ yubiñob i bʌ. An tsaʼ jaxto bʌ ñujpuñiyob ñumen wem bʌ miʼ qʼuelob cheʼ miʼ yʌcʼob ti ñumel jumpʼejl o chaʼpʼejl jab chaʼan miʼ tilelob i yalobil. Come tiʼ cosʌntelob yomʌch cabʌl i yorajlel yicʼot i pʼʌtʌlelob. Miʼ chʼʌmbeñob i sujm chaʼan cheʼ muʼto i pijtañob miʼ caj i yʌqʼueñob i yorajlel chaʼan miʼ ñʌmʼañob chumtʌl bajcheʼ jumpʼejl xñujpuñel yicʼot miʼ pʼʌtʼesañob bajcheʼ añob (Ef. 5:33).

6. Cheʼ mi laj qʼuel bajcheʼ chumulonla ili qʼuin, ¿chuqui an i ñaʼtayob i mel chaʼtiquil uxtiquil ñujpuñemoʼ bʌ?

⁶ An yambʌ xñoptʼañob am bʌ i qʼueleyob chuqui tsiʼ mele uxtiquil i yalobil Noé yicʼot i yijñamob, mach bʌ ti orajic tsaʼ tʌliyob i yalobil (Gn. 6:18; 9:18, 19; 10:1; 2 P. 2:5). Jesús tsiʼ laji ili qʼuin chumulonla cheʼ bajcheʼ tiʼ yorajlel Noé, i tiʼ sujm añonla tiʼ «yorajlel bʌbʌqʼuen tac bʌ» (2 Ti. 3:1; Mt. 24:37). Cheʼ yujilob iliyi, an xñujpuñel am bʌ i ñaʼtayob chaʼan maxto yomobic i yalobil chaʼan miʼ mejlel i ñumen melbeñob i yeʼtel Jehová.

7. ¿Bajcheʼ miʼ mejlel i coltañob jiñi ñujpuñemoʼ bʌ jiñi tʼan tac muʼ bʌ lac taj ti Lucas 14:28, 29 yicʼot ti Proverbios 21:5?

⁷ Cheʼ woliʼ ñaʼtañob mi yomob i yalobil o maʼañic yicʼot jaytiquil, jiñi ñujpuñemoʼ bʌ  wen añoʼ bʌ i ñaʼtʌbal yom miʼ ‹tsicob i tojol› (pejcan Lucas 14:28, 29). Jiñi tatʌlob añix bʌ i cosayob alʌl yujilob chaʼan mach cojach yomob taqʼuin yicʼotʌch jaʼel i yorajlel yicʼot i pʼʌtʌlelob. Jin chaʼan, jiñi ñujpuñemoʼ bʌ ñuc i cʼʌjñibal cheʼ miʼ melbeñob i bʌ ili cʼajtiya: «¿Muʼ ba caj lac chaʼlen eʼtel ti lac chaʼticlel chaʼan miʼ mejlel lac mʌn i cʼʌjñibal bʌ i chaʼan lac familia? ¿Lajal ba mi lac ñaʼtan baqui bʌ yoque an i cʼʌjñibal? Mi ti lac chaʼticlel mi caj lac chaʼlen eʼtel, ¿majqui mi caj i cʌntan jiñi alʌlob? ¿Majquiyob mi caj i ñijcañob ti wem bʌ pensar yicʼot melbal?». Jiñi ñujpuñemoʼ bʌ muʼ bʌ i wen tsajiñob ili cʼajtiya tac an i chʼʌmʌyob ti ñuc muʼ bʌ i yʌl Proverbios 21:5 (pejcan).

8. a) ¿Chuqui ti wocol tac yom miʼ ñaʼtañob jiñi xñoptʼañob ñujpuñemoʼ bʌ? b) ¿Chuqui mi caj i mel jiñi wiñic muʼ bʌ i cʼuxbin i yijñam?

⁸ Jiñi tatʌl yicʼot ñaʼʌl yom miʼ yʌqʼueñob cabʌl i yorajlel yicʼot i pʼʌtʌlel chaʼan miʼ cosan i yalobilob. Jin chaʼan, mi belecña mi caj laʼ taj laʼ walobil, tajol wocol mi caj laʼ wubin chaʼan bajcheʼ mi caj laʼ qʼuelob ti jujuntiquil cheʼ bajcheʼ i wentʌlel yom mi laʼ mel. Jiñi ñujpuñemoʼ bʌ añix bʌ i cosayob cabʌl i yalobil tsiʼ yʌlʌyob chaʼan maʼañic tsiʼ ñaʼtayob chuqui miʼ yʌlob yicʼot miʼ melob. Tajol ti bele ora jiñi ñaʼʌl lujben tiʼ bʌcʼtal yicʼot ti bajcheʼ miʼ yubin i bʌ, jin chaʼan maʼañix i pʼʌtʌlel chaʼan miʼ pejcan jiñi i Biblia, miʼ chajpan i bʌ, miʼ chaʼlen oración yicʼot chaʼan ti bele ora miʼ loqʼuel ti subtʼan. Cheʼ jaʼel, wocol mi caj i yubin chaʼan miʼ xucʼchocon i pensar yaʼ ti tempa bʌ yicʼot miʼ locʼsʌben i wenlel. Tiʼ sujm, jiñi wiñic muʼ bʌ i cʼuxbin i yijñam mi caj i chaʼlen wersa i coltan cheʼ yaʼañob ti tempa bʌ yicʼot tiʼ yotot. Jumpʼejl ejemplo, mi caj i coltan ti chuqui tac yom melol tiʼ yototob, mi caj i chaʼlen wersa chaʼan tiʼ pejtelelob tijicña miʼ ñusañob tiʼ chʼujutesaya i familia cheʼ ti acʼʌlel yicʼot mi caj i loqʼuel ti subtʼan yicʼotob.

9, 10. ¿Chuqui ñuc bʌ i cʼʌjñibal yom miʼ melob jiñi tatʌlob yomoʼ bʌ i coltan i yalobilob?

⁹ ¿Chuqui miʼ mejlel i melob jiñi tatʌlob chaʼan miʼ cʌntesan i yalobilob i cʼuxbin Jehová? ¿Bajcheʼ miʼ mejlel i cʌntañob ti wocolel ili jontol bʌ pañimil? Laʼ laj qʼuel chaʼpʼejl uxpʼejl ticʼojel.

¹⁰ Cʼajtibenla ti oración i coltaya Jehová. Laʼ lac ñaʼtan tiʼ tojlel Manoáh yicʼot i yijñam. Cheʼ bʌ tsiʼ yubi chaʼan miʼ caj i chʼocʼan i yalobil, jiñi Sansón, tsiʼ cʼajtibe Jehová chaʼan miʼ suben bajcheʼ yom miʼ cosan.

11. ¿Chuqui yom miʼ mel jiñi tatʌlob chaʼan miʼ tsajcʌbeñob i melbal jiñi Manoáh, cheʼ bajcheʼ miʼ yʌl Jueces 13:8?

¹¹ Nihad yicʼot Alma, chʼoyoloʼ bʌ ti Bosnia-Herzegovina tsiʼ lajibeyob i melbal Manoáh,  miʼ yʌlob: «Cheʼ bajcheʼ Manoáh, tsaʼ j cʼajtibe lojon ti wocol tʼan jiñi Jehová chaʼan miʼ coltañon lon ti sujtel ti wem bʌ tatʌl yicʼot ñaʼʌl. I cabʌl bajcheʼ tsiʼ jacʼbeyon lojon: Tsiʼ cʼʌñʌ jiñi Biblia, jiñi jun tac, jiñi tempa bʌ yicʼot colem tempa bʌ tac» (pejcan Jueces 13:8).

12. ¿Chuqui wem bʌ ejemplo tsiʼ pʌsbe José yicʼot María jiñi i yalobilob?

¹² Cʌntesañobla ti laʼ melbal. Tatʌlob, muʼ bʌ laʼ suben laʼ walobilob ñucʌch i cʼʌjñibal. Pero tajol mi caj i ñumen coltañob jiñi muʼ bʌ laʼ mel. Miʼ mejlel lac ñop chaʼan José yicʼot María tsiʼ pʌsbeyob wem bʌ i melbal jiñi i yalobilob, yaʼ bʌ an jiñi Jesús jaʼel. José mach cojach tsiʼ chaʼle tsʌts bʌ eʼtel chaʼan miʼ mʌcʼlan i familia, tsaʼʌch i chaʼle wersa chaʼan miʼ coltañob i qʼuelob ti ñuc i chʼujutesʌntel Jehová (Dt. 4:9, 10). «Ti jujumpʼejl jab» miʼ pʌy majlel jiñi i familia yaʼ ti Jerusalén cheʼ tiʼ qʼuiñilel Pascua anquese maʼañic mi wersa al jiñi mandar (Lc. 2:41, 42). Tajol ti jimbʌ ora, yambʌ tatʌlob tsiʼ ñaʼtayob chaʼan wocol chaʼan miʼ luʼ pʌyob majlel i familia, wen ñajt miʼ xʌñob jiñi bij yicʼot yom miʼ cʼʌñob cabʌl taqʼuin. Pero José tsiʼ qʼuele ti ñuc i chaʼan tac bʌ Dios yicʼot tsiʼ cʌntesa i yalobilob chaʼan cheʼʌch miʼ melob jaʼel. Cheʼ jaʼel, jiñi María i wen cʌñʌyʌch jiñi Tsʼijbujel tac. Jiñi i tʼan yicʼot i melbal tsiʼ pʌsbe jiñi i yalobilob i cʼuxbiñob i Tʼan Dios.

13. ¿Chuqui tsiʼ mele jumpʼejl xñujpuñel chaʼan miʼ tsajcʌben i melbal José yicʼot María?

¹³ Nihad yicʼot Alma, tsaʼ bʌ ajli yaʼ ti párrafo 11 tsiʼ chaʼleyob wersa i lajiñob i melbal José yicʼot María chaʼan miʼ mejlel i coltañob i yalobil i cʼuxbin yicʼot i chʼujutesan Jehová. Miʼ yʌlob chuqui tsiʼ meleyob: «Tsaʼ c chaʼle lon wersa chaʼan bajcheʼ chumulon lojon miʼ cʌntesan jiñi lon calobil chaʼan añʌch i wenlel cheʼ mi lac jacʼ jiñi principio tac am bʌ ti Biblia». Nihad miʼ bej al: «Yom mi lac chaʼlen wersa chaʼan jiñoñʌchla jiñi quixtañu la com bʌ miʼ sujtel jiñi la calobil».

14. ¿Chucoch yom miʼ ñaʼtan jiñi tatʌlob majqui i yamigojob jiñi i yalobilob?

¹⁴ Coltan laʼ walobil chaʼan miʼ tajob wem bʌ i yamigojob. Jiñi tatʌl yicʼot ñaʼʌl yom yujilob majqui miʼ ñochtañob jiñi i yalobilob yicʼot chuqui miʼ melob. Cheʼ jaʼel, yom miʼ ñaʼtañob majqui miʼ pejcañob ti Internet, ti celular o ti yan tac bʌ. Jiñi i yamigojob miʼ mejlel i ñijcʌbeñob i pensar yicʼot i melbal (1 Co. 15:33).

15. ¿Chuqui miʼ mejlel i cʌñob jiñi tatʌlob tiʼ tojlel Jessie?

¹⁵ ¿Chuqui miʼ mejlel i melob jiñi tatʌlob mi mach wen yujilobic i chaʼan bʌ computadora, celular o yan tac bʌ? Juntiquil tatʌl ti Filipinas i cʼabaʼ Jessie miʼ yʌl: «Anquese maʼañic mic wen ñaʼtan lojon i chaʼan bʌ tecnología, maʼañic tsaʼ j cʌyʌ lon c suben jiñi lon calobilob jiñi wocol tac mejl bʌ i tajob chaʼan jiñi celular o tableta». Maʼañic tiʼ subeyob chaʼan maʼañix miʼ cʼʌñob come mach yujilic cʼʌñol. Miʼ yʌl: «Tsaʼ c sube jiñi lon calobil chaʼan jiñi celular o tableta miʼ mejlel i cʼʌjñibʌyel chaʼan miʼ ñopob yambʌ tʼan, i chajpañob i bʌ chaʼan jiñi tempa bʌ tac yicʼot chaʼan miʼ pejcañob jiñi Biblia ti jujumpʼejl qʼuin». Tatʌlob, ¿añix ba laʼ pejca yicʼot laʼ wʌlʌ yicʼot laʼ walobilob jiñi wem bʌ ticʼojel tac cheʼ miʼ chojquel majlel mensaje tac yicʼot miʼ letsʌntel foto tac muʼ bʌ lac taj yaʼ ti sección «xColelob» am bʌ ti jw.org^®? ¿Am ba laʼ tsaji la wicʼotob jiñi video ¿Yaʼ jach ba ñoj añet ti celular o ti a tableta? yicʼot Yom tsajilet cheʼ maʼ cʼʌn jiñi Internet? * Ili miʼ mejlel i coltañetla chaʼan mi laʼ cʌntesan laʼ walobilob chaʼan miʼ cʼʌñob ti wen jiñi i celular o tableta (Pr. 13:20).

16. ¿Chuqui an i mele cabʌl tatʌlob yicʼot baqui bʌ wenlel an i tajayob?

 ¹⁶ Cabʌl tatʌlob miʼ chaʼleñob wersa chaʼan jiñi i yalobilob miʼ ñusañob qʼuin yicʼotob jiñi muʼ bʌ i yʌcʼob wem bʌ ejemplo tiʼ melol i yeʼtel Jehová. Cheʼʌch tsiʼ mele Dani yicʼot Bella, jumpʼejl xñujpuñel chʼoyol bʌ ti Costa de Marfil. Ñʌmʌlob i pʌyob cʌytʌl tiʼ yotot jiñi superintendente i chaʼan circuito. Dani miʼ yʌl: «Ili jiñʌch tsaʼ bʌ i colta lon calobil. Tsaʼ ochi bajcheʼ precursor yicʼot wʌle añix bajcheʼ sustituto i chaʼan circuito». Tatʌlob, ¿mejl ba laʼ mel jaʼel iliyi chaʼan mi laʼ coltan laʼ walobilob?

17, 18. ¿Jalaqui yom miʼ tech i cʌntesañob jiñi i yalobilob jiñi tatʌlob?

¹⁷ Techeʼ laʼ cʌntesan laʼ walobil cheʼ alʌlobto. Ñumen wen cheʼ ti ora mi laʼ tech laʼ cʌntesan laʼ walobil (Pr. 22:6). Cheʼʌch tsaʼ ujti tiʼ tojlel jiñi Timoteo, jiñi i ñaʼ i cʼabaʼ Eunice yicʼot i chuchuʼ (coʼ) Loida tsiʼ teche i cʌntesañob i chaʼan bʌ Jehová cʼʌlʌl cheʼ bʌ tsiʼ yila pañimil (2 Ti. 1:5; 3:15). Tsaʼ ñumi i yorajlel i jiñi Timoteo tsaʼ cʼoti ti majlel yicʼot jiñi Pablo baqui tac tsiʼ xʌñʌ.

¹⁸ Yambʌ xñujpuñel chʼoyoloʼ bʌ jaʼel ti Costa de Marfil, jiñi John yicʼot Paula tsiʼ cʌntesayob wʌctiquil i yalobil i cʼuxbiñob Jehová yicʼot i melbeñob i yeʼtel. ¿Chuqui tsiʼ coltayob? Tsiʼ lajibeyob i melbal jiñi Eunice yicʼot Loida. Miʼ yʌlob: «Tsaʼ caji lon cʌntesan chaʼan i Tʼan Dios jiñi lon calobilob cheʼ bʌ wen chutobto» (Dt. 6:6, 7).

19. ¿Bajcheʼ miʼ mejlel i cʌntesan jiñi tatʌlob i yalobilob chaʼan jiñi i Tʼan Dios?

¹⁹ Deuteronomio 6:7 miʼ pʌs bajcheʼ yom miʼ cʌntesan jiñi i yalobilob jiñi tatʌlob tiʼ Tʼan Dios. Yom miʼ ‹chʌcʌ subeñob› chaʼan jiñi i Tʼan Dios, i yaʼ ochem jeʼel cheʼ miʼ cʌybeñob tiʼ pensar. Jin chaʼan, jiñi tatʌlob yom miʼ ñusañob qʼuin ti bele ora yicʼot i yalobilob. Pero an i tajol miʼ mejlel i tajob i chʼijiyemlel cheʼ an chuqui tac yom miʼ chʌcʌ subeñob. Pero jiñi tatʌlob miʼ mejlel i cʼʌñob chaʼan miʼ coltan jiñi i yalobilob i chʼʌmbeñob i sujm i Tʼan Dios yicʼot chaʼan miʼ jacʼob.

20. Tsictesan bajcheʼ miʼ mejlel laj cʼʌn Salmo 127 chaʼan tiʼ cosʌntel alʌlob.

²⁰ Wen cʌñʌla laʼ walobilob. Jiñi Salmo 127 miʼ yʌl chaʼan lajalʌch la calobilob bajcheʼ jiñi i teʼel jalʌjb (pejcan Salmo 127:4). Lajal  bajcheʼ jiñi i teʼel tac jalʌjb mach bʌ junlajalic bajcheʼ melbil yicʼot i tamlel, jiñi alʌlob mach junlajalobic. Jin chaʼan, jiñi tatʌlob yom miʼ ñaʼtañob bajcheʼ mi caj i cosañob ti jujuntiquil jiñi i yalobilob. Jumpʼejl xñujpuñel chʼoyol bʌ ti Israel, tsaʼ bʌ mejliyob i coltan i yalobilob chaʼan miʼ cʼotel i melbeñob i yeʼtel Jehová, miʼ yʌl chuqui tsiʼ meleyob: «Tsaʼ c toxbe lon c bʌ jiñi lon calobilob chaʼan mic pejcan lon jiñi Biblia yicʼotob». Tiʼ sujm, jiñi i jol familia miʼ caj i qʼuel miʼ cʼʌjñibal o mi mejlʌch i melob iliyi.

21. ¿Chuqui coltʌntel ti Jehová miʼ mejlel i pijtan jiñi tatʌlob?

²¹ Jiñi tatʌlob an i tajol miʼ mejlel i yubiñob chaʼan maʼañix chuqui miʼ mejlel i melob come añʌch wocol tac tiʼ cosʌntel alʌlob, pero jumpʼejlʌch majtañʌl tilem bʌ ti Jehová. Yomʌch i coltañetla. Miʼ wen ñʌchʼtan jiñi la woración yicʼot miʼ jacʼbeñetla ti jiñi Biblia, ti jiñi jun tac yicʼot tiʼ melbal yicʼot tiʼ ticʼojel jiñi tatʌlob xñoptʼañoʼ bʌ añix bʌ i cosayob alʌlob.

22. ¿Chuqui tac miʼ mejlel i ñumen aqʼueñob i yalobilob jiñi tatʌlob?

²² Chaʼtiquil uxtiquil quixtañujob miʼ yʌlob chaʼan ti 20 jab miʼ cosʌntel juntiquil alʌl, pero tiʼ sujm, mach yaʼ jach cʌylem yaʼi. Mejl bʌ i ñumen aqʼueñob i yalobilob jiñi tatʌlob jiñʌch jiñi i cʼuxbiya, i yorajlel añoʼ bʌ i chaʼan yicʼot i cʌntesʌntel i chaʼan bʌ Biblia. Mach lajal bajcheʼ mi caj i jacʼob i cʌntesʌntel jujuntiquil la calobil. Pero cabʌl am bʌ cosʌntiyob ti tatʌl yicʼot ñaʼʌl muʼ bʌ i cʼuxbiñob Jehová, cheʼ miʼ yubiñob i bʌ bajcheʼ Anna, juntiquil hermana chʼoyol bʌ ti Asia miʼ yʌl: «Cheʼ mic ñaʼtan jiñi cʌntesʌntel tsaʼ bʌ i yʌqʼueñon jiñi c tat c ña, mi cʌqʼueñob wocolix i yʌlʌ chaʼan tsiʼ tiqʼuiyoñob yicʼot tiʼ cʌntesayoñob j cʼuxbin Jehová. Mach cojach tsiʼ yʌqʼueyoñob quilan pañimil, tsiʼ yʌqʼueyoñob j cuxtʌlel añʌch bʌ i sujmlel» (Pr. 23:24, 25). Yonlel i wiñicob Jehová cheʼʌch miʼ cʼotel i yʌlob jaʼel.