Jiñi Deuteronomio 22:25-27 mach jiñic miʼ ñoj taj ti tʼan chaʼan yom miʼ ñaʼtʌntel mi jiñi wiñic añʌch i mul o maʼañic come tsiquil chaʼan tsaʼʌch i ticʼla jiñi xʼixic. Jiñi yom bʌ jiñi mandar jiñʌch cheʼ miʼ ñaʼtʌntel mi añʌch i mul jiñi xʼixic o maʼañic. Pero laʼ lac ñumen tsajin.

Jiñi Deuteronomio 22:23, 24 miʼ yʌl tiʼ tojlel juntiquil wiñic tsaʼ bʌ i piʼle yaʼ ti «tejclum» juntiquil xʼixic cʼajtibilix bʌ i chaʼan wiñic. Come ti wajali jiñi xʼixic cʼajtibilix bʌ mi qʼuejlel bajcheʼ ñujpuñemix, jiñi wiñic miʼ mel tsʼiʼlel ¿Chuqui miʼ yujtel tiʼ tojlel jiñi xʼixic? «Maʼanic tsiʼ chaʼle oñel». Mi tsaʼic i chaʼle oñel, tsaʼʌch ubinti yicʼot tsaʼ coltʌnti. Pero come maʼañic, jin chaʼan tsaʼʌch i chaʼle tsʼiʼlel jaʼel. I tiʼ chaʼticlelob añob i mul.

Pero jiñi xʼixic muʼ bʌ i yʌl Deuteronomio 22:25-27, qʼuexelʌch chuqui tsiʼ mele, miʼ yʌl: «Mi tsiʼ wersa piʼle xchʼoc [cʼajtibilix bʌ] juntiquil winic cheʼ an ti cholel, wersa yom miʼ chʌmel jini winic, come tsiʼ ticʼla jini xchʼoc. Pero jini xchʼoc maʼanic chuqui mi caj laʼ tumben, come maʼanic i mul chaʼan miʼ chʌmel, come lajal tsiʼ yubi i ticʼlʌntel cheʼ bajcheʼ juntiquil muʼ bʌ i tsʌnsʌntel cheʼ maʼanic i mul. Come jini winic tsiʼ taja yaʼ ti cholel. Jini xchʼoc tsiʼ chaʼle oñel pero maʼanic majch tsiʼ yubibe i yoñel chaʼan miʼ coltan».

Mi cheʼʌch miʼ yujtel bajcheʼ iliyi, jiñi juezob miʼ ñopbeñob i tʼan jiñi xʼixic. Miʼ mejlel i yʌlob chaʼan «tsiʼ chaʼle oñel pero maʼanic majch tsiʼ yubibe i yoñel chaʼan miʼ coltan». Jin chaʼan, maʼañic tsiʼ chaʼle tsʼiʼlel. Pero jiñi wiñic jiñʌch i mul miʼ cʼotel chaʼan tsiʼ ticʼla yicʼot tsiʼ mele tsʼiʼlel come «tsiʼ wersa piʼle» jiñi xʼixic.

Jin chaʼan, anquese jiñi mandar miʼ ñoj taj ti tʼan cheʼ yom miʼ ñaʼtʌntel mi añʌch i mul jiñi xʼixic o maʼañic, jiñi relato miʼ wen aqʼuen i sujmlel cheʼ jiñi wiñic añʌch i mul chaʼan tsiʼ ticʼla jiñi xʼixic yicʼot tsiʼ mele tsʼiʼlel. Miʼ mejlel lac ñop chaʼan jiñi juezob tsiʼ wen cʼajtiyob, tiʼ tsajiyob chuqui tsaʼ ujti yicʼot tsiʼ ñaʼtayob chuqui mi caj i melob cheʼ bajcheʼ tsaʼ subentiyob ti Dios chaʼyajl uxyajl (Éx. 20:14; Dt. 13:14; 17:4).