1. ¿Bajcheʼ yilal miʼ qʼuelob jiñi eʼtel yonlel wiñicob xʼixicob?

¿BAJCHEʼ yilal miʼ qʼuelob jiñi eʼtel (troñel) yonlel lac piʼʌlob yaʼ baqui chumulonla? Ti cabʌl país, jiñi wiñicob xʼixicob (quixtañujob) miʼ wen chaʼleñob eʼtel. Jin chaʼan, maʼañix miʼ yʌqʼueñob i yorajlel chaʼan miʼ cʼajob i yoj, miʼ yajñelob yicʼot i familia o chaʼan miʼ ñaʼtañob i chaʼan bʌ Dios (Ec. 2:23). Pero an yambʌ lac piʼʌlob maʼañic bʌ miʼ mulañob eʼtel yicʼot miʼ sʌclañob i tʼan chaʼan maʼañic miʼ melob (Pr. 26:13, 14).

2, 3. ¿Chuqui ti ejemplo miʼ pʌsbeñonla Jehová yicʼot Jesús chaʼan jiñi eʼtel?

² Ili melbal (chaʼlebal) tac mach weñic. Pero ¿bajcheʼ miʼ qʼuel Jehová yicʼot Jesús jiñi eʼtel? Tiʼ sujm, Jehová miʼ wen mulan eʼtel. Jesús tsiʼ yʌlʌ: «Cʼʌlʌl wʌle miʼ chaʼlen eʼtel c Tat. Joñon jaʼel mic chaʼlen eʼtel» (Jn. 5:17). Laʼcu lac ñaʼtan chaʼan tsiʼ mele (pʌtʌ) yonlel ángelob yicʼot pejtelel chuqui an ti panchan, i cheʼ jaʼel, pejtelel chuqui tsiʼ mele ila ti Lum baqui chumulonla. Jin chaʼan, jiñi salmista tsiʼ yʌlʌ: «C Yum, cabʌl jax a melbal. Ti a ñaʼtʌbal tsaʼix a mele tiʼ pejtelel. Tiʼ pejtelel pañimil tsiquil jini wen tac bʌ tsaʼ bʌ a melbeyon lojon» (Sal. 104:24).

³ Jesús tiʼ tsajcʌbe i melbal i Tat. Tsiʼ colta cheʼ bʌ «tsiʼ mele jini panchan» i tsaʼ tem ajñi yicʼot bajcheʼ juntiquil wem bʌ xʼeʼtel (Pr. 8:27-31). Tiʼ wiʼil, cheʼ tsajñi ila ti Lum, tsiʼ mele utsʼatax bʌ eʼtel. Tsiʼ qʼuele bajcheʼ i bʌl ñʌcʼ, i pejtelel chuqui tsiʼ mele tsiʼ pʌsʌ chaʼan Dios tsiʼ choco tilel (Jn. 4:34; 5:36; 14:10).

4. ¿Chuqui mi laj cʌn tiʼ tojlel Jehová yicʼot Jesús chaʼan jiñi cʼaj o?

 ⁴ ¿Yom ba i yʌl ili ejemplo tac i chaʼan Jehová yicʼot Jesús chaʼan mach i cʼʌjñibalic mi laj cʼaj la co? Maʼañic. Jehová maʼañic baʼ ora miʼ lujbʼan, jin chaʼan mach i cʼʌjñibalic miʼ cʼaj i yo bajcheʼ joñonla. Pero jiñi Biblia miʼ yʌl chaʼan cheʼ bʌ tsaʼix ‹ujti i mel› jiñi panchan yicʼot Lum, ‹tsiʼ cʼaja i yo› (Éx. 31:17). Ili tʼan tajol yom i yʌl chaʼan tsiʼ cʌyʌ i mel chuqui tac an i tsiʼ yʌqʼue i yorajlel chaʼan miʼ qʼuel jiñi tsaʼ bʌ i mele. I jiñi Jesús, anquese tsiʼ wen chaʼle eʼtel cheʼ bʌ tsajñi ila ti Lum, tsaʼʌch i yʌqʼue i yorajlel chaʼan miʼ cʼaj i yo i miʼ ñusan i bʌ ti uchʼel yicʼot i yamigojob (Mt. 14:13; Lc. 7:34).

5. ¿Chuqui wocol bʌ miʼ yubin cabʌl i wiñicob Dios?

⁵ Jiñi Biblia miʼ yʌl chaʼan jiñi wiñiconbʌla Dios yom mi lac chaʼlen eʼtel, i chaʼan mach yom tsʼuʼbonla (Pr. 15:19). Tajol mi lac chaʼlen eʼtel chaʼan mi lac mʌcʼlan lac familia. I tiʼ pejtelel jiñi xñoptʼañonbʌla yom mi lac sub jiñi wen tʼan. Pero i cʼʌjñibalʌch lac chaʼan cheʼ wen mi laj cʼaj laj co. ¿Wocol ba mi la cubin chaʼan wen jach miʼ la cʌqʼuen i yorajlel jiñi eʼtel, jiñi subtʼan yicʼot jiñi cʼaj o? ¿Bajcheʼ mi lac ñaʼtan jaypʼejl i yorajlel yom mi la cʌqʼuen jiñi eʼtel yicʼot cʼaj o?

6. ¿Bajcheʼ miʼ pʌs Marcos 6:30-34 chaʼan pʼisbil jach miʼ qʼuel Jesús jiñi eʼtel yicʼot cʼaj o?

⁶ Ñucʌch i cʼʌjñibal cheʼ pʼisbil jach mi laj qʼuel jiñi eʼtel. Jiñi rey Salomón tiʼ tsʼijbu chaʼan «tiʼ pejtelel chuqui mi lac mel añʌch i yorajlel», chaʼan mi lac chaʼlen pacʼ, mi lac mel la cotot, mi lac chaʼlen uqʼuel, tseʼñal yicʼot son (Ec. 3:1-8). Tiʼ sujm, jiñi eʼtel yicʼot jiñi cʼaj o jiñʌch chaʼchajp ñuc bʌ i cʼʌjñibal lac chaʼan. Ili chaʼchajp, pʼisbil jach tsiʼ qʼuele Jesús. Ti jumpʼejl bʌ qʼuin, cheʼ bʌ jiñi xcʌntʼañob i chaʼan tsaʼ sujtiyob baqui tsaʼ tsajñiyob ti subtʼan i «maʼanic tsiʼ tajbeyob i qʼuiñilel chaʼan miʼ chaʼleñob weʼel», Jesús tiʼ subeyob: «Conla ti lac bajñelil ti jochol bʌ lum chaʼan mi laj cʼaj la co tsʼitaʼ» (pejcan Marcos 6:30-34). Jesús yicʼot jiñi xcʌntʼañob i chaʼan maʼañic tsiʼ wen cʼajayob i yoj bajcheʼ yomob. Pero Jesús yujil chaʼan i cʼʌjñibalʌch miʼ cajob i yoj.

7. ¿Bajcheʼ mi caj i coltañonla cheʼ mi lac pejcan jiñi mandar chaʼan cʼaj o?

⁷ An i tajol i cʼʌjñibalʌch mi lac tsʼitaʼ cʼaj la co o mi laj qʼuex chuqui mi lac mel. Jiñʌch muʼ bʌ i pʌs jumpʼejl mandar tsaʼ bʌ i yʌqʼue Jehová jiñi israelitajob ti jiñi i Mandar Moisés: Yomʌch miʼ cʼajob i yo ti jujumpʼejl semana cheʼ ti sábado. Joñonla maʼañoñixla tiʼ Mandar Moisés, pero mucʼʌch lac tajben i wenlel cheʼ mi lac pejcan chuqui miʼ yʌl chaʼan jiñi cʼaj o. Muʼ bʌ caj laj cʌn mi caj i coltañonla lac tsajin bajcheʼ yilal mi laj qʼuel jiñi eʼtel yicʼot cʼaj o.

8. Cheʼ bajcheʼ miʼ yʌl Éxodo 31:12-15, ¿chuqui yom miʼ melob jiñi israelitajob tiʼ yorajlel cʼaj o cheʼ ti sábado?

⁸ Jiñi i Tʼan Dios miʼ yʌl chaʼan cheʼ bʌ tsaʼ ñumi wʌcpʼejl «qʼuin» Jehová tsiʼ cʌyʌ i mel chuqui tac an ila ti Lum (Gn. 2:2). Pero Jehová miʼ wen mulan eʼtel i añʌch chuqui woli (choncol) i bej mel ili ora (Jn. 5:17). Jiñi mandar chaʼan cʼaj o lajal bajcheʼ muʼ bʌ i yʌjlel ti Génesis, yom i yʌl, cheʼ wʌcpʼejl qʼuin miʼ mejlel eʼtel i miʼ yujtel cʼaj o cheʼ tiʼ wucpʼejlel qʼuin. Dios tsiʼ yʌlʌ chaʼan jiñi cʼaj o jiñʌch jumpʼejl señal chaʼan bajcheʼ mi caj i yajñel yicʼot jiñi israelitajob. Tsʼʌcʌl jumpʼejl qʼuin yom miʼ cʼajob i yoj come ‹chʼujutesʌbil  i chaʼan› Jehová (pejcan Éxodo 31:12-15). Ti jiñi qʼuin maʼañic majqui miʼ chaʼlen eʼtel, mi jiñic alobob, xyaj eʼtelob mi jiñicto i yʌlacʼob (Éx. 20:10). Ili tsiʼ colta jiñi israelitajob chaʼan miʼ ñumen qʼuelob i chaʼan tac bʌ Dios.

9. ¿Chuqui jiñi mach bʌ weñic miʼ ñaʼtʌntel chaʼan jiñi cʼaj o cheʼ tiʼ yorajlel Jesús?

⁹ Jiñi i yorajlel cʼaj o jiñʌch wem bʌ chaʼan i wiñicob Dios ti wajali. Pero cabʌl muʼ bʌ i ñaxan acʼob i bʌ ti ñopbalʌl tac cheʼ tiʼ yorajlel Jesús, tsiʼ waʼchocoyob tsʌts bʌ mandar chaʼan bajcheʼ yom miʼ tsʼʌctesañob. Miʼ yʌlob chaʼan maʼañic miʼ mejlel i tucʼbeñob i wut jam mi muqʼuic i cʼoqʼuesañob juntiquil cʼam bʌ (Mr. 2:23-27; 3:2-5). Ili mach jiñic yom bʌ Jehová, i Jesús cheʼʌch tsiʼ jamʌ tsictesa tiʼ tojlel jiñi tsaʼ bʌ i ñʌchʼtayob.

10. ¿Chuqui miʼ cʌntesañonla Mateo 12:9-12 chaʼan bajcheʼ yilal tsiʼ qʼuele Jesús jiñi cʼaj o cheʼ ti sábado?

¹⁰ Jesús yicʼot jiñi judíojob muʼ bʌ i tsajcañob miʼ cʼajob i yoj ti sábado come miʼ jacʼob jiñi Mandar i chaʼan Moisés. * Pero Jesús cabʌl chuqui tsiʼ yʌlʌ yicʼot tsiʼ mele chaʼan miʼ yʌc ti ñaʼtʌntel chaʼan mach mulilic cheʼ an chuqui wen tac miʼ melob cheʼ ti sábado. Jamʌ tsiquil tsiʼ yʌlʌ: «Mach ticʼbilic ti mandar i melol chuqui utsʼat tiʼ yorajlel cʼaj o» (pejcan Mateo 12:9-12). Maʼañic tsiʼ qʼuele chaʼan woli (yʌquel) i ñusan tiʼ pʼis jiñi mandar chaʼan bʌ cʼaj o cheʼ an chuqui wen miʼ mejlel. Jiñi tsaʼ bʌ i mele Jesús tsiʼ pʌsʌ  ñuc bʌ i sujmlel chaʼan chucoch mach yomic miʼ mejlel eʼtel ti jiñi bʌ qʼuin. Come jiñi israelitajob miʼ cʼajob i yoj chaʼan i yeʼtelob, miʼ mejlel i melob i chaʼan tac bʌ Dios. Jiñi i familia Jesús miʼ cʼʌn jiñi qʼuin chaʼan bʌ cʼaj o chaʼan miʼ chʼujutesan Dios. Ili miʼ cʼotel lac ñaʼtan cheʼ mi lac pejcan tsaʼ bʌ i mele Jesús yaʼ ti tejclum Nazaret. Jiñi Biblia miʼ yʌl: «Tsaʼ majli Jesús yaʼ ti Nazaret baʼ tsaʼ coli. Tsaʼ ochi ti sinagoga tiʼ qʼuiñilel cʼaj o cheʼ bajcheʼ i tilel. Tsaʼ waʼle chaʼan miʼ qʼuel jun» (Lc. 4:15-19).

11. ¿Majqui tiʼ tojlel tsiʼ cʌñʌ Jesús jiñi tsʌts bʌ eʼtel?

¹¹ Miʼ mejlel lac ñaʼtan chaʼan José cheʼ woliʼ cʌntesan ti jucʼteʼ jiñi Jesús, jiñi i majan yalobil, tsiʼ cʌntesa chaʼan bajcheʼ miʼ qʼuel Dios jiñi eʼtel (Mt. 13:55, 56). I jiñi Jesús tajol tsiʼ qʼuele chaʼan José miʼ wen chaʼlen eʼtel ti jujumpʼejl qʼuin chaʼan miʼ mʌcʼlan i familia. Cheʼ ñumeñix ora, tiʼ sube jiñi xcʌntʼañob i chaʼan: «Utsʼat miʼ yʌqʼuentelob i tojol xʼeʼtelob» (Lc. 10:7). Jin chaʼan, Jesús yujilʌch chuquiyes cheʼ mi lac chaʼlen tsʌts bʌ eʼtel.

12. ¿Baqui bʌ texto tac miʼ pʌs chaʼan bajcheʼ yilal tsiʼ qʼuele Pablo jiñi tsʌts bʌ eʼtel?

¹² Jiñi apóstol Pablo yujil jaʼel chuquiyes jiñi tsʌts bʌ eʼtel. Tsiʼ yʌqʼue i yorajlel chaʼan miʼ sub jiñi wen tʼan chaʼan i cʼabaʼ Jesús yicʼot tsaʼ bʌ i cʌntesa. Pero tsaʼʌch i chaʼle eʼtel chaʼan miʼ mʌcʼlan i bʌ. Jiñi añoʼ bʌ ti Tesalónica yujilob chaʼan tsaʼʌch i chaʼle «eʼtel ti qʼuiñil yicʼot ti acʼʌlel chaʼan maʼanic miʼ cʼojyel» i mʌcʼlañob (2 Ts. 3:8; Hch. 20:34, 35). Jiñi tsaʼ bʌ i yʌlʌ, tajol tsiʼ taja ti tʼan tsaʼ bʌ i mele ti Corinto. Yaʼi tsaʼ jijli tiʼ yotot Áquila yicʼot Priscila i «temel tsiʼ chaʼleyob eʼtel come xmel pisil bʌ ototob». Cheʼ miʼ yʌl chaʼan tsiʼ chaʼle eʼtel «ti qʼuiñil yicʼot ti acʼʌlel» mach yomic i yʌl chaʼan maʼañic tsiʼ cʼaja i yo. Jumpʼejl ejemplo, ti jujumpʼejl sábado tiʼ sube wen tʼan jiñi judíojob, maʼañic bʌ miʼ chaʼleñob eʼtel jaʼel ti jiñi qʼuin (Hch. 13:14-16, 42-44; 16:13; 18:1-4).

13. ¿Chuqui miʼ mejlel laj cʌn tiʼ tojlel Pablo?

¹³ Jiñi apóstol Pablo tsiʼ yʌcʼʌ wem bʌ ejemplo. Anquese tsiʼ chaʼle eʼtel, tsiʼ ñaʼta chaʼan ti bele ora miʼ sub jiñi «i wen tʼan Dios» (Ro. 15:16; 2 Co. 11:23). Tiʼ sube yambʌlob chaʼan cheʼʌch miʼ melob jaʼel. Áquila yicʼot Priscila ‹tsiʼ chaʼleyob eʼtel yicʼot ti Cristo Jesús› (Ro. 12:11; 16:3). Pablo tiʼ sube jiñi añoʼ bʌ ti Corinto ili ticʼojel: «Yom bʌxetla cheʼ mi laʼ chaʼliben i yeʼtel lac Yum» (1 Co. 15:58; 2 Co. 9:8). Yicʼot tiʼ tsʼijbu: «Mi an majqui mach yomic eʼtel, mach i toʼol cʼux waj» (2 Ts. 3:10).

14. ¿Chuqui tsiʼ yʌcʼʌ ti ñaʼtʌntel Jesús ti Juan 14:12?

¹⁴ Jiñi ñuc bʌ eʼtel ti ili cojix bʌ qʼuin tac jiñʌch cheʼ mi lac sub jiñi wen tʼan yicʼot mi lac sutqʼuin ti xcʌntʼan yambʌlob. Jesús tsiʼ wʌn alʌ chaʼan jiñi xcʌntʼañob i chaʼan ñumen ñuc chuqui mi caj i melob (pejcan Juan 14:12). Ili mach yomic i yʌl chaʼan mi caj i melob milagro tac cheʼ bajcheʼ tsiʼ mele, yom bʌ i yʌl jiñʌch chaʼan mi caj i ñumen chaʼleñob subtʼan yicʼot cʌntesa ti yan tac bʌ tejclum yicʼot ñumen jal mi caj i melob.

15. ¿Chuqui ti cʼajtiya tac yom mi lac melben lac bʌ, i chucoch?

¹⁵ Mi an jumpʼejl la queʼtel, laʼ laj cʼajtiben lac bʌ: «¿Cʌmbilon ba bajcheʼ juntiquil wem bʌ xʼeʼtel? ¿Muʼ ba cujtesan jiñi queʼtel tiʼ yorajlel i mic mel ti wen?». Mi cheʼʌchi, tajol jiñi lac yum ti eʼtel miʼ ñop chaʼan weñʌch chuqui mi lac mel i chaʼan jiñi lac piʼʌlob ti eʼtel mi caj i mulañob i ñʌchʼtan jiñi wen tʼan. Cheʼ jaʼel, cheʼ mi lac sub jiñi wen tʼan yicʼot mi lac sutqʼuin ti xcʌntʼan yambʌlob, laʼ laj cʼajtiben lac bʌ: «¿Muʼ ba j cʌjñel bajcheʼ juntiquil muʼ bʌ i wen chaʼlen wersa i sub jiñi wen tʼan? ¿Wen ba mic chajpan c bʌ cheʼ an majqui mi caj  c chaʼ majlel c julaʼtan? ¿Muʼ ba c chaʼ majlel c julaʼtan ti ora jiñi yomoʼ bʌ i cʌn i chaʼan bʌ Biblia? Yicʼot ¿muʼ ba c wen acʼ j coltaya ti jiñi eʼtel tac ochem bʌ chaʼan subtʼan?». Mi mucʼʌch la cʌl chaʼan cheʼʌchi, tajol yom i yʌl chaʼan mi lac ñusan lac bʌ ti jiñi eʼtel.

16. ¿Chucoch mach lajalic bajcheʼ miʼ qʼuelob ili ora jiñi cʼaj o jiñi quixtañujob cheʼ bajcheʼ tsiʼ qʼuele Jesús yicʼot jiñi xcʌntʼañob i chaʼan?

¹⁶ Jesús yujil chaʼan i cʼʌjñibal i chaʼan yicʼot jiñi xcʌntʼañob cheʼ miʼ cʼajob i yoj. Pero ti jimbʌ ora, lajal bajcheʼ ili qʼuin, cheʼob i pensar jiñi quixtañujob cheʼ bajcheʼ jiñi wiñic am bʌ cabʌl i taqʼuin tsaʼ bʌ i taja ti tʼan Jesús. Ili wiñic miʼ yʌl: «Laʼ j cʼaj co. Laʼ j cʼux c waj. Laʼ c jap chuqui com. Laʼ cubin i tijicñʌyel c pusicʼal» (Lc. 12:19; 2 Ti. 3:4). Ñuc bʌ i cʼʌjñibal i chaʼan jiñi wiñic jiñʌch jiñi cʼaj o yicʼot cheʼ miʼ ñusan i bʌ tiʼ chaʼan tac bʌ pañimil. Pero Jesús yicʼot jiñi xcʌntʼañob i chaʼan maʼañic tsiʼ yʌcʼʌyob tiʼ jol i ñusañob i bʌ tiʼ chaʼan tac bʌ ili pañimil.

17. ¿Chuqui mi lac mel cheʼ jochol laj qʼuin?

¹⁷ Mi lac ñop lac lajin Jesús cheʼ mi laj cʼʌn jiñi jochol bʌ qʼuin lac chaʼan mach chaʼañic jach mi la cʼaj la co, chaʼañʌch mi lac chaʼlen subtʼan yicʼot mi lac majlel ti tempa bʌ tac. Jiñʌch ñuc bʌ i cʼʌjñibal lac chaʼan ili chaʼchajp, jin chaʼan mi lac chaʼlen wersa lac mel ti bele ora (He. 10:24, 25). Cheʼto jaʼel, cheʼ mi lac majlel ti vacación mi lac majlel ti tempa bʌ mach yʌlʌlic baqui añonla yicʼot mi lac sʌclʌben i yorajlel chaʼan mi lac suben wen tʼan jiñi quixtañujob ti baqui jach mi lac tajob (2 Ti. 4:2).

18. ¿Chuqui yom jiñi lac Rey Jesucristo chaʼan mi lac mel?

¹⁸ Mi lac wen aqʼuen wocolix i yʌlʌ jiñi lac Rey Jesucristo cheʼ miʼ chʼʌmben i sujm i cʼʌjñibal bʌ lac chaʼan yicʼot cheʼ miʼ coltañonla chaʼan wen jach mi laj qʼuel jiñi eʼtel yicʼot cʼaj o (He. 4:15). Yom chaʼan wen mi laj cʼaj la co. Cheʼ jaʼel, yom chaʼan mi lac chaʼlen tsʌts bʌ eʼtel chaʼan mi lac mʌcʼlan lac bʌ yicʼot mi lac chaʼlen wersa chaʼan mi lac sujtesan ti xcʌntʼan yambʌlob. Ti jiñi yambʌ temaj mi caj laj qʼuel chuqui an i mele Jesús chaʼan miʼ yʌcʼonla ti libre.