An ti lac wenta chaʼan mi lac mel chuqui wem bʌ
Mi weñʌch chuqui mi lac mel mi caj i yʌqʼueñonla lac tijicñʌyel. Jehová yujil jiñi, jin chaʼan yom chaʼan mi lac jacʼben i mandar.
Jehová yom chaʼan tijicñayonla yicʼot an lac ñʌchʼtʌlel.
«Joñon a Yumon, a Dioson muʼ bʌ j cʌntesañet chaʼan maʼ taj chuqui wen. Joñon mic tojʼesañet ti a bijlel baʼ yom maʼ chaʼlen xʌmbal. Tsaʼic a jacʼʌ c mandar, cabʌlix i ñʌchʼtilel a pusicʼal cheʼ bajcheʼ colem jaʼ woli bʌ ti ajñel. Añʌch toj bʌ a pusicʼal yicʼot cabʌl a pʼʌtʌlel cheʼ bajcheʼ wetsʼecña bʌ jaʼ» (Isaías 48:17, 18).
Jehová jiñʌch tsaʼ bʌ i meleyonla, jin chaʼan yujilʌch bajcheʼ ñumen wen mi lac mejlel ti chumtʌl. Yom chaʼan mi lac jacʼben i mandar come jiñʌch ñumen wem bʌ chaʼañonla. Mi mucʼʌch lac mel, mi caj lac tajben i wenlel. I chuqui muʼ bʌ lac mel mi caj i yʌqʼueñonla lac tijicñʌyel yicʼot lac ñʌchʼtʌlel.
Jehová maʼañic miʼ subeñonla lac mel mach bʌ mejlic lac tsʼʌctesan.
«Come ili mandar woli bʌ c subeñet wʌle mach wocolic ti jacʼol. Mach ñajtic an» (Deuteronomio 30:11).
Chaʼan mi lac jacʼben i mandar Dios, tajol yom mi laj qʼuextan lac ñaʼtʌbal yicʼot lac melbal. Pero Jehová mach wocolic muʼ bʌ i subeñonla lac mel. Yujil chaʼan pʼisbil jach chuqui miʼ mejlel lac mel. I cheʼ lac wen cʌñʌyix mi caj laj qʼuel chaʼan «jiñi i mandar tac mach wocolic ti jacʼol» (1 Juan 5:3).
Jehová miʼ yʌl chaʼan mi caj i coltan jiñi muʼ bʌ i jacʼben i mandar.
«Joñon a Yumon, a Dioson. Mi caj c chuquet ti ñoj bʌ a cʼʌb. Mach a chaʼlen bʌqʼuen, come mi caj j coltañet» (Isaías 41:13).
Mucʼʌch i mejlel lac jacʼben i mandar Dios come jiñʌch muʼ bʌ i coltañonla. Miʼ cʼʌn jiñi Biblia chaʼan miʼ ñuqʼuesan lac pusicʼal yicʼot miʼ yʌqʼueñonla lac pijtaya.
Yonlel lac piʼʌlob an i qʼueleyob chaʼan jiñi Biblia mucʼʌch i coltañonla. ¿Muʼ baʼ mulan a cʌn jaʼel? Miʼ mejlel a tech yicʼot jiñi folleto Ubin a tijicñʌyel. Mach tojbilic i miʼ mejlel a taj ti jw.org. Miʼ chʼʌm tilel uxpʼejl cʌntesʌntel:
-
«¿Bajcheʼ miʼ mejlel i coltañet jiñi Biblia?».
-
«Jiñi Biblia miʼ yʌqʼueñonla lac pijtaya».
-
«¿Muʼ ba mejlel lac ñop muʼ bʌ i yʌl jiñi Biblia?».
Cheʼ maʼ ñumen cʌn jiñi i Tʼan Dios, mi caj a qʼuel chaʼan jiñi ticʼojel tac muʼ bʌ i chʼʌm tilel mucʼʌch i bej coltañonla ili ora (Salmo 111:8). Cheʼ mi lac jacʼ jiñi ticʼojel tac jiñʌch ñumen wem bʌ. Pero Dios maʼañic miʼ wersa xicʼonla chaʼan mi lac jacʼben i tʼan (Deuteronomio 30:19, 20; Josué 24:15). Añix ti lac wenta mi mucʼʌch lac jacʼ o maʼañic.
