¿Bajcheʼ miʼ chʼʌmob i decisión jiñi lac piʼʌlob?
Lʌcʼʌ tiʼ pejtelel lac piʼʌlob i cʌñʌyob chuqui jiñi wem bʌ yicʼot mach bʌ weñic. Mach weñic miʼ qʼuelob cheʼ miʼ yujtel violación tac, tsʌnsa yicʼot cheʼ miʼ ticʼlʌntel jiñi wolito (choncolto) bʌ i colelob. Pero weñʌch miʼ qʼuelob cheʼ an muʼ bʌ pʌsob i yutslel, muʼ bʌ i mulan i coltan yañoʼ bʌ o muʼ bʌ i chaʼleñob wersa chaʼan miʼ mejlel chuqui wem bʌ. Pero ¿bajcheʼ yilal miʼ qʼuelob jiñi chaʼan tac bʌ piʼleya, i cosʌntel i yalobilob yicʼot cheʼ miʼ chaʼleñob lot? An muʼ bʌ i yʌlob chaʼan laj wen jach chuqui miʼ mejlel. Jin chaʼan, an muʼ bʌ i chʼʌmob i decisión tac ti chuqui wem bʌ miʼ lon ñaʼtañob o miʼ jacʼob chuqui miʼ yʌl yambʌlob. Pero ¿wem ba cheʼ miʼ melob tiʼ pejtelel ora bajcheʼ ili?
AN MUʼ BɅ I ÑAʼTAÑOB CHAʼAN WEÑɅCH MUʼ BɅ I MELOB
Lʌcʼʌ tiʼ pejtelel ora cheʼ bʌ mi lac chʼʌm jumpʼejl decisión, mi lac jacʼ chuqui miʼ yʌl jiñi laj conciencia come jin muʼ bʌ i subeñonla chuqui jiñi wem bʌ yicʼot mach bʌ weñic (Romanos 2:14, 15). Jinto jaʼel jiñi wolito (yʌquelto) bʌ i colelob miʼ cʌñob cheʼ bʌ an chuqui mach bʌ weñic miʼ mejlel i an i mul miʼ yubiñob cheʼ miʼ melob mach bʌ weñic. I cheʼ mi laj colel majlel mi laj cʌn chuqui jiñi wem bʌ yicʼot mach bʌ weñic ti chuqui mi laj qʼuel ti lac familia, ti lac piʼʌlob, ti jiñi maestrojob, ti lac ñopbal o ti laj cultura. I cheʼ bʌ mi lac chʼʌm lac decisión, jiñi laj conciencia mi caj i subeñonla mi weñʌch o mach weñic tsaʼ bʌ lac yajca lac mel.
Cheʼ la cujilix chuqui jiñi wem bʌ yicʼot mach bʌ weñic mi caj i coltañonla lac pʌs la cutslel, lac chʼʌmben i sujm yañoʼ bʌ, mi la cʌqʼuen wocolix i yʌlʌyob yicʼot tojonla. Cheʼ jaʼel, mi caj i coltañonla chaʼan maʼañic mi lac mel muʼ bʌ i mejlel i yʌqʼuen i chʼijyemlel lac familia, la camigojob o miʼ yʌcʼonla ti quisin o an lac mul mi la cubin.
¿Wem ba mi caj i loqʼuel pejtelel chuqui mi lac bajñel ñaʼtan lac mel? Garrick, cheʼ bʌ xcolelto, tsiʼ bajñel ñaʼta i mel chuqui jach yom. Pero ti wiʼil, tsiʼ qʼuele chaʼan mach weñic jiñi, come tsaʼ caji i mel mach tac bʌ weñic, bajcheʼ jiñi tsʼiʼlel,
i cʼʌn droga tac, i tsaʼix caji i wen jap lembal yicʼot wen jontol (simaron) tsaʼ sujti.WEM BɅ MIʼ QʼUEL YAÑOʼ BɅ
Cheʼ an chuqui la com lac mel, an i tajol mi lac chʼʌm ti ñuc chuqui miʼ ñaʼtan yañoʼ bʌ i mach cojach mi lac jacʼ muʼ bʌ i yʌl laj conciencia. I cheʼ mi lac mel bajcheʼ jiñi, miʼ mejlel laj cʌn chuqui ñusʌbil bʌ i chaʼañob yicʼot i ñaʼtʌbalob. Cheʼ bʌ mi lac mel chuqui miʼ subeñonla lac familia, la camigojob yicʼot jiñi lac piʼʌlob, miʼ qʼueloñobla ti ñuc.
¿Wem ba cheʼ mi lac mel tiʼ pejtelel ora chuqui miʼ yʌl yañoʼ bʌ? Priscila, cheʼ bʌ xcolelto, tsiʼ mele chuqui miʼ mel i yamigojob. Jiñi i yamigojob mach lecojic miʼ qʼuelob cheʼ miʼ chaʼleñob piʼleya cheʼ maxto ñujpuñemobic. Pero wiʼilto tsiʼ cʌñʌ chaʼan maʼañic miʼ yʌqʼuen i tijicñʌyel cheʼ miʼ mel muʼ bʌ i mel i yamigojob. Priscila miʼ yʌl: «Cheʼ tsaʼ caji c mel muʼ bʌ i mel yañoʼ bʌ maʼañic tsiʼ yʌqʼueyon c tijicñʌyel, mach weñic chuqui tsaʼ caji c mel i tsaʼ cʌcʼʌ ti wocol j cuxtʌlel».
¿AM BA CHUQUI MIʼ MEJLEL I COLTAÑONLA CHAʼAN MI LAC MEL CHUQUI WEM BɅ?
Cheʼ com lac mel chuqui wem bʌ, weñʌch cheʼ mi lac chʼʌm ti ñuc chuqui mi lac ñaʼtan yicʼot chuqui miʼ ñaʼtan yañoʼ bʌ. Pero mi jin jach mi lac chʼʌm ti ñuc jiñi, mach tiʼ pejtelelic ora wen mi caj i loqʼuel chuqui mi lac mel. An i tajol maʼañic miʼ mejlel lac ñaʼtan bajcheʼ mi caj i ticʼlañonla o i ticʼlan yañoʼ bʌ (Proverbios 14:12). Anquese weñʌch chuqui mi lac mel mi la cubin o chuqui miʼ mel yañoʼ bʌ, an i tajol mach cheʼiqui. Ili pañimil woliʼ qʼuextʌyel majlel, an melbalʌl (chaʼlibal) tac mach bʌ weñic miʼ qʼuejlel ti wajali, pero wʌle mach lecojix miʼ qʼuejlel.
¿Wem ba cheʼ mi lac mel tiʼ pejtelel ora chuqui miʼ yʌl yañoʼ bʌ?
¿Am ba baqui miʼ mejlel lac taj ticʼojel tac muʼ bʌ i coltañonla lac mel chuqui wem bʌ?
Tiʼ sujm añʌch, mach yʌlʌyic majquiyonla o baqui chumulonla mucʼʌch i mejlel i coltañonla. Ti jiñi yambʌ artículo mi caj laj qʼuel chuqui miʼ mejlel i coltañonla.