Wocolʌch ti tajol jumpʼejl majtañʌl muʼ bʌ i mulan juntiquil quixtañu. Jumpʼejl majtañʌl ñuc i cʼʌjñibal jiñʌch bajcheʼ yilal miʼ qʼuel jiñi muʼ bʌ la cʌqʼuen: Tajol juntiquil mucʼʌch i qʼuel ti ñuc, pero jiñi yambʌ mach cheʼiqui.

Jumpʼejl ejemplo, tajol juntiquil xcolel miʼ yʌl chaʼan jiñi ñumen wem bʌ majtañʌl jiñʌch ñumen tsijiʼ bʌ celular o tableta. Juntiquil añix bʌ i jabilel tajol miʼ qʼuel ti ñuc cheʼ an chuqui wajalix bʌ i chaʼan i familia miʼ yʌqʼuentel. An cultura tac baqui jiñi xcolelob o ñoxobix bʌ yomob miʼ yʌqʼuentel taqʼuin chaʼan miʼ cʼʌñob cheʼ bajcheʼ yomob.

Pero añʌch muʼ bʌ i chaʼleñob wersa chaʼan miʼ tajob jiñi ñumen wem bʌ majtañʌl chaʼan jiñi muʼ bʌ i wen cʼuxbiñob. Anquese mach tiʼ pejtelel ora miʼ mejlel, añʌch muʼ bʌ i mejlel i coltañonla chaʼan mi lac ñaʼtan bajcheʼ yilal bʌ majtañʌl miʼ mejlel la cʌcʼ. Mi caj laj qʼuel chʌnchajp muʼ bʌ i mejlel i coltañonla lac ñaʼtan.

Muʼ bʌ i mulan jiñi muʼ bʌ caj la cʌqʼuen. Juntiquil wiñic chʼoyol bʌ ti Belfast (Irlanda del Norte), tsiʼ yʌlʌ chaʼan jiñi ñumen wem bʌ majtañʌl aqʼuebil jiñʌch jiñi bicicleta chaʼan bʌ ajñel tsaʼ bʌ aqʼuenti cheʼ 10 jaxto majlel i jabilel, come miʼ yʌl: «Tsaʼ c wen mulaj jumpʼejl bicicleta bajcheʼ jiñi». Ili miʼ pʌsbeñonla chaʼan ñuc miʼ qʼuejlel jumpʼejl majtañʌl mi mucʼʌch i mulan jiñi muʼ bʌ caj la cʌqʼuen. Ñaʼtan majqui a wom bʌ a wʌqʼuen jiñi majtan. Ñaʼtan chuqui miʼ qʼuel ti ñuc come yaʼʌch chucul chuqui tac miʼ mulan. Jumpʼejl ejemplo, jiñi añobix bʌ i buts miʼ qʼuelob ti ñuc cheʼ an i yorajlel cheʼ miʼ tem ajñel yicʼotob i familia. Tajol miʼ mulañob i qʼuel i yalobil yicʼot i butsob ti bele ora. Mi jiñi i familia miʼ pʌyob ti uchʼel, jiñʌch muʼ bʌ caj i wen qʼuelob ti ñuc.

Chaʼan mi lac ñaʼtan chuqui miʼ mulan juntiquil, yomʌch mi lac wen ñʌchʼtañob. Jiñi Biblia miʼ yʌl: «Yom pʼipʼetla cheʼ mi laʼ ñichʼtan tʼan. Mach yomic ora mi laʼ chaʼlen tʼan» (Santiago 1:19). Cheʼ maʼ chaʼlen tʼan a wicʼot a wamigojob yicʼot a familiajob, wen ñʌchʼtan chuqui miʼ mulañob i yʌl.  Cheʼʌch miʼ mejlel a ñaʼtan chuqui mi caj a wʌqʼueñob chaʼan miʼ mulañob.

I cʼʌjñibal bʌ i chaʼañob. Mi jumpʼejl majtañʌl mucʼʌch i cʼʌjñibʌyel i chaʼan jiñi muʼ bʌ la cʌqʼuen mucʼʌch caj i qʼuel ti ñuc anquese maʼañic bajcheʼ cʌlʌx yilal. ¿Bajcheʼ miʼ mejlel lac ñaʼtan chuqui i cʼʌjñibal i chaʼan?

Ñumen wem bʌ yubil jiñʌch cheʼ mi laj cʼajtiben chuqui yom. Pero an cabʌl maʼañic bʌ miʼ mulañob i mel bajcheʼ jiñi, come miʼ ñaʼtañob chaʼan ñumen utsʼat cheʼ miʼ yʌqʼuentel i majtan juntiquil quixtañu cheʼ mach pijtʌbilic i chaʼan. Cheʼ jaʼel, anquese añʌch muʼ bʌ i mulañob i yʌl chuqui miʼ mulañob o maʼañic, pero cheʼ an chuqui i cʼʌjñibal i chaʼañob miʼ quisñiñob i yʌl.

Jin chaʼan, yom maʼ wen qʼuel bajcheʼ yilal woli (choncol) i ñusan. ¿xColelto ba, ñoxix, i bajñel to, ñujpuñem, cʌybil o i bajñel jachix? ¿Muʼto ba ti eʼtel (troñel) o maʼañix? Ti wiʼil, ñaʼtan chuqui miʼ mejlel ti cʼʌjñibʌyel i chaʼan jiñi quixtañu.

Chaʼan miʼ mejlel a yoque ñaʼtan chuqui ñoj i cʼʌjñibal i chaʼan jiñi a wom bʌ a wʌqʼuen majtañʌl, chaʼlen tʼan a wicʼot yambʌ lajal bʌ ñusʌbil i chaʼan bajcheʼ jiñi. Tajol miʼ subeñet yambʌ tac chuqui i cʼʌjñibal i chaʼan maʼañic bʌ majqui wen yujil. Cheʼ bajcheʼ jiñi, mi caj i mejlel a wʌcʼ jumpʼejl majtañʌl mucʼʌch bʌ i cʼʌjñibʌyel i chaʼan, tajol maʼañic bʌ miʼ ñaʼtan yambʌlob.

Jiñi i yorajlel. Jiñi Biblia miʼ yʌl: «Jini yujil bʌ wen bʌ tʼan [«ti wen bʌ i yorajlel», TNM] an cabʌl i cʼʌjñibal ti coltaya» (Proverbios 15:23). Ili yom i yʌl chaʼan cheʼ mi lac sʌclan wem bʌ i yorajlel chuqui la com la cʌl, miʼ yʌqʼuen i tijicñʌyel jiñi muʼ bʌ lac suben. Lajalʌch ti chuqui com lac mel: Cheʼ mi la cʌcʼ jumpʼejl majtañʌl ti wem bʌ i yorajlel, miʼ yʌqʼuen cabʌl i tijicñʌyel jiñi muʼ bʌ la cʌqʼuen.

Juntiquil la camigo muʼ bʌ i ñujpuñel, juntiquil xcolel woli (yʌquel) bʌ i loqʼuel ti escuela, jumpʼejl xñujpuñel woli bʌ i pijtañob miʼ yilan pañimil (chʼocʼan) i yalobil... Jin tacʌch baqui ora miʼ yʌjqʼuel majtañʌl. An muʼ bʌ i tsʼijbuñob ti jun jiñi qʼuin tac ñuc bʌ i cʼʌjñibal ti jumpʼejl jab. Cheʼ bajcheʼ jiñi an i yorajlel chaʼan miʼ wen ñaʼtañob chuqui yom miʼ yʌcʼob ti majtañʌl. *

Miʼ mejlel la cʌcʼ majtañʌl ti baqui jach bʌ qʼuin, mach cojach tiʼ yorajlel qʼuiñijel tac. Pero yom tsajilonla. Jumpʼejl ejemplo, mi juntiquil wiñic miʼ toʼol aqʼuen jumpʼejl majtañʌl juntiquil xʼixic, jiñi xʼixic miʼ mejlel i ñaʼtan chaʼan woliʼ mulʌntel. Pero mi jiñi wiñic mach cheʼic woliʼ ñaʼtan, miʼ mejlel ti tejchel wocol. Jin chaʼan, yom mi lac ñaʼtan chucoch mi la cʌcʼ majtañʌl.

¿Chucoch mi la cʌcʼ majtañʌl? Jiñi ejemplo tsaʼ bʌ la cʌlʌ, miʼ pʌs chaʼan yom mi lac wen qʼueleʼ mi maʼañic chuqui miʼ mejlel i leco ñaʼtan jiñi muʼ bʌ la cʌqʼuen majtañʌl. Pero yom mi lac wen tsajin jaʼel chucoch la com la cʌcʼ. Anquese cabʌl mi lac mulan la cʌcʼ majtañʌl come cheʼʌch miʼ loqʼuel ti lac pusicʼal, cabʌl muʼ bʌ i yʌcʼob majtañʌl tiʼ yorajlel jumpʼejl qʼuiñijel chaʼan jach wersa cheʼ yom miʼ melob. An yambʌ muʼ bʌ i melob chaʼan jach yomob chuqui miʼ yʌqʼuentelob jaʼel o chaʼan miʼ wen chʼʌjmelob ti ñuc.

¿Chuqui miʼ mejlel lac mel chaʼan mi lac ñaʼtan mi tiʼ wenlelʌch lac pusicʼal la com la cʌcʼ majtañʌl? Jiñi Biblia miʼ yʌl: «Tiʼ pejtelel chuqui tac mi laʼ mel, melela yicʼot cʼuxbiya» (1 Corintios 16:14). Mi chaʼañʌch a cʼuxbiya yicʼot maʼ qʼuel ti ñuc jiñi muʼ bʌ a wʌqʼuen majtañʌl, tiʼ tijicñʌyel mi caj i chʼʌmob. Cheʼ jaʼel, mi caj a wubin a tijicñʌyel cheʼ maʼ pʌs a wutslel. Mi chaʼañʌch cʼuxbiya mi la cʌcʼ jumpʼejl majtañʌl, mi la cʌqʼuen i tijicñʌyel jaʼel jiñi lac Tat am bʌ ti panchan. Jiñi apóstol Pablo tsiʼ yʌqʼueyob i tijicñʌyel tiʼ tʼan jiñi xñoptʼañob ti Corinto come tsiʼ coltayob tiʼ yutslel jiñi hermanojob ti Judea, tiʼ tsʼijbubeyob: «Dios miʼ cʼuxbin jini muʼ bʌ i yʌcʼ tiʼ tijicñʌyel i pusicʼal» (2 Corintios 9:7).

Mi mucʼʌch a cʼajtesan jiñi tsaʼ bʌ laj qʼuele, mi caj a wʌcʼ majtañʌl tac muʼ bʌ i tijicñesan yambʌlob. Jin tacʌch tsaʼ bʌ i yʌcʼʌ ti ñuc Dios yicʼot yan tac bʌ ñuc bʌ i cʼʌjñibal cheʼ bʌ tsiʼ yʌqʼueyonla jiñi ñumen ñuc bʌ lac majtan. Yaʼ ti yambʌ temaj mi caj laj qʼuel baqui bʌ jiñi.