TEMAJ AM BɅ TIʼ TEJCHIBAL | ¿BAQUI BΛ JIÑI ÑUMEN ÑUC BΛ MAJTAÑΛL?
¿Baqui bʌ jiñi ñumen ñuc bʌ majtañʌl?
«Pejtelel wen bʌ lac majtan yicʼot pejtelel utsʼat bʌ lac majtan miʼ tilel ti Dios. Miʼ jubel tilel ti lac Tat, tsaʼ bʌ i mele ecʼ tiʼ pejtelel» (Santiago 1:17). Ili texto miʼ taj ti tʼan bajcheʼ miʼ tʼox chuqui an i chaʼan Jehová, jiñi lac Tat am bʌ ti panchan. Jehová an i yʌqʼue cabʌl majtañʌl jiñi wiñicob xʼixicob (quixtañujob), pero an jumpʼejl ñumen ñuc bʌ tsiʼ yʌcʼʌ. ¿Baqui bʌ? Jiñʌch tsaʼ bʌ i yʌlʌ Jesús yaʼ ti Juan 3:16, miʼ yʌl: «Come cheʼi tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel».
Cheʼ tsiʼ yʌcʼʌ cojach bʌ i Yalobil Dios ti laj caj, jiñʌch ñumen ñuc bʌ majtañʌl miʼ mejlel lac taj ili ora. Wocolix i yʌlʌ tsaʼ bʌ i mele, ili ora mi lac mejlel ti cojlel loqʼuel ti mulil, ñoxlel yicʼot chʌmel (Salmo 51:5; Juan 8:34). Anquese mi lac bajñel ñop laj col lac bʌ, maʼañic baqui ora mi caj lac mejlel. Pero Dios miʼ wen cʼuxbiñonla, jin chaʼan tsiʼ chajpa jiñi muʼ bʌ i mejlel i coltañonla loqʼuel ti mulil. Cheʼ bʌ tsiʼ yʌcʼʌ jiñi cojach bʌ i Yalobil, Jesucristo, bajcheʼ i tojol mulil, Jehová tsiʼ yʌqʼueyonla ti lac pejtelel muʼ bʌ lac jacʼben i tʼan chaʼan mi lac mejlel ti chumtʌl tiʼ pejtelel ora. Pero ¿bajcheʼ tsaʼ mejli i toj jiñi i cuxtʌlel Jesús chaʼan mi laj cojlel loqʼuel ti mulil yicʼot chʌmel? ¿Chucoch i cʼʌjñibalʌch? I ¿bajcheʼ miʼ mejlel lac taj lac wenlel chaʼan jiñi?
Cheʼ tsiʼ yʌcʼʌ i cuxtʌlel Jesús lajalʌch bajcheʼ tsaʼ tojle chuqui miʼ sajtel o chaʼan miʼ cojlel juntiquil quixtañu. Jiñi Biblia miʼ yʌl chaʼan Dios tsiʼ mele Adán yicʼot Eva chaʼan miʼ mejlelob ti chumtʌl yicʼot i yalobilob ti jumpʼejl paraíso wʌʼ ti Pañimil cheʼ mach xmulilobic (Génesis 1:26-28). Pero tsiʼ luʼ sʌtʌyob chuqui an i chaʼañob cheʼ bʌ tsiʼ ñusʌbeyob i tʼan Dios i tsaʼ sujtiyob ti xmulil. ¿Baqui bʌ i wocolel tsaʼ tajle tiʼ caj jiñi? Jiñi Biblia miʼ yʌl: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Romanos 5:12). Maʼañic tsaʼ mejli i yʌcʼ chaʼan jiñi i yalobilob miʼ chumtʌlob tiʼ pejtelel ora, tsaʼ jach i cʌybeyob jiñi mulil yicʼot chʌmel.
Jiñi i tojol tsaʼ bʌ ajqʼui chaʼan mi laj cojlel loqʼuel ti chʌmel yicʼot ti mulil cheʼʌch cʼamel bajcheʼ jiñi tsaʼ bʌ sajti. Adán tsiʼ taja i mul cheʼ bʌ tsiʼ yʌlol ñusʌbe i tʼan Dios, jin chaʼan tsaʼ sujti ti xmulil. Jiñi Biblia miʼ yʌl chaʼan tsiʼ yotsa ti mulil yicʼot chʌmel i yalobilob. Chaʼan miʼ cojlelob loqʼuel, tsiʼ yʌcʼʌ i cuxtʌlel juntiquil mach bʌ xmulilic: Jiñʌch i chaʼan Jesús (Romanos 5:19; Efesios 1:7). Cheʼ machic tsiʼ tojo lac mul Dios, joñonla maʼañic miʼ mejlel lac taj jiñi tsaʼ bʌ i sʌtʌ Adán yicʼot Eva: Chaʼan mi lac chumtʌl ti jumpʼejl paraíso tiʼ pejtelel ora (Apocalipsis [Revelación] 21:3-5).
Cabʌlʌch lac wenlel miʼ yʌqʼueñonla jiñi i tojol mulil, i wen tsiquil chaʼan jiñʌch jiñi «ñumen ñuc bʌ majtañʌl» aqʼuebil i chaʼañonla Dios. Chaʼan mi lac ñaʼtan chucoch ñumen wen ili majtañʌl bajcheʼ yambʌ tac, laʼ laj qʼuel bajcheʼ miʼ tsʼʌctiyel jiñi tsaʼ bʌ la cʌlʌ ti yambʌ temaj chaʼan bajcheʼ yilal jiñi wem bʌ majtañʌl.
Miʼ yʌqʼueñonla chuqui mi lac mulan. Luʼ la comʌch chumtʌl tiʼ pejtelel ora come cheʼʌch tsaʼ mejliyonla (Eclesiastés 3:11, TNM). Ti lac bajñelil maʼañic miʼ mejlel lac taj chuqui mi lac mulan, cojach tiʼ coltaya i cuxtʌlel Jesús. Jiñi Biblia miʼ yʌl: «An i tojol mulil. Jini muʼ bʌ i chaʼleñob mulil wersa miʼ chʌmelob, jiñʌch i tojol. Pero lac majtan chʼoyol bʌ ti Dios jiñʌch laj cuxtilel mach bʌ anic miʼ jilel ti lac Yum Cristo Jesús» (Romanos 6:23).
Miʼ yʌqʼueñonla chuqui i cʼʌjñibal lac chaʼan. Mi juntiquilic quixtañu miʼ mejlel i locʼsañonla ti mulil. Yaʼ ti Biblia miʼ yʌl chaʼan wen lets i tojol yom bʌ miʼ yʌjqʼuel i maʼañic majqui miʼ mejlel i yʌcʼ (Salmo 49:8). I cʼʌjñibalʌch lac chaʼan i coltaya Dios chaʼan miʼ locʼsañonla ti mulil yicʼot chʌmel. Dios tsiʼ yʌcʼʌ chuqui anto bʌ yom lac chaʼan cheʼ «tiʼ cotayonla Jesucristo cheʼñac tiʼ yʌcʼʌ i bʌ chaʼan i tojol lac mul» (Romanos 3:23, 24, Cuxul bʌ tʼan).
Ti wem bʌ i yorajlel. Jiñi Biblia miʼ yʌl: «Pero tsaʼ chʌmi Cristo chaʼañonla cheʼ xmulilon tola» (Romanos 5:8). Dios miʼ pʌs chaʼan mucʼʌch i wen cʼuxbiñonla anquese xmulilonla, jin chaʼan tsiʼ yʌcʼʌ i tojol lac mul. Iliyi miʼ yʌqʼueñonla jumpʼejl lac pijtaya anquese yomto mi laj cuchben i wocolel jiñi mulil.
Miʼ pʌs i yutslel. ¿Chuqui tsiʼ ñijcʌbe i pusicʼal Dios chaʼan miʼ yʌcʼ i Yalobil ti lac tojlel? «Tsiʼ pʌsbeyonla i cʼuxbiya Dios cheʼ bʌ tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel ti Jesús. Jiñʌch mero cʼuxbiya. Mach joñonicla tsaʼ laj cʼuxbi Dios pero jini tsiʼ cʼuxbiyonla» (1 Juan 4:9, 10).
¿Chuqui yom maʼ mel chaʼan maʼ pʌs chaʼan mucʼʌch a qʼuel ti ñuc jiñi majtañʌl? Cʼajtesan tsaʼ bʌ i yʌlʌ Jesús yaʼ ti Juan 3:16, chaʼan cojach majqui «miʼ ñop i Yalobil» miʼ taj i coltʌntel. Jiñi Biblia miʼ yʌl chaʼan jiñi am bʌ i ñopoñel «xucʼul i pusicʼal miʼ pijtan» (Hebreos 11:1). Chaʼan cheʼʌch mi lac mel, yom mi laj cʌn i sujmlel am bʌ ti Biblia. Jin chaʼan, mic subeñet lon chaʼan maʼ locʼsʌben i yorajlel a cʌn Dios, jiñi tsaʼ bʌ i yʌqʼueyonla jiñi «ñuc bʌ majtañʌl», yicʼot chaʼan maʼ cʌn jiñi yom bʌ maʼ mel chaʼan maʼ taj a cuxtʌlel maʼañic bʌ i jilibal.
Chaʼan maʼ cʌn jiñi i sujmlel am bʌ ti Biblia, sʌclan yaʼ ti página i chaʼan Internet www.pr418.com/ctu. Jiñi i testigojonbʌlon Jehová miʼ mejlel j coltañet lojon. Cheʼ maʼ ñumen cʌn majlel chaʼan jiñi majtañʌl yicʼot bajcheʼ miʼ coltañet, mic ñop lojon chaʼan mi caj a mulan a wʌl: «Wocolix i yʌlʌ Dios, Jesucristo lac Yum miʼ yʌcʼon ti colel» (Romanos 7:25).