Cheʼʌch tsiʼ yʌlʌ juntiquil xchʼoc 13 bʌ i jabilel cheʼ bʌ tsaʼ aqʼuenti juncojt saj tsʼiʼ. Juntiquil xʼixic am bʌ i colem empresa tsiʼ yʌlʌ chaʼan tsaʼ qʼuextʌyi i cuxtʌlel cheʼ bʌ jiñi i papá tsiʼ yʌqʼue jumpʼejl computadora cheʼ xcolelto. Juntiquil wiñic maxto bʌ wen jalic ñujpuñem miʼ yʌl chaʼan jiñi ñumen ñuc bʌ majtañʌl aqʼuebil jiñʌch cheʼ bʌ jiñi i yijñam tsiʼ yʌqʼue jumpʼejl alʌ jun tsaʼ bʌ i mele cheʼ bʌ tsaʼ tsʼʌctiyi jumpʼejl jab i ñujpuñelob.

Ti jujumpʼejl jab, yonlel quixtañu miʼ yʌqʼuen i yorajlel yicʼot miʼ cʼʌn i pʼʌtʌlel chaʼan miʼ taj jiñi «ñumen ñuc bʌ» majtañʌl chaʼan miʼ yʌqʼuen i yamigo o juntiquil tiʼ familia. Ti lac pejtelel mi lac mulan chaʼan jiñi muʼ bʌ la cʌqʼuen jumpʼejl majtañʌl lajal miʼ yubin i bʌ bajcheʼ tsaʼ bʌ la cʌlʌyob. ¿A wom ba a wʌcʼ jumpʼejl majtañʌl bajcheʼ jiñi o chaʼan maʼ wʌqʼuentel jaʼel?

Wen utsʼatax ti ubintel come tijicña miʼ yubin jiñi muʼ bʌ i yʌcʼ majtañʌl, mach jiñic jach chaʼan bajcheʼ yubil miʼ yubin jiñi muʼ bʌ i yʌqʼuentel. Jiñi Biblia miʼ yʌl: «Ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hechos 20:35). Tiʼ sujm, ñumen tijicñayonla cheʼ mucʼʌch i yʌqʼueñonla wocolix la cʌlʌ jiñi tsaʼ bʌ la cʌqʼue majtañʌl.

¿Chuqui miʼ mejlel lac mel chaʼan tijicñayonla cheʼ mi la cʌcʼ jumpʼejl majtañʌl i miʼ taj i tijicñʌyel jaʼel jiñi muʼ bʌ la cʌqʼuen? Pero mi maʼañic miʼ mejlel la cʌcʼ jiñi ñumen wem bʌ majtañʌl mi lac ñaʼtan, ¿bajcheʼ miʼ mejlel lac ñaʼtan mi jiñi quixtañu mucʼʌch i mulan jiñi la com bʌ la cʌqʼuen?