Yonlel quixtañu tiʼ petol pañimil miʼ ñopob, cheʼ bajcheʼ cʼʌlʌl wajali, chaʼan jiñi Navidad jiñʌch i melbentel i cumpleaño Jesucristo. Pero ¿am baʼ cʼajtibe a bʌ mi tsaʼʌch i meleyob Navidad jiñi ñaxam bʌ xñoptʼañob i chaʼan Jesús wen ñʌmʌl bʌ yicʼotob? Cheʼ jaʼel, ¿a wujil ba chuqui miʼ yʌl jiñi Biblia chaʼan jiñi cumpleaño tac? I jacʼbal ili cʼajtiya tac miʼ mejlel i coltañonla lac ñaʼtan mi yomʌch mi lac mel jiñi Navidad.

Ti ñaxam, maʼañic miʼ yʌjlel yaʼ ti Biblia chaʼan tsaʼ melbenti i cumpleaño Jesús mi juntiquilic yambʌ i wiñic Dios. Jiñi Tsʼijbujel tac cojach miʼ taj ti tʼan chaʼtiquil tsaʼ bʌ i meleyob i cumpleaño, pero maʼañic miʼ chʼujutesañob Jehová, jiñi Dios tsaʼ bʌ i yʌcʼʌ ti melol jiñi Biblia. Cheʼ jaʼel, mach weñic chuqui tsaʼ ujti ti jiñi chaʼpʼejl qʼuiñijel (Génesis 40:20; Marcos 6:21). Cheʼ bajcheʼ miʼ yʌl jiñi Encyclopædia Britannica, jiñi ñaxam bʌ xñoptʼañob i chaʼan Jesús tiʼ tsʼaʼleyob «jiñi costumbre i chaʼan bʌ pañimil cheʼ miʼ melob jiñi cumpleaño».

Jiñi Biblia maʼañic miʼ yʌl chuqui ti qʼuin tsiʼ yila pañimil Jesús. Jiñi Diccionario de historia de la Iglesia miʼ yʌl chaʼan «maʼañic baqui tsʼijbubil chuqui ti qʼuin o uw tsiʼ yila pañimil Cristo». Cheʼ yomic Jesús chaʼan jiñi xcʌntʼañob i chaʼan miʼ melbeñob i cumpleaño, miʼ mejlel lac ñaʼtan chaʼan tiʼ subeyob i wentʌlel chuqui bʌ qʼuin tsiʼ yila pañimil.

I chaʼchajplel, yaʼ ti Biblia maʼañic miʼ yʌl chaʼan Jesús yicʼot jiñi xcʌntʼañob i chaʼan tsiʼ meleyob jiñi Navidad. Jumpʼejl enciclopedia miʼ yʌl chaʼan jiñi Navidad tsaʼ ñaxan ajli yaʼ ti «Cronógrafo i chaʼan Filócalo, jumpʼejl calendario muʼ bʌ i cʼʌn jiñi romanojob tsaʼ bʌ mejli ti jabil 336». Wen tsiquil mi laj qʼuel chaʼan tsaʼ ajli cheʼ bʌ cabʌlix jab i yujtel ti tsʼijbuntel jiñi Biblia yicʼot cheʼ bʌ Jesús tsajñix wʌʼ ti Pañimil. Jin chaʼan, jiñi Cyclopedia i chaʼan McClintock yicʼot Strong miʼ yʌl chaʼan jiñi Navidad mach chuculic yaʼ ti Nuevo Testamento, i mach tilemic ti Dios. *

Jesús, jiñi ñuc bʌ Maestro, tiʼ sube jiñi xcʌntʼañob i chaʼan chaʼan yaʼ ti Biblia miʼ mejlel i tajob chuqui yom bʌ miʼ melob. Pero maʼañic baqui ora tiʼ sube chaʼan yom miʼ melob jiñi Navidad. Lajal bajcheʼ juntiquil maestro mach yomic cheʼ juntiquil xcolel miʼ mel maʼan bʌ miʼ subentel, Jesús mach yom chaʼan jiñi xcʌntʼañob miʼ melob jaʼel maʼan bʌ «tsʼijbubil» yaʼ ti Biblia (1 Corintios 4:6).

Pero yom bʌ miʼ melob jiñi ñaxam bʌ xcʌntʼañob: Jiñʌch i cʼajtesʌntel i chʌmel Cristo. Jesús tiʼ sube jiñi xcʌntʼañob i chaʼan jala yom miʼ melob i tsiʼ pʌsʌ bajcheʼ yom miʼ mejlel. Yaʼ ti Biblia mi lac taj chuqui yom bʌ miʼ mejlel yicʼot chuqui ti qʼuin tsaʼ chʌmi (Lucas 22:7, 19; 1 Corintios 11:25).

Cheʼ bajcheʼ tsaʼix laj cʌñʌ, jiñi Navidad i qʼuiñilelʌch jumpʼejl cumpleaño, i jiñi ñaxam bʌ xñoptʼañob maʼañic tsiʼ meleyob. Cheʼ jaʼel, jiñi Biblia maʼañic miʼ yʌl chaʼan Jesús tsiʼ mele, o chaʼan an majqui yambʌ tsiʼ mele jiñi Navidad. Yonlel xñoptʼañob tiʼ pejtelel pañimil cʼotem i ñaʼtañob chaʼan jiñi Navidad mach i chaʼañobic.