Yom pʼisbil mi laj qʼuel lac sajtemal
Don yicʼot Margaret * wen tijicñayob cheʼ yaʼañob ti julaʼ i yixicʼal, i ñijʼal yicʼot i butsob. Margaret, wen yujil mel (pʌt) uchʼibʌl i jiñʌch i yeʼtel (troñel) wajali, jin chaʼan tsiʼ ñaʼta i chajpan macarrón melbil bʌ yicʼot queso ti jiñi cojix bʌ qʼuin temelob, come jiñʌch muʼ bʌ i wen mulañob i buts.
Margaret tsiʼ ñusa jiñi pʼejt tiʼ xiñil jiñi mesa cheʼ yaʼix luʼ buchulob. Pero cheʼ tsiʼ jamʌ jiñi pʼejt, jiñi yambʌlob toj ñʌchʼʌl tsaʼ cʌyleyob... ¡toʼol queso jach yicʼot salsa yaʼan! Margaret tsaʼ ñajayi i yotsan jiñi macarrón, i jiñʌch ñaxam bʌ yom miʼ yotsʌntel. *
Anquese añix lac jabilel o cabʌlix chuqui la cujil, mucʼʌch lac luʼ ñajʌyel. Maʼañic mi lac ñaxan ñaʼtan muʼ bʌ la cʌl, mi lac mel mach bʌ i yorajlelic yom melol, o mucʼ jach lac ñusan o miʼ ñajʌyel lac chaʼan. ¿Chucoch cheʼ mi la cujtel? ¿Bajcheʼ miʼ mejlel lac tojʼesan? ¿Am ba chuqui miʼ mejlel lac mel? Cheʼ wen jach bajcheʼ mi laj qʼuel, mi caj i coltañonla lac jacʼ ili cʼajtiya tac.
¿BAJCHEʼ YILAL MI LAJ QʼUEL, I BAJCHEʼ MIʼ QʼUEL DIOS?
Cheʼ weñʌch chuqui mi lac mel, tijicña mi la cubin cheʼ mi lac subentel wen tac bʌ tʼan come la cujil chaʼan jiñʌch yom bʌ miʼ mejlel ti lac tojlel. Pero cheʼ mi lac mel mach bʌ weñic, anquese mach yʌlolic lac chaʼan o maʼañic majqui tsiʼ qʼuele o tsiʼ yubi, ¿muʼ ba la cʌl? Yomʌch an lac pecʼlel chaʼan mi lac mel.
Tajol maʼañic mi la cʌcʼ ti ñuc lac sajtemal, mi lac muc o mi la cʌqʼuen tiʼ wenta yambʌ cheʼ mi lac chanʼesan lac bʌ. Pero mach weñic cheʼ mi lac mel bajcheʼ iliyi come maʼañic miʼ jilel jiñi wocol i mi lac toʼol jopʼben i mul yambʌ wiñicob xʼixicob (quixtañujob). Mi maʼañic mi lac tajben i wocolel yilal muʼ bʌ lac mel, yom mi laj cʼajtesan chaʼan ti wiʼil, «ti jujuntiquilonla mi caj lac sub lac bʌ tiʼ tojel Dios» (Romanos 14:12).
Dios yujil chaʼan mucʼʌch lac taj lac sajtemal. Yaʼ ti Salmos miʼ yʌl chaʼan Jehová miʼ «chaʼlen pʼuntaya, uts i pusicʼal». Yicʼot miʼ yʌl chaʼan «mach tiʼ pejtelelic ora mi caj i ticʼonla. Maʼanic miʼ cʌntan i michʼajel tiʼ pejtelel ora». Yujil chaʼan xmulilonla ti lac pejtelel yicʼot yujil baqui cʼuñonla, cʼajal i chaʼan chaʼan «melbilonla ti tsʼubejn» (Salmo 103:8, 9, 14).
Dios yom chaʼan, bajcheʼ i yalobilonla, lajal mi laj qʼuel jiñi lac sajtemal cheʼ bajcheʼ yilal miʼ qʼuel come juntiquilʌch tatʌl yujil bʌ pʼuntaya (Salmo 130:3). Miʼ yʌqʼueñonla cabʌl ticʼojel tiʼ Tʼan i miʼ subeñonla bajcheʼ yom mi laj qʼuel jiñi lac sajtemal yicʼot i chaʼan yambʌlob.
¿CHUQUI MIʼ MEJLEL LAC MEL?
An muʼ bʌ i tajob i sajtemal i miʼ wen ñusañob qʼuin yicʼot miʼ cʼʌñob i pʼʌtʌlel chaʼan yambʌ majqui miʼ jopʼbeñob i mul o chaʼan miʼ pʌsob chucoch
cheʼ tsiʼ meleyob jiñi. Pero cheʼ an majqui maʼ low ti a tʼan cʼajtin a ñusʌbentel, lajmesan jiñi wocol i chaʼ utsʼesan laʼ bʌ, ¿mach ba cheʼi yom maʼ wʌl? O mi tsaʼ mele mach bʌ utsʼatic maʼ qʼuel chaʼañet o chaʼan yambʌlob, mach a michʼesan a bʌ mi yomic maʼ jopʼben i mul yambʌ, ñopo a tojʼesan jiñi wocol. Mi tsaʼ caji a wersa al chaʼan maʼañic a mul, mucʼ jach caj a ñumen jalʼesan jiñi wocol yicʼot maʼ ñumen tsʌtsʼesan. Yom bʌ maʼ mel jiñʌch maʼ locʼsʌben i wenlel tsaʼ bʌ ujti, tojʼesan jiñi wocol i bej chaʼlen wersa.Cheʼ yambʌ quixtañu miʼ mel mach bʌ weñic, orajach miʼ mejlel lac pʌs chaʼan maʼañic tsaʼ lac mulaj tsaʼ bʌ i mele. Pero ñumen wen cheʼ mi lac jacʼ ili ticʼojel tsaʼ bʌ i yʌlʌ Jesús: «Melela chuqui utsʼat tiʼ tojlel laʼ piʼʌlob mi laʼ wom chuqui utsʼat ti laʼ tojlel» (Mateo 7:12). Cheʼ mi lac mel mach bʌ weñic, anquese tajol mach wen tsʌtsic, tijicña mi la cubin cheʼ mi lac pʼuntʌntel yicʼot mi lac ñusʌbentel. Jin chaʼan, ¿chucoch maʼañic maʼ chaʼlen wersa a pʌsben a wutslel yañoʼ bʌ? (Efesios 4:32).
PRINCIPIO TAC MUʼ BΛ I COLTAÑONLA CHAʼAN MAʼAÑIC MI LAC WEN TAJ LAC SAJTEMAL
Jumpʼejl diccionario miʼ yʌl chaʼan mi lac taj lac sajtemal come maʼañic mi lac wen ñaʼtan chuqui wen, an chuqui mach wen la cujilic o maʼañic mi lac wen acʼ ti ñuc. Yom mi lac ñaʼtan chaʼan ti lac pejtelel mi lac mejlel ti ujtel bajcheʼ iliyi. Pero cheʼ mucʼʌch la cʌcʼ ti ñuc principio tac am bʌ ti Biblia, mach cʌlʌxic mi caj lac taj lac sajtemal.
Jumpʼejl principio jiñʌch Proverbios 18:13: «Jini muʼ bʌ i jacʼ tʼan cheʼ maxto ubibilic i chaʼan miʼ caj ti quisin chaʼan i tontojlel». Cheʼ mucʼʌch lac ñaxan wen ubin bajcheʼ an jiñi wocol i mi lac ñaʼtan chuqui mi caj la cʌl, wen tsajil mi caj lac chaʼlen tʼan o chuqui mi caj lac mel. Cheʼ la cujilʌch bajcheʼ an jiñi wocol, mi caj i coltañonla chaʼan maʼañic mi lac mel mach bʌ tojic.
Yambʌ principio jiñʌch iliyi: «Chaʼlenla wersa chaʼan ñʌchʼʌl mi laʼ wajñel yicʼot pejtelel winicob xʼixicob» (Romanos 12:18). Chaʼlen wersa chaʼan tijicña yicʼot juntemel mi laʼ wajñel. Chʼʌmʌ ti ñuc jiñi yambʌlob cheʼ woliyetla (choncoletla) ti eʼtel. Aqʼueñob i yubin i tijicñʌyel i subeñob chuqui wen. Cheʼ bajcheʼ ili, mach wocolic mi caj laʼ wubin chaʼan mi laʼ ñusʌben laʼ bʌ laʼ sajtemal muʼ bʌ laʼ taj ti laʼ tʼan o ti laʼ melbal. Anquese tsʌts chuqui miʼ yujtel, wen jach miʼ mejlel laʼ tojʼesan jaʼel.
Locʼsʌben i wenlel ti jiñi tsaʼ bʌ a mele. Mach a sʌclan a tʼan chaʼan chuqui tsaʼ wʌlʌ o tsaʼ mele, ñaʼtan chaʼan jiñʌch bajcheʼ miʼ mejlel a cʌn baqui to yom maʼ ñumen weñʼan. Tajol ñumen yom a wujil pijt, maʼ pʌs i yutslel a pusicʼal, maʼ ticʼ a bʌ, utset, maʼ sʌclan ñʌchʼtʌlel yicʼot chaʼan maʼ pʌs cʼuxbiya (Gálatas 5:22, 23). Mi caj i coltañet a ñaʼtan mach bʌ yomic maʼ chaʼ mel. Mach a wen lot ti a pusicʼal jiñi a sajtemal, pero yomʌch maʼ chʼʌm ti ñuc. Cheʼ maʼ sʌclan bajcheʼ maʼ pʌs a tijicñʌyel cheʼ an chuqui miʼ yujtel, mucʼʌch caj i lajmel.
CHEʼ PʼISBIL JACH BAJCHEʼ MI LAJ QʼUEL LAC SAJTEMAL AÑΛCH I WENLEL
Cheʼ pʼisbil jach bajcheʼ yilal mi laj qʼuel lac sajtemal tac, wen jach bajcheʼ mi caj lac ñusan cheʼ an chuqui mi lac mel. Ti ñʌchʼtʌlel mi caj la cajñel la quicʼot yambʌlob yicʼot ti lac bajñelil. Mi mucʼʌch lac locʼsʌben i wenlel cheʼ an chuqui mi lac mel, mi caj lac taj majlel lac ñaʼtʌbal yicʼot wem bʌ lac melbal. Maʼañic mi caj lac wen taj lac chʼijiyemlel mi muqʼuic caj lac ñaʼtan chaʼan mucʼ jach lac tech wocol. Cheʼ mi lac ñaʼtan chaʼan cabʌl woliyoʼ (yʌqueloʼ) bʌ ti wersa jaʼel, mi caj i coltañonla lac lʌcʼtesan lac bʌ tiʼ tojlelob. Pero jiñi ñumen ñuc bʌ jin cheʼ mi caj lac lajin Dios yicʼot cheʼ la cujil i ñusʌntel i mul yambʌlob cheʼ bajcheʼ miʼ mel (Colosenses 3:13).
¿Chuqui tsaʼ ujti tiʼ tojlel Margaret? ¿Mach ba weñic tsiʼ ñusayob jiñi qʼuin? Tsaʼ jach luʼ cajiyob ti tseʼñal, ñumento jiñi Margaret, i tijicña tsaʼ cajiyob ti cʼux waj anquese maʼañic i fideolel. Cheʼ ñumeñix jabil tac, jiñi i butsob tsaʼ caji i subeñob i yalobil ili tsaʼ bʌ ujti yicʼot bajcheʼ utsʼatax chuqui tsiʼ ñusayob yicʼotob i tatuch... yicʼot jaʼel mach ñoj tsʌtsic tsaʼ bʌ ujti.