AN MUʼ BΛ I YΛLOB CHAʼAN MAʼAÑIC. Juntiquil doctor tsiʼ yʌlʌ chaʼan cheʼ mi lac sʌclan ti Biblia chuqui la com lac ñaʼtan lajalʌch bajcheʼ woli (choncol) laj cʼʌn ti cʌntesa ti Química jumpʼejl libro melbil bʌ ti 1920. Jiñi maʼañic bʌ miʼ qʼuelob ti ñuc jiñi Biblia tajol miʼ cʼajtibeñetob: «¿Muʼ ba caj a qʼuelben i juñilel ñoxix bʌ computadora chaʼan maʼ ñaʼtan bajcheʼ yom maʼ cʼʌn jiñi tsijiʼ bʌ?». Ili yom i yʌl chaʼan an muʼ bʌ i ñaʼtañob chaʼan maʼañix i cʼʌjñibal jiñi Biblia.

¿Chuqui yeʼtel lac chaʼan ñoxix bʌ libro ili ora cheʼ cabʌlix chuqui tsijib melbil yicʼot cabʌlix tecnología? Ñumento ili ora come cabʌlix página ti Internet yicʼot ticʼojel o tʼan tac yaʼ bʌ miʼ tsʼijbuntel letsel chaʼan miʼ mejlel i qʼuel yambʌlob. Jiñi programa tac ti televisión baʼ miʼ ñumel jiñi wen yujiloʼ bʌ yicʼot baʼ miʼ mejlel entrevista tac miʼ wen chaʼleñob tʼan jiñi sicólogojob, pastorob yicʼot xtsʼijbaya juñob. Yaʼ baqui miʼ mejlel jun tac miʼ locʼsañob cabʌl libro chaʼan laj coltʌntel, iliyi miʼ cʌy cabʌl taqʼuin yaʼ ti empresa tac.

Mi cabʌl jax bajcheʼ miʼ mejlel lac taj chuqui la com lac ñaʼtan ili ora, ¿chucochto mi lac pejcan jiñi Biblia, añix bʌ lʌcʼʌl 2,000 jab tsaʼ ujti ti tsʼijbuntel? ¿Isujmʌch ba i tʼan jiñi muʼ bʌ i yʌlob chaʼan jiñi Biblia lajal jach bajcheʼ jumpʼejl libro chaʼan química o i juñilel jumpʼejl ñoxix bʌ computadora? Tiʼ sujm, mach i tojelic bajcheʼ miʼ ñaʼtañob. Jiñi ciencia yicʼot tecnología mach jalic miʼ qʼuextʌyel, pero ¿qʼuextʌyemix ba chuqui i cʼʌjñibal i chaʼan jiñi wiñicob xʼixicob (quixtañujob)? Jiñi quixtañujob bej yomobʌch i taj i tijicñʌyel, ñʌchʼtʌlel, i sujmlel i cuxtʌlel, chaʼan temelob ti familia yicʼot wem bʌ i yamigojob.

Anquese jiñi Biblia añix ora i tsʼijbuntel, mucʼʌch i taj ti tʼan chuqui tac i cʼʌjñibal lac chaʼan yicʼot yan tac bʌ. Cheʼ jaʼel, chʼoyolʌch ti Dios, jiñi tsaʼ bʌ i Meleyonla. Miʼ chʼʌm tilel ticʼojel tac chaʼan laj cuxtʌlel yicʼot miʼ cʌntesañonla bajcheʼ miʼ mejlel lac ñusan jiñi wocol (2 Timoteo 3:16, 17). Cheʼ jaʼel, jiñi i ticʼojel tac maʼañic mi caj i junyajl jilel, tiʼ pejtelel ora mi caj i cʼʌjñibʌyel. Yaʼ ti Biblia miʼ yʌl: «Cuxul i tʼan Dios» (Hebreos 4:12).

¿Isujmʌch ba muʼ bʌ i yʌjlel yaʼ ti Biblia? ¿Maʼañix ba i cʼʌjñibal jiñi Biblia o jiñʌch jiñi ñumen wem bʌ, jiñi cuxul bʌ libro? Ili revista Lac Tsictesʌbentel, ñaʼtʌbil chaʼan miʼ coltañet a ñaʼtan i jacʼbal ili cʼajtiya tac.