ÑAʼTANCU chaʼan woli (choncol) a xʌn majlel ti icʼyochʼan bʌ bij. Poj jumucʼ jaxto i yochel (pʼʌjquel) jiñi Qʼuin, pero maʼañic chuqui maʼ wen cʼojoʼtan come cuchul a chaʼan jumpʼejl foco wen pʼʌtʌl to bʌ i cʼʌcʼal. Cheʼ bʌ maʼ ñejñan jubel ti lum, wen tsiquil chuqui maʼ taj a qʼuel. I cheʼ bʌ toj jach maʼ ñejñan majlel jiñi a bijlel, ñumen ñajt miʼ mejlel a qʼuel a bijlel.

Jiñi Biblia lajalʌch bajcheʼ jiñi foco. Cheʼ bajcheʼ tsaʼ laj qʼuele ti yan tac bʌ temaj, jiñi i Tʼan Dios miʼ mejlel i coltañonla chaʼan mi lac ñusan jiñi wocol tac muʼ bʌ lac taj ti jujumpʼejl qʼuin wʌʼ ti pañimil (mulawil). Pero anto chuqui yambʌ miʼ mejlel i mel: Miʼ pʌsbeñonla jaʼel chuqui miʼ cajel ti talto bʌ qʼuin, come miʼ coltañonla laj qʼuel jiñi wem bʌ bij baqui miʼ mejlel lac taj lac tijicñʌyel tiʼ pejtelel ora, i miʼ coltañonla lac tsajcan (Salmo 119:105). ¿Bajcheʼ miʼ mel?

Laʼ laj qʼuel chaʼchajp bajcheʼ miʼ coltañonla jiñi Biblia chaʼan wen mi lac chumtʌl: 1 Miʼ yʌqʼuen i sujmlel laj cuxtʌlel yicʼot 2 miʼ cʌntesañonla chaʼan ti bele ora utsʼat mi la cajñel la quicʼot jiñi tsaʼ bʌ i Meleyonla.

Jiñi Biblia miʼ yʌcʼ wen tac bʌ ticʼojel chaʼan miʼ mejlel lac ñusan lac wocol tac, pero ñumen wento bajcheʼ yan tac bʌ libro am bʌ ili ora chaʼan laj coltʌntel. Miʼ cʌntesañonla chaʼan mach jiñic jach mi lac bajñel ñaʼtan lac wocol tac, yom mi lac ñaʼtan jaʼel jiñi yambʌlob. Mi cheʼʌch mi lac mel, mi caj lac tajben i sujmlel laj cuxtʌlel.

Jumpʼejl ejemplo, ñaʼtancu ili principio: «Ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hechos 20:35). ¿Am ba coltʌbil a chaʼan juntiquil woli (yʌquel) bʌ i ñusan wocol tiʼ caj taqʼuin? ¿O wen ñʌchʼtʌbil baʼ chaʼan juntiquil a wamigo chʼijiyem bʌ? Tiʼ sujm, utsʼatʌch tsaʼ wubi a bʌ cheʼ bʌ tsaʼ tijicñesʌbe i pusicʼal yambʌ quixtañu.

Cheʼ mi lac tʼox chuqui an lac chaʼan i maʼañic mi lac chaʼ pijtan, ñumen tijicñayonla. Juntiquil xtsʼijbaya tsiʼ yʌlʌ chaʼan cheʼ an chuqui mi la cʌcʼ an i tajol ñumento mi lac chaʼ taj cheʼ bajcheʼ tsaʼ laʼ cʌcʼʌ, pero cheʼ bʌ an chuqui mi la cʌcʼ, maʼañic chuqui  yom mi lac pijtan. Cheʼ mi lac tʼoxben yambʌlob chuqui an lac chaʼan, ñumento jiñi maʼañic bʌ miʼ mejlel i chaʼ sutqʼuibeñoñobla, mucʼʌch lac tajben i chobejtʌbal. Pero cheʼ mi laj coltan jiñi yambʌlob, ñumento jiñi maʼañic bʌ chuqui añob i chaʼan, añʌch chuqui mi lac taj. Temel woliyonla ti eʼtel (troñel) yicʼot jiñi tsaʼ bʌ i Meleyonla, i lajal bajcheʼ an i bet miʼ yubin ti lac tojlel chaʼan jiñi la cutslel (Proverbios 19:17). Dios miʼ wen qʼuel ti ñuc cheʼ mi laj coltan yambʌlob, i miʼ yʌcʼ i tʼan chaʼan an chuqui wen ñuc bʌ mi caj i yʌqʼueñonla: Laj cuxtʌlel tiʼ pejtelel ora ti jumpʼejl paraíso wʌʼ ti Pañimil bajcheʼ lac tojol. ¡Wen utsʼatax bʌ lac pijtaya! (Salmo 37:29; Lucas 14:12-14). *

Pero jiñi Biblia miʼ cʌntesañonla chaʼan yom mi lac chʼujutesan Jehová, jiñi isujm bʌ Dios, i cheʼʌch miʼ mejlel lac tajben i sujmlel laj cuxtʌlel. Yaʼ tiʼ Tʼan miʼ subeñonla laj cʌqʼuen i ñuclel yicʼot mi lac jacʼben i tʼan cheʼʌch bajcheʼ yom (Eclesiastés 12:13; Apocalipsis 4:11). An chuqui ñuc bʌ mi lac taj cheʼ mucʼʌch lac mel: Mi la cʌqʼuen i tijicñʌyel jiñi tsaʼ bʌ i Meleyonla. Jiñʌch miʼ subeñonla: «Yom pʼipʼ a pusicʼal calobil. Ñuqʼuesʌbeñon c pusicʼal» (Proverbios 27:11). ¿Añix baʼ ñaʼta iliyi? Cheʼ mi lac jacʼ i ticʼojel jiñi Biblia i wen chuqui mi lac yajcan, mi la cʌqʼuen i tijicñʌyel jiñi wen uts bʌ lac Tat am bʌ ti panchan. ¿Chucoch? Come miʼ chʼʌmonla ti ñuc i yom chaʼan mi lac jacʼben i ticʼojel chaʼan wen mi la cajñel (Isaías 48:17, 18). ¿Chuqui yambʌ miʼ mejlel i yʌqʼuen i sujmlel laj cuxtʌlel mi mach jiñic cheʼ mi lac chʼujutesan jiñi Yumʌl bʌ ti panchan yicʼot pañimil i mi la cʌqʼuen i tijicñʌyel?

Jiñi Biblia miʼ cʌntesañonla bajcheʼ mi lac mejlel ti sujtel tiʼ yamigo jiñi tsaʼ bʌ i Meleyonla. Jumpʼejl ejemplo, miʼ yʌl: «Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (Santiago 4:8). Tajol maʼañic miʼ mejlel lac ñop chaʼan mi lac mejlel ti sujtel tiʼ yamigo jiñi wen pʼʌtʌl bʌ tsaʼ bʌ i Meleyonla. Pero jiñi Biblia miʼ subeñonla chaʼan mucʼʌch lac taj cheʼ mi lac sʌclan, come «mach ñajtic an Dios ti lac tojlel ti jujuntiquilonla» (Hechos 17:27). Cheʼ mi lac jacʼ muʼ bʌ i yʌl jiñi Biblia chaʼan mi lac sujtel tiʼ yamigo Dios, jiñʌch junchajp bajcheʼ mi lac chajpan lac bʌ chaʼan jiñi talto bʌ qʼuin. ¿Chucoch?

Ñaʼtancu: Anquese mi lac wen chaʼlen wersa, mi juntiquilic miʼ mejlel i putsʼtan jiñi ñuc bʌ laj contra, jiñi chʌmel (1 Corintios 15:26). Pero Dios maʼañic i jilibal. Maʼañic mi caj i wis chʌmel (sajtel) i yom chaʼan jiñi i yamigojob cuxul miʼ yajñelob jaʼel tiʼ pejtelel ora. Jehová miʼ yʌl ti ili utsʼatax bʌ tʼan chuqui ñaʼtʌbil i mel tiʼ tojlel jiñi muʼ bʌ i sʌclañob: «Laʼ ajnicob tiʼ pejtelel ora jini muʼ bʌ i sajcañob» (Salmo 22:26).

Ixcu jatet, ¿chuqui miʼ mejlel a mel chaʼan maʼ sujtel tiʼ yamigo Dios tiʼ pejtelel ora? Bej cʌñʌ majlel chuqui miʼ yʌl tiʼ tojlel yaʼ tiʼ Tʼan, jiñi Biblia (Juan 17:3; 2 Timoteo 3:16). Cʼajtiben chaʼan miʼ coltañet a chʼʌmben isujm. Yaʼ ti Biblia miʼ subeñonla chaʼan mi tsaʼ laj cʼajtibe Dios lac ñaʼtʌbal ti jumpʼejl lac pusicʼal, mucʼʌch caj i yʌqʼueñonla * (Santiago 1:5). Cheʼ jaʼel, chaʼlen wersa a pʌs ti a melbal pejtel chuqui maʼ cʌn, cheʼ bajcheʼ ili, jiñi i Tʼan Dios mi caj i sujtel bajcheʼ jumpʼejl «lámpara» chaʼan a woc ili ora yicʼot bajcheʼ i sʌclel a bijlel tiʼ pejtelel ora (Salmo 119:105).