Rosi miʼ yʌl: «An c wocol tac maʼañix bʌ miʼ loqʼuel tic jol come maʼañix i loqʼuib mic ñaʼtan, i lecojax chuqui miʼ tilel tic pensar». ¿Baqui tac bʌ texto tsiʼ colta? Jumpʼejl jiñʌch Mateo 6:34: «Mach mi laʼ mel laʼ pusicʼal chaʼan jini muʼ to bʌ i yujtel ijcʼʌl. Yaʼto tsiquil chuqui miʼ yujtel ijcʼʌl. Jasʌl jach mi lac ñaʼtan ili wocol am bʌ wʌle». Rosi miʼ yʌl chaʼan ili tʼan tsaʼ bʌ i yʌlʌ Jesús tsiʼ colta chaʼan maʼañic miʼ cʌlʌx ñaʼtan chuqui muʼ bʌ i mejlel ti ujtel. Miʼ chaʼ al: «Añix cabʌl c wocol chaʼan muʼto c chaʼ pensalin yan tac bʌ maxto bʌ ujtemic, i tajol mi muqʼuicto i caj ti ujtel».

Yasmín tsaʼ caji i yubin jaʼel chaʼan maʼañic miʼ mejlel i ticʼ i bʌ ti cʌlʌx pensar. Miʼ yʌl: «Ti jujumpʼejl semana mic chaʼlen uqʼuel i an i tajol maʼañic mic mejlel ti wʌyel ti acʼʌlel. Jiñi mach bʌ weñic c pensar choncol i tsʌnsañon yubil». ¿Baqui bʌ versículo tsiʼ colta? Miʼ taj ti tʼan 1 Pedro 5:7, baqui miʼ yʌl: «Acʼʌ tiʼ wenta Dios pejtelel laʼ cʼojol, come woliʼ cʌntañetla». Yasmín miʼ chaʼ al: «Maʼañic tsaʼ j cʌyʌ c pejcan Jehová i tsaʼʌch cʼoti i yorajlel cheʼ bʌ tsiʼ coltayon. Cheʼ bajcheʼ tsiʼ cuchbeyoñob j cuch tsaʼ cubi. An i tajol muʼto i tilel tic pensar mach tac bʌ weñic, pero waʼli cujilix chuqui yom mic mel».

Juntiquil xʼixic maxto bʌ cabʌlic i jabilel i cʼabaʼ Isabella, miʼ yʌl: «Cheʼ wiʼilix mij cʌy yom bʌ mic  mel, c tatʌch tsaʼ c locʼsʌbe. An i tajol, cheʼ wiʼilix mij cʌy jiñi ñumen ñuc bʌ i cʼʌjñibal, tiʼ cajach maʼañic chuqui com c mel, com j qʼuel televisión o cʼaj co. Iliyi mach weñic come miʼ wen acʼonla ti pensar i mach wen utsʼatix mi loqʼuel muʼ bʌ lac mel». Jumpʼejl principio tsaʼ bʌ i wen colta jiñʌch 2 Timoteo 2:15, muʼ bʌ i yʌl: «Chaʼlen wersa chaʼan maʼ pʌs a bʌ ti utsʼat tiʼ wut Dios cheʼ bajcheʼ xʼeʼtel mach bʌ añic chuqui miʼ quisñin». Isabella miʼ chaʼ al: «Mach comic chaʼan Jehová miʼ quisñin c troñel tiʼ caj wiʼilix mij cʌy».

Cheʼ jaʼel, Kelly miʼ yʌl: «Cheʼ bʌ yom mi cʌcʼ jumpʼejl eʼtel (troñel), maʼañic mic seb mel tiʼ yorajlel. Cheʼ jiñi mij cajel ti uqʼuel, maʼañix mic wen wʌyel yicʼot mic wen pensalin c bʌ. Mach weñic tic tojlel jiñi». Jiñi ticʼojel am bʌ ti Proverbios 13:16 tsiʼ wen colta: «Pejtel cʌntesʌbiloʼ bʌ miʼ wʌn ñaʼtañob bajcheʼ yom miʼ melob. Jini tonto bʌ i pusicʼal muʼ jach i pʌs i bʌ ti tonto». Miʼ yʌl chuqui tsiʼ cʌñʌ cheʼ bʌ tsiʼ wen ñaʼta jiñi versículo: «Utsʼatʌch cheʼ wen tsajilonla yicʼot mi lac wʌn chajpan chuqui mi caj lac mel. Wʌle, añix baqui mic tsʼijbun chuqui mi caj c mel ti jujumpʼejl qʼuin, miʼ coltañon chaʼan wen chajpʌbilon yicʼot chaʼan mach ti wiʼilic mij cʌy yom bʌ melol».

Cristina miʼ yʌl: «Tsiʼ cʌyʌyon c ñoxiʼal yicʼot chʌntiquil calobilob». ¿Baqui bʌ principio tsiʼ colta? Proverbios 17:17 miʼ yʌl: «Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla tiʼ pejtelel ora. Junlajalʌch bajcheʼ lac piʼʌl baʼ ora woli la cubin wocol». Tiʼ sʌcla i coltʌntel ti hermanojob. ¿Bajcheʼ tsaʼ ujti? «Jiñi camigojob cabʌl bajcheʼ tsiʼ coltayoñob. An tsaʼ bʌ i chʼʌmbeyoñob lon majlel bʌlñʌcʼʌl tac yicʼot ñichteʼ. Cabʌl camigojob tsaʼ bʌ i coltayon quicʼot calobilob cheʼ bʌ uxsujtel tsaʼ j qʼuextan lon c bʌ ti otot. An juntiquil tsaʼ bʌ i coltayon c taj c troñel. Jiñi camigojob maʼañic tsiʼ bajñel cʌyʌyoñob».

Diana, tsaʼ bʌ lac ñaxan alʌ, tsiʼ taja i chʼijiyemlel jaʼel. Miʼ yʌl chaʼan cʼajalto i chaʼan bajcheʼ tsiʼ yubi i bʌ cheʼ bʌ tsiʼ ñusa pejtelel jiñi wocol: «Jiñi j cuxtʌlel lajal bajcheʼ jumpʼejl jach película choncol bʌ ti ñumel, i maʼañic chuqui miʼ mejlel c mel». Jumpʼejl texto tsaʼ bʌ i colta jiñʌch Salmo 68:6: «Dios miʼ yʌqʼueñob i chumlib jini chʼijiyemoʼ bʌ». Diana miʼ yʌl: «Cujil chaʼan jiñi versículo mach cojach woli (yʌquel) i yʌl chaʼan Dios miʼ yʌqʼueñonla la cotot baʼ mi lac chumtʌl. Tsaʼ cʼoti c ñaʼtan chaʼan Dios miʼ yʌqʼueñon jumpʼejl c chumlib tiʼ yorganización baqui mic taj c tijicñʌyel, chuqui tac com yicʼot temel mi cajñel quicʼotob muʼ bʌ i cʼuxbiñob Jehová. Pero cujil jeʼel chaʼan yom mic ñaxan lʌcʼtesan c bʌ ti Dios mi lʌcʼʌl com ajñel quicʼot yambʌlob. Jiñi Salmo 37:4 tsiʼ coltayon j qʼuel jiñi. Miʼ yʌl: ‹Yom tijicñayet ti lac Yum. Mi caj i yʌqʼueñet chuqui yom a pusicʼal›».

Diana miʼ yujtesan i tʼan: «Tsaʼ cʼoti c ñaʼtan chaʼan yomʌch mic ñumen lʌcʼtesan c bʌ ti Jehová. Maʼañic yambʌ ñumen ñuc bʌ bajcheʼ Jehová. Tsaʼ c tsʼijbu chuqui tac miʼ mejlel c mel quicʼot yambʌlob chaʼan mic taj camigojob cheʼ bʌ yilal i melbalob bajcheʼ miʼ mulan Dios. Tsaʼ j cʌñʌ chaʼan yom mij qʼuel jiñi wem bʌ tiʼ tojlel yambʌlob yicʼot mic ñusʌbeñob i sajtemal».

La cujil chaʼan jiñi muʼ bʌ i melbeñob i yeʼtel Dios xmulilob jaʼel. Jiñi wocol tac muʼ bʌ i ñusan wiñicob xʼixicob (quixtañujob), mucʼʌch i ñusañob jaʼel jiñi Testigojob. Pero muʼ bʌ i jacʼob jiñi cʌntesa tac am bʌ ti Biblia miʼ chaʼleñob wersa cheʼ bajcheʼ miʼ mejlelob chaʼan miʼ coltañob yambʌlob. Mi an laj camigojob cheʼoʼ bʌ bajcheʼ jiñi jiñʌch ñumen wem bʌ. Pero ¿muʼ ba i mejlel i coltañonla jiñi principio tac tiʼ pejtelel lac wocol maʼañic bʌ i tsʼʌcal, bajcheʼ jumpʼejl cʼamʌjel o cheʼ bʌ miʼ chʌmel juntiquil ti lac familia?