Diana, tsaʼ bʌ lac ñaxan alʌ, miʼ yʌl chaʼan tsaʼ caji i yubin chaʼan jiñi i cʌlʌx pensal tsiʼ xiqʼui chaʼan miʼ wen chaʼlen lembal. Jiñi Biblia maʼañic miʼ yʌl chaʼan mach yomic mi lac tsʼitaʼ jap lembal, pero mucʼʌch i yʌl: «Mach a piʼlen majlel jiñi [xcʌlʌx jap] vinojob» (Proverbios 23:20). Jiñi wen jap lembal miʼ yʌcʼ cʼamʌjel, i an i jeme familia tac yicʼot ti jujumpʼejl jab an i tsʌnsa cabʌl quixtañu. Cheʼ muqʼuic i jacʼob jiñi ticʼojel am bʌ ti Biblia, mach cheʼic miʼ yujtelob bajcheʼ jiñi.

Diana cheʼʌch tsiʼ mele (chaʼle), ili ora miʼ yʌl: «Tsaʼ cʼoti c ñaʼtan chaʼan jiñi lembal maʼañic miʼ jisan chuqui mij cʼojoʼtan. Tsaʼ c jacʼʌ jiñi wem bʌ ticʼojel am bʌ ti Filipenses 4:6, 7: ‹Mach mi laʼ chaʼlen tsic pusicʼal [...] tiʼ pejtelel chuqui tac miʼ yujtel subenla Dios›. Ti jujumpʼejl acʼʌlel, cheʼ cʌlʌxix chuqui miʼ tilel tic pensal, mic suben Jehová bajcheʼ yubil mi cubin: Jiñi c michʼajel, c chʼijiyemlel yicʼot cheʼ maʼañix mic ñaʼtan chuqui yom mic mel... i mij cʼajtiben chaʼan miʼ yʌqʼueñon wem bʌ c pensar. I cheʼ tiʼ yijcʼʌlel, mic chaʼlen wersa chaʼan maʼañic mic chʌn ñaʼtan jiñi muʼ bʌ i yʌqʼueñon c chʼijiyemlel. Jehová tsiʼ coltayon chaʼan cojach mic ñaʼtan chuqui am bʌ c chaʼan i mach jiñic maʼan bʌ c chaʼan. Tsaʼ cʌlʌ chaʼan maʼañic baʼ ora mi caj c chaʼ japeʼ come mij qʼuel ti ñuc jiñi ñʌchʼtʌlel tsaʼ bʌ c taja, i mach comic c chaʼ sʌt».

Jiñi tsʼiʼlel ñumento miʼ yʌcʼ wocol bajcheʼ yan tac bʌ. Chaʼan maʼañic mi lac yajlel ti jiñi wocol, jiñi principio miʼ mejlel i coltañonla come miʼ pʌsbeñonla chuqui tac muʼ bʌ mejlel i yʌcʼonla ti yajlel, bajcheʼ juntiquil muʼ bʌ i tech i pʌsben yambʌ chaʼan miʼ poj mulan o tiʼ qʼuelol pornografía. Juntiquil wiñic i cʼabaʼ Samuel miʼ yʌl: «Mach wocolic maʼ pʌsben yambʌ chaʼan maʼ mulan... An i tajol mi muqʼuicto c mulan, pero joñon mij qʼuel chaʼan mucʼʌch i mulañon, i ñumen utsʼatax yubil bajcheʼ jiñi». Pero ti wiʼil, tsaʼ caji ti subentel chaʼan majqui jach miʼ pʌsben chaʼan miʼ mulan, anquese an i tajol mach jiñic yom bʌ i pʌs, Samuel tsaʼix caji yʌlo mel, pero jiñi i conciencia tsaʼ caji i ticʼlan. Ili ora miʼ yʌl: «Cheʼ majqui jach maʼ pʌsben chaʼan maʼ mulan, an i wocolel, jatet jach maʼ bajñel ñaʼtan a bʌ».

Samuel tsiʼ pejca jumpʼejl temaj chaʼan bʌ xcolelob yaʼ ti página chaʼan Internet www.pr418.com. Cheʼ jaʼel tsiʼ ñaʼta jiñi Proverbios 20:11, baqui miʼ yʌl: «Winicob xʼixicob yicʼot jaʼel alʌlob miʼ yʌcʼob i bʌ ti cʌjñel tiʼ melbalob. Tsiquil ti lac melbal mi sʌconla mi tojonla». ¿Bajcheʼ tsiʼ colta ili ticʼojel? Samuel tsaʼ cʼoti i ñaʼtan chaʼan mach sʌquic mi tojic. Tsiʼ chaʼ alʌ: «Tsaʼ j cʌñʌ chaʼan mi juntiquil xcolel miʼ mel bajcheʼ jiñi, mach weñic bʌ ñoxiʼal miʼ cajel. I tsaʼ caji c ñaʼtan bajcheʼ yubil mi caj i yubin quijñam cheʼ ñujpuñemoñiquix cheʼ muqʼuic i qʼuel chaʼan woli (choncol) c pʌsben yambʌ xʼixic chaʼan mic mulan. Tsaʼ cʼoti c ñaʼta chaʼan jiñi añʌch i wocolel. Anquese mach wocolic tiʼ melol jiñi, mach yom i yʌl chaʼan jiñʌch wem bʌ». Samuel tsiʼ qʼuexta i melbal, i jiñi tsiʼ colta chaʼan maʼañic miʼ yajlel ti tsʼiʼlel.

Jiñi i wocol Antonio ñumen tsʌtsto: Miʼ wen mulan i qʼuel pornografía. Anquese mucʼʌch i wen cʼuxbin i yijñam, miʼ chʌn yajlel ti jiñi wocol. Miʼ yʌl chaʼan tsaʼ bʌ i wen colta jiñʌch 1 Pedro 5:8: «Ñaʼtanla pañimil. Chʌcʌ qʼuele laʼ bʌ, come jini xiba, jini laʼ contra, woli ti pam ñumel cheʼ bajcheʼ colem bajlum woli bʌ ti jujuj tʼan. Woliʼ chijtan i colojm chaʼan miʼ cʼux». Antonio miʼ yʌl: «Baqui jach mi lac taj laj qʼuel jiñi pornografía muʼ bʌ i mejlel ti cʌytʌl ti lac pensar. Jiñi texto tsiʼ coltayon c ñaʼtan baqui tilem jiñi wocol. Yom ti orajach mic ñaʼtan chaʼan jiñi pornografía tilemʌch ti xiba. Waʼli, tsaʼ cʼoti c ñaʼtan chaʼan cojach Jehová miʼ mejlel i coltañon c taj wem bʌ c ñaʼtʌbal yicʼot bajcheʼ mi caj j cʌntan c pensar, c pusicʼal yicʼot c ñujpuñel». Antonio tsiʼ taja i cʼʌjñibal bʌ i coltʌntel i tsaʼ mejli i cʌy jiñi mach bʌ weñic i melbal. Wocolix i yʌlʌ jiñi, tsaʼ mejli i tsʼaʼlen jiñi ñumen tsʌts bʌ wocol.

Tsaʼix laj cʌñʌ chaʼan jiñi Biblia miʼ chʼʌm tilel ticʼojel tac muʼ bʌ mejlel i coltañonla chaʼan maʼañic mi lac yajlel ti tsʌts tac bʌ wocol. Pero ¿ixcu miʼ tsaʼ ñumen tsʌtsʼa jiñi wocol i maʼañic mi lac ñaʼtan bajcheʼ mi caj lac tojʼesan? Mi caj laj qʼuel bajcheʼ miʼ mejlel i coltañonla i Tʼan Dios ti jiñi wocol tac.