ÑAʼTANCU chaʼan añet ti jumpʼejl museo, i cabʌl chuqui ñoxix bʌ maʼ taj a qʼuel. Lʌcʼʌ tiʼ pejtelel jojweñix yicʼot wolix (choncolix) i yʌsiyel majlel. An mach bʌ wen tsʼʌcʌl taquix. Pero maʼ taj a qʼuel wen tsʼʌcʌlto bʌ. Wen tsiquil chaʼan utsʼatax melbil. Cheʼ jiñi, maʼ cʼajtiben jiñi woli (yʌquel) bʌ i pʌsbeñet ñumel: «¿Jim ba ñumen tsijibto bʌ?». I miʼ jacʼbeñet: «Maʼañic, jiñʌch jiñi ñumen ñoxix bʌ yicʼot maʼañic bʌ wis tojʼesʌbil». I maʼ chaʼ cʼajtiben: «¿Am ba baqui tsaʼ wen lojti?». Pero miʼ chaʼ jacʼbeñet: «Maʼañic, jiñʌch am bʌ i ñumen taja wocol bajcheʼ icʼ yicʼot jaʼal, yicʼot am bʌ i ñopoyob i jisan». Cheʼ jiñi, tajol maʼ ñaʼtan: «Pero ¿bajcheʼ tsiʼ meleyob cheʼ jiñi?».

Jiñi Biblia lʌcʼʌ lajalʌch bajcheʼ jiñi tsaʼ bʌ ujti la cʌl. Jumpʼejlʌch ñoxix bʌ libro, ñumento bajcheʼ yan tac bʌ. Isujm, añʌch yan tac bʌ libro wajalix bʌ tsaʼ mejli, pero lajalʌch bajcheʼ jiñi yan tac bʌ mach bʌ ñoj wen taquix come wolix i jilel majlel tiʼ caj i jabilel. Jumpʼejl ejemplo, an libro tac muʼ bʌ i yʌl chaʼan ciencia tsaʼix bʌ qʼuextʌnti, come loqʼuemix yan tac bʌ añix bʌ bajcheʼ miʼ pʌs chaʼan isujm chuqui miʼ yʌl. Jiñi muʼ bʌ i yʌjlel chaʼan tac jiñi tsʼac, an i tajol ñumen an i wocolel, i mach jiñic chuqui wem bʌ. Cabʌl libro tac bajcheʼ iliyi wajalix bʌ melbil, mach tsʼʌcʌlix come tʼox sajtem taquix o asiyemix.

Pero jiñi Biblia mach lajalic bajcheʼ tac jiñi. Ñumeñix ti 3,500 jab cheʼ tsaʼ caji ti mejlel, pero tsʼʌcʌlto cʼʌlʌl ili ora. Anquese cabʌl jab tajbil i chaʼan wocol, an i lon puluyob, tsiʼ mʌctayob tiʼ tsʼijbuntel yicʼot tsiʼ juʼsʌbeyob i cʼʌjñibal, maʼañic qʼuextʌyem chuqui tac miʼ yʌl. Anquese ili ora cabʌl chuqui tsijib cʌmbil, jiñi Biblia miʼ pʌs chaʼan wʌn albilix i chaʼan chuqui woli bʌ i cʌjñel ili ora  (qʼuele jiñi recuadro «¿Ñoxix ba, o miʼ wʌn al chaʼan bʌ ili ora?»).

Pero tajol maʼ cʼajtiben a bʌ: «¿Cʼʌlʌl anto ba i cʼʌjñibal jiñi ticʼojel tac am bʌ ti Biblia?». Chaʼan maʼ tajben i jacʼbal, ñaʼtancu jiñi tsʌts tac bʌ wocol muʼ bʌ lac ñusan ili ora. ¿Baqui bʌ ñumen bʌbʌqʼuen tac? Tajol jiñi guerra, i bibʼesʌntel ili pañimil (mulawil), jiñi tsʌnsa yicʼot xujchʼ o lot. Wʌle, wen qʼuele jiñi cʌntesa tac muʼ bʌ i pʌs jiñi Biblia, i cʼajtiben a bʌ: «¿Ñumen wem ba an ili pañimil cheʼ muqʼuic i laj chʼʌmob ti ñuc jiñi wen tac bʌ melbalʌl?».

I CʼUXBINTEL JIÑI ÑΛCHʼTΛLEL

«Tijicñayob jini muʼ bʌ i ñʌchʼchocoñob xleto, come mi caj i sujbelob tiʼ yalobil Dios» (Mateo 5:9). «Chaʼlenla wersa chaʼan ñʌchʼʌl mi laʼ wajñel yicʼot pejtelel winicob xʼixicob» (Romanos 12:18).

PʼUNTAYA YICʼOT I ÑUSΛNTEL MULIL

«Tijicñayob muʼ bʌ i chaʼleñob pʼuntaya, come mi caj i pʼuntʌntelob» (Mateo 5:7). «Yom mi laʼ coltan laʼ piʼʌlob tiʼ yutslel laʼ pusicʼal. Pʼuntan laʼ piʼʌlob. Ñusʌben laʼ bʌ laʼ mul cheʼ bajcheʼ Dios tsiʼ ñusʌbeyetla laʼ mul ti Cristo» (Efesios 4:32).

CHEʼ JUNTEMELOB JIÑI WIÑICOB XʼIXICOB

«Loqʼuem jach ti juntiquil winic Dios tsiʼ laj mele winicob ti jujunchajp chaʼan miʼ pam chumtʌlob tiʼ pejtelel pañimil» (Hechos 17:26). «Junlajal miʼ qʼuel winicob Dios. Tiʼ pejtelel lum Dios miʼ qʼuel ti utsʼat jini muʼ bʌ i bʌcʼñañob, muʼ bʌ i chaʼleñob chuqui toj» (Hechos 10:34, 35).

I QʼUEJLEL TI ÑUC ILI LUM

«Lac Yum Dios tsiʼ pʌyʌ jini winic. Tsiʼ yʌqʼue tiʼ wenta jini pʌcʼʌbʌl i cʼabaʼ Edén chaʼan miʼ yʌcʼñan, chaʼan miʼ cʌntan» (Génesis 2:15). Dios mi caj i «jisan jini muʼ bʌ i jisañob pañimil» (Apocalipsis [Revelación] 11:18).

I TSʼAʼLENTEL JIÑI I CΛLΛX MULΛNTEL CHUBΛʼAÑΛL YICʼOT TSʼIʼLEL

«Chʌcʌ qʼuele laʼ bʌ chaʼan maʼanic chuqui tac mi laʼ tsʌjyun [mulan]. Mach cuxulobic winicob chaʼan ti cabʌl i chubʌʼan» (Lucas 12:15). «Mach yomic mi laʼ chaʼlen tsʼiʼlel, mi chuqui tac biʼbiʼ tiʼ melol, mi i tsʌjyuntel chubʌʼañʌl, mach yomic miʼ yujtel ti laʼ tojlel pejtelel iliyi, come i chaʼañetla Dios» (Efesios 5:3, Jiñi tsijiʼ bʌ wen tʼañ chaʼañ estudio).

I MELOL CHUQUI UTSʼAT YICʼOT TSΛTS BΛ EʼTEL

«Tiʼ pejtelel lojon c pusicʼal com c mel lojon chuqui utsʼat» (Hebreos 13:18). «Jini tsaʼ bʌ i chaʼle xujchʼ mach i chʌn chaʼlen. Laʼ i chaʼlen eʼtel» (Efesios 4:28).

I COLTΛNTEL JIÑI YOMOʼ BΛ COLTΛNTEL

«Ñuqʼuesʌbeñob i pusicʼal jini cʼuñoʼ bʌ. Coltanla jini mach bʌ añobic i pʼʌtʌlel. Cuchbenla i sajtemal pejtelel winicob» (1 Tesalonicenses 5:14). Yom mi laj «coltan mebaʼ alobob yicʼot mebaʼ xʼixicob» cheʼ miʼ ñusañob wocol (Santiago 1:27).

Jiñi Biblia mach cojach miʼ yʌl jiñi principio tac, miʼ subeñonla jaʼel bajcheʼ yom mi laj qʼuel ti ñuc yicʼot mi lac mel bajcheʼ miʼ yʌl. Cheʼ muqʼuic i jacʼob jiñi wiñicob xʼixicob (quixtañujob) muʼ bʌ i yʌl jiñi Biblia, tajol mach cʌlʌxic wocol. Ti isujm, jiñi ticʼojel tac am bʌ ti Biblia ñumen an i cʼʌjñibal  ili ora. Pero ¿chuqui miʼ mejlel i mel ti a tojlel jiñi Biblia?

Jiñi wiñic wen am bʌ i ñaʼtʌbal ñumen wʌʼ ti Pañimil, tsiʼ yʌlʌ: «I ñaʼtʌbal Dios miʼ tsictiyel tiʼ yalobilob [o melbal]» (Mateo 11:19). ¿Mach ba isujmicʌch maʼ wʌl ili tʼan? Miʼ mejlel lac ñaʼtan mi tojʌch jumpʼejl ticʼojel o maʼañic, cheʼ mi laj qʼuel mi añʌch i wenlel tiʼ jacʼol. Jin chaʼan, i tilelʌch cheʼ maʼ cʼajtiben a bʌ: «Mi añʌch i cʼʌjñibal jiñi Biblia, ¿mach ba yomʌch mij qʼuelben i wenlel tij cuxtʌlel? ¿Tiʼ sujm ba miʼ mejlel i coltañon c tojʼesan jiñi wocol woli bʌ c ñusan?». Laʼ laj qʼuel jumpʼejl ejemplo.

Diana * wen utsʼatax bajcheʼ lon chumul yicʼot wen tijicña, pero ti ora tsaʼ tili tsʌts tac bʌ wocol tiʼ tojlel: Jiñi xchʼoc bʌ i yalobil tsaʼ chʌmi (sajti), tsaʼ jejmi i ñujpuñel i tsaʼ caji i taj wocol chaʼan taqʼuin. Diana miʼ yʌl: «Mach cujilix majquiyon tsaʼ cubi, tsaʼ c sʌtʌ quixicʼal, maʼañix c ñoxiʼal mi cototic. Tsaʼ c luʼ sʌtʌ: Maʼañix j cʼʌjñibal tsaʼ cubi, tsaʼ jili c pʼʌtʌlel yicʼot c pijtaya».

Diana tsaʼ cʼoti i ñaʼtan chaʼan isujmʌch muʼ bʌ i yʌl ili tʼan: «I ñajtlel lojon c jabilel jiñʌch lujumpʼejl i chʌncʼal (70). Mi pʼʌtʌlon lojon, mic taj lojon chʌncʼal jab. Mic ñusan lojon tsʌts tac bʌ eʼtel yicʼot  wocol. Miʼ jilel lojon c jabilel ti ora. Mic chʌmel lojon» (Salmo 90:10).

Cheʼ bʌ Diana tsiʼ ñusa pejtelel jiñi wocol, tiʼ sʌcla i coltʌntel ti Biblia, i tsaʼʌch i taja i wenlel. Cheʼ bajcheʼ mi caj laj qʼuel yaʼ ti uxpʼejl temaj talto bʌ, cabʌlob an i tajbeyob i wenlel cheʼ tsiʼ yʌcʼʌyob ti ñuc tiʼ cuxtʌlel jiñi ticʼojel tac am bʌ ti Biblia. Qʼuelbil i chaʼañob chaʼan jiñi Biblia lajalʌch bajcheʼ jiñi tsaʼ bʌ la cʌlʌ tiʼ tejchibal maʼañic bʌ chuqui an i chaʼle. Mach wis lajalic bajcheʼ yan tac bʌ libro tsaʼix bʌ jili i cʼʌjñibal tiʼ caj añix ora tsaʼ mejli. ¿Chaʼan ba wen qʼuexelʌch melbil jiñi Biblia bajcheʼ yan tac bʌ libro? ¿Jim ba Dios tajol tsaʼ bʌ i yʌcʼʌ ti tsʼijbuntel, i mach wiñicobic? (1 Tesalonicenses 2:13).

Tajol maʼ ñaʼtan jaʼel chaʼan machʌch añic miʼ jalijel laj cuxtʌlel yicʼot chaʼan cabʌl jax wocol. Cheʼ bʌ maʼ ñusan cabʌl wocol, ¿baqui maʼ sʌclan i ñuqʼuesʌntel a pusicʼal, a coltʌntel yicʼot ticʼojel?

Laʼ laj qʼuel uxchajp bajcheʼ miʼ mejlel ti cʼʌjñibʌyel jiñi Biblia yicʼot miʼ coltañet ti a cuxtʌlel. Miʼ mejlel i cʌntesañet chaʼan:

1. Maʼ tʌtsʼ jiñi wocol tac muʼ bʌ i mejlel a taj.

2. Maʼ tojʼesan jiñi wocol tac muʼ bʌ i tilel.

3. Maʼ lʌtʼ jiñi wocol tac mach bʌ mejlic ti qʼuextʌyel.

Jiñi yambʌ temaj tac mi caj i tsictesan ili uxchajp.