JIÑI BIBLIA MACH JUMPʼEJLIC LIBRO CHAʼAN CIENCIA, PERO MIʼ WΛN TSICTESAN WOLI BΛ I QʼUEJLEL ILI ORA. LAʼ LAJ QʼUEL EJEMPLO TAC.

¿Am ba majqui tsiʼ mele jiñi panchan yicʼot pañimil?

Ti wajali jiñi wen cʌmbil bʌ científicojob tsiʼ yʌlʌyob chaʼan maʼañic. Pero ili ora, añix cabʌl muʼ bʌ i yʌlob chaʼan añʌch majqui tsiʼ mele. Jiñi Biblia cheʼʌch wʌn albil i chaʼan (Génesis 1:1).

¿Bajcheʼ miʼ tilel jiñi jaʼ?

Ti wajali maxto cʌmbilic bajcheʼ miʼ tilel jiñi jaʼ, pero añix cabʌl jabil wʌn albil yaʼ ti Biblia bajcheʼ miʼ yujtel iliyi. «Pejtel i bijlel colem jaʼ miʼ majlel ti colem ñajb, pero mach bujtʼic jini ñajb. Yaʼ baʼ miʼ majlel jaʼ yaʼ miʼ chaʼ sujtel» (Eclesiastés 1:7).

¿Muʼ ba i xucʼu jilel majlel jiñi an tac bʌ ti panchan?

Cheʼ bʌ ti jabil 400-301 cheʼ maxto tilemic Cristo (m.t.C.), juntiquil científico i cʼabaʼ Aristóteles, tsiʼ yʌlʌ chaʼan cojach ili Lum muʼ bʌ i jilel majlel, pero jiñi an tac bʌ ti panchan maʼañic. Cabʌl jab tsiʼ ñopoyob bajcheʼ jiñi, jinto cheʼ bʌ jiñi científicojob tsaʼ caji i yʌlob cheʼ ti jabil 1,800 tilel chaʼan pejtelel chuqui an, bajcheʼ am bʌ wʌʼ ti Lum yicʼot ti panchan, miʼ jilel majlel. Juntiquil tsaʼ bʌ i chaʼle coltaya chaʼan cheʼ miʼ ñaʼtʌntel bajcheʼ iliyi jiñʌch jiñi científico lord Kelvin, tsaʼ bʌ i qʼuele muʼ bʌ i yʌl jiñi Biblia chaʼan jiñi panchan yicʼot ili Lum: «Miʼ caj ti tsuculiyel cheʼ bajcheʼ bujcʌl» (Salmo 102:25, 26). Kelvin tsiʼ ñopo cheʼ bajcheʼ miʼ yʌl jiñi Biblia, chaʼan Dios miʼ mejlel i mʌctan chaʼan maʼañic miʼ jilel chuqui melbil (pʌtbil) tac i chaʼan (Eclesiastés 1:4).

¿Bajcheʼ chucul jiñi planeta tac?

Aristóteles tiʼ tsictesa chaʼan xotol tac yaʼ baqui chucul jujumpʼejl planeta, i chaʼan jiñi Lum an ti ojlil. Cheʼ ti jabil 1701-1800, jiñi científicojob tsiʼ ñopoyob chaʼan maʼañic baqui chucul jiñi planeta tac. Pero yaʼ ti libro i chaʼan Job, tsaʼ bʌ ujti ti tsʼijbuntel cheʼ ti 1473 m.t.C., miʼ yʌl chaʼan jiñi tsaʼ bʌ i Meleyonla woliʼ «tsʼuychocon pañimil yaʼ baʼ maʼanic chucul» (Job 26:7).

JIÑI BIBLIA MACH JUMPʼEJLIC JUN MUʼ BΛ I YΛL CHAʼAN TSʼAC, PERO MIʼ CHʼΛM TILEL PRINCIPIO TAC BAʼ MIʼ PΛS CHAʼAN WΛN ÑAʼTΛBILIX JIÑI YOM TAC BΛ MELOL ILI ORA CHAʼAN LAJ CʼOCʼLEL.

Parte baqui yom miʼ yajñel jiñi cʼamoʼ bʌ.

Jiñi i Mandar Moisés tsiʼ yʌlʌ chaʼan jiñi añoʼ bʌ lecoj bʌ i tsoy ñajt yom miʼ yajñelob tiʼ tojlel jiñi cʼocʼoʼ bʌ. Ili mandar bej anto i cʼʌjñibal ili ora, i an jaxto cheʼ bʌ 700 jab cheʼ tsaʼ caji i yʌcʼob ti ñuc, cheʼ bʌ tsaʼ tejchi tsʌts tac bʌ cʼamʌjel muʼ bʌ i pam pujquel (capítulo 13 yicʼot 14 i chaʼan Levítico).

Juntiquil muʼ bʌ i tʌl chʼujlelʌl yom miʼ poc i cʼʌb.

An jaxto cheʼ bʌ 150 jab i ñumel cheʼ jiñi doctorob maʼañic miʼ pocob i cʼʌb cheʼ miʼ yujtel i tʌlob juntiquil chʼujlelʌl, i ti wiʼil miʼ majlel i qʼuelob yambʌ xcʼamʌjel, jin chaʼan cabʌl majqui tsaʼ chʌmi. Pero yaʼ tiʼ Mandar Moisés tsiʼ yʌlʌ chaʼan juntiquil muʼ bʌ i tʌl chʼujlelʌl bibiʼ miʼ cʌytʌl. Tsaʼ ajli chaʼan yom miʼ wen sʌqʼuesan i bʌ ti jaʼ cheʼ bajcheʼ albil ti mandar. Tiʼ sujm, iliyi wen añʌch i cʼʌjñibal chaʼan laj cʼocʼlel (Números 19:11, 19).

Jiñi quixtañujob yom wen miʼ mucob i taʼ.

Ti jajabil, ñumen ti ojlil millón alʌlob miʼ chʌmelob tiʼ caj jaʼtaʼ, i jiñʌch ñumen tiʼ caj cheʼ lʌcʼʌl añob baʼan i taʼ jiñi quixtañujob. Tiʼ Mandar Moisés tsiʼ yʌlʌ chaʼan ñajt baʼ yom miʼ chaʼleñob taʼ jiñi quixtañujob i wen miʼ mucob (Deuteronomio 23:13).

I yorajlel tsep pʌchʌlel.

Tiʼ Mandar Dios tsaʼ ajli chaʼan juntiquil alʌl jinto yom miʼ tsepbentel i pʌchʌlel cheʼ añix 8 qʼuin i yila pañimil (Levítico 12:3). I chʼichʼel juntiquil alʌl jinto cheʼ añix jumpʼejl semana i chʼocʼan miʼ tiquin ti wen. Ti wajali, cheʼ maxto añic tsʼac tac, ñumen ti jumpʼejl semana miʼ pijtʌntel chaʼan miʼ tsepbentel i pʌchʌlel juntiquil alʌl chaʼan maʼañic miʼ cʼamʼan.

Cheʼ wen mi la cubin lac bʌ miʼ coltañonla ti laj cʼocʼlel.

Jiñi doctorob yicʼot científicojob miʼ yʌlob chaʼan cheʼ tijicñayonla, an lac pijtaya, mi la cʌqʼueñob wocolix i yʌlʌ yambʌlob yicʼot mi lac ñusʌbeñob i mul weñʌch chaʼan laj cʼocʼlel. Jiñi Biblia miʼ yʌl: «I tijicñʌyel lac pusicʼal i wentajʌch wen bʌ tsʼac. I chʼijiyemlel lac pusicʼal miʼ tiquesan lac bʌcʼtal» (Proverbios 17:22).