¿MUCʼɅCH BA I MEJLEL A WɅN YAJCAN CHUQUI A WOM TI TALTO BɅ QʼUIN? An muʼ bʌ i yʌlob chaʼan wʌn ñaʼtʌbilix chuqui mi caj i yujtel tiʼ tojlelob, i yambʌ miʼ yʌlob chaʼan jiñi i cuxtʌlelob añʌch tiʼ wenta Dios. Jin chaʼan, cheʼ bʌ maʼañic miʼ tsʼʌctiyel muʼ bʌ i lon ñaʼtañob, mucʼ jax i yʌlob: «Wʌn ñaʼtʌbilix chaʼan cheʼʌch mi caj i yujtel».

An muʼ bʌ i tajob i chʼijiyemlel come bej anto jontolil yicʼot ticʼlʌntel ila ti pañimil. Tajol miʼ ñopob chumtʌl ti utsʼat, pero maʼañic miʼ mejlelob tiʼ caj jiñi guerra, xujchʼ, cʼamʌjel, icʼ jaʼal yicʼot yan tac bʌ wocol. Ti wiʼil, miʼ cʼotel i ñaʼtañob chaʼan maʼañix i cʼʌjñibal cheʼ miʼ chaʼleñob wersa.

Isujmʌch, jiñi ñaʼtʌbil bʌ lac chaʼan miʼ mejlel ti qʼuextʌyel (Eclesiastés 9:11, 12). Pero mucʼʌch i mejlel lac yajcan chuqui la com ti talto bʌ qʼuin. Cheʼ jaʼel, jiñi Biblia miʼ cʌntesañonla chaʼan an ti lac wenta laj cuxtʌlel. ¿Chucoch mi la cʌl iliyi?

Cheʼ bʌ jiñi tejclum Israel lʌcʼʌlix mi caj i yochel yaʼ ti Lum tsaʼ bʌ wʌn Subentiyob, Moisés tsaʼ subenti ti Dios: «Tsaʼix c pʌsbeyetla i bijlel laʼ cuxtʌlel baʼan bendición, yicʼot i bijlel chʌmel baʼan wocol. Jini chaʼan yajcan a cuxtʌlel chaʼan chʌn cuxulet, yicʼot a walobilob. Cʼuxbin lac Yum Dios. Chʌn nichʼtʌben i tʼan, chʌn tsajcan» (Deuteronomio 30:15, 19, 20).

Dios tsiʼ colta loqʼuel jiñi israelob yaʼ ti Egipto i tsiʼ yʌcʼʌ chaʼan libre miʼ yajñelob yicʼot tijicña miʼ chumtʌlob ti jiñi Lum tsaʼ bʌ wʌn Subentiyob. Pero jiñi bendición tac mach cheʼic jach mi caj i bajñel cʼotel. Yomʌch miʼ ‹yajcañob i cuxtʌlel›. ¿Bajcheʼ? Yom miʼ cʼuxbiñob Dios, miʼ ñʌchʼtʌbeñob i tʼan yicʼot miʼ chʌn tsajcañob.

Jiñʌch yom bʌ maʼ mel jaʼel, jiñi muʼ bʌ a yajcan a mel miʼ mejlel i yʌqʼueñet a wenlel o maʼañic. Mi tsaʼ yajca a cʼuxbin Dios, a ñʌchʼtʌben i tʼan yicʼot a chʌn tsajcan, mi caj a taj jiñi cuxtʌlel mach bʌ añic miʼ jilel ti jumpʼejl paraíso ila ti Pañimil. Pero ¿chuqui yom i yʌl jujunchajp iliyi?

Jiñi apóstol Juan tiʼ tsʼijbu chaʼan Dios «cʼuxbiyajʌch», jiñʌch jiñi ñumen ñuc bʌ i melbal an i chaʼan (1 Juan 4:8). Jesús yujil chaʼan isujmʌch iliyi, cheʼ bʌ tsaʼ cʼajtibenti baqui bʌ jiñi mandar ñumen ñuc bʌ, tsiʼ yʌlʌ: «Cʼuxbin a Yum Dios tiʼ pejtelel a pusicʼal, tiʼ pejtelel a chʼujlel [«cuxtʌlel», TNM], tiʼ pejtelel a ñaʼtʌbal» (Mateo 22:37). Jin chaʼan, mi la camigojʌch Jehová tiʼ sujm, yomʌch chucul ti laj cʼuxbiya tiʼ tojlel, mach tiʼ cajic jach bʌqʼuen o chaʼan mi lac toʼol jacʼben i tʼan. Pero ¿chucoch yom mi laj cʼuxbin Dios?

Jiñi i cʼuxbiya Jehová tiʼ tojlel quixtañujob lajalʌch bajcheʼ muʼ bʌ i yubin jiñi tatʌlob tiʼ tojlel i yalobilob. Anquese jiñi tatʌlob xmulilobʌch, miʼ chaʼleñob wersa i cʌntesañob i yalobil, miʼ ñuqʼuesʌbeñob i pusicʼal, i wen jach bajcheʼ miʼ coltañob yicʼot miʼ ticʼob come yomob chaʼan tijicña miʼ yajñelob i maʼañic miʼ tajob wocol.  Pero jiñi tatʌlob yomob chaʼan miʼ cʼuxbintelob tiʼ yalobilob jaʼel, miʼ jacʼbentelob i tʼan i miʼ chʼʌmbeñob isujm chaʼan pejtelel chuqui miʼ subentelob chaʼañobʌch i wenlel. Jin chaʼan, jiñi lac Tat am bʌ ti panchan mach bʌ xmulilic yom chaʼan mi laj cʼuxbin jaʼel i mi la cʌqʼuen wocolix i yʌlʌ chaʼan pejtelel chuqui aqʼuebil i chaʼañonla.

Cheʼ bajcheʼ tsaʼ ñaxan tsʼijbunti jiñi Biblia, jiñi tʼan ñʌchʼtan an i tajol miʼ cʼʌjñel bajcheʼ i «jacʼol». ¿Mach ba jiñic yom bʌ jiñi tatʌl tiʼ tojlel i yalobil cheʼ bʌ miʼ suben «ñʌchʼtañon»? Jin chaʼan, cheʼ mi lac ñʌchʼtʌben i tʼan Dios yaʼ ochem jaʼel cheʼ mi laj cʌn chuqui yom ti lac tojlel yicʼot mi lac mel. Ili ora, Dios maʼañix miʼ pejcañonla cheʼ bajcheʼ tsiʼ mele wajali, mi la com la cubiben i tʼan, yom mi lac pejcan jiñi Biblia yicʼot mi lac jacʼ chuqui miʼ yʌl (1 Juan 5:3).

Chaʼan miʼ pʌs chaʼan ñucʌch i cʼʌjñibal cheʼ miʼ ñʌchʼtʌbentel i tʼan Dios, Jesús tsiʼ yʌlʌ: «Mach cuxulobic winicob xʼixicob chaʼan jach waj pero ti jujumpʼejl tʼan muʼ bʌ i loqʼuel tiʼ yej Dios» (Mateo 4:4). Ñuc i cʼʌjñibal cheʼ mi laj cʼux lac waj, pero ñumen ñuc i cʼʌjñibal cheʼ mi lac weʼsan lac bʌ tiʼ chaʼan bʌ Dios. ¿Chucoch? Jiñi rey Salomón tiʼ tsictesa: «An i cʼʌjñibal taqʼuin, an i cʼʌjñibal lac ñaʼtibal, pero ñumen cabʌl i cʼʌjñibal lac ñaʼtibal. Miʼ chʌn coltañonla cheʼ maʼanix lac taqʼuin» (Eclesiastés 7:11, 12). Jiñi lac ñaʼtʌbal chʼoyol bʌ ti Dios yicʼot la cujil bʌ tiʼ tojlel miʼ mejlel i cʌntañonla ili ora yicʼot miʼ coltañonla lac taj jiñi bij chaʼan laj cuxtʌlel mach bʌ añic i jilibal.

Yaʼ ti yambʌ temaj tsaʼ lac taja ti tʼan ili tsaʼ bʌ i yʌlʌ Jesús: «Chʼoʼchʼoc i tiʼ, chʼoʼchʼoc i bijlel baʼ mi laʼ taj laʼ cuxtʌlel. Tsʼitaʼ jax jini muʼ bʌ i yochelob i taj i cuxtʌlel» (Mateo 7:13, 14). Chaʼan mi lac xʌn jiñi bij muʼ bʌ i pʌyonla majlel lac taj laj cuxtʌlel, mi lac mulan chaʼan juntiquil wen i cʌñʌ bʌ miʼ tojʼesañonla majlel. Jin chaʼan, mach yomic mi lac ñajtʼesan lac bʌ ti Dios (Salmo 16:8). Pero ¿bajcheʼ miʼ mejlel lac mel?

Tiʼ pejtelel ora cabʌl chuqui yom mi lac mel, i ñumen cabʌlto chuqui la com mel. Wen cabʌl chuqui mi lac mel i maʼañix mi lac tajben i yorajlel chaʼan mi lac ñaʼtan chuqui yom Dios chaʼan mi lac mel. Jiñi Biblia miʼ cʼajtesʌbeñonla: «Yom yʌxʌl laʼ wo cheʼ bajcheʼ jini añoʼ bʌ i pusicʼal. Tsajaletla ame mi laʼ ñusan qʼuin cheʼ bajcheʼ jini tontojoʼ bʌ. Tiʼ pejtelel qʼuin pʌsʌ laʼ bʌ ti utsʼat, come cabʌl woliʼ pʼojlel jontolil ti ili ora» (Efesios 5:15, 16). Cheʼ mi lac chʌn tsajcan Dios yom i yʌl chaʼan jin yom mi la cʌcʼ ti ñaxan bajcheʼ añonla la quicʼot (Mateo 6:33).

Anquese maʼañix miʼ mejlel a tojʼesan jiñi tsaʼix bʌ a mele, añʌch chuqui miʼ mejlel a mel chaʼan wen mi a wajñel yicʼot a familia ti jiñi talto bʌ qʼuin. Jiñi Biblia miʼ cʌntesañonla chaʼan Jehová, jiñi lac Tat am bʌ ti panchan, miʼ wen cʼuxbiñonla i miʼ subeñonla yom bʌ mi lac mel. Qʼuele chuqui tsiʼ yʌlʌ jiñi xʼaltʼan Miqueas:

«Tsaʼix i pʌsbeyet chuqui utsʼat tiʼ wut. Jini jach woliʼ cʼajtibeñet. Mele chuqui tac toj. Pʌsʌ i yutslel a pusicʼal yicʼot cʼuxbiya. Peqʼuesan a bʌ tiʼ tojlel a Dios» (Miqueas 6:8).

Ixcu jatet, ¿muʼ ba caj a tsajcan Dios? Mi cheʼʌchi, mi caj a taj jiñi bendición tac chajpʌbil bʌ i chaʼan tiʼ tojlel i yamigojob. An ti a wenta chuqui mi caj a yajcan.