Jiñi astrólogojob miʼ yʌlob chaʼan jiñi ecʼ, uw yicʼot jiñi planeta tac an i pʼʌtʌlel tiʼ tojlel wiñicob xʼixicob (quixtañujob). Chaʼan miʼ ñaʼtʌntel bajcheʼ yilal miʼ cajel juntiquil alʌl muʼ bʌ i yilan pañimil (chʼocʼan), jiñi astrólogojob miʼ qʼuelob bajcheʼ an chuqui tac an ti panchan.

Anquese jiñi astrología tsaʼ tejchi ti Babilonia, ili ora mucʼʌch i bej cʼʌjñel. An cabʌlob muʼ bʌ i ñopob chaʼan jiñi astrología yicʼot chuqui tac miʼ yʌlob. Pero ¿mucʼʌch ba i mejlel lac ñop chuqui miʼ yʌlob? Maʼañic. Laʼ laj qʼuel chucoch.

• Jiñi ecʼ tac yicʼot planeta tac maʼañic i pʼʌtʌlel ti quixtañujob cheʼ bajcheʼ miʼ lon al jiñi astrólogojob.

• Jiñi astrólogojob junlajal jach chuqui miʼ yʌlob, maʼañic chuqui wen qʼuexel.

• Jiñi astrólogojob miʼ chʌn ñaʼtañob chaʼan jiñi planeta tac miʼ wijlel tiʼ joytilel ili Lum i jiñʌch muʼ bʌ i chʼʌmob ti ñuc cheʼ an chuqui yomob i ñaʼtan, pero jiñi planeta tac miʼ chaʼlen wijlel tiʼ joytilel jiñi Qʼuin.

• Chaʼtiquil uxtiquil astrólogo mach junsujmic chuqui miʼ mejlel i suben juntiquil quixtañu.

• Miʼ yʌjlel chaʼan jiñi horóscopo miʼ yʌcʼ ti ñaʼtʌntel bajcheʼ yilal miʼ cajel juntiquil quixtañu, pero mach isujmic, come jiñi junlajal bʌ miʼ yilayob pañimil wen qʼuexelobʌch. Jiñi tsic bajcheʼ miʼ yilayob pañimil, maʼañic miʼ pʌs bajcheʼ yilalob miʼ cajel. Jiñi astrólogojob cheʼ jach mi toʼol ñaʼtañob chuqui miʼ yʌlob, maʼañic miʼ qʼuelob bajcheʼ ñoj yilal jiñi quixtañu. ¿Weñʌch ba maʼ wʌl jiñi?

Cʼʌlʌl ti wajali, jiñi quixtañujob miʼ majlelob baʼan jiñi muʼ bʌ i poj ñaʼtañob jiñi talto bʌ qʼuin. An tsaʼ bʌ i cʼʌñʌyob an tac bʌ tiʼ malil juntiquil quixtañu o juncojt añimal, bajcheʼ jiñi soytaʼ, o miʼ qʼuelob bajcheʼ miʼ chʼoj i bucʼbal juncojt xtat mut chaʼan miʼ ñaʼtañob jiñi talto bʌ qʼuin. An muʼ bʌ i qʼuelob bajcheʼ yilal miʼ cʌytʌl i mal jiñi taza baʼ miʼ yujtel i japob jiñi cajpeʼ o té. Ili ora miʼ cʼʌjñel jiñi carta tac yicʼot bola de cristal, i an muʼ bʌ i majlelob ti xwujt. Pero ¿mucʼʌch ba i mejlel lac ñop pejtelel iliyi? Maʼañic. Laʼ laj qʼuel chucoch.

Mach wen añic i sujmlel bajcheʼ miʼ yʌjlel. An muʼ bʌ i jatsʼ i bʌ ti tʼan yicʼot yambʌ, anquese junsujm jach chuqui miʼ cʼʌñob i ñaʼtan. Jumpʼejl ejemplo, cheʼ bʌ juntiquil miʼ cʼajtiben chaʼtiquil poj yujiloʼ bʌ tsictesʌntel jiñi talto bʌ qʼuin i lajal jach bʌ carta miʼ «pejcañob», i wentʌlel lajal chuqui miʼ yʌlob, pero mach cheʼiqui.

Miʼ yʌjlel chaʼan mach weñic bajcheʼ miʼ melob yicʼot chucoch miʼ melob. An muʼ bʌ i yʌlob chaʼan cojach miʼ wen qʼuelob bajcheʼ yilal mi lac mel, i pejtelel jiñi muʼ bʌ i cʼʌñob i chʼʌjlil jach i chaʼañob. Jumpʼejl ejemplo, an muʼ bʌ i wen melob cʼajtiya tac i jin jach miʼ wen qʼuelob bajcheʼ mi lac jacʼ o mi lac mel. Cheʼ jiñi, miʼ poj tsictesʌbeñoñobla, pero joñon jachla tsaʼ lac chaʼ aqʼueyob i ñaʼtan chuqui yom miʼ yʌlob. Cheʼ mucʼʌch lac ñop pejtelel chuqui miʼ yʌlob, miʼ mejlel i wen locʼsañob lac taqʼuin.

Jiñi astrología yicʼot adivinación yaʼ chucul ti jiñi cʌntesa chaʼan wʌn tsʼijbubilix chuqui mi caj i yujtel ti lac tojlel. Pero ¿isujm ba iliyi? Jiñi Biblia miʼ yʌl chaʼan ti jujuntiquil miʼ mejlel lac yajcan chuqui mi caj lac ñop o lac mel, pero jiñi muʼ bʌ lac yajcan miʼ mejlel i yʌqʼueñonla lac wenlel o maʼañic (Josué 24:15).

Jiñi yomoʼ bʌ qʼuejlel ti utsʼat ti Dios añʌch yambʌ chucoch yom miʼ tsʼaʼleñob jiñi astrología yicʼot adivinación: Dios miʼ tsʼaʼlen pejtelel jiñi. Jiñi Biblia miʼ yʌl: «Mach yomic miʼ yajñel ti laʼ tojlel [...] mi xticʼlaya mi xwujt mi jini muʼ bʌ i wʌn ñaʼtan chuqui mi caj i yujtel, mi jini muʼ bʌ i yʌcʼ i bʌ tiʼ wenta ecʼ, mi xpejca cruz mi jini muʼ bʌ i yʌcʼ i bʌ tiʼ wenta xiba chaʼan miʼ sub i tʼan yicʼot chaʼan miʼ mel ñuc tac bʌ i yeʼtel, mi jini yujil bʌ i pejcʌntel chʼujlelʌl. Come tsʼaʼlebil ti lac Yum pejtel muʼ bʌ i melob cheʼ bajcheʼ jini» (Deuteronomio 18:10-12).