¡WEN UTSʼATAX BɅ PIJTAYA! Jiñi tsaʼ bʌ i Meleyonla (Pʌtʌyonla) tsiʼ yʌcʼʌ i tʼan chaʼan tiʼ pejtelel ora mi caj lac chumtʌl ila ti Lum. Pero an cabʌlob maʼañic bʌ miʼ wen ñopob. Miʼ ñaʼtañob chaʼan mi caj i cʼotel i yorajlel chaʼan mi lac chʌmel (sajtel) ti lac pejtelel i chaʼan i tilelʌch cheʼ mi la cujtel bajcheʼ jiñi. An muʼ bʌ i ñopob jaʼel chaʼan mucʼʌch lac mejlel ti chumtʌl tiʼ pejtelel ora, pero yom mi lac ñaxan chʌmel i mi lac majlel ti panchan. ¿Chuqui maʼ wʌl jatet?

Mic subeñet lojon chaʼan maʼ ñaxan qʼuel chuqui miʼ yʌl jiñi Biblia chaʼan ili cʼajtiya tac: ¿Bajcheʼ jalel yom mi lac chumtʌl mi wen utsʼatax melbilonla? ¿Chucoch tsiʼ mele Dios jiñi Pañimil yicʼot wiñicob xʼixicob (quixtañujob)? ¿Chucoch mi lac chʌmel?

Cheʼ muqʼuic lac lajin lac bʌ yicʼot jiñi yan tac bʌ tsaʼ bʌ i yʌqʼue i cuxtʌlel Dios ila ti Pañimil, tsiquil chaʼan wen qʼuexeloñʌchla. ¿Bajcheʼ? Jiñi Biblia miʼ yʌl chaʼan melbilonla tiʼ yejtal Dios (Génesis 1:26, 27). ¿Chuqui yom i yʌl jiñi? Chaʼan Dios tsiʼ meleyonla, pero yicʼot lac melbal (chaʼlebal) tac lajal bʌ bajcheʼ i chaʼan, bajcheʼ jiñi cʼuxbiya yicʼot i ñaʼtʌntel chuqui toj.

Dios tsiʼ yʌqʼueyonla lac pensar chaʼan miʼ mejlel lac ñaʼtan chuqui wen yicʼot mach bʌ weñic, i chaʼan mi lac mulan laj cʌn yicʼot mi lac sujtel tiʼ yamigo. Jin chaʼan, miʼ mejlel laj qʼuel ti ñuc bajcheʼ yilal jiñi panchan yicʼot jiñi utsʼatax bʌ chuqui tac an ila ti Pañimil, jiñi la cujil tac bʌ melol bajcheʼ jiñi dibujo yicʼot música. Pero ñumen ñuc bʌ chaʼañonla, jin cheʼ miʼ mejlel lac chʼujutesan jiñi tsaʼ bʌ i meleyonla. Pejtelel iliyi miʼ pʌs chaʼan wen qʼuexelonla bajcheʼ yan tac bʌ chuqui cuxul wʌʼ ti Pañimil.

Ñaʼtancu iliyi: Mi Dios tsiʼ wʌn ñaʼta chaʼan mach wen jalic mi lac chumtʌl, ¿chucoch tsiʼ yʌcʼʌ ti lac tojlel chaʼan cabʌl chuqui miʼ mejlel laj cʌn yicʼot lac mel? Come yom chaʼan tiʼ pejtelel ora tijicña mi lac chumtʌl ila ti Lum.

An muʼ bʌ i yʌlob chaʼan Dios maʼañic baʼ ora tsiʼ ñaʼta chaʼan yom mi lac chumtʌl tiʼ pejtelel ora ila ti Pañimil. Miʼ yʌlob chaʼan ñumel jach mucʼonla come woli (choncol) laj qʼuejlel mi yomʌch mi lac  majlel ti chumtʌl yaʼ ti panchan. Pero cheʼ isujmic jiñi, ¿mach ba i mulic Dios pejtelel jiñi jontolil am bʌ wʌʼ ti Lum? Iliyi an tiʼ contra chaʼan bajcheʼ yilal Dios. Jiñi Biblia miʼ yʌl: «Tsʼʌcʌl i yeʼtel. Tojʌch pejtelel muʼ bʌ i mel. Xucʼulʌch, maʼanic i mul» (Deuteronomio 32:4).

Jiñi Biblia jamʌ tsiquil miʼ yʌl chucoch Dios tsiʼ mele jiñi Lum: «Lac Yum i yumʌch panchan. Pero tsiʼ yotsa pañimil tiʼ wenta winicob xʼixicob» (salmo 115:16). Dios tsiʼ mele jiñi Lum chaʼan mi lac chumtan tiʼ pejtelel ora i tsiʼ yʌcʼʌ pejtelel chuqui i cʼʌjñibal lac chaʼan chaʼan tijicña mi lac chumtʌl (Génesis 2:8, 9).

«Lac Yum i yumʌch panchan. Pero tsiʼ yotsa pañimil tiʼ wenta winicob xʼixicob» (Salmo 115:16).

Dios miʼ yʌl yaʼ tiʼ Tʼan chucoch tsiʼ mele jiñi quixtañujob. Tiʼ sube jiñi ñaxam bʌ wiñic yicʼot xʼixic: «Butʼula jini pañimil. Cʼʌñʌla. Laʼ i yumañetla [...] pejtel cuxul tac bʌ muʼ bʌ ti xʌmbal ti pañimil» (Génesis 1:28). Adán yicʼot Eva tsaʼ aqʼuentiyob utsʼatax bʌ i majtan: Miʼ cʌntañob jiñi Lum i miʼ sujtesañob tiʼ jumpʼejl paraíso. Miʼ lon mejlelob ti chumtʌl yicʼotob i pʼolbal tiʼ pejtelel ora wʌʼ ti pañimil, mach yaʼic ti panchan.

Jiñi Biblia miʼ yʌl chaʼan juntiquil ángel i chaʼan Dios, tsaʼ bʌ cʼoti ti cʌjñel bajcheʼ Satanás, tsaʼ sujti tiʼ contra i tsiʼ ñopo i jem chuqui ñaʼtʌbil i chaʼan Dios. ¿Bajcheʼ tsiʼ mele?

Satanás tsiʼ loti Adán yicʼot Eva chaʼan miʼ sujtelob tiʼ contra Dios. Tsiʼ yʌlʌ chaʼan Dios woli (yʌquel) i mʌctʌbeñob chuqui wen, chaʼan maʼañic miʼ mejlelob i bajñel yajcan chuqui wen yicʼot mach bʌ weñic. Adán yicʼot Eva tsiʼ temeyob i bʌ yicʼot Satanás i tsiʼ yʌcʼʌyob i bʌ tiʼ contra Dios. ¿Chuqui tsaʼ ujti? Tsaʼ chʌmiyob cheʼ bajcheʼ tsaʼ wʌn subentiyob. Maʼañix tsaʼ mejliyob ti chumtʌl tiʼ pejtelel ora yaʼ ti Paraíso (Génesis 2:17; 3:1-6; 5:5).

Cʼʌlʌl ti wajali, jiñi quixtañujob an i tajayob wocol tiʼ caj i ñusatʼan Adán yicʼot Eva. Jiñi i Tʼan Dios miʼ yʌl: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Romanos 5:12). Jin chaʼan, mi lac chʌmel tiʼ caj jiñi mulil, mach chaʼañic lecoj chuqui «chajpʌbil» i chaʼan Dios.

Jiñi mulil tsaʼ bʌ tejchi ti Edén,maʼañic tsiʼ qʼuexta chuqui ñaʼtʌbil i chaʼan Dios chaʼan ili Pañimil yicʼot quixtañujob. Come wen an i cʼuxbiya yicʼot miʼ mel chuqui toj tiʼ sʌcla bajcheʼ miʼ mejlel i locʼsañonla tiʼ pʼʌtʌlel mulil yicʼot chʌmel. Jiñi apóstol Pablo tiʼ tsictesa: «An i tojol mulil. Jini muʼ bʌ i chaʼleñob mulil wersa miʼ chʌmelob, jiñʌch i tojol. Pero lac majtan chʼoyol bʌ ti Dios jiñʌch laj cuxtilel mach bʌ anic miʼ jilel ti lac Yum Cristo Jesús» (Romanos 6:23). Jiñi i cʼuxbiya Dios ti lac tojlel tsiʼ ñijca chaʼan miʼ yʌcʼ «cojach bʌ i Yalobil [Jesucristo]. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16). Jesús tsiʼ tojo jiñi mulil cheʼ bʌ tsiʼ yʌcʼʌ i cuxtʌlel, i cheʼ jiñi miʼ mejlel lac chaʼ taj tsaʼ bʌ i sʌtʌ Adán. a

Ili pañimil lʌcʼʌlix mi caj i sujtel ti jumpʼejl paraíso cheʼ bajcheʼ albil i chaʼan Dios. Chaʼan maʼ mejlel a chumtan iliyi, yom maʼ jacʼ ili i ticʼojel Jesús: «Ochenla ti chʼoʼchʼoc bʌ i tiʼ, come colem i tiʼ, ñuc i bijlel muʼ bʌ i majlel ti tojmulil. Cabʌlob miʼ yochelob yaʼi. Come chʼoʼchʼoc i tiʼ, chʼoʼchʼoc i bijlel baʼ mi laʼ taj laʼ cuxtʌlel. Tsʼitaʼ jax jini muʼ bʌ i yochelob i taj i cuxtʌlel» (Mateo 7:13, 14). Tiʼ sujm, an ti a wenta jiñi talto bʌ qʼuin chaʼañet. ¿Chuqui mi caj a yajcan?