Tsaʼix la cʌlʌ chaʼan jiñi oráculo ti Delfos tsiʼ loti Creso come tsaʼ majli i contrajin jiñi rey ti Persia, pero maʼañic tsiʼ mʌlʌ (joto). Pero yaʼ ti Biblia miʼ tilel jumpʼejl ñuc bʌ profecía tiʼ tojlel jiñi rey ti Persia, i tsaʼʌch luʼ tsʼʌctiyi cheʼ bajcheʼ tsʼijbubil.

Cheʼ bʌ anto yom 200 jab chaʼan miʼ yilan pañimil (chʼocʼan) ili rey, jiñi xʼaltʼan Isaías tsiʼ wʌn alʌ chaʼan i cʼabaʼ jiñʌch Ciro. Cheʼ jaʼel, tsiʼ yʌlʌ bajcheʼ mi caj i jisan jiñi tejclum Babilonia.

Isaías 44:24, 27, 28. «Cheʼʌch woliʼ yʌl lac Yum, [...] mic suben i mal lum chaʼan miʼ tiquin i yaʼal. Mi cʌcʼ ti tiquin colem jaʼ. Joñon mi cʌqʼuen i yeʼtel Ciro. Mic sub: ‹Jiñʌch xcʌnta tiñʌmeʼ c chaʼan. Mi caj i mel pejtelel chuqui mi cʌl. Mi caj i yʌcʼ ti chaʼ melol Jerusalén. Mi caj cʌcʼ tiʼ chaʼ wejlel i cʼʌclib jini Templo›».

Juntiquil griego wen yujil bʌ chaʼan historia i cʼabaʼ Heródoto tsiʼ yʌlʌ chaʼan jiñi i soldadojob Ciro tsiʼ tiquesayob jiñi jaʼ muʼ bʌ i ñumel tiʼ joytʌlel Babilonia. Cheʼ bajcheʼ iliyi, tsaʼ mejliyob i xʌn ochel yaʼ ti tejclum. Cheʼ bʌ Ciro tsiʼ mʌlbe Babilonia, tsiʼ colo pejtelel jiñi judíojob yaʼ bʌ cʌchʌlob, i tsiʼ yʌcʼʌyob ti chaʼ sujtel ti Jerusalén chaʼan miʼ chaʼ melob (pʌtob) jiñi tejclum añix bʌ 70 jab i jisʌntel.

Isaías 45:1. «Jiñʌch i tʼan lac Yum tsaʼ bʌ i sube Ciro jini yajcʌbil bʌ i chaʼan: Joñon woli j coltañet chaʼan maʼ jisan cabʌl tejclum tac, chaʼan maʼ jisʌbeñob i pʼʌtʌlel ñuc bʌ reyob. Mi cʌcʼ ti jejmel i tiʼ tac Babilonia. Maʼanic majch miʼ mejlel i chaʼ ñupʼ».

I puertajlel jiñi tejclum jamʌl tsaʼ cʌyle, i yaʼʌch tsaʼ ochiyob jiñi persajob. Cheʼ jiñi babiloniojob wʌn yujilobiquix chuqui woli (choncol) i chajpan Ciro, tsiʼ luʼ ñupʼuyob jiñi puerta tac am bʌ tiʼ tojel jiñi jaʼ. Come maʼañic tsiʼ meleyob, jiñi tejclum maʼañic chuqui tsiʼ cʌnta tiʼ tojlel i contrajob.

Ili profecía am bʌ ti Biblia tsaʼʌch luʼ tsʼʌctiyi bajcheʼ albil, pero an yan tac bʌ tsʼʌctiyem bʌ jaʼel. a Jiñi muʼ bʌ i lon alob jiñi wiñicob xʼixicob (quixtañujob), lʌcʼʌ tiʼ pejtelel ora miʼ yʌqʼueñob tiʼ wenta jiñi diosteʼ tac, pero jiñi profecía tac am bʌ ti Biblia mach lajalic come tilem ti isujm bʌ Dios, muʼ bʌ i yʌl: «Mic wʌn sub i yujtibal jini woli bʌ ti tejchel. Ti oñiyi tsaʼ c wʌn tsictesa jini maxto bʌ anic woli ti ujtel» (Isaías 46:10).

Muʼ bʌ i mejlel i yʌl iliyi cojach Jehová, jiñi isujm bʌ Dios. Miʼ ñaʼtʌntel chaʼan jiñi i cʼabaʼ yom i yʌl «Jiñʌch miʼ Mel chaʼan cheʼʌch miʼ Sujtel», ili  miʼ pʌs chaʼan miʼ mejlel i ñaʼtan jiñi talto bʌ qʼuin yicʼot miʼ yʌcʼ ti tsʼʌctiyel jiñi yom bʌ i mel (chaʼlen). Wen tsiquil chaʼan Dios miʼ mejlel i tsʼʌctesan pejtelel chuqui miʼ yʌl.

¿A wom baʼ ñaʼtan chuqui miʼ yʌl jiñi Biblia chaʼan ili ora? Añix cheʼ bʌ chaʼpʼejl mil jab, jiñi Biblia tsiʼ yʌlʌ chaʼan wen wocol miʼ cajel jiñi «cojix bʌ qʼuin tac». ¿Chuqui mi caj i jilel ti jiñi cojix bʌ qʼuin? Mach jiñic jiñi Lum o quixtañujob, jiñʌch jiñi wocol tac yicʼot ticʼlʌntel wajalix bʌ i cajel. Laʼ laj qʼuel chaʼpʼej uxpʼejl profecía muʼ bʌ i pʌs chaʼan añoñixla ti «cojix bʌ qʼuin».

2 Timoteo 3:1-5. «Ti cojix bʌ qʼuin tac [...] jujuntiquil mi caj i bajñel cʼuxbin i bʌ. Mi caj i mulañob taqʼuin, mi caj i chañʼesañob i bʌ, ñuc mi caj i qʼuelob i bʌ. Mi caj i chaʼleñob pʼajoñel. Mi caj i ñusʌbeñob i tʼan i tat i ñaʼ. Maʼanic miʼ subeñob Dios wocolix i yʌlʌ. Mach i cʌñʌyobic Dios. Mach yujilobic cʼuxbiya mi pʼuntaya. Xʼuʼyajob. Maʼanic miʼ ticʼob i pusicʼal. Wen jontolob. Miʼ tsʼaʼleñob chuqui utsʼat. Miʼ yʌcʼob i piʼʌlob tiʼ cʼʌb i contra. Bʌbʌqʼuen jax i melbalob. Cʼax ñuc miʼ pʌsob i bʌ. Miʼ mulañob pejtel chuqui tac yom i pusicʼal. Maʼanic miʼ cʼuxbiñob Dios. An bajcheʼ miʼ lon chʼujutesañob Dios, pero maʼanic miʼ cʌmbeñob i pʼʌtʌlel».

¿Am baʼ qʼuele quixtañujob cheʼoʼ bʌ bajcheʼ woli (yʌquel) bʌ i yʌjlel? ¿Mach ba chumuloñicla baʼan quixtañujob muʼ bʌ i chañʼesañob i bʌ, jin jach bʌ miʼ bajñel ñaʼtañob i bʌ yicʼot jiñi taqʼuin? ¿Mach ba ñumeñiquix ti pʼis chuqui miʼ cʼajtin jiñi quixtañujob, i maʼañic miʼ chʼʌmob ti ñuc yambʌlob? Tajol qʼuelbil a chaʼan alobob maʼañic bʌ miʼ jacʼbeñob i tʼan i tat i ñaʼ, i jiñi quixtañujob miʼ ñumen cʼuxbiñob jiñi ñusaqʼuin i mach jiñic Dios. I wolito i ñumen pʼojlel ili wocol.

Mateo 24:6, 7. «Mi caj laʼ wubin an cabʌl guerra yicʼot cabʌl tʼan chaʼan tal guerra. [...] Jini añoʼ bʌ ti jumpejt lum mi caj i techob guerra tiʼ contra añoʼ bʌ ti yambʌ lum. Jini añoʼ bʌ tiʼ wenta juntiquil yumʌl mi caj i techob guerra tiʼ contra jini añoʼ bʌ tiʼ wenta yambʌ yumʌl».

Miʼ ñaʼtʌntel chaʼan cʼʌlʌl ti 1914, ñumen ti 100 millón chʌmeñoʼ (sajtemoʼ) bʌ tiʼ caj guerra, ñumento bajcheʼ jiñi quixtañujob chumuloʼ bʌ ti cabʌl país. Ñaʼtancu bajcheʼ cʼamel jiñi chʼijiyemlel yicʼot wocol tsiʼ yubiyob tiʼ caj iliyi. Anquese cheʼ ujtem bajcheʼ iliyi, ¿woli ba i jilel jiñi guerra?

Mateo 24:7. «Tal [...] cabʌl wiʼñal».

Jiñi Programa Mundial de Alimentos tsiʼ yʌlʌ: «Jiñi Lum miʼ yʌcʼ ti colel bʌlñʌcʼʌl chaʼan pejtelel quixtañujob, pero 815 millón quixtañujob wiʼñalob miʼ wʌyel, yom i yʌl chaʼan an juntiquil wiʼñal bʌ ti bolontiquil. I cabʌl cʼamoʼ bʌ chaʼan maʼañic chuqui miʼ wen cʼuxob, an juntiquil ti uxʼuxtiquil quixtañu». Miʼ ñaʼtʌntel chaʼan ti jujumpʼejl jab ñumen ti 3 millón alʌlob miʼ chʌmelob tiʼ caj wiʼñal.

Lucas 21:11. «Tal pʼʌtʌl bʌ i yujquel lum».

Ti jujumpʼejl jab, miʼ ñumel 50,000 yujquel muʼ bʌ lac taj la cubin, i an 100 muʼ bʌ i mejlel i jem ñuqui otot tac. Cheʼ jaʼel, lʌcʼʌ jujumpʼejl jab miʼ ñumel jumpʼejl tsʌts bʌ yujquel. Miʼ ñaʼtʌntel chaʼan cheʼ ti jabil 1975 cʼʌlʌl ti 2000, an chʌmen 471 mil quixtañujob tiʼ caj yujquel.

Mateo 24:14. «Jini wen tʼan chaʼan i yumʌntel Dios mi caj i sujbel tiʼ pejtelel pañimil chaʼan miʼ yubintel tiʼ pejtelel pañimil. Ti jimbʌ ora mi caj i tilel i jilibal».

Jiñi i testigojob Jehová, añix bʌ ñumen ti 8 millón ili ora, woliʼ subob jiñi wen tʼan chaʼan i Yumʌntel Dios ñumen ti 240 país, miʼ mejlel la cʌl chaʼan tiʼ pejtelel pañimil (mulawil). Jiñi wen tʼan miʼ sujbel ti jiñi ñuqui tejclum tac yicʼot alʌ tejclum tac, ti alʌ xchumtʌl yicʼot añoʼ bʌ ti mateʼel tac. Ili profecía miʼ yʌl jaʼel chaʼan cheʼ bʌ Dios miʼ ñaʼtan chaʼan tsaʼix ujti jiñi subtʼan «mi caj i tilel i jilibal». ¿Chuqui yom i yʌl? Yom i yʌl i jisʌntel jiñi yumʌlob ila ti pañimil i mi caj i chaʼ luʼ tsijibtesʌntel tiʼ Yumʌntel Dios. ¿Chuqui tac mi caj i mel ili Yumʌntel? Bej pejcan majlel chaʼan maʼ tajben i jacʼbal.