¿IXCU JATET? ¿AM BAʼ MELBE A BɅ JIÑI CʼAJTIYA CHEʼ BɅ MIʼ YUJTEL JUMPʼEJL WOCOL? ¿AN A ÑUSA JUMPʼEJL TSɅTS BɅ WOCOL TSAʼ BɅ I YɅQʼUEYET A ÑAʼTAN CHAʼAN DIOS MAʼAÑIC MIʼ QʼUELET TI ÑUC?

Sheila, chʼoyol bʌ ti Estados Unidos i tsaʼ coli ti jumpʼejl familia muʼ bʌ i ñopob Dios, miʼ yʌl: «Cheʼ bʌ chutonto tsaʼ c teche c ñop Dios come cujil chaʼan jiñʌch tsi’ Meleyonla, pero maʼañic baʼ ora tsaʼ cubi chaʼan lʌcʼʌl an tic tojlel. Cujil chaʼan mucʼʌch i qʼuelon, pero tsaʼ cʼoti c ñaʼtan chaʼan maʼañic miʼ chʼʌmon ti ñuc. Maʼañic mic ñop chaʼan miʼ tsʼaʼleñon, pero mic ñaʼtan chaʼan maʼañic miʼ qʼuelon ti ñuc. ¿Chucoch cheʼ tsiʼ ñaʼta bajcheʼ jiñi? Sheila miʼ yʌl: «Mach junsujtel jach tsiʼ ñusa wocol jiñi c familia i Dios maʼañic tsiʼ coltayon lojon».

Cheʼ bajcheʼ Sheila, tajol mucʼʌch a ñop jiñi Dios Mach bʌ Añic i Pʼisol i Pʼʌtʌlel, pero tajol maʼ cʼajtiben a bʌ miʼ mucʼʌch i qʼuelet ti ñuc. Cheʼʌch tsiʼ yubi i bʌ jiñi Job, juntiquil toj bʌ wiñic tsaʼ bʌ i yʌcʼʌ i ñopoñel (chʼujbiya) tiʼ pʼʌtʌlel yicʼot tiʼ ñaʼtʌbal jiñi tsaʼ bʌ i meleyonla (Job 2:3; 9:4). Cheʼ bʌ tsiʼ ñusa cabʌl wocol i maʼañix i pijtaya, tsiʼ cʼajtibe Dios: «¿Chucoch maʼ mʌy a bʌ tic tojlel? Maʼ qʼuelon ti a contra» (Job 13:24).

Pero ¿chuqui miʼ yʌl jiñi Biblia? ¿I mul ba Dios jiñi wocol tac? ¿Muʼ ba i qʼuel ti ñuc pejtelel wiñicob xʼixicob (quixtañujob) i miʼ chʼʌmonla ti ñuc ti jujuntiquilonla? ¿Bajcheʼ miʼ mejlel lac ñaʼtan chaʼan i cʌñʌyonla ti jujuntiquil, chaʼan miʼ chʼʌmben i sujm chuqui mi la cubin yicʼot miʼ coltañonla cheʼ bʌ an lac wocol tac?

Ti jiñi yambʌ temaj tac, mi caj laj qʼuel bajcheʼ miʼ pʌs jiñi melbil tac bʌ i chaʼan Dios yicʼot jiñi Biblia chaʼan mucʼʌch i chʼʌmonla ti ñuc (Romanos 1:20). Cheʼ maʼ ñumen cʌn jiñi tsaʼ bʌ i Meleyonla, mi caj a ñumen ñop chaʼan mucʼʌch i cʼuxbiñet (1 Juan 2:3, TNM; 1 Pedro 5:7).