LUCÍA WOCOL MIʼ MEJLEL TI XɅMBAL. Cheʼ bʌ chutto tsiʼ taja poliomielitis, jumpʼejl cʼamʌjel muʼ bʌ i wen ticʼlañonla ti lac bʌcʼtal i miʼ mejlel i toy yambʌ wiñicob xʼixicob (quixtañujob). I cheʼ bʌ an 16 i jabilel, jiñi xʼixic tsaʼ bʌ i chaʼle eʼtel (troñel) yicʼot tiʼ sube: «Dios tsiʼ yʌqʼueyet jiñi cʼamʌjel come tsaʼ ñusatʼan yicʼot maʼañic tsaʼ qʼuele ti ñuc a ñaʼ». Lucía chʌn cʼajalto i chaʼan jiñi tʼan tsaʼ bʌ i wen lowo.

CHEʼ BɅ DÁMARIS TIʼ SUBENTI CHAʼAN AN TUMOR TIʼ SICOJC, jiñi i tat tiʼ sube: «¿Chuqui tsaʼ mele chaʼan cheʼ tsaʼ ujtiyet bajcheʼ iliyi? Mi cʌl añʌch chuqui mach weñic tsaʼ mele. Jin chaʼan Dios woli (choncol) i yʌqʼueñet a toj a mul». Dámaris wen chʼijiyem tsiʼ yubi i bʌ.

Cʼʌlʌlix ti wajali, jiñi quixtañujob an i ñopoyob chaʼan jiñi cʼamʌjel tac tilemʌch ti Dios chaʼan miʼ yʌqʼueñonla lac toj lac mul. Jiñi libro Usos y costumbres de las tierras bíblicas miʼ yʌl chaʼan cheʼ tiʼ yorajlel Jesús, jiñi quixtañujob miʼ ñopob chaʼan «cheʼ an majqui miʼ cʼamʼan tiʼ cajʌch tsiʼ chaʼle mulil, o tiʼ mul yambʌ i familia, jin chaʼan miʼ tojob yicʼot jiñi cʼamʌjel». Jiñi libro Medieval Medicine and the Plague (La medicina medieval y la peste) miʼ yʌl chaʼan añix ñumen cheʼ bʌ 600 jab, yaʼ ti Europa, «an quixtañujob tsaʼ bʌ i ñopoyob chaʼan Dios tsiʼ cʼʌñʌ jiñi cʼamʌjel muʼ bʌ i pam pujquel chaʼan miʼ yʌqʼueñob i toj i mul jiñi quixtañujob». Pero ¿jiñʌch ba Dios tsaʼ bʌ i choco cʼotel jiñi cʼamʌjel yaʼ ti Europa ti jiñi bʌ ora? O ¿cheʼ ba bajcheʼ tiʼ wiʼil acʼʌ ti ñaʼtʌntel jiñi ciencia, chaʼan an baqui tsiʼ toyoyob i chʌñil jiñi cʼamʌjel? Tajol maʼ cʼajtiben a bʌ mi Dios miʼ cʼʌn jiñi cʼamʌjel tac chaʼan miʼ yʌqʼueñonla lac toj lac mul. *

ÑAʼTANCU ILIYI: Mi tsaʼ i cʼʌñʌ Dios jiñi cʼamʌjel tac yicʼot jiñi wocol chaʼan miʼ yʌqʼuen i toj i mul jiñi mach bʌ weñic i melbalob, ¿chucoch tsiʼ cʼoqʼuesa Jesús jiñi cʼamoʼ bʌ? ¿Mach ba wolic i yʌcʼ ti ñaʼtʌntel yubil chaʼan mach tojic chuqui miʼ mel Dios? (Mateo 4:23, 24). Jesús maʼañic baʼ ora tsiʼ contraji i Tat. Tsiʼ yʌlʌ: «Tiʼ pejtelel ora mic mel chuqui tac miʼ mulan» i «mic chaʼlen cheʼ bajcheʼ tsiʼ subeyon c Tat ti mandar» (Juan 8:29; 14:31).

Yaʼ ti Biblia tsiquil miʼ yʌl chaʼan Jehová «tojʌch pejtelel muʼ bʌ i mel» (Deuteronomio 32:4). Jumpʼejl ejemplo, Dios maʼañic mi caj i yʌcʼ chaʼan cabʌl quixtañujob maʼañobic bʌ i mul miʼ jop chʌmelob (sajtelob) ti jumpʼejl avión chaʼan jach miʼ yʌqʼuen i toj i mul juntiquil. Abrahán, juntiquil wiñic xucʼul bʌ tiʼ tojlel Dios, tsiʼ yʌlʌ chaʼan Dios maʼañic baʼ ora mi caj i «jisan jini toj bʌ yicʼot jontol bʌ». Tsiʼ yʌlʌ: «Jini xMeloñel muʼ bʌ i mel pejtel añoʼ bʌ ti pañimil, ¿mach ba muqʼuic i melob ti toj?» (Génesis 18:23, 25). Cheʼ jaʼel, jiñi Biblia miʼ yʌl chaʼan Dios «mach yujilic jontolil» (Job 34:10-12).

Cheʼ woli (yʌquel) lac ñusan jumpʼejl wocol, mach chaʼañic Dios woliʼ yʌqʼueñonla lac toj mach bʌ weñic tsaʼ lac mele. Jesús wen tsiquil tsiʼ pʌsʌ iliyi cheʼ bʌ temel yicʼot jiñi xcʌntʼañob i chaʼan tsiʼ tajayob juntiquil wiñic xpotsʼ bʌ tsiʼ yila pañimil. Tsiʼ cʼajtiyob: «Maestro, ¿chucoch xpotsʼ jini winic cheʼ bʌ tsiʼ yila pañimil? ¿Majqui tsiʼ chaʼle mulil? ¿Jim ba jini winic? ¿Jim ba i tat i ñaʼ?» Jesús tsiʼ jacʼbeyob: «Maʼanic tsiʼ chaʼle mulil jini winic, mi i tat, mi i ñaʼ» (Juan 9:1-3).

Come mach isujmic chuqui miʼ ñaʼtʌntel ti jiñi bʌ ora, toj sajtel i pusicʼal jiñi xcʌntʼañob cheʼ bʌ Jesús tsiʼ yʌlʌ chaʼan jiñi wiñic yicʼot i tat i ñaʼ maʼañic chuqui tsiʼ meleyob chaʼan miʼ tojob i mul. Cheʼ tsiʼ chaʼ jambe i wut jiñi wiñic, mach cojach tsiʼ cʼoqʼuesa, tsaʼʌch i yʌcʼʌ ti ñaʼtʌntel chaʼan mach isujmic muʼ bʌ  i ñaʼtañob (Juan 9:6, 7). Cheʼ bʌ mi lac ñaʼtan chaʼan Dios mach i mul cheʼ mi lac ñusan wocol miʼ ñuqʼuesʌben i pusicʼal jiñi woli bʌ i ñusañob tsʌts bʌ cʼamʌjel tac.

Jiñi Biblia miʼ subeñonla:

• «Dios mach mejlic i pʌjyel ti mulil [wocol]. Maʼanic baʼ ora miʼ pʌy ti mulil winicob» (SANTIAGO 1:13) Mach cojach jiñi, mach jalix yom chaʼan Dios mi caj i jisan jiñi jontolil am bʌ i ticʼla ti cabʌl jab jiñi quixtañujob, bajcheʼ jiñi cʼamʌjel tac, cʼuxyajiyel yicʼot chʌmel.

• Jesucristo tsiʼ «lajmesa xcʼamʌjelob» (MATEO 8:16). Cheʼ bʌ Jesús tsiʼ cʼoqʼuesa jiñi quixtañujob tsaʼ jach i pʌsʌ muʼ bʌ caj i mel jiñi i Yumʌntel Dios tiʼ petol pañimil (mulawil).

• «Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora. Come tsaʼix ñumi jini ñaxan tac bʌ» (APOCALIPSIS [REVELACIÓN] 21:4).

Jin chaʼan, ¿chucoch an cabʌl cʼuxyajiyel yicʼot wocol ila ti pañimil? Mi Dios mach i mulic chuqui woli lac ñusan, ¿majqui i mul? Ili cʼajtiya tac, añix ora i cajel i cʼajtibeñob i bʌ jiñi quixtañujob. Ti yambʌ temaj mi caj a tajben i jacʼbal.