¿Bajcheʼ miʼ coltañet cheʼ maʼ cʌn Dios?
Tsaʼix laj qʼuele chuqui tac miʼ coltañonla laj cʌn majqui jiñi Dios. Tsaʼ laj qʼuele chaʼan jiñi Biblia miʼ pʌs chaʼan i cʼabaʼ jiñʌch Jehová i jiñi i cʼuxbiya jiñʌch ñumen ñuc bʌ i melbal. Cheʼ jaʼel tsaʼix laj cʌñʌ chuqui melbil i chaʼan yicʼot chuqui mi caj i mel tiʼ tojlel jiñi quixtañujob. Anquese cabʌlto chuqui yom mi laj cʌn tiʼ tojlel Dios, tajol maʼ cʼajtiben a bʌ mi añixto i cʼʌjñibal.
Jehová miʼ yʌcʼ i tʼan chaʼan mi mucʼʌch a sʌclan, «mi caj a taj» (1 Crónicas 28:9). Mi mucʼʌch a chaʼlen wersa a cʌn Jehová, utsʼatax chuqui mi caj a taj: Mi caj a sujtel ti wem bʌ i yamigo (Salmo 25:14). ¿Bajcheʼ miʼ mejlel i yʌqʼueñet a wenlel jiñi?
Tijicñayet tiʼ sujm. Jiñi Biblia miʼ yʌl chaʼan Jehová jiñʌch «jiñi tijicña bʌ Dios» (1 Timoteo 1:11, TNM). Mi mucʼʌch a lʌcʼtesan a bʌ ti Dios yicʼot maʼ lajin, ñumen tijicña mi caj a wajñel, i jiñi mi caj i yʌqʼueñet a wenlel ti a bʌcʼtal, ti a pensar yicʼot bajcheʼ yubil maʼ wubin a bʌ (Salmo 33:12). Cheʼ jaʼel, maʼañic mi caj a mel muʼ tac bʌ i ticʼlañet, mi caj a mel chuqui wen yicʼot utsʼat mi caj a wajñel a wicʼot yambʌlob. Tiʼ sujm, mi caj a wʌl bajcheʼ tsiʼ yʌlʌ jiñi salmista: «Pero joñon mic taj c wenlel cheʼ mic ñochtan Dios» (Salmo 73:28).
Dios mi caj i cʌntañet. Jehová miʼ suben i yamigojob: «Mi caj c tojʼesañet majlel tic wut» (Salmo 32:8). Ili yom i yʌl chaʼan Jehová mi cʌntan ti jujuntiquil i wiñicob i miʼ yʌqʼuen chuqui i cʼʌjñibalob i chaʼan (Salmo 139:1, 2). Cheʼ bʌ maʼ sujtel ti wen bʌ i yamigo Jehová, mi caj a qʼuel chaʼan tiʼ pejtelel ora miʼ mejlel a cʼajtiben i coltaya.
Wen utsʼatax miʼ cajel jiñi talto bʌ qʼuin chaʼañet. Jehová mach cojach miʼ coltañet a taj a tijicñʌyel ti ili ora, miʼ yʌqʼueñet jaʼel jumpʼejl a pijtaya chaʼan jiñi talto bʌ qʼuin (Isaías 48:17, 18). Jiñi Biblia miʼ yʌl: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3). Jiñi albil bʌ i chaʼan Dios mi caj i coltañonla chaʼan maʼañic tilel bixel lac pusicʼal i maʼañic mi caj lac taj lac chʼijiyemlel ti ili ora wen wocol jax bʌ (Romanos 4:20).
Ili jiñʌch chaʼpʼejl uxpʼejl wenlel tac muʼ bʌ lac taj cheʼ mi lac ñumen cʌn Dios yicʼot cheʼ mi lac sujtel tiʼ yamigo. Mi a womto a bej cʌn majlel, pejcan juntiquil i testigo Jehová o maʼ mejlel ti ochel yaʼ ti www.pr418.com/ctu.